89
sənədlərin başqa növlərini də meydana çıxarır. Biblioqrafik informasiyanın
dolğunluğunu
təmin etmək üçün, cari biblioqrafik göstəricilərin də nəzərdən
keçirilməsi arzu olunur. Seçilən biblioqrafik informasiyanın yalnız dolğunluğu
deyil, relevantlığını da təmin etmək vacibdir. Bunun üçün biblioqraf əlaqədər
problemlərə yaxşı bələd olmalı, ədəbiyyatda rast gəldiyi terminləri başa
düşməli, onları istifadəçilərin sorğusunda ifadə edilmiş terminlərdə düzgün
müqayisə etməyi bacarmalıdır.
Biblioqrafik informasiya resursları ilə mükəmməl kitabxana-
biblioqrafiya xidməti göstərmək üçün, sorğuların ödənilməsinə yönəlmiş
dolğun sənəd fondunu komplektləşdirmək, kitabxana
fondunu bütünlüklə açan
kataloq-kartoteka sistemini (ənənəvi və elektron) yaratmaq, daim yeniləmək
və kitabxananın saytı vasitəsi ilə axtarışı təmin etmək, soraq-biblioqrafik
nəşrlər fondunu komplektləşdirmək və daim yeniləmək, müxtəlif mövzulu
biblioqrafik vəsaitlər (göstəricilər, bülletenlər, biblioqrafik siyahılar) tərtib
etməklə, tammətnli elektron biblioqrafik sənəd-informasiya resurslarını
yaratmaq,
mütəmadi olaraq yeniləmək, onlayn biblioqrafik sorğuları ödəmək
və ədəbiyyatı virtual sifariş etmək lazımdır. Kitabxanada yaradılmış həm
tammətnli, həm də biblioqrafik informasiya mənbələrinə girişi təmin etmək,
soraq-biblioqrafik, biblioqrafik informasiya və sənədlərin elektron çatdırılması
xidmətini həyata keçirmək, kitabxana-biblioqrafiya proseslərinin kompleks
şəkildə avtomatlaşdırılmasına imkan verən kompüter şəbəkəsini qurmaq və
təkmilləşdirmək də nəzərə alınmalıdır.
Bütün tip kitabxanalarda olduğu kimi MKS-lərdə də soraq biblioqrafiya
aparatı (SBA) biblioqrafik fəaliyyətin əsas bazası hesab edilir. Müasir
texnologiyanın, xüsusilə kompüter texnologiyasının
biblioqrafik proseslərə
tətbiqi MKS-in soraq biblioqrafiya aparatının məzmununu daha da
zənginləşdirir. Fondun həcmindən, kitabxanaların tipindən və profilindən asılı
olmayaraq onun soraq və biblioqrafiya aparatının tərkibinə həm ənənəvi, həm
də elektron vasitələr daxildir: əlifba kataloqu, sistemli kataloq, elektron
kataloq, kartotekalar sistemi (ümumi,
sistemli, diyarşünaslıq, elektron və s.)
soraq-biblioqrafik nəşrlər fondu (məlumat kitabları, ensiklopediyalar, metodik
və biblioqrafik nəşrlər fondu), ödənilmiş arayışlar fondu və s.
Hər bir kitabxanada biblioqrafik iş əvvəlcədən tərtib olunmuş plan
əsasında aparılmalıdır. Planlaşdırılan işin elmi cəhətdən əsaslandırılması
kitabxananın real şəraitini və imkanlarını nəzərə almağı, biblioqrafik nəzəriyyə
və təcrübənin nailiyyətlərindən istifadə etməyi, mütərəqqi texnologiyaların və
qabaqcıl iş təcrübələrinin tətbiqini nəzərdə tutur.
Kitabxananın biblioqrafik fəaliyyətinin inkişafı istiqamətlərini, SBA-nın
təkmilləşdirilməsinə dair əsas tədbirlər, tərtib olunması planlaşdırılan
biblioqrafik vəsaitlərin
xarakteri və mövzusu, innovativ biblioqrafik
informasiya xidməti və s. əks etdirir.
MKS-də biblioqrafik fəaliyyət aşağıda göstərilən kimi planlaşdırılır:
1. Soraq-biblioqrafiya xidməti;
90
2. Biblioqrafik informasiya xidməti (2, s.136).
Soraq-biblioqrafiya xidməti məlumat tələbatçılarının birdəfəlik sorğusu
əsasında olan biblioqrafik xidmətdir. Soraq-biblioqrafiya xidməti sorğu-cavab
rejimində yerinə yetirilməklə arayışlar hazırlamaq şəklində həyata keçirilir.
Arayış - biblioqrafik və ya faktoqrafik məlumatı əks etdirən biblioqrafik
axtarış zamanı əldə edilən, oxucu sorğusuna müvafiq cavabdır. Yerinə
yetirilmə formasına görə arayışlar şifahi və yazılı olur. Şifahi arayışlar bir
qayda olaraq operativ şəkildə və oxucunun iştirakı ilə yerinə yetirilir. Yazılı
arayışlar isə mürəkkəb olduğundan müəyyən müddət ərzində hazırlanır. Yazılı
biblioqrafik arayışların hazırlanması aşağıdakı mərhələlərə bölünür:
1. Sorğunun qəbulu:
Sorğu qəbul edilərkən, onun mövzusu, məqsəd və
vəzifəsi, əhatə dairəsi dəqiqləşdirilməli, bu məqsədlə tərtib edilmiş xüsusi
qeyd dəftərində yazılmalıdır;
2. Sorğu ilə əlaqədar əsas mənbələrin aşkar edilməsi və seçilməsi: Bu
mərhələdə kitabxana işçisi sorğunun ödənilməsi üçün hansı mənbələrə
müraciət ediləcəyini müəyyənləşdirir. Bu mənbələr salnamələr, məlumat
kitabları,
biblioqrafik vəsaitlər, məlumat nəşrləri, dərsliklər, kataloq sistemi və
s. ola bilər;
3. Ədəbiyyatın aşkara çıxarılması və seçilməsi: Bu zaman kitabxanaçı
axtarış apardığı mənbələrdən aktual, sorğuya bilavasitə uyğun ədəbiyyatı
seçməlidir;
4. Sorğunun tərtibi: Sorğu tərtib edilərkən biblioqrafik təsvirlərin
dəqiqliyini, ədəbiyyatın müvafiq qayda əsasında düzülüşünü təmin etmək
lazımdır.
Arayış tərtib edilərkən istifadə edilən
mənbələrin göstərilməsi
unudulmamalıdır. Biblioqrafik arayış mütləq iki nüsxədə hazırlanmalı və bir
nüsxəsi soraq-biblioqrafiya aparatının ödənilmiş sorğular fondunda
saxlanılmalıdır.
Oxucu sorğularına uyğun olaraq arayışların iki növü var:
1. Biblioqrafik arayışlar;
2. Faktoqrafik arayışlar.
Tələb olunan və verilən informasiyanın xarakterindən asılı olaraq
biblioqrafik arayışlar da üç növə ayrılır:
1. Mövzu arayışı;
2. Dəqiqləşdirmə arayışı;
3. Ünvan arayışı.
Yerinə yetirilən arayışların böyük hissəsi mövzu arayışlarından ibarət
olur. Bu arayışlar müxtəlif problemlərə həsr olunur. Mövzu sorğularının
məqsədi olduqca müxtəlifdir: elmi iş, istehsalata kömək, mühazirə və ya çıxışa
hazırlıq, şəxsi təhsil, tədris işi və s. Kitabxanada yerinə yetirilən arayışların
digər qismini biblioqrafik ünvan arayışı təşkil edir. Bu arayışlar oxucuya
məlum olan sənədlərin və ya onun bir hissəsinin kitabxana fondunda
yerləşdiyi yeri müəyyən etməyə xidmət edir. Belə arayış biblioqrafik ünvan