Ankara hissəsi parlament binasında, birinci mərtəbədə olan zalda ayaq üstü yeməklə başa
çatmalı idi. Yəni bizim nümayəndə heyətinin məlumatı belə idi, lakin bunun ardınca da tədbir
var imiş və bu barədə bir qədər sonra yazılacaq.
Ayaqüstü yemək zamanı nümayəndə heyətləri bir-birilə təmas qurur, yüngül
məsləhətləşmələr aparır və lazım gələrsə bir az sonraya yüksək səviyyəli görüşlər təyin
edirdilər.
Burada da diqqət Elçibəydə idi. O demək olar ki, fasiləsiz olaraq ayaqüstü görüşlər keçirirdi.
Bu görüşlər əsnasında ayrı-ayrılıqda həm Şevardnadze, həm Nazarbayev, həm də Ukrayna
Prezidenti Leonid Kravçuk Elçibəyə Ermənistan prezidenti Levon Ter-Petrosyanla görüşməsini
təklif etdilər.
Əbülfəz bəy "yaxşı, görüşərik" deyə cavab verdi.
Bu sözdən sonra Süleyman Dəmirəlin yanında dayanmış Türkiyə Xarici İşlər naziri Hikmət
Çətin az qala yüyürə-yüyürə Ermənistan nümayəndə heyətinin durduğu səmtə getdi. Az
keçmiş oradan o zamankı Ermənistan Xarici İşlər naziri Papazyanla birlikdə bizə tərəf qayıtdı.
Bizə bir qədər qalmış Papazyan dayandı. Hikmət Çətin tək Elçibəyə yaxınlaşıb dedi ki, cənab
Prezident, Ter-Petrosyan indi bu dəqiqə sizə yaxınlaşmaq istəyir. Əbülfəz bəy dedi ki, madam
istəyir gəlsin. Hikmət Çətin Papazyanla birlikdə Levon Ter-Petrosyanın yanına getdilər və üçü
birlikdə geriyə qayıtdılar.
Onlar bizim dayandığımız yerə çatanda Elçibəy də L.Ter-Petrosyana tərəf bir addım atdı və
onlar görüşdülər. Salamlaşandan sonra Levon Ter-Petrosyan dedi ki, mən görüşün yerini və
vaxtını müəyyənləşdirmək istəyirəm.
Elçibəy qısa şəkildə cavab verdi ki, saat altının yarısında mənim iqamətgahımda.
Bununla da onların görüşü bitdi və Ter-Petrosyan öz adamlarının yanına döndü.
Saat üçdə ayaqüstü yemək başa çatdı və bütün nümayəndə heyətləri öz iqamətgahlarına
getdilər.
Bizim nümayəndə heyəti də Azərbaycan Prezidentinin iqamətgahının yerləşdiyi "Böyük
Ankara" otelinə döndü.
Otelə çatan kimi tamamilə rahatlandıq. Çünkü saat 16.30-dan 24.00-a qədər olacaq bütün
yüksək səviyyəli görüşlər . otelin altıncı mərtəbəsində, Elçibəyin iqamətgahında olacaqdı.
Hətta Prezident üçün ayrılmış maşını da buraxdıq, çünki daha bir tədbirin də olduğundan heç
kimin xəbəri yox idi. Bütün günü bizdən ayrılmayan Azərbaycanın Türkiyə səfiri Məmməd
Əliyev rəsmi başsağlığı verilməsi üçün saat 16-da dövlət başçısı səlahiyyətlərini icra edən
Türkiyə Böyük Millət Məclisinin sədri Hüsaməddin Cindorukla Azərbaycan Prezidenti Elçibəyin
görüşü təyin olduğunu heç kimə deməmişdi. Saat dördə on dəqiqə qalmış Cindorukun
köməkçisi zəng edib xəbərdarlıq etməsəydi, bizim bu görüşdən qətiyyən xəbərimiz
olmayacaqdı. Nəticənin nə olacağını mənə elə gəlir ki, yazmağa ehtiyac yoxdur.
Biz təcili aşağı düşdük. Təsadüfən orada olan və Elçibəyə pərəstiş edən Azərbaycan əsilli bir
Türkiyə vətəndaşı var idi. Onun "Kadillak" markalı maşını ilə yaxınlıqda yerləşən parlament
binasına, demək olar ki, vaxtında çata bildik.
Görüşdən sonra səfirdən bu barədə izahat tələb olunanda, cavabı çox qəribə oldu, dedi ki,
yadımdan çıxıb.
Saat on birin yarısında Elçibəy general Dostumu qəbul etməli idi. Özbək əsilli general Dostum
Əfqanıstanın üçdə bir hissəsinə nəzarət edir. Paytaxtı Məzari-Şərif şəhəridir.
Qəbul məsələlərinə nəzarət edən Nəcəf Nəcəfov mənə dedi ki, saat on birin yarısında general
Dostum yanında dörd adamla gələcək. Çalışın o çox da nəzərə çarpmasın. Bu məqsədlə otelin
liftlərindən birini daima boş saxladıq və mən özüm otelin qabağında dayanaraq gözlədim ki,
general gələn kimi cəld yuxarı qaldıra bilim.
General Dostum yanında da Nəcəf bəyin dediyi kimi beş adam gəldi və bu zaman səfir
Məmməd Əliyev də hardansa peyda olaraq onlara qoşuldu. Biz iki liftlə, mən, general və
adamlarından biri ilə bərabər, qalanları isə o biri liftlə yuxarı qalxdıq. Cəld Elçibəyin
iqamətgahına daxil olduq. Bu zaman Məmməd Əliyev gələn adamlardan birinin qoluna
girmişdi. Onlar hamısı birlikdə otağa daxil oldular və az keçmiş Nəcəf bəy çox əsəbi
vəziyyətdə çölə çıxıb bizim işçilərin üstünə qışqırmağa başladı. Mən nəsə baş verdiyini
anlayaraq Nəcəf bəyə yaxınlaşıb, nə olduğunu soruşdum. Onu heç vaxt belə vəziyyətdə
görməmişdim. O çox əsəbi şəkildə dedi ki, kənar şəxsi niyə içəri buraxmısınız? Mən dedim ki,
axı nə bilək ki, onların içində kənar adam var, hamısı bir yerdə gəlib içəri girdilər.
Bu zaman həmin kənar şəxs səfirlə birlikdə çölə çıxdı və Nəcəf bəy mənə dedi ki, bu adam
Ana Vətən partiyasının başqanı Məsud Yılmazın müavinidir, içəri girməkdə məqsədi Elçibəylə
şəkil çəkdirib, qarşıdan gələn seçkilərdə təbliğat vasitəsi kimi istifadə etməkdir.
Bu məsələdə heç bir günahı olmadığına görə həmin şəxsin adını çəkməyi lazım bilmirəm.
Dedim ki, Nəcəf bəy, səfir Məmməd Əliyev gələndə bu adamın qoluna girmişdi. Burada
yanlışlığı səfir edib, bizim heç bir günahımız yoxdur. Sonra mən öz işçilərimi yığıb, tapşırdım
ki, mənim icazəm olmadan heç səfirin özünü də Prezidentin iqamətgahına tərəf buraxmayın.
Səhər tezdən İstanbula uçmaq üçün Ankara hava limanına getməyə hazırlaşırdıq. Bu zaman
Vaqif Axundov mənə dedi ki, gəl burada və İstanbulda maşınların hərəkətini bu şəkildə
quraq: qabaqda mühafizə, sonra Prezidentin, sonra H.Əliyevin oturduğu və sonda yenə
mühafizə maşını getsin.
Mən dedim ki, Vaqif, protokol necədirsə o cür də hərəkət edəcəyik.
Vaqif bir dəfə də cəhd etdi ki, mənə nəyisə izah etsin lakin mənim fikrimin qəti olduğunu
görüb dayandı və biz protokol qaydalarına görə hərəkət etdik.