İqtisadi nəzəriyyə
ECONOMICS
58
Mövzu 7. Dövlətin iqtisadi vəzifələri (funksiyaları)
7.1 Dövlətin iqtisadi siyasətinin zəruriliyi və mahiyyəti
7.2 İqtisadi siyasətin məqsəd və vəzifələri
7.3 Dövlətin iqtisadi siyasətinin istiqamətləri və yolları
7.4 Azərbaycan Respublikasının iqtisadi siyasətinin uğurları və perspektivləri
7.1. Dövlətin cəmiyyətin çoxsahəli təsərrüfat həyatında rolu və onun reallaşdırdığı
iqtisadi siyasət xətti, həmin siyasətin zəruriliyi, mahiyyəti, məqsədi, vəzifələri, fəaliyyət
mexanizmi iqtisadi nəzəriyyənin mühüm problemlərdən sayılır. Dövlətin iqtisadi
siyasətinin əsasında, cəmiyyətin sosial-iqtisadi həyatında baş verən mürəkkəb prosesləri
konkret faktlarla öyrənib ümumiləşdirən iqtisadi nəzəriyyə elmi durur. Elmi əsaslar
üzərində işlənib hazırlanan iqtisadi siyasət xətti, təkcə bu məsələlərin həlli yollarını
göstərməklə kifayətlənməyərək, eyni zamanda gözlənilə biləcək – işsizlik, inflyasiya,
istehsalın aşağı düşməsi, yoxsulluğun səviyyəsi kimi proseslərin qarşısını almaq, yaxud
bunların təsirini zəiflətmək istiqamətində konkret çıxış yollarını müəyyənləşdirə bilər.
Qeyd etmək lazımdır ki, dövlət siyasi-iqtisadi təsisat (qurum) kimi həmişə
olmamışdır və onun meydana çıxaraq, ayrı-ayrı ölkələrdə formalaşması bir sıra ciddi
səbəblərlə bağlı olmuşdur. Bu səbəblər sırasında ictimai əmək bölgüsünün dərinləşməsini,
təsərrüfat həyatının inkişafını, cəmiyyətin təbəqələşməsini, müxtəlif ölkələrlə ticarət
əlaqələrinin genişlənməsini, insanların tələbatlarının artmasını, onların hüquq və
təhlükəsizliyinin qorunmasını göstərmək olar.
Dövlətin özünün iqtisadi siyasəti ilə ölkənin təsərrüfat həyatında bilavasitə iştirak
etməsinə, yaxud onun iqtisadiyyatı tənzimləməsinə dair mövqelərin müxtəlifliyinə və fərqli
cəhətlərinə baxmayaraq, həmin fikirləri 3 qrupa ayırmaq mümkündür. Bir qrup alim və
mütəxəssislərin (A.Smit, A.Marşall, L.Mizens, F.Hayek və başqalarının) fikrincə,
ümumiyyətlə dövlət iqtisadiyyata qarışmamalı, onun işinə müdaxilə etməməlidir. Digər
qrupa daxil olanların (V.Zombart, B.Hildebrant, C.Keyns və onun davamçıları) fikrincə,
dövlət yaranmış yeni şəraitin tələblərinə uyğun olaraq, habelə sərbəst bazarın nöqsanlarını
aradan qaldırıb tənzimləmək üçün hökmən iqtisadiyyatın işlərinə qarışmalı, yeri gəldikcə
ölkənin təsərrüfatı problemlərinə müdaxilə etməlidir. Üçüncü qrupun (P.Samuelson,
V.Leontyev, L.Erxad, C.Helbreyt, K.Makkonnell, C.Soros və başqaları) fikrincə müəyyən
hüdudlar daxilində, habelə ictimai əhəmiyyət daşıyan təsərrüfat sahələrində dövlətin
iqtisadiyyatın fəaliyyətinə müdaxiləsi (tənzimləməsi) şübhəsiz məqsədəuyğun, hətta
zəruridir.
Nobel mükafatı laureatı Vasili Leontyev (ABŞ) yazmışdı: «Bazar münasibətləri
maraq küləyi ilə iqtisadiyyat gəmisinin yelkənlərini hərəkətə gətirir, dövlət tənzimlənməsi
isə gəminin sükanı rolunu oynayır... Küləksiz yelkənli gəmi yerindən tərpənməyəcək,
sükansız isə gəmini uğurla idarə etmək mümkün deyildir». Xeyriyyəçi və biznes adamı
Cors Soros göstərir ki, dövlətin iqtisadi proseslərə qoşulmaması özbaşınalıq, hədsiz
qarışması isə hökm, əmr, inzibatçılıq sistemi yaradır. Onun fikrincə, «bazar ağalığı (market
fundamentalist) meylləri müasir iqtisadiyyat üçün doğru sayıla bilməz. Ona görə də elə
yollar axtarılıb tapılmalıdır ki, bazar və dövlətdə olan dağıdıcı (mənfi) cəhətlər birləşərək,
iqtisadi inkişaf üçün yaradıcı (müsbət) qüvvəyə çevrilsin».
İqtisadi nəzəriyyə
ECONOMICS
59
Doğrudan da bir tərəfdən bazar münasibətləri iqtisadi sistemi ona xas olan
inhisarçılıq meylləri, sosial ədalətsizlik, işsizlik, inflyasiya kimi nöqsanlar, digər tərəfdən
isə inteqrasiya və qloballaşma prosesləri, beynəlxalq bazarda rəqabət mübarizəsi, milli
təhlükəsizlik problemləri, informasiya-məlumat toplamaq zəruriliyi, iqtisadiyyatın dövlət
tənzimlənməsini irəli sürür. Eyni zamanda dünya ölkələrinin təsərrüfat təcrübəsi sübut
etmişdir ki, dövlətin iqtisadiyyata zəif (biganə) təsiri ölkənin normal təsərrüfat həyatında
hərc-mərclik (xaos) vəziyyəti yaratdığı kimi onun güclü müdaxiləsi (həddsiz qarışması) da
yolverilməz olub, cəmiyyətdə insanların iqtisadi sərbəstliyinə, təşəbbüskarlığına, işgüzar
sahibkarlıq-biznes fəaliyyətinə aşkar əngəllar törədir. Ona görə də dövlət öz iqtisadi
siyasəti ilə ölkənin təsərrüfat həyatının «oyun qaydalarını» müəyyənləşdirir və bu qayda-
qanunlara əməl olunmasına müvafiq orqanları vasitəsilə nəzarət edir. Dövlətin iqtisadi
siyasəti, ölkənin təsərrüfat həyatında fəaliyyət göstərən subyektlər (iştirakçılar, agentlər)
tərəfindən könüllü (şüurlu), yaxud qanunvericilikdə nəzərdə tutulan müvafiq məcburi
(icbari) qaydalarla həyata keçirilir.
Deməli, iqtisadiyyatın dövlət siyasəti səviyyəsində tənzimlənməsinin mahiyyəti –
bazar münasibətləri şəraitində qanunverici, icraedici və nəzarət xarakterli tədbirlər
vasitəsilə, müxtəlif dövlət orqanlarının, təşkilatlarının ölkənin təsərrüfat həyatı
problemlərinin həllinə təsir göstərməsi, nizamlamasıdır. Bu proses dünya miqyasında
tarixən 3 iri mərhələ keçmişdir.
Birinci mərhələ, dövlətin hələ iqtisadi məsələlərə və ölkənin təsərrüfat həyatına
qarışmamaq dövrünü əhatə edir. Son 250-300 ili əhatə edən bu mərhələ XIX əsrin sonu
XX əsrin əvvəllərinə qədər davam etmişdir. Bu mərhələnin təsərrüfat həyatının əsas
prinsipi iqtisadi sərbəstlik və bazarda formalaşan qiymətlər hər şeyi həll edir ideyası
olmuşdur. Dövlətin iqtisadiyyatın gedişi prosesinə qarışmamaq siyasəti xətti, « faissez-
faire» (fransızca «necə gedirsə qoy elə də getsin», yaxud « bizi sakit buraxın» deməkdir)
kimi ifadə olunaraq, ilk mərhələdə dünyanın əksər ölkələrinin, xüsusilə də Avropa və
Şimali Amerika dövlətlərinin iqtisadi fəlsəfəsi olmuşdur.
İkinci mərhələ, dövlətin iqtisadi siyasəti və ölkənin təsərrüfat həyatının
tənzimlənməsinə dair C.M.Keynisin adı ilə bağlı keynsçilik ideyaları dövrü kimi
səciyyələnərək, XX əsrin 30-cu illərindən 70-ci illərinə qədər olan müddəti əhatə edir.
Birinci dünya müharibəsinin ağır sosial-iqtisadi nəticələri, xüsusilə 1929-1933-cü illərdə
bütün dünya iqtisadiyyatını sarsıtmış böhran göstərdi ki, bazar münasibətləri sistemində
iqtisadiyyatın kortəbii surətdə öz-özünü tənzimləməsi yolunda aşkar çətinliklər meydana
çıxdığından, dövlətin iqtisadi proseslərə qarışması zəruridir.
Üçüncü mərhələ, ötən əsrin 70-ci illərindən başlayaraq XXI əsrin əvvəllərinə qədər
olan dövrü əhatə edir. Vaxtilə iqtisadi nəzəriyyədə və dövlətin ölkənin təsərrüfat həyatının
tənzimlənməsində çevriliş yaratmış keynsçilik ideyaları, artıq XX əsrin ikinci yarısının
yaratdığı mürəkkəb problemləri həll edə bilmirdi. Dövlətin iqtisadiyyata getdikcə güclənən
təsir və müdaxiləsi isə onun iqtisadi-sosial səmərəliliyi baxımından istənilən, habelə
gözlənilən nəticələri vermirdi. Bu mərhələdə ABŞ iqtisadçısı, Nobel mükafatı laureatı
Milton Fridmenin belə bir nəzəriyyəsi geniş yayılmağa başladı ki, dövlət yalnız ölkənin
tədavül dairəsində olan pul kütləsini nizamlamalı, başqa məsələlərdə isə istehsalçıların
işinə qarışmamalı və təsərrüfat həyatına müdaxilə etməməlidir. Monetarizm adlanan bu
nəzəriyyənin tərəfdarları iqtisadiyyatın qiymət, inflyasiya, işsizlik, gəlirlərin formalaşması
Dostları ilə paylaş: |