33
şəkli yoxdur. Bu xaldey allahı kahinlərinin dediyinə görə, allahın bütün yerli qadınlar içərisindən özü üçün seçdiyi
bircə qadından başqa burada heç kəs gecələmir.
182. Bu kahinlər iqrar edirlər ki, allah özü hərdən məbədə gəlib həmin yataqda gecələyir (amma mən buna
inanmıram). Misirlilərin danışdıqlarına görə, guya həmin hadisə Misirdəki Fivada da olur. Oradakı Fiva Zevsi
məbədində bir qadın yatır. Bu iki qadın, deyilənə görə, ölümlü kişilərlə əlaqəyə girmirlər. Bununla yanaşı, rəmmal
Likiyadakı Patarada allahın gəldiyini bəyan edəndə (bu da həmişə yox, hərdən bir olur) allahın qeybdən xəbər verən
kahinəsi də eyni ilə məbəddə yatır. Lakin allah gələndə kahinəni gecələr onun yanında qoyub məbədi bağlayırlar.
183. Babilin müqəddəs məbəd sahəsinin aşağısında Zevsin oturmuş vəziyyətdə qızıl heykəli qoyulmuş bir ibadətgah
da var. Onun da yanında böyük qızıl miz, qızıldan tac və üstündə ayaq qoyulması üçün kətil mövcuddur. Xaldeylərin
dediyinə görə, bütün bu şeylərin qayrılmasına 800 talant qızıl işlənmişdir. Bu məbədin qarşısında qızıl mehrab
tikilmişdir. Orada böyük bir mehrab da var. Bu mehraba yaşlı heyvanlardan qurban gətirirlər; qızıl mehraba isə yalnız
südəmər heyvanı qurban gətirmək olar. Xaldeylər bayramlar zamanı böyük mehrabda bu allahın şərəfinə hər il 1000
talant buxur yandırırlar. Haqqında söhbət gedən qədim vaxtlarda müqəddəs sahədə allahın 12 dirsək hündürlüyündə
başdan-ayağa qızıldan olan heykəli varmış. Onu görmək mənə qismət olmamışdır, mən yalnız xaldeylərin
danışdıqlarını xəbər verirəm. Güştəsp oğlu Dara bu heykəli ələ keçirməyi çox arzu etsə də, onu zəbt etməyə cəsarət
göstərməmişdir. Lakin Daranın oğlu Kserks heykəli oğurlamışdır. O, heykəli yerindən tərpətmək üçün (divara əl
vurmağa) icazə verməyən kahinəni öldürməyi əmr etmişdir. Ayrı-ayrı adamlardan da çoxlu nəzirlər gələn bu məbəd və
müqəddəs sahə belə zəngin bəzənmişdir.
184. Babildə çoxlu hökmdar hakimiyyət sürmüşdür. Mən onların haqqında "Assuriya tarixi" əsərimdə danışacağam.
Həmin hökmdarlar şəhər hasarını daha da möhkəmlədib, ibadətgahı da xeyli bəzəmişlər. Assur tarixində biri o birindən
beş nəsil fərqlə yaşamış iki qadın hökmdar olmuşdur. Bunların birincisi olan Semiramida əvvəllər daşqın zamanı vadini
ağzına götürən çayın qarşısını almaq üçün diqqətəlayiq bir bənd tikdirmişdir.
185. Nitokris adlanan ikinci qadın hökmdar öz sələfindən daha müdrik olmuş və abidələr qoyub getmişdir ki, mən
bu barədə danışacağam. Bundan başqa, bu hökmdar midiyalıların gücünün böyüklüyünü, bu qüvvənin xalqı necə
qorxuya saldığını, onların artıq bir çox şəhəri, (hətta Nini) istila etdiklərini görmüşdür. Ona görə də əvvəlcədən bütün
ehtiyat tədbirlərini həyata keçirmək qərarına gəlmişdir. Birinci növbədə şəhərin düz ortasından keçən Fərat çayının
axarını dəyişmişdir. Nitokris bunun üçün şəhərin üst tərəfində kanal qazılmasını əmr etmişdir: bunun da nəticəsində çay
elə dolanbac axmışdır ki, məsələn, Assuriyanın bir kəndinin yanından üç dəfə qıvrılıb keçməli olurmuş. (Fəratın üç
dəfə qıvrılıb yanından axdığı kənd Arderikka adlanır). Hələ indi də Bizim dənizimizdən Fərat boyu aşağılara, Babilə
səyahət edəndə bu kəndin yanından: üç gün ərzində üç dəfə keçib getmək lazım gəlir. Nitokrisin bir xidməti budur.
Bunun ardınca, onun əmrinə görə, çayın hər iki qırağınca uzunu və hündürlüyü heyrət doğuran torpaq bənd
tökülmüşdür. Sonra o, Babildən xeyli yuxarıda, çayın yaxınlığında göl üçün elə dərin hövzə qazılmasına əmr vermişdir
ki, bütün yeraltı sular axıb oraya dolsun. Bu hövzənin eni 420 stadiyaya çatır. Hökmdar qazılmış torpaqdan çayın bəndi
üçün istifadə edilməsini buyurmuşdur. Hövzə hazır olanda hökmdar daş gətirib hövzənin qırağına daşdan üz
çəkilməsini əmr etmişdir. Hökmdar bu iki işi görməklə çayı döngəli etmiş və bütün qazılan hövzəni bataqlığa
çevirmişdir. O, çoxlu dirsəklər vasitəsi ilə nəinki çayın axımını yavaşıtmış, həm də Babilə gedən su yolunu daha
dolanbac eləyibmiş. Bununla da çayla üzüb gələn səyyahları sonra bir də göl ətrafında quru yolla böyük bir məsafəni
dolandırmaq istəmişdir. Bu işlər ölkənin Midiya tərəfdən ən kəsə keçidləri və yolları olan səmtində görülmüşdür. Bu
tədbirlərdən məqsəd ticarət əlaqələri zamanı midiyalıların ölkəyə daxil olmasını gecikdirmək və onların ölkənin
vəziyyətini dəqiq öyrənməsinə mane olmaqmış.
186. Hökmdar midiyalıların əleyhinə bütün bu qurğuları su hövzəsi qazılarkən yığılan torpaqla tikdirmişdir. Bundan
başqa, o həmin işlərdən daha bir məqsədlə istifadə etmişdir. Ortadan axan çay şəhəri iki yerə böldüyündən əvvəlki
hökmdarın vaxtında onun bir hissəsindən o birinə getmək üçün çayı qayıqla keçmək lazım gəlirdi, mən bilən, bu da
əlverişli deyildi. Nitokris bunun da qayğısına qalmışdır. Göl üçün hövzə qazılanda həmin işlərdən belə bir xatirə
qalmışdır. O, böyük daşların yonulmasını əmr etmişdir. Bu daşlar hazırlanıb, hövzə də qazılandan sonra Nitokris çayın
bütün axarını bu hövzəyə yönəltdirmiş və hövzə dolduqca çayın əvvəlki məcrası da qurumağa başlamışdır. Bunun
arxasınca Nitokris şəhər hasarının uzunluğu boyu sahilləri və çaydan hasar qapılarına gedən enişi bərkidib, şəhər
divarları tikintisində üzlük çəkildiyi kimi, buralara da bişmiş kərpicdən üzlük çəkməyi əmr etmişdir. Sonra da təxminən
şəhərin ortasında yonulmuş daşlardan körpü salmağı buyurmuşdur (daşlar dəmir və qurğuşun vasitəsi ilə bir-birinə
bərkidilmişdir). Gündüzlər körpünün üstünə taxta sallayırlarmış ki, (babillilər çaydan keçə bilsinlər, gecələr bu taxtalar
götürülürmüş ki, adamlar bu sahildən o sahilə veyllənməsinlər və bir-birini qarət etməsinlər. Körpü tikiləndən sonra
hökmdar Fəratın axarını göldən ayırıb əvvəlki məcrasına döndərməyi buyurmuşdur. Beləliklə, göl, əvvəlcədən nəzərdə
tutulduğu kimi bataqlığa çevrilmiş və bundan əlavə şəhərlilər üçün körpü salınmışdır.
187. Bu hökmdar qadın bir kələk işlədərək öz xələflərini bax belə aldatmışdır.O, şəhərin ən tünlük yerindəki
darvazalar üstündə özünə türbə tikməyi, onun da üstündə bu məzmunda yazı həkk etməyi əmr etmişdir: "Məndən
sonrakı hər hansı Babil hökmdarı pula ehtiyac duysa, qoy bu türbəni açsın və istədiyi qədər pul götürsün, amma ehtiyac
olmadan qoy onu açmasın. Daha yaxşı olar ki, (türbə) heç açılmasın". Babildə hökmranlıq Daraya keçənə qədər bu
türbəyə toxunulmamışdır. (Darvazalar üstündəki) bu türbədə xəzinələr yerləşdiyi, hələ üstəlik, xəzinəni ələ keçirmək
üçün babillilərin özləri şahı dəvət etdikləri halda Dara onu indiyə qədər niyə ələ keçirmədiyinə təəccüblənmişdir.
Bununla belə, şah bu darvazadan ona görə keçib, xəzinəyə girmək istəməmişdi ki, o, gərək türbədəki meyitin altından
keçib gedəydi. Amma elə ki, şah türbəni açmalı olur, onda orada meyitdən və belə bir yazıdan başqa heç bir xəzinə
tapmır: "Əgər sən bu qədər tamahkar olmasaydın, ölülər türbəsini qarət etməzdin". Bu türbə haqqında bax, belə şeylər
danışırlar.