57
Qiymətləndirmə. Formativ qiymətləndirmə aparılarkən 38-45-ci səhifələrdə
verilmiş müvafiq qiymətləndirmə meyarları və səviyyələri
üzrə cədvəllərdən
istifadə məqsədəuyğundur.
Müəllim dərslikdəki “Evdə iş” başlıqlı tapşırığın evdə yerinə yetiriləcəyini
şagirdlərə xatırladır.
Mövzu: Cəfər Cabbarlı. “Ana” – 3 saat
Üçüncü saat: Tətbiq. Müzakirə. Yaradıcı iş
Standartlar
Təlim nəticələri
1.1.1.
Şeirdə tanış olmayan sözlərin mənasını lüğətlərdən, sorğu
kitablarından istifadə etməklə aydınlaşdırır.
1.1.2.
Şeiri ideya-məzmununa uyğun ifadəli oxuyur.
1.1.5.
Şeirdə bədii təsvir və ifadə vasitələrini müəyyənləşdirir.
1.2.3.
Şeirin təsir gücünün artmasında bədii təsvir və ifadə
vasitələrinin rolunu aydınlaşdırır.
1.2.4.
Şeirin mövzusunu, ideya-bədii xüsusiyyətlərini şərh edir,
onlara əsaslandırılmış münasibət bildirir.
2.1.2.
Şeirin
mövzusuna müqayisələr, ümumiləşdirmələr aparmaq-
la münasibət bildirir.
Dərsin gedişi
Ev tapşırığının yerinə yetirilməsi səviyyəsi təqdimatların dinlənilməsi və
müzakirəsi ilə müəyyənləşdirilə bilər. Müəllimin müvafiq qiymətləndirmə meyar-
larından istifadə etməsi məqsədəuyğundur.
Motivasiya, problemin qoyuluşu. Əvvəlki siniflərdən məlumdur ki, “Tətbiq.
Müzakirə. Yaradıcı iş” başlığı altında verilmiş tapşırıqlarda, əksər
hallarda,
müxtəlif xarakterli işlərin həyata keçirilməsi nəzərdə tutulur.
Bu qəbildən dərslərdə, adətən, motivasiyanın yaradılması, tədqiqat sualının
müəyyənləşdirilməsi daha çox diqqət yetirilən, vaxt ayrılan təlim işi – tapşırıq üzrə
həyata keçirilir. Bu mövqedən çıxış edən müəllim yığcam müsahibə aparmaqla ana
mövzusuna ədəbiyyatımızda həmişə böyük diqqət yetirildiyini və bunun
səbəblərini şagirdlərin xatırlatmalarına nail olur. Dərslikdəki “Düşünün” başlıqlı
sualı (Anaya həsr olunmuş əsərlərdə ümumi cəhətlər nə ola bilər?) müsahibəyə
cəlb edən müəllim şagirdlərin fəal iştirakı ilə tədqiqat sualının formalaşmasını
həyata keçirir.
Tədqiqat sualı: Ana mövzusunda yazılmış əsərlərin
ideya-məzmununda oxşar
cəhətlərin olmasına səbəb, sizcə, nədir?
Şagirdlərin fərziyyələri dinlənilir və qeydlər aparılır.
Tədqiqatın aparılması. Tədqiqat Xaqaninin “Ana” şeirinin oxusu ilə başlanır.
Oxu fərqli formalarda həyata keçirilə bilər; şagirdlərin fəal iştirakı ilə izahlı oxu,
fərdi səssiz oxu, ikihissəli gündəliyin tətbiqi ilə oxu və s. Oxu prosesində tanış
olmayan sözlərin mənasının aydınlaşdırılması, bədii təsvir və ifadə vasitələrinin
müəyyənləşdirilməsi həyata keçirilir.
58
Şeirin məzmununun öyrənilməsi, ideyasının müəyyənləşdirilməsi
üzrə işi də
fərqli variantlarda təşkil etmək mümkündür. Dərslikdə təklif olunmuş tövsiyələr
üzrə işin təşkili vaxta qənaət baxımından məqsədəuyğundur. Yəni oxuya ayrılan
vaxt başa çatdıqdan sonra şagirdlər kiçik qruplarda birləşərək şeirin məzmununa
aid suallar tərtib edirlər. Suallar və onlara hazırlanmış cavablar qrup sözçülərinin
təqdimatı əsasında müzakirə edilir.
Əsərin ideyasının müəyyənləşdirilməsi və müzakirəsi də bu qayda ilə həyata
keçirilə bilər. Bu məzmunda aparılan iş ədəbi nümunələrin (C.Cabbarlının “Ana”
şeiri ilə Xaqaninin “Ana” əsərinin) uğurla müqayisə edilməsinə imkan yaradır.
Əsərlərin müqayisəsi üçün əvvəlcədən əsasların (əlamətlərin)
müəyyənləşdirilməsi
vacibdir. Kiçik qrupların müəyyənləşdirdiyi əsaslar (əlamətlər) ciddi müzakirədən
sonra qəbul edilir. İşin icrasını isə hər qrup ayrıca yerinə yetirir və əldə etdiyi
nəticəni cədvəldə əks etdirir.
Məlumat mübadiləsi və müzakirə mərhələsində diqqət bu iki əsərin necə
müqayisə edildiyinə, müqayisədən çıxarılmış nəticəyə yönəldilir. Eləcə də deyilmiş
fikirlərin əlaqələndirilməsi, sistemə salınması, yanlış,
birtərəfli mülahizələrin
aradan qaldırılması həyata keçirilir.
Nəticənin çıxarılması, ümumiləşdirmənin aparılması mərhələsində indiyə
kimi səsləndirilmiş fikirlərin ümumiləşdirilərək vahid ideya halına salınması diqqət
mərkəzində saxlanılır. Şagirdlərdə belə bir qənaət möhkəmlənir ki, hansı dövrdə
yazılmasından asılı olmayaraq, anaya həsr edilmiş əsərləri birləşdirən cəhətlər çox
olur. Bu əsərlər məzmununa, bədii xüsusiyyətlərinə, ideyalarına
görə bir-biri ilə
yaxından səsləşir. Ananın mənəvi böyüklüyü, qüdrəti, ülviyyəti, tükənməyən övlad
sevgisi və nəvazişi bu mövzuda əsər yazan bütün sənətkarların diqqətini çəkən
mühüm cəhətlərdəndir.
Çıxarılmış nəticələrin fərziyyələrlə, tədqiqat sualı ilə müqayisəsinə vaxt ayrılır.
Yaxşı təşkil edilən, vaxtdan səmərəli istifadə olunan
dərsdə dərslikdəki
sonuncu tövsiyəni – C.Cabbarlının “Ana” şeirindən bir bəndin ifadəli oxusunu
həyata keçirmək mümkün olur. Şeirin ideya-məzmununu dərindən mənimsəyən
şagirdlərə bəndin oxusu üçün ifaçılıq vəzifəsini, səsin çalarlarını, fərqli keyfiyyət
qazanmasını müəyyənləşdirmək çətin olmur. Bəndin dərslikdə göstərildiyi
qaydada
cədvəldə yazılması, şərti işarələrdən istifadə olunması oxunu xeyli asanlaşdırır.
Bir neçə ifanın dinlənilib müzakirə edilməsi məqsədəuyğundur.
Qiymətləndirmə. Formativ qiymətləndirmə aparılarkən 38-45-ci səhifələrdə
verilmiş müvafiq qiymətləndirmə meyarları və səviyyələri üzrə cədvəllərdən
istifadə məqsədəuyğundur.
Müəllim dərslikdəki “Evdə iş” başlıqlı tapşırığın evdə yerinə yetiriləcəyini
şagirdlərə xatırladır.