Bağ “qonşu”su
(hekayə)
Pərdəsiz pəncərədən düşən günəş onu durğuzmaq fikrindəydi. Professor üzünü
divara çevirib adyalı gözünün üstünə çəksə də hiss etdi ki, daha yata bilməyəcək.
Canında ağrılar duyurdu, yuxudan da doymamışdı. Hər gecə özünə söz verirdi ki,
axşam saat 12-dən sonra əlinə kitab götürməyəcək. Amma kitabsız da yuxusu ərşə
çəkilirdi. Nə yaxşı ki, kitabları vardı! Süleyman müəllim bu kitabları xəzinə bilirdi və
bu kitablar professoru gecələr üstünə hücum çəkən dərddən xilas edir, yuxu dərmanı
olurdu. Səhərə yaxın gözünün acısını alırdısa, çətini ayağa qalxınca idi. Bağın havası,
bir kilometrdən səsi gələn dənizin doğma uğultusu onu sap-sağlam edib ağrılarını
unutdururdu.
Əlini qaldıranda nəyəsə toxundu. Axşamlar başının üstünə oxumaq üçün
məftillə çəkib gətirdiyi lampaydı. Ayaqlarını zoğalı rəngi getmiş, amma tərtəmiz
sildiyi taxta döşəməyə qoyub başmaqlarını geyindi. Daşdan hörülmüş balaca
xudmani mənzilin hər yanı jurnal-kitab qalasıydı. Çarpayı, yazı stolu, şifoner
olmasaydı otaq kitab anbarına oxşardı.
Çarpayını səliqəyə saldı. Mələfələr təmiz idi: həftədə bir dəyişirdi. Quyunun
ağappaq suyunda paltar tozu ilə isladır, bir gün keçəndən sonra əllə yuyurdu.
Mələfədən korluq çəkmirdi. Şifonerin siyirtmələri dolu idi, arvadının sağlığından
qalmaydı. Rəhmətlik bilirmiş ki, vaxt gələcək, belə mələfər od qiymətinə çıxacaq və
ərinin də təzəsini almağa imkanı olmayacaq. Sədaqətin saysız-hesabsız mələfələri,
məhrəbaları indi qocanın karına gəlirdi.
Şəraiti o qədər yüksək olmasa da Fatmayıdakı bu atasından qalma ikimərtəbəli
ev, arvadının qab-qacaq, çəngəl-bıçaq, məhrəba, mələfə, süfrə ehtiyatları onu bu ahıl
yaşında heç kəsdən asılı olmağa qoymurdu. Bu onun üçün indi çox böyük təminat idi.
Yayda suyu quyudan hamamın üstündəki iri çənə motorla vururdu. Gün suyu
qızdırırdı, olurdu əməlli başlı hamam. Nə qədər çimirsən, çim, dəniz də iki
kilometrlikdə.
Bu il bağa lap tez mart ayında köçmüşdü. Gecələr soyuqdan iki yorğanın altında
dişi dişinə dəysə də, professor özünə gəlmişdi. Sinirləri dincəlmişdi. Nə yaxşı
babalardan qalma bu bağ vardı! Yoxsa kişi nə edərdi?! Süleyman müəllim 74 yaşında
ilk dəfəydi belə sevinc hissi keçirirdi. O vaxt mikrorayondakı dörd otaqlı mənzilini
alanda da belə hiss keçirirdi.
Mənzili havayı almışdı. Onun yaşadığı qəsəbə Bakıda havası ən təmiz olan ərazi
sayılırdı. Ətraf elə genişlik olmasa da sakinlər burada gözəl yaşıllıqlar salmışdılar.
Şam ağacları, çinarlar, zeytunluqlar quşların nəğmə məkanına çevrilmişdi. Süleyman
müəllim bu səslərlə sabahını açırdı. Yaxınlıqdakı məktəbin yaşıl futbol meydançası,
idman qurğuları öz həvəskarlarını qoynuna alırdı. Professorun pəncərəsi uşaq
bağçasının binasına baxırdı. Köşklər, skamyalar, yelləncəklər, günlüklər sıx
ağaclardan, yaşıl kollardan görünməz olmuşdu.
Süleyman müəllimə hər gün onu arxayın-arxayın işə aparan trolleybus ləzzət
eləyirdi. Bu xətt düz bulvara qədər gedirdi. Üç qapılı, geniş salonlu trolleybus.
Professor geniş şose yolunu iki yerə bölən gül-çiçəkli yaşıllığı, sıra ilə düzülmüş
2
yaraşıqlı quşarmudu kollarını pəncərədən seyr edə-edə bir də görürdü ki, artıq işə
çatıb.
Yəqin gözə gəldilər. Trolleybus xətti ləğv olundu. Yerini “bir ayaq ancaq
yerləşən” darısqal maşınlar tutdu. Hələ bu harasıdır, bir səhər gözünü açanda elə bildi
ki, onları köçürməyə gəliblər. Binanın dörd dövrəsindəki buldozerləri, “Kamaz”
maşınları, traktorları görüb çaşdı. İri, yaşıl ağacları mişarlayır, bağçanı uçururdular.
- Buralarda ev tikəcəklər, - narazı sakinlər bir-birilərinə şikayətlənirdilər:
- Yenə gen-bol yer olsa, adam dinməz. Bizə hələ buralar darısqal idi. Uşaqlar
oynamağa yer tapmırdılar. İndi lap bir-birimizin evinə baxacağıq.
- Bəlkə icra hakimiyyətinə demək lazımdır. – Süleyman müəllimə tapşıraq bu
işi. Aramızda ad-san yiyəsi odur.
Professor bunun mənasız olduğunu hiss etsə də adamların sözünü yerə salmaq
istəmədi. Mənzili alandan bəri rayon icra hakimiyyətinə işi düşməmişdi. O vaxt onu
tanıyır, hörmətli adam olduğunu bilirdilər. Onu tanıyanlar, kim bilir, bu illər ərzində
artıq işdən çıxmış, bəlkə yerlərini dəyişmiş olardılar. Hər halda cəhd etməyə nə vardı
ki!
İcra hakimiyyətinin nömrəsini yığdı. Onları kim narahat edir başa saldı.
-
Bizlik deyil, - quru, qısa cavab verdilər.
-
Kimlikdir, a bala?
-
Bilmirik, - dəstəyi asdılar.
Yığışıb qəzetə də yazdılar. Amma qəzetdən də səs-soraq çıxmadı.
Ətrafda iş gündən-günə qaynayırdı. Bir neçə metrlik ərazidə dörd ev birdən
tikilirdi. Dörd traktor, dörd buldozer işləyir, “Kamaz”ların biri gəlib, biri gedirdi.
Fəhlələrin hay-küyünü də bura gəlcək ətrafda daha yaşamaq mümkün deyildi. Bu
hələ gündüzün səsiydi. Gündüzün səsinə dözmək mümkün olmayanda professor
evdən çıxıb bulvara yollanırdı. Ancaq daha indi onu bulvara aparacaq yaraşıqlı
trolleybus da yox idi. Havadakı məftillərinəcən izin-tozun itirmişdilər. Lap trolleybus
olsun, indi onun pəncərəsindən heç baxmağa da yer görmürdü. Hər yanda tikinti
gedir, əvəzində bəzək kolları, yaşıl ağaclar kəsilir, babat asfaltlar telefon,
kanalizasiya və digər xətlər üçün xəndək təki qazılırdı. Şəhərdə yerimək zülmə
dönürdü. Plansız, nizamsız, harada gəldi, necə gəldi inşa edilən bu çoxmərtəbəli
qorxunc evlər üzünə bol-bol ənlik-kirşan yaxan, makiyajdan istifadə etməyi
bacarmayan zövqsüz əcaib qadınlar təki ordan-burdan adamın gözünə girirdi. Bircə
bulvarda ürəyi açılırdı. Dənizin içində lövbər salan, uzaqdan xəyalı çəkən gəmilərə,
kolazlara, barkazlara baxır, Bakının əzəmətli bir liman şəhərinə çevrilməsindən fəxr
duyub qürrələnsə də şəhərin hər yerində az qala bir-birinin çiyninə qonan eyni
şeylərlə dolu saysız-hesabsız, yaraşıqsız, lüzumsuz marketlər, ərzaq dükanları, qadın
salonları, şadlıq sarayları bu hissi onun qəlbindən qovub çıxarırdı.
...Gecələr qaranlıq üzünə həsrət idilər. Hər yandan projektorlar boylanırdı.
Buldozerlər, traktorlar dayanmaq bilmir, “Kamaz”lar ardı-arası kəsilmədən nəsə
daşıyırdılar. Adamlar rahatlıqlarını itirmişdilər. Böyüklü-kiçikli hamının baş qulağı
dəng olmuşdu. Qonşular rastlaşanda salamlaşmaqdan qabaq “gözümü səhərə qədər
yuma bilməmişəm” deyib əllərini yelləyir, qaşqabaqlı keçirdilər.
Professor ilk dəfəydi təqaüddə olmasına sevinirdi. Pozulan rahatlığı ilə işə
getmək onun yaşda adam üçün çox çətin idi.
Dostları ilə paylaş: |