Gülüstan müqaviləsi
27
qoşunlarının komandanı Abbas Mirzəni öz müttəfiqi bilsin. Napoleonun
tələbinə əsasən şah qoşunları rus qüvvələri ilə döyüşə biləcək bir
səviyyəyə qaldırılmalı və Avropada müharibə aparılması üçün Rusiyanın
Qafqazdakı qüvvələrinin azalmasından istifadə edilməli idi. Bu şəraitdən
istifadə etməklə ruslara həm zərbə endirmək, həm də onları Cənubi
Qafqazda işğal etdikləri ərazilərdən çıxarmaq olardı. Napoleonun
fikrincə, qoşunları qüvvətlənəcək Qacar sarayı imkan verməməli idi ki,
ruslar bu dağlardan cənuba doğru irəliləsin.
Napoleon general Qardana tapşırırdı ki, onun heyətinə daxil olan
zabitlər də yeni döyüş taktikasını, istehkamların tikilməsinin yeni qayda-
larını şah qoşunlarına öyrətsinlər. Napoleona görə, hərbi təlim-tərbiyə
məsələsini yüksək səviyyədə icra etməklə həm Rusiyaya müqavimət
göstərəcək qoşun formalaşdırıla bilər, həm də bu proses dövründə ölkə
ilə bağlı kifayət qədər hərbi məlumatlar toplana bilər. General Qardana
həm də icazə verilirdi ki, şah qoşunlarının təchizi üçün Fransadan
süngülü tüfənglər və toplar alınması haqqında şah sarayı ilə müqavilələr
imzalasın. Şah qoşunlarına satılan silahların qiymətində güzəşt edilməli
və bu qiymətlər Fransadakı daxili qiymətlərdən baha olmamalı idi.
Napoleon qeyd edirdi ki, şah sarayına satılacaq silahların qiymətindənsə,
onların bacarıqla işlədilməsi daha əhəmiyyətlidir. Silahların nə vaxt
alınması, hara gətirilməsi imzalanan müqavilədə nəzərdə tutlmalı idi.
Napoleon general Qardana icazə verirdi ki, satılan silahların puluna
İrandan ərzaq əşyaları alınsın və silah daşıyan gəmilər vasitəsilə geri
göndərilsin. Fransa imperatoru şah qoşunlarına 10 min ədəd tüfəngin və
30 ədəd topun satılmasını mümkün sayırdı.
Napoleon tapşırdı ki, Fransa hərbçiləri yalnız şah qoşunlarına təlim
verməklə kifayətlənməsin və onlar öz sahələri üzrə lazımi məlumatlar
toplasınlar. O tələb edirdi ki, hərbi və dəniz mühəndisləri, topçular
keçdikləri yolları, rastlaşdıqları istehkam qurğularını, Fars körfəzində və
Xəzər dənizində olan limanları öyrənsinlər və onların xəritəsini
hazırlasınlar. Sonra əldə edilən məlumatlar xəritə üzərində təsbit edilərək
Fransaya göndərilməli idi.
General Qardan bir sıra digər tapşırıqlar da aldı və onun seçdiyi heyət
tapşırıqların mahiyyətinə uyğun olaraq toplanmışdı. General Qardan az
sonra səfərə yola düşmək hazırlığına başladı. Finkinşteyn müqaviləsinin
imzalanmasından təxminən bir ay sonra, iyun ayının 8-də general Qardan
Tehrana yola düşdü.
Mirzə Rzaxan Qəzvini Finkinşteyn anlaşmasının imzalandığı günlər-
də Fransa sarayının əyanları ilə bir sıra danışıqlar da apardı. Şahın
tapşırığına əsasən, Mirzə Rza xan şah qoşunlarının silaha olan ehtiya-
Mehman Süleymanov
28
cının ödənməsi, istehkam xidmətinin fransalılar
vasitəsilə yenidən
qurulması üçün fikir mübadiləsi apardı. Taleyranın yazışmalarına əsasən
belə bir qənaətə gəlmək olar ki, Mirzə Rza xan Fransadan 10 min ədəd
süngülü tüfəng istəməklə bərabər, bu tüfənglərin İran daxilində
istehsalının qurulması arzusunu da bildirmişdi (59).
General Qardanın rəhbərliyi altında müxtəlif ixtisaslı zabit heyətinin
İrana göndərilməsi haqqında Napoleonun qərarı isə şah elçisini xüsusilə
sevindirdi. Finkinşteyn anlaşmasının imzalanmasından sonra Fransa
hərbi nümayəndə heyətinin Tehrana göndərilməsi xəbəri Fətəli şahı və
Abbas Mirzəni də xüsusilə sevindirdi və onlarda Napoleonla hərbi
ittifaqın reallığına olan ümidləri daha da gücləndirdi. Çünki bu ittifaq
Rusiyanın Cənubi Qafqazdakı təcavüzünün qarşısını dayandırmağa real
yardım ola bilərdi.
Finkinşteyn anlaşmasına sadiqliyini bildirmək və onun icrası istiqa-
mətində ilk addımı atmaq məqsədilə Fətəli şah Fransa nümayəndələri ilə 20
min ədəd tüfəng alınması haqqında müqavilə imzaladı və Xark adasını da
fransalıların ixtiyarına verdiyini bəyan etdi. Amma bu alışlar son dərəcə
gizli şəkildə həyata keçirildi ki, ingilislər bundan xəbər tutmasınlar (60).
General Qardanı müşayiət edən 14 nəfərlik hərbi nümayəndə heyəti
1807-ci ilin sentyabrında Ərzuruma yetişdi və Ərzurum sərəsgəri Yusif
paşa tərəfindən çox hörmətlə qarşılandı. Burada çox dayanmadan general
Qardan Mirzə Rza xan Qəzvininin müşayiəti ilə Təbrizə doğru istiqamət
götürdü. General Qardan Abbas Mirzə tərəfindən çox təntənəli şəkildə
qarşılandı və o, Napoleonun məktubunu Abbas Mirzəyə təqdim etdi. Nü-
mayəndə heyəti Təbrizdə qaldığı günlər ərzində general Qardanla Abbas
Mirzə arasında bir sıra müzakirələr keçirildi, fransalı hərbçilər qoşunların
vəziyyəti ilə tanış oldular, qoşun düşərgələrinə baş çəkdilər, şah qoşunları
haqqında müəyyən məlumatlar əldə etdilər. Bir neçə gündən sonra
nümayəndə heyəti Tehrana doğru istiqamət götürdü. Abbas Mirzə
fransalı hərbçilərdən birinin onun yanında qalmasını xahiş etdi (61).
General Qardan və onun nümayəndə heyəti 1807-ci il dekabrın 4-də
Tehrana daxil oldu. Burada da o, şah sarayı tərəfindən böyük ehtiramla
qarşılandı. Əvvəlcə, şah Finkinşteyn müqaviləsini təsdiq etdi, anlaşmanın
şərtlərinə əsasən İran ərazisindəki ingilis ticarət şirkətlərinin ölkədən
çıxarılmasına başlandı, general Qardanla ticarət müqaviləsi imzalandı
(62).
Qacarların tarixi haqqında mötəbər mənbələrdən olan “Məəssər-e
Soltaniyyə” əsərinin müəllifi Ə.Dünbəli general Qardanın heyətinin
Təbrizə yetişməsi və Abbas Mirzə tərəfindən qarşılanması haqqında
müxtəsər qeydlər etmişdir. Amma bu müxtəsər qeydlər də onu göstərir