72
gəliriksə, XIII və sonrakı yüzilliklərdə real səpkidə oyulmuş nəbati ornamentlər
arasında gül-çiçək rəsmini andıran bədii nəstəlik xəttini görürük.
Həndəsi bəzək ünsürləri tətbiq edilmiş ən ilkin orijinal abidə Bakıda,
İçərişəhərdə yerləşən Sınıqqala minarəsidir. 1078-ci il tarixli bu minarənin bizim
üçün maraqlı olan ən gözəl hissəsi yuxarısında azançının gəzməsinə məxsus olan
artırmadır. Üçmərtəbəli stalaktitlər vasitəsilə saxlanılan bu artırma dördkünc
daşlarla hörülmüş, üzəri isə müxtəlif-növlü həndəsi naxışlarla oyulmuşdur. Üç, beş,
altıkünclü fiqurlar, səkkizguşəli ulduz bu oyma ornament motivlərinin əsas
mahiyyətini təşkil edir. Bu abidənin oyma bəzəklərinin maraqlı cəhəti bir də ondan
ibarətdir ki, burada onu inşa edən memarın adı - "Əbubəkr oğlu Məhəmməd"
yazılmışdır.
Daş üzərində həkk edilmiş həndəsi bəzəklərə sonralar, yəni XIII yüzilliyin
memarlıq abidələrində də təsadüf edilir. Bu tipli memarlıq abidələri sırasına, ilk
növbədə, Culfa yaxınlığındakı Gülüstan türbəsini aid edə bilərik. Sənətkar bu
onikisəthli abidədə böyük ustalıqla ardıcıl təkrar olunan üç həndəsi ornamentli
orijinal kompozisiya yaratmışdır. Burada tətbiq olunan həndəsi ornamentlərin əsasını
çoxuclu ulduz və ondan gedən şüalar təşkil edir. Bu abidədə beş, altı, səkkizuclu
ulduzlara, altı və səkkizbucaqlı quruluşlara təsadüf edirik. Bu həndəsi oymalar öz bədii
xüsusiyyət və məzmununa görə kərpicdən tikilmiş Naxçıvandakı Möminə xatın
türbəsinin bəzəklərini yada salır.
Bu əsrlərdə yaradılmış daş üzərində oyma işlərinin ən böyük və maraqlı
səhifəsini nəbati ornament və canlıları təsvir edən rəsmlər təşkil edir. Belə oyma
işləri sırasına, ilk növbədə, Bakıda, Bayıl tərəfdə dənizdən tapılmış, elm aləmində
"Bayıl daşları" adını almış qabartmaları daxil etmək lazımdır.
Bu abidələrin 25-30 ildən artıq öyrənilməsinə baxmayaraq, onların Xəzərin
dibində olması elm aləminə lap çoxdan məlumdur. Məsələn, hələ 1782-ci ildə rus
xəritəçiləri tərəfindən tərtib edilmiş Bakı limanının xəritəsində "Bayıl daşları"nın
sudan çıxmağa başladığı qeyd edilmişdir. Bu marağın səbəbi
abidədən daha çox, Xəzər
dənizinin səviyyəsi məsələsi ilə əlaqədar olmuşdur. Bundan sonra Bayıl tərəfdə
dənizin içərisindəki tikinti qalıqları haqqında 1848-ci ildə Bakıda olmuş görkəmli rus
şərqşünası İ.N.Berezin və Azərbaycanın görkəmli alimi Abbasqulu ağa Bakıxanov
da maraqlı məlumat vermişdir.
1939-cu ildə Xəzər dənizinin səviyyəsinin yenidən aşağı düşməsi
nəticəsində "Bayıl daşları" quruya çıxmış və onun əsil mənada öyrənilməsi
mümkün olmuşdur. "Bayıl daşları"nın ən maraqlı hissəsi su altından çıxarılmış
daşlardır. Arxeoloqlarımız tərəfindən son 30 il ərzində Xəzərdən çıxarılmış 700-dən
çox bu bədii daş hissələri vaxtilə quruda yerləşən möhtəşəm bir memarlıq abidəsinin
bəzəkləri olmuşdur. Tapıntılar içərisində memarın adını və binanın inşa tarixini
göstərən daşlar da vardır. Memar yazıda özünü Əbdürrəşid oğlu Zeynəddin Şirvani
adlandırır. Bundan başqa, burada bir sıra şəxslərin adları və s. yazılar da (Mahmud əz
Bakü, Əfridün, "Fəriburz", "Nəqqaş" və s.) vardır.
Dərin oyma üsulu ilə bəzədilmiş "Bayıl daşları"nın maraqlı cəhəti ondan