59
XXI əsrin əvvəli MDM-in həcminin 2009-cu ildə 2,2%, inkişaf etmiş
ölkələrdə isə - 3,5% ixtisar olunması ilə yadda qalmışdır.
Qeyd olunmalıdır ki, istehsalın dalğavari xarakteri mənfəət dalınca
qaçaraq kapitalın həddən artıq artırılmasını və buna müvafiq olaraq
istehsalın lüzumsuz dərəcədə genişləndirilməsini ifadə edir. Böhran
nəticəsində istehsalın ixtisar olunması əsas kapitalın kütləvi surətdə
yeniləşdirilməsi ilə müşayiət olunur. Bunlar iqtisadi enib-qalxma
dalğalarının və dövrlərinin əsasını təşkil edir, məhsuldar qüvvələrin
səviyyəsinin yüksəldiyini, kapitalın təkrar istehsalın yeni şəraitinə uyğun-
laşdığını göstərir. Beləliklə, böhranlar təkrar istehsalın ziddiyyətlərinin
(istehsal və istehlak, istehsal və dövriyyə aralarında) həm milli təsərrüfatlar
çərçivəsində, həm də bütövlüklə dünyada zorakılıq yolu ilə həll olunmasıdır.
XX əsrin ikinci yarısında dalğada əhəmiyyətli dəyişikliklər baş
vermişdir. İstehsalın ixtisar olunmasının dərinliyi və davametmə müddəti
azalmışdır. Məsələn, ABŞ-da 1845-1945-ci illər ərzində orta iqtisadi böhran
21 ay, 1945-2000-ci illərdə isə 11 ay davam etmişdir. Bunun əsas səbəbləri
istehsalın strukturunda baş verən dəyişikliklər, xüsusən də, ixtisara nisbətən
az məruz qalan xidmətlər sektorunun genişlənməsi, habelə istehsalın
azalması dövrlərində tələbin səviyyəsini saxlamağa imkan verən pul-kredit
və maliyyə tənzimlənməsinin güclənməsidir.
Milli təsərrüfatların istehsalın sənaye üsuluna keçməsi ilə əlaqədar
olaraq, K.Marks və K.Juqlyar tərəfindən ətraflı öyrənilmiş ortamüddətli
dalğalardan başqa, iqtisadi inkişafın inkişaf templərində uzunmüddətli
dalğalar (ilk növbədə inkişaf etmiş ölkələrdə) müşahidə olunmağa başlandı.
Rus alimi N. Kondratyevin adı ilə bağlı olan Kondratyev dalğaları 40-50
illik dövrü əhatə edir. Onların əsasında istehsalın elmi-texniki rejimlərinin
dəyişməsi durur. İstehsalda uzunmüddətli tənəzzüllərin baş verməsi 1814-
1848-ci, 1873-1896-cı, 1920-1930-cu və 1980-1990-cı illərdə müşahidə
olunmuşdur. Bu mərhələlər kapitalın 3 formasının: pul, məhsuldar və əmtəə
- hərəkətini əhatə edən struktur böhranlarının meydana çıxması ilə
səciyyələnir. Struktur böhranı məfhumu istehsal prosesinin bütün
həlqələrini: bilavasitə istehsalı, beynəlxalq əmək bölgüsünü, xarici iqtisadi
sahələri - əhatə edən böhran kimi təfsir olunur. Dünyada təsərrüfat
prosesinin mövcud sosial-iqtisadi parametrlərinin həm ümumdünya, həm də
milli səviyyələrdə baş verən dəyişiklikləri də buraya daxil edilir. Bu zaman
təsərrüfat mexanizmlərində dəyişikliklər baş verir. İqtisadi strukturun bu
köklü dəyişiklikləri müddətinin uzun olması fərqlənir və ortamüddətli bir
dalğanın hüdudlarından kənara çıxır.
60
2.6. Qlobal iqtisadi sistem konsepsiyası
Qlobal sistem kimi, dünya təsərrüfatı iqtisadi, inkişaf edən və
dinamik kateqoriyadır. Onun təkamülü, inkişafın bir mərhələsindən digərinə
keçməsi həmin dəyişiklikləri izah edən nəzəri konsepsiyaları ön plana
çıxarırdı. Ölkələr arasında iqtisadi münasibətlərin inkişafını və ayrı-ayrı
ölkələrin, ölkə qruplarının dünya təsərrüfatında tutduğu mövqeyi
aydınlaşdıran iki qrup konsepsiya mövcuddur. Birinci qrupa sahibkarlıq
subyektləri arasında beynəlxalq iqtisadi münasibətlərin inkişafını, dünya
təsərrüfatı sisteminin yaranmasının və inkişafının səbəblərini izah edən
nəzəriyyələr daxildir. Bunlar nisbi üstünlüklər (xərclər), istehsal amillərinin
nisbəti, texnoloji fərqlər, kapitalın hərəkəti nəzəriyyələridir.
Tarixən, dünya təsərrüfatı milli təsərrüfatların, yaxud onların
müəyyən qruplarının sistemi kimi nəzərdən keçirilmişdir. Buna görə də,
milli təsərrüfatların dünya sistemində tutduğu mövqe beynəlxalq əmək
bölgüsü nəzəriyyələri ilə yanaşı, bir çox başqa konsepsiyaların təhlilinin
əsasında durur. Bu nəzəriyyələrin ümumi mahiyyəti milli təsərrüfatların
dünyada fərqli mövqe tutmasıdır. Qlobal sistemin aparıcı konsepsiyaları
sırasına imperializm və neo-imperializm, modernləşmə və neo-təkamül
nəzəriyyələri, asılılıq, artım mərhələləri nəzəriyyələri, dünya sistemi, istehsal
üsulları, qarşılıqlı asılılıq, əməkdaşlıq, qloballaşma nəzəriyyələri daxildir.
_________________________________________________
İmperializm və neo-imperializm nəzəriyyələri
Bu nəzəriyyə dünyanın strukturunu aparıcı dövlətlər arasında yeni
bazarlar, xammal mənbələri, kapitalın tətbiqi sahələri, siyasi və mədəni
təsirin gücləndirilməsi uğrunda gedən mübarizə kimi izah edir. İmperializm
deyildikdə, inkişafın "inhisarların və maliyyə kapitalının hökmranlığının
bərqərar olduğu, kapital ixracının mühüm əhəmiyyət kəsb etdiyi, dünyanın
beynəlxalq trestlər tərəfindən bölgüsünün başlandığı və onun bütün
ərazisinin ən iri kapitalist dövlətləri arasında parçalanmasının başa çatdığı"
(V.İ.Lenin) mərhələ başa düşülür. İmperializm nəzəriyyəsinin baniləri
O.Bauer, R.Qilferdinq, V.Lenindir.
İmperializm nəzəriyyəsinin bir necə, o cümlədən Britaniya
imperiyasındakı prosesləri tədqiq etmiş C.Qobsonun təmsil etdiyi sosial-
liberal istiqamətləri mövcuddur. İmperializmin marksist nəzəriyyəsi bir çox
dünya nəzəriyyələrinə təsir göstərmişdir. Müstəmləkə imperiyaları
dağıldıqdan sonra imperializm nəzəriyyələrinin populyarlığı azaldı. Amma
imperializmin sadəcə müstəmləkə tabeçiliyi sistemi deyil, kapitalın
təcavüzünün təzahürü olduğu nəzərə alınsa, iqtisadi imperializmin bəzi
formalarının müstəmləkə imperiyaları dağıldıqdan sonra da mövcudluğu
mümkündür.