AZƏRBAYCAN RESPUBLİKASININ
DÖVLƏT İMTAHAN MƏRKƏZİ
abituriyentin
YADDAŞ
KİTABÇASI
(Azərbaycan Tibb Universitetinin hərbi tibb məktəbinə
feldşer ixtisası üzrə qəbul imtahanı üçün )
Aşağıdakıları imtahana gətirmək qadağandır:
İmtahan binasına giriş zamanı üzərində mobil telefon və digər
rabitə vasitələri, konspekt və başqa yardımçı vasitələr aşkar
olunan abituriyentlər barədə akt tərtib olunur, bu vasitələr və
onların imtahan sənədləri alınır və onlar imtahan binasına
buraxılmırlar.
İmtahanının nəticələrini
www.dim.gov.az
internet səhifəmizdən öyrənə bilərsiniz!
2017
2
ƏZİZ ABİTURİYENTLƏR!
Azərbaycan Respublikası Dövlət İmtahan Mərkəzi (DİM) təhsilinizi davam
etdirmək istəyinizi bəyənir və sizə uğurlar arzulayır!
DİM-in məqsədi imtahanda biliklərinizi nümayiş etdirmək üçün sizə rahat şərait
yaratmaq, şəffaflığı, aşkarlığı və obyektivliyi təmin etməkdir.
Yüksək bilik nümayiş etdiyiniz və imtahanın texnoloji tələblərinə düzgün əməl
etdiyiniz təqdirdə uğur qazanacağınıza tamamilə əmin ola bilərsiniz.
İMTAHANDA İŞTİRAK ETMƏK ÜÇÜN AŞAĞIDAKILARA
ƏMƏL ETMƏLİSİNİZ:
1.
Siz imtahan günü buraxılış vərəqənizdə göstərilən vaxtda imtahan verəcəyiniz
binanın qarşısına gəlməli, özünüzlə mütləq qara və ya tünd göy rəngdə yazan,
mürəkkəb axıtmayan diyircəkli qələm və (və ya) HB sərtliyində sadə karandaş,
qələmyonan, pozan və aşağıdakı sənədləri gətirməlisiniz:
-
şəxsiyyət vəsiqəsi;
-
imtahana buraxılış vərəqəsi
DİQQƏT! Göstərilən sənədlərdən biri olmadıqda və ya sənədlər arasında
uyğunsuzluq olduqda imtahana buraxılmayacaqsınız!
2.
Göstərilən sənədləri imtahan binasının giriş qapısında buraxılış rejimini həyata
keçirən mühafizə əməkdaşlarına təqdim edib yoxlamadan keçdikdən sonra imtahana
buraxılış vərəqənizdə göstərilmiş müvafiq kodlu zala gedin.
ABİTURİYENTİN İMTAHAN ZALINDA GÖRƏCƏYİ İŞLƏR:
1.
İmtahan zalında imtahana buraxılış vərəqəsində göstərilən sıra və yerdə oturduqdan
sonra nəzarətçinin izahatını diqqətlə dinləyin. Aydın olmadıqda əlinizi qaldırıb
nəzarətçiyə müraciət edin.
2.
İzahat işi qurtardıqdan sonra sizə cavab kartı paylanır. Cavab kartını qara və ya tünd
göy rəngdə yazan mürəkkəb axıtmayan diyircəkli qələmlə doldurun. Cavab
kartı”ndakı məlumatlar optik qurğu vasitəsilə oxunur. Ona görə də cavab kartı ilə
işləyərkən ehtiyatlı olun. Dairələri tam qaralayın, kartın əks üzünün qabarmaması
üçün qələmi bərk basmayın. Kartı əzmək, ləkələmək, zədələmək və cırmaq olmaz.
DİQQƏT!
Korlanmış cavab kartı dəyişdirilmir.
Cavab kartının 1-ci bölməsində iş nömrəniz, soyadınız, adınız və atanızın adı çap
edilmişdir. Özünüz haqqında çap edilmiş həmin məlumatları yoxlayın. Uyğunsuzluq
aşkar etdikdə mütləq nəzarətçiyə müraciət edib məsələyə aydınlıq gətirin.
2-ci bölmədə özünüz haqqında məlumatları yazın və qaydalara zidd hərəkətə yol
verməyəcəyiniz barədə bu bölmədəki Bəyannamə ilə tanış olun. cavab kartında çap
edilmiş məlumatların düzgünlüyünü və Bəyannamə ilə tanış olduğunuzu öz
imzanızla təsdiq edin.
3-cü bölmədə sizə veriləcək sual kitabçasının variantı çap edilmişdir.
4-cü bölmədə iş nömrənizin hər bir rəqəmini ardıcıl olaraq damalara yazıb, hər
bir damanın altındakı sütunda uyğun rəqəmi tapıb, onun yerləşdiyi dairəni qaralayın.
3
Bu zaman diqqətli olun: hər sütunda yalnız bir dairə qaralanmalıdır. Bu bənddə
həmçinin soyadınızı, adınızı, atanızın adını müvafiq sətirlərə yazın.
3.
Sonra sizə üzərində iş nömrəniz, soyadınız və ata adınız çap edilmiş və cavab
kartınızın 3-cü bölməsində göstərilmiş varianta uyğun sual kitabçası verilir.
DİQQƏT! Sizə verilən sual kitabçası sizə məxsus deyilsə və ya cavab kartınızın 3-
cü bölməsində çap edilmiş varianta uyğun olmazsa, dərhal nəzarətçiyə müraciət
edin. Belə ki, imtahan nəticələriniz qiymətləndirilərkən cavablarınız cavab
kartınızda göstərilmiş varianta uyğun və sizə məxsus olan sual kitabçasının doğru
cavabları ilə müqayisə ediləcəkdir. Sual kitabçasının sizə düzgün təqdim
olunduğuna əmin olun. Nəzarətçi sual kitabçasını açmağa icazə verdikdən sonra onu
vərəqləyərək çap qüsurlarının olub-olmadığını yoxlayın. Belə qüsurlar varsa,
problemin aradan qaldırılması üçün nəzarətçiyə müraciət edin.
4.
“İmtahan başlandı!” elan edilən andan suallara cavab vermək üçün ayrılan 2 saat
vaxtdan səmərəli istifadə edin. Cavabların cavab kartında qeyd olunması (uyğun
dairələrin qaralanması) üçün sərf olunan vaxt da imtahan müddətinə daxildir.
5.
Sizə 40 test tapşırığı təqdim olunur. Cavablarınızı yazarkən, hər bir sualın cavabını
cavab kartında həmin suala uyğun sırada qeyd edin. Sual kitabçasında hər suala
verilmiş beş cavabdan (bunlar A, B, C, D, E hərfləri ilə işarələnmişdir) düzgün
hesab etdiyiniz yalnız bir cavabı seçin və “Cavab kartı”nda ona uyğun dairəni
qaralayın. Əgər bir suala cavab olaraq iki və daha çox dairə qaralanarsa, həmin cavab
səhv hesab edilir.
Ballarınız hesablanarkən yalnız cavab kartında qaraladığınız cavablar
nəzərə alınır.
DİQQƏT! Başqasının cavablarını köçürməyin. Özünüz də diqqətli olun ki, sizin
cavablarınızı heç kim köçürməsin. Nəticələriniz yoxlanarkən xüsusi araşdırma
zamanı köçürmə faktı aşkar edilərsə, həm köçürənin, həm də köçürməyə şərait
yaradanın imtahan nəticələri ləğv olunacaqdır.
6.
Hesablamaları və qeydləri aparmaq üçün “Sual kitabçası”nda kifayət qədər boş
yerlər nəzərdə tutulmuşdur. Buna görə də əlavə kağızdan istifadə etməyə icazə
verilmir.
7.
İmtahanın başlanmasından 1 saat müddət keçənədək və qurtarmasına qalmış son 15
dəqiqə ərzində imtahan zalını tərk etmək qadağandır.
8.
“İmtahan qurtardı!” elan olunduqda cavab kartınızı və sual kitabçanızı mütləq
nəzarətçiyə təhvil verin.
9.
Cavab kartını və sual kitabçasını nəzarətçiyə təhvil verdikdən sonra imtahana
buraxılış vərəqəsində nəzarətçiyə imza etdirməlisiniz. İmtahan sənədlərini
nəzarətçiyə təhvil verməsəniz, imtahan nəticələriniz ləğv olunacaqdır.
DİQQƏT! Cavab kartının və sual kitabçasının təhvil verilməsinə görə abituriyent
şəxsən məsuliyyət daşıyır.
10.
Siz cavab kartlarının sayılıb zərfə qoyularaq bağlanmasında iştirak edib, zərfin
üzərindəki aktı imzalaya bilərsiniz.
4
ABİTURİYENTƏ QADAĞANDIR:
-
saxta sənəd təqdim etmək;
-
imtahan binasına (zalına) mobil telefon, xarici yaddaş qurğuları, kalkulyator, çanta,
konspekt, lüğət, cədvəl, məlumat kitabçası və digər yardımçı vasitələr gətirmək və
onlardan istifadə etmək;
-
yandırıcı, partlayıcı, kəsici, deşici və digər bu növ əşyalarla imtahan binasına girmək,
özü ilə siqaret gətirmək;
-
sual kitabçaları paylandıqdan sonra hər hansı bir səbəbə görə imtahan zalını tərk edib
yenidən geri dönmək;
-
nizam-intizam qaydalarını pozmaq;
-
zalda yerini dəyişmək, gəzişmək, yerindən durmaq və bu kimi hallarla imtahanın
gedişinə mane olmaq;
-
başqasının cavab kartına, sual kitabçasına baxmaq və ya öz cavab kartına, sual
kitabçasına başqasının baxması üçün şərait yaratmaq;
-
“İmtahan başlandı!” elan olunan andan 1 saat müddətində və imtahanın qurtarmasına
qalmış son 15 dəqiqə ərzində imtahandan getmək;
-
nəzarətçiyə test tapşırıqlarının həllində kömək üçün müraciət etmək;
-
cavab kartını və sual kitabçasını nəzarətçiyə təhvil vermədən imtahan zalından
çıxmaq.
Belə hallara yol verən abituriyentlər imtahandan xaric olunacaq və onların
imtahan nəticələri ləğv olunacaqdır.
DİQQƏT! Belə hallara yol verən abituriyentlər imtahandan xaric olunacaq və
onların imtahan nəticələri DİM tərəfindən ləğv olunacaqdır.
Qəbul Qaydalarında hər hansı bir pozuntuya və saxtakarlığa yol verməsinə görə
(saxta sənəd təqdim etmə, köçürmə, köçürməyə şərait yaratma, imtahana öz yerinə
başqasını göndərmə və qəbul qaydalarına zidd digər hərəkətlər) abituriyentin imtahan
nəticələrinin ləğv olunması və onun haqqında müvafiq inzibati-hüquqi tədbirlərin
görülməsi nəzərdə tutulmuşdur. Siz cavab kartının 2-ci bölməsində belə hallara yol
verməyəcəyiniz barədə öz üzərinizə öhdəlik götürərək Bəyannamə imzalayırsınız.
Əgər siz imtahan zamanı qaydaların pozulması halları ilə rastlaşsanız, mütləq
nəzarətçiyə müraciət edin, nəzarətçi lazımi ölçü götürməzsə, imtahan rəhbərinin və ya
DİM nümayəndəsinin zala gəlməsini tələb edin.
Nəzarətçi müəllimlər qeyri-fənn müəllimləridir. Onların vəzifəsi imtahanın gedişi
zamanı nizam-intizam yaratmaqdır. İmtahanın başlandığı elan edildikdən sonra sizin
onlara sual verməniz, onların sizə yaxınlaşıb hər hansı bir məlumat almaq üçün
müraciət etməsi imtahan qaydalarına ziddir.
Nəzarətçi müəllimlərin fəaliyyəti imtahan prosesinin tələblərinə uyğun olmazsa,
bu barədə imtahan rəhbəri zala gəldikdə ona məlumat verin. İmtahan binasından
çıxdıqdan sonra imtahanın gedişi ilə əlaqədar şikayətlərə baxılmayacaqdır.
Sizə müvəffəqiyyətlər arzulayırıq!
Dostları ilə paylaş: |