Kimsə bilməsin
71
XOCALI.
Soyuq qış gecəsi... Ayaqlar yalın,
Yerdə qar var idi, kəfəndən qalın.
Gecənin sükutu pozmuşdu halın,
Bilirdi özündə bir sirr saxlayır,
Bu gecə bir şəhər qara bağlayır.
Bir belə vəhşilik, qırğın, qan-qada,
Min ildi olmurdu qoca dünyada.
Xocalı “üzürdü” qanlı dəryada.
Qan ilə yuyulan izim ağlayır,
Dilim topuq vurur, sözüm ağlayır.
Kimlərsə vicdanı satmışdı o gün,
Kimlərsə kamına çatmışdı o gün.
Tanrının özü də yatmışdı o gün,
Yatmasa görərdi dünya çağlayır,
Xocalı can verir, sinə dağlayır.
İyirmi üç illik dözüm ağlayır,
Kirpiyim qan süzür, gözüm ağlayır.
Sönmüş od- ocağım, közüm ağlayır.
Sinəmdə dağ oldu, qəlbimdə xalım,
Getdi yer üzündən, getdi Xocalım...
Ramil Mərzili
72
SƏNLƏ BAŞDAŞIM.
Sən yalanl sevdin, mən səni sevdim,
Sən ondan qopmadın, məndəki səndən.
Günbəgün böyüyən artan bu sevgim,
Yalana öyrəşdi səni sevəndən.
Heç nədir yanımda yağan yağışlar,
Yuyar bu dünyanı, yuyar gözyaşım.
Bəlkə də yalanı onda bağışlar,
Üzbəüz qalanda sənlə başdaşım.
Kimsə bilməsin
73
VAR…
Boğulan arzuların,
Hardasa "yelkəni" var.
Mənim dərdim yoxduki,
Dərdlərimin "Mən"i var.
Düzəlmirki, ha deyin,
Arzular düyün- düyün.
Sinəm üstə çəkdiyin,
Dağlarımın "çəni" var.
Bulud yağış gətirə,
Sığınasan çətirə...
Qara gündən xatirə,
Saçlarımın dəni var.
Ramil Mərzili
74
YAVAŞ-YAVAŞ…
Ürəyindən qor götürüb,
Əriyəsən yavaş- yavaş.
Ayağını bu dünyadan,
Sürüyəsən yavaş- yavaş.
Dincə qoyasan "əkini",
İtirəsən öz çəkini...
İçindəki qəm yükünü,
Kürüyəsən yavaş- yavaş.
Hara baxsan quru ehkam,
Yorulsan dərdinə söykən.
Ağlayasan möhkəm- möhkəm,
Kiriyəsən yavaş- yavaş.
Gələsən öz nəzərinə,
"Şeş" də verməyə zərinə.
Ölümünün üzərinə,
Yeriyəsən yavaş- yavaş.
Günah gizlənir batində,
Haqq itir insan qatında.
Köçəsən, torpaq altında,
Çürüyəsən yavaş- yavaş...
Kimsə bilməsin
75
BƏZƏN…
Bəzən bir ürəyin hərarətini,
Başqa bir ürəyə vermək olarmış.
Bəzən gözlərini yumanda belə,
Yüz addım uzağı görmək olarmış.
Bəzən ay ürəyim, bu "bəzən"ləri,
Yığıb bir ümidə sığdırmaq olur.
Bəzən gözlərini möhkəm sıxmaqla,
Bir payız leysanın yağdırmaq olur.
Bəzən bezər insan adamsızlıqdan,
Baş alıb çəkilər səssiz otağa.
Bəzən öz-özünə danışar insan,
Yorulub qısılar tənha yatağa....
Bəzən adını da unudar insan,
Tək onu, tək onu düşünər ürək.
Bəzən qadını da unudar insan,
Darıxdığın sanki qanadsız mələk.
Bəzən qınayarsan özün özünü,
Əlini başına çırparsan hətta.
Sən məni "bəzən"siz sev, ömrüm günüm,
Kim bilir, sabahı olmam həyatda...
Ramil Mərzili
76
ÇƏK…
Mən bir siqar çəkim, sən şəklimi çək,
Mən dərdini çəkim, sən həsrətimi.
Gözlərim yolunu çəkib qurtarsın,
Çək məni içinə son nəfəs kimi...
Mən zülmünü çəkim, sən adımı çək,
Dönüb baxışını gözümə əkim.
Zaman səni məndən almasın deyə,
Durdurub saatı geriyə çəkim...
Çək məni maqnitin əks qütbütək,
Qoyma ayrı qalsın əhdim, ilqarım.
Yolla nə amanın, nə ahın varsa,
Mən onu bir ömür çəkib qurtarım.
Kimsə bilməsin
77
GƏL ÖRT ÜRƏYİMİ …
Xəyalın bu gecə qeybə çəkilib,
Fikrim zülmətləri yarır, hey yarır.
Ulduzlardan işıq əmən gözlərim,
Aydan boylanaraq səni axtarır.
Hara yoxa çıxdın ey mələk üzlüm,
Gecənin bu dəmi tək qoydun məni.
Ey gecə kirpiklim, ey bulud gözlüm,
Axtarmadığım yer qalmadı səni.
Bəlkə də yatmısan yuxularımda,
Mən oyağam deyə tapmıram səni.
Sən mənim qəlbimdən beynimə axıb,
Gözümə salmısan eşqdən pərdəni.
Gəl, yuxusuz gecəm eşqə boyansın,
İçimə dol gülüm, yorğun nəfəstək.
Canına, qanına hopdur sevgimi,
Məni nəfəs kimi içərinə çək ...
Gəl, bu gecə məni tənha buraxma,
Xəyalını göndər sən gəlməsən də.
Gəl ört ürəyimi, çox üşüyürəm,
Hər yarpaq titrəyib, hər meh əsəndə.
Sən gəlki gecə də sübhə qovuşsun,
Zülmət də ağlayır sənsizlik ilə.
Kəlmələr uçuşur qulaqlarımda,
Sevirəm gecəni səssizliyilə...
Zülmət gecələri izsizliyilə ………..
Dostları ilə paylaş: |