məcbur olurdular. Lakin bu da həmin müstəqil xanlıqların tez-tez İranın özü, eləcə də
Türkiyə, Gürcüstan və nəhayət Rusiya ilə müharibələrə cəlb olunmalarının qarşısını
ala bilmirdi. Bu müharibələrin çoxu müdafiə xarakteri daşıyırdı və aydındır ki,
xanlıqlar müstəqilliklərini qoruyub saxlamaq uğrunda vuruşurdular. Təhlükə Rusiya
tərəfindən gələndə mübarizə daha kəskin və sərt xarakter alırdı. Rusiya imperiyası
ardı-arası kəsilməyən müharibələrlə Türkiyə və İranın sərhəd bütövlüyünü
zəiflətdikdən sonra Gürcüstanı Moskvaya birləşdirdi. Gürcülər bu yolla öz
təhlükəsizliklərini təmin edəcəklərini düşünürdülər. Rusiya isə bütün Transqafqazı
fəth etmək və onun xalqlarını əsarət altına almaq istəyirdi.
Xanlıqların süqutu
Azərbaycanın tarixi qəhrəmanlıq epizodları ilə zəngindir. Bu tarixin
səhifələrini çevirdikcə biz kiçik xanlıqların silaha sarılaraq azadlıq və ləyaqətlərini
qorumaq üçün rus qoşunları ilə necə cürətlə və qorxu bilmədən vuruşduqlarının şahidi
oluruq. Onlar azadlıqları uğrunda doğma torpaqlarını oğullarının qanı ilə
suvarmışdılar. Onlar öz azadlıqlarını XIX əsrin başlanğıcı, hətta həmin əsrin birinci
rübünün axırına qədər mərdlik və müvəffəqiyyətlə qoruyub saxlaya bilmişdilər. Bu
dövrdə xanlıqların qüvvəsi tədricən zəiflədiyindən onlar güclü Rusiya ordusunun
hücumlarına davam gətirə bilmirdilər. 1813-cü ildə Qarabağ, Gəncə, Şəki, Şirvan,
Dərbənd, Quba, Bakı, Talış, 1828-ci ildə isə İrəvan və Naxçıvan xanlıqları ruslar
tərəfindən ələ keçirildi.
Müstəqillik itirildikdən, rus hakimiyyət dairələri gücləndikdən və onların
işğal olunmuş ərazilərdə apardıqları ruslaşdırma siyasəti böyük vüsət aldıqdan sonra
xanlıqları “Odlar yurdu”nun başqa hissələri ilə bağlayan tellər qırılmağa başladı.
Həmin dövrdən etibarən artıq Rusiya nəzarətindəki Azərbaycan torpaqları deyil,
mərkəzi Təbriz olmaqla İrandakı ərazilərimiz Azərbaycan adlandırılmağa başladı.
İşğal olunmuş ərazilər özbaşınalıqla bölünür, şəhərlərin, mahalların adları
dəyişdirilirdi (nümunə kimi Azərbaycanın qədim mərkəzlərindən biri olan Gəncənin
Rusiya imperatriçəsinin şərəfinə Yelizavetpol adlandırılmasını göstərmək olar).
Rusiya imperiyası Azərbaycan ərazisini istədiyi şəkildə qayçılayır, işğala qədər
mövcud olmuş siyasi azadlığın ən kiçik təzahürlərini də məhv edirdi. Rus dövləti
işğal etdiyi xanlıqların əhalisinin adını dəyişdirməkdən də çəkinmirdi. Etnoqrafiyanı,
xalqın dilini və ədəbiyyatını nəzərə almadan Azərbaycan əhalisinə Qafqaz tatarları,
Qafqaz müsləmanları, yaxud sadəcə olaraq müsəlman adı qoyulmuşdu.
Etnoqrafiya
Əlbəttə, haqqında söhbət gedən əhali indiyə qədər türk mənşəli millət olaraq
qalmaqdadır. Qafqaz, xüsusən də Azərbaycan etnoqrafiyasına və tarixinə dair
ədəbiyyatın azlığı, hətta deyərdik ki, yoxluğu, eləcə də mövcud materialların elm
aləminə naməlum qalmasının labüd nəticəsi olaraq bu millətin etnik təşəkkülü və
quruluşu haqqında Rusiya imperiyasının uydurduğu yalanlar rəsmi nöqteyi-nəzər kimi
qəbul edilmişdir. Qədim türk-müsəlman xanlıqlarının əhalisi əsl mənşələri nəzərə
alınmadan Qafqaz tatarları adlandırılmışlar və indinin özündə də Qafqaz tatarları kimi
tanınırlar. Əsl həqiqətdə köklərinin eyniliyi ilə bir sırada azərbaycanlıların və
tatarların dilləri, adətləri, ənənələri, inamları arasındada da müəyyən yaxınlıq vardır.
Bu yaxınlıq həm fransız tarixçisi M.Leon-Kahen, həm də məşhur macar alimi
H.Vamberi tərəfindən sübuta yetrilimişdir.
Asiyalı fateh Teymurləngin (Teymurləng Avropada Axsaq Teymur
mənasında istifadə olunan Tamerlan adının qarşılığıdır) Azərbaycana yürüşündən söz
açan fransız alimi yazır: “Əsrlər boyu türklərin yaşadığı bir ölkə olan Azərbaycan
könüllü surətdə Teymurləngin hakimiyyətini qəbul etdi”.
H.Vamberi Azərbaycan xalqının etnik mənşəyindən danışarkən göstərir ki,
İran ünsürlərinin Azərbaycandan hansı dövrdə sıxışdırılıb çıxarıldığını söyləmək
çətindir. Bu məsələ hələlik öz həllini tapmamışdır. Buna baxmayaraq, biz bir neçə
fakta müraciət edəcəyik:
Azərbaycanın istər İrana aid hissəsində, istərsə də Qafqaz, yaxud
Transqafqaz hissəsində əhali Azərbaycan dilində danışan türklərdən ibarətdir. Onların
öz ədəbiyyatı, milli poeziyası, ənənələri və mifləri mövcuddur. İslamın iki təriqəti
(şiəlik və sünnilik-tərc.) Azərbaycanda geniş yayılmışdır.
İntellektual mədəniyyət baxımından Azərbaycan, xüsusən də onun İran
hissəsi qədim İran ədəbiyyatından əsaslı şəkildə təsirlənmişdir. Bu ədəbiyyatın əsas
nümayəndələri olan Firdovsi, Hafız və Sədi azərbaycanlılar arasındada indi də kifayət
qədər məşhurdurlar, onların əsərlərinə tez-tez istinad edilir. Bir tərəfdən İranın
qüdrətinin azalması və onun sosial mədəniyyətinin tənəzzülə uğraması, o biri tərəfdən
isə Rusiya mədəniyyətinin daha geniş ərazidə yayılması və ümumilikdə milli şüurun
yüksəlişi nəticəsində Azərbaycanı İranla bağlayan tellərin qırılmaqda olduğu aşkara
çıxdı.
İndi isə gəlin Azərbaycanın “Qafqaz Azərbaycanı” adlandırılan hissəsinə
nəzər salaq. Biz İran Azərbaycanına toxunmaq niyyətində deyilik. Biz qafqazlılar
onun sakinlərinə ən yaxşı istəklərimizi yetirir, qüdrətli və mədəni İran dövlətinin
himayəsi altında siyasi və fərdi azadlığa çatmalarını, böyük inkişafa, sosial və siyası
tərəqqiyə qovuşmalarını arzu edirik.
Dostları ilə paylaş: |