88
aydınlığını və şəffaflığını göstərir. «Varlıq» hər səhifəsində
ədəbi dilin nə qədər təbii olduğunu bir sənəd kimi ortaya
qoyur. Bir sözlə, «Varlığ»ın ədəbi dilimizin
populyarlaşmasında oynadığı rol danılmazdır.
Mən bir məqamı, incə bir nüansı da xüsusi vurğulamaq
istəyirəm. Heç şübhəsiz, «Varlıq» jurnalını nəşr etmək doktor
Cavad Heyət üçün heç bir yöndən asan olmayıb. O,
həkimliyindən, alimliyindən qazandığını «uf» demədən bu
jurnalın məsrəflərinə sərf edib, məcazi dillə desək, millətin
varlığına xərcləyib. Mən hələ istirahətindən, dincliyindən
kəsdiklərini, mənəvi narahatlıqlarını, əzab-əziyyətlərini
demirəm. Bu mənada, Cavad Heyət qəhrəmandır. Yorulmaq
bilmədən öz məsləki uğrunda mübarizə aparan və sonda qalib
gələn qəhrəman. Eşq olsun zəmanəmizin bu fədakar
qəhrəmanına!
Onu da mütləq qeyd etmək lazımdır ki, «Varlıq» həm də
qaranquş olub. Onun ardınca İranda ana dilində onlarla mətbu
orqanı, qəzet, jurnal çap olunmağa başlayıb.
«Varlığ»ın daha bir böyük xidməti isə ondan ibarətdir ki,
o, Şimali Azərbaycanın istiqbal mübarizəsini də öz
səhifələrində müdafiə etdi, erməni təcavüzünü pislədi. Bu gün
də öz mövqeyində qalır.
Oxucuları ilə dil tapan, onların qəlbinə hakim olan
mətbu orqanı «Varlıq» Azərbaycanda da böyük maraqla
oxunur. Dərgidən seçmə nümunələr müntəzəm olaraq qəzet və
jurnallarda dərc edilir, geniş oxucu kütləsinə çatdırılır,
Beləliklə, fədakar yaradıcılığın bəhrəsi olan «Varlıq» xalqın
varlığını, onun haqq səsini, mənəvi istəklərini ifadə edir. Elin
sevincinə, dərdinə şərik olan, mənəvi yaralarına məlhəm
qoyan, ona keçmişini, bu gününü anladan, sabahının yolunu
göstərən nüfuzlu bir söz kürsüsüdür «Varlıq».
Bir daha qeyd edirəm, doktor Cavad Heyət öz
89
həmkarları ilə birlikdə «Varlığ»ın səhifələrində Azərbaycanın
tarixi, ədəbiyyatı, dili və folklorunun öyrənilməsinə silsilə
məqalələr həsr etmiş, bu sahədə bir akademiyanın görə
biləcəyi işi görmüşdür. Azərbaycan ziyalıları bu əvəzsiz
mənəvi sərvətlərə görə böyük ustad Cavad Heyətə və
«Varlıq» dərgisinin müəlliflər heyətinə son dərəcə
minnətdardırlar.
Doktor Cavad Heyət böyük alimdir. Onun türkoloji
araşdırmalara dair üç yüzə qədər, tibbə aid isə yüzə yaxın
məqaləsi, elmi əsəri müxtəlif illərdə İran, Türkiyə,
Azərbaycan, Avropa ölkələri və Amerikada yayımlanıb. Onun
türkologiyaya aid kitablarını məxsusi qeyd etmək istəyirəm:
iki cilddə «Azərbaycan ədəbiyyatı tarixinə bir baxış»,
«Azərbaycan şifahi xalq ədəbiyyatı», «Türklərin tarix və
ədəbiyyatına bir baxış», «Ədəbiyyatşünaslıq», «İki dilin
müqayisəsi», «Türk dili və ləhcələrin tarixi». Bu kitabların hər
biri ayrı-ayrılıqda Azərbaycan ədəbiyyatının, ana dilinin
tədqiqinə, araşdırılmasına həsr olunan, böyük əhəmiyyət kəsb
edən əsərlərdir. Və alimin bu əsərləri indi əl-əl gəzir.
Cavad Heyət dostu və həmkarı, rəhmətlik H.Nitqiylə
birlikdə İranda elmi türkologiyanın əsasını qoyub. O, 1993-cü
ildə Türkiyənin Tehran böyük elçisi Korkmaz Haktanırla
birgə Tehranda Türk Kültür Mərkəzini açır. Cavad Heyət
türkologiya sahəsində apardığı araşdırmalara və elmi
əsərlərinə görə Türk dili Qurumunun üzvü seçilib, İstanbul
Universiteti tibb və ədəbiyyat fakültələrinin altun və fəxri
diplomlarını alıb, Azərbaycanın bir neçə nüfuzlu
universitetinin fəxri professor və doktoru seçilib, bir çox
önəmli elmi-mədəni qurumların mükafatlarına layiq görülüb.
Cavad Heyət Vətənimizdə çox sevilir, olduqca hörmətli
tutulur. O, 1982-ci ildən Azərbaycan Elmlər Akademiyasının
Nizami adına Ədəbiyyat İnstitutunun Elmi Şurasının, 1992-ci
90
ildən Azərbaycan Yazıçılar Birliyinin fəxri üzvüdür. Cavad
Heyət Azərbaycan mədəniyyəti və elminin inkişafındakı
xidmətlərinə, İran-Azərbaycan mədəni-ədəbi əlaqələrinin
möhkəmləndirilməsindəki fəaliyyətinə görə 1991-ci ildə Milli
Yaradıcılıq Akademiyasının fəxri akademiki, 1992-ci ildə
Bakı Dövlət Universitetinin fəxri doktoru, 1993-cü ildə
N.Tusi adına Azərbaycan Pedaqoji Universitetinin, 1994-cü
ildə N.Nərimanov adına Tibb Universitetinin,
Y.Məmmədəliyev adına Naxçıvan Dövlət Universitetinin,
Bakı Xəzər Universitetinin fəxri professoru, Azərbaycan
Cərrahları Elmi Cəmiyyətinin fəxri üzvü seçilib. Bakı
universitetlərində professor-müəllim heyəti ilə görüşləri,
tələbələr qarşısında maraqlı mühazirələri, xəstəxanalardakı
uğurlu cərrahiyyə əməliyyatları alimi daha da sevdirib. Cavad
Heyətin Bakıda tələbələr qarşısında “Kitabi-Dədə Qorqud”un
yaranma tarixi və s. mövzularda oxuduğu mühazirələr həm
tarixi-filoloji, həm də linqvistik baxımdan xüsusi marağa
səbəb olub. İndiyədək onun çıxış və məruzələri mötəbər elmi
simpoziumlarda səslənib, İngiltərə, Fransa, eləcə də
Avropanın digər ölkələrinin ən nüfuzlu dərgilərində çap
olunub.
Bəli, doktor Cavad Heyət tibbi və türkologiya
sahələrində çalışmalarına görə dünyada, xüsusilə türk
dünyasında məşhurlaşıb, adını öz sağlığında ikən
əbədiləşdirib.
Doktor Cavad Heyət ana dilimizin böyük qayğıkeşi və
təəssübkeşidir. O, böyük vətənpərvərdir, xalqını, millətini,
Vətənini ülvi, təmiz, təmənnasız, alovlu məhəbbətlə sevən bir
övladdır, Azərbaycan oğludur. Onun bu böyüklüyü ilə bağlı
iki məqamı hər dəfə xatırlayanda çox təsirlənirəm. Birinci fakt
odur ki, Cavad Heyət «Varlığ»ın ilk sayında böyük
Azərbaycan şairi Bəxtiyar Vahabzadənin «Ana dili» şeirini
Dostları ilə paylaş: |