204
Bacarmaq olmur
Görüşdük, danışdıq bağçada-bağda
Gül açdı arzumuz, diləklərimiz.
İllər ötüşsə də a dostlar bilin
Hələ çox cavandır ürəklərimiz.
Eşqin bəlasına düşdüm neyləyim
Peşman deyiləm,onu sevirəm.
Vaxtsız gedən köçü necə əyləyim?
Bu sual önündə durub əsirəm.
Sevən ürəklə də bacarmaq olmur
Axı sinədə yanan ocaqdır
Bu dünya sevgisiz heç zaman qalmır
Əbədi yaşayıb o qalacaqdır.
Götür-qoy edərək düşündüm dərin
Nə qədər gözəldir sevib yaşamaq.
Vurğunu olmuşam sevən gözəlin
Bu yükü çətindir, çətin daşımaq.
Eşqin badəsini vaxtsız içmişəm
Zəhər olub ancaq yenə bal dadıb.
Əzablı yolları yarıb keçmişəm
Bu yaşda sevməyim məni aldadıb.
205
Qınamayın məni əziz dostlarım
Bu yolda nələrdən keçdim biləsiz.
Qalmışam od ilə su arasında
Kömək istəyirəm yol göstərəsiz.
10.22.2005.
206
Bir gün gərəyin olar
Ayaq saxla, dur, dayan
Nura, şəfəqə boyan
Sevgin olsun Allaha
Batma heç vaxt günaha.
Məni özümdən aldın
Oda-alova saldın.
Sevginin nə olduğun
Ürəklərə dolduğun
Anlamayıb bilmədin
Görüşümə gəlmədin.
Hər bir sözün saxtadı
Yolun çovğun, şaxtadı
Məni sən anlamadın
Eşq oduna yanmadın.
Sevgim olub lal dinməz
Eşqin atəşi sönməz.
Əhdə vəfalıyam mən
Cövrü-cəfalıyam mən
207
Danış-danış, din bir az,
Sevgi cavabsız olmaz.
Bir gün məyus olarsan,
Bir gün tənha qalarsan.
Qoru sevgi adını,
Qoru ocaq-odunu.
Alışıb yanan eşqim,
Tənha qalan bu sevgim.
Yaxşı-yaxşı fikirləş,
Üzün qoy olsun güləş.
Fikir düşüncələrim,
Sənsiz olan günlərim.
Gəlib qəlbinə dolsun,
Bir gün gərəyin olsun.
06.04.2007.
208
Keçə bilmədim
Dilin bir söz dedi, ürəyin bir söz,
Hansına inanım keçə bilmədim.
Alışdı ürəyim yanıb oldu köz
Sənli günlərimdən keçə bilmədim.
Unutmaq istərkən qəmi-kədəri
Yarama duz səpib göynətdin dərin.
Dəlsə də sinəmi yalan vədlərin
Cücərən inamı biçə bilmədim.
Nə qədər olsan da nə qədər böyük
İstəməzdim görəm sözünə dönük.
Yaralı qəlbimi etsən də bölük
Ayrılıq şərbətin içə bilmədim.
24.09.2005.
209
Sevgilim
Gedirsən yolundan saxlamıram mən
Bunu bilməlisən sən əzəl gündən.
Saxta məhəbbətlə yaşamaram mən
Heyif ki, sən bunu etdin sevgilim.
Deyirsən sevirəm bəs onda niyə,
Bir ürəyi böldün iki hissəyə.
Açmadım dərdimi mən heç kimsəyə
Qəlbimi talan edib getdin sevgilim.
De necə unudum olub keçəni
Qara saçlarıma ələdin dəni.
Sevirdinsə niyə atıb sən məni
Başqa bir vüsala yetdin sevgilim.
05.02.2000.
210
Oğlan
Qəlbimi yandırır uzaq getməyin
Mənə ağır gəlir qəfil itməyin.
Bağrı qan lalə tək tənha bitməyin
Sevgi çiçəyimi solduran oğlan.
Bulaq tək qaynayan o qara gözlər
Məni yaşadırdı o şirin sözlər.
Könlümdən silinmir qoyduğun izlər
Qəlbimi həsrətlə dolduran oğlan.
Aramsız çalınan zəngə tutuldum
Elə bil qüssədən, qəmdən qurtuldum.
Sevincdən çeşmə tək axdım duruldum
Məni xəyallara daldıran oğlan.
05.06.2000.
211
Məzarımdadır
Həsrətli baxışın məni yandırır
Nəyi istədiyin mənə andırır.
Saxta gülüşlərin məni sındırır
Çırpınan ürəyim yollarındadır.
Sevgi alovunda alışdım, yandım
Cəfalı yollarda bezdim, usandım.
Əziz xatirəni ürəyim sandım
Əlinin izləri qollarımdadır.
Çəkmişdin sinəmə çal-çarpaz dağı
Şirin məhəbbətə qatdın sən acı.
Neynirəm son anda soyuq dodağı
Saxta öpüşlərin məzarımdadır.
18.07.2000.
212
Baxa biləydim
Ala gözlərinə mənim əzizim
Gecə də, gündüz də baxa biləydim.
O parlaq gözlərin dərinliyində
Bulaq tək çağlayıb axa biləydim.
Əhdi, ilqarımı saxla əmanət
Çaşıb saf sevgimə etmə xəyanət.
Nur saçsın qəlbinə mərdlik, dəyanət
Sevinci, sevincə qata biləydim.
Ağrılı keçsə də hər ötən günüm
Dünyanı bürüyüb fəryadım, ünüm.
Müqəddəs bu yoldan mən necə dönüm
Uyuyub sinəndə yata biləydim.
02.11. 2005.
Dostları ilə paylaş: |