~ 39 ~
verilmişdir. Ən çox qəbul edilən modelə görə plazmatik membran üç
qatdan ibarətdir. Xarici və daxili qatın zülaldan, orta qatın isə lipiddən
ibarət olduğu müəyyən edilir.
Elektron mikroskopu vasitəsi ilə ayırd edilmişdir ki, plazmatik
membranın qalınlığı 75-80A
0
-ə yaxındır. Zülal qatların hər biri ayrı-
ayrılıqda 20A
0
, orta lipid qatlarında isə 35A
0
-ə bərabərdir.
Müəyyən edilmişdir ki, daxili və xarici qatlarda zülal molekulları bir
sırada, orta qatda isə lipid molekulları iki sırada yerləşir.
Hüceyrə membranı yarımkeçirici membran olub, xarici mühitlə
hüceyrə arasında mübadilə proseslərini tənzim edir və hüceyrənin daxili
mühitini sabit saxlayır. Maddələrin xarici mühitdən hüceyrəyə və
hüceyrədən xarici mühitə keçməsi osmos və diffuziya qanunları əsasında,
habelə faqositoz və pinositoz yolu ilə baş verir.
Sitoplazma və hüceyrə orqanoidləri
İşıq mikroskopunun çox da güclü olmayan böyütməsi ilə sitoplazma
ilk tədqiqatçılara homogen amorf maddə kimi görünmüşdür. Elektron
mikroskopu ilə sitoplazmatik matriksin incə quruluşu öyrənilmişdir və
məlum olmuşdur ki, sitoplazmatik matriks homogen və ya toz dənəcikləri
şəklində olur.
Sitoplazmanın 85%-i sudan, 10%-i isə zülallardan, qalan 5%-i isə
digər maddələrdən ibarətdir. Heyvan hüceyrələrində sitoplazma kolloid
maddə olub iki: daxili – endoplazma və xarici ektoplazma qatından
ibarətdir. Bunlar qalınlıqlarına görə fərqlənirlər. Sitoplazmanın
endoplazma hissəsində müxtəlif ölçüdə və quruluşda orqanoidlər:
endoplazmatik şəbəkə, Holci aparatı, mitoxondrilər, lozosomlar,
ribosomlar, hüceyrə mərkəzi və s. vardır. Bunlardan başqa, sitoplazmada
hüceyrə törəmələri – yağ damlaları, qlikogen, zülali kristallar və
piqmentlər olur.
Endoplazmatik şəbəkə
1945-ci ildə K.Porter öz əməkdaşları ilə birlikdə elektron mikros-
kopunda, hüceyrələrin mərkəzi hissəsində böyük miqdarda xırda vakuol və
kanal yığımı aşkar etmişlər. Onlar bir-biri ilə birləşərək çox da sıx
olmayan tor əmələ gətirir. Bu orqanel endoplazmatik tor və ya
endoplazmatik şəbəkə adlandırıldı. Endoplazmatik şəbəkə iki formada ola
bilər: qranulyar (nahamar) və aqranulyar (hamar).