91
çap edib və bununla nə qədər misilsiz bir iş gördüyünü biz bu
gün də böyük məmnuniyyət və minnətdarlıqla dilə gətiririk.
İkincisi, Cavad Heyət 1971-ci ildə ustad Şəhriyarı ailəsi ilə
birlikdə Tehrana dəvət edir, onları 5 ay evində qonaq saxlayır.
Bununla da o, ustad Şəhriyarın yaradıcılığında yeni səhifə
açır, şairin ana dilində yazıb-yaratmasına şərait yaradır. Və
böyük Şəhriyar yenidən türkcə şeirlər yazmağa başlayır. Bu
böyüklüyü və xeyirxahlığı ilə Cavad Heyət elə özü dediyi
kimi, «fars şeirinin zirvəsinə çıxan və müasir İranın Hafizi.
sayılan» Şəhriyarı sanki yenidən bizə qaytarır. Ədəbiyyat
dünyamıza, söz sənətimizə «Heydərbabaya salam» adlı bir
sənət incisi, söz mirvarisi, çox müqəddəs bir əsər bəxş edir.
Doktor Cavad Heyət Qarabağ müharibəsi ilə bağlı
Azərbaycanın haqq səsinin dünya ictimaiyyətinə
çatdırılmasında da böyük fədakarlıq göstərib və göstərir.
İrandakı Qarabağ Müsəlmanlarına Yardım Komitəsinin sədri
kimi Cavad Heyət dünyanın bir çox dövlət başçılarına
müraciət edib. Onun 1993-cü ildə böyük ürək ağrısı ilə
Türkiyənin prezidenti cənab Süleyman Dəmirələ yazdığı açıq
məktubundakı sözləri həyəcansız oxumaq mümkün deyil:
«Mən bu sətirləri göz yaşlarımın qabağını ala bilmədən
yazıram və bu anda Allah-təaladan xalqımıza qurtuluş, ya
özümə ölüm istəyirəm». Cavad Heyət həmin məktubda
Azərbaycanı düşdüyü fəlakətdən çıxarmaq üçün səyləri
gücləndirməyə, «böyük dövlətlərin silahları ilə təpədən-
dırnağadək silahlanmış ermənilər qarşısında azərbaycanlıları
müdafiə edib, soyqırımına mane olmağa» çağırır.
Cavad Heyət 1992-ci ildə Qarabağ savaşının 180
yaralısının – Qarabağ əlilinin Tehranda pulsuz müalicəsini
təşkil edib, ən ağır yaralıları isə şəxsən özü əməliyyat edərək
həyata qaytarıb.
Mən onlardan birinin Cavad Heyət haqqında dediklərini
92
də unuda bilmirəm. Bu, Qarabağ müharibəsi əlili Maarif
Əliyevin sözləridir: «Mənim ağ ciyərim tamam dağılmışdı,
qara ciyərimdə də qəlpələr qalmışdı. Məni fevralın 2-də
operasiya elədi. Əməliyyat müvəffəqiyyətlə qurtarmışdı.
Əməliyyatdan sonra mən ayılmamışdım. Görün, Cavad Heyət
neyləmişdi. Mənimlə birgə Azərbaycandan gələn uşaqları
gətirmişdi ki, Azərbaycan dilində, Bakı ləhcəsində,
Azərbaycan ləhcəsində danışın. Maarif anasının, atasının,
bacısının, qardaşının adını çəkirdi, o adları siz də çəkin ki,
əsəblərinə toxunsun, bəlkə, narkozdan ayılsın. Cavad Heyət
həmin variantla məni narkozdan ayıltmışdı». Gəlin etiraf edək
ki, bu, həm də insan taleyinə biganə qalmayan humanist,
xeyirxah bir həkimin hərəkətidir, Cavad Heyət böyüklüyüdür.
Cavad Heyət Azərbaycana humanitar yardım
toplanılması, onun qaçqınlara, yaralılara və şəhid ailələrinə
çatdırılması işində böyük əmək sərf edir. Biz bütün bunlara
görə də ona çox borcluyuq.
Öz fəaliyyətində iki parlaq sahənin vəhdətini yaradan,
iki qütbü birləşdirən, ədəbiyyatı təbabət, təbabəti ədəbiyyat
qədər dərindən mənimsəyən, bilən Cavad Heyətin Bakıya hər
gəlişi əsl toy-bayrama çevrilir. O, müstəqil Azərbaycanın ən
əziz qonağı olur.
Bilirsiniz ki, on il əvvəl Doktor Cavad Heyətin 70 illiyi
Bakıda dövlət səviyyəsində, Azərbaycan ziyalıları və elmi
ictimaiyyətin iştirakı ilə geniş qeyd edildi. Dövlət Televiziyası
ilə nümayiş etdirilən bu yubiley gecəsinə bütün Azərbaycan
baxdı, bütün Cavadsevərlər baxdı, xalqımız bir daha bu Vətən
oğlunun qüdrətinin şahidi oldu.
Xalqımızın ümummilli lideri, dünyaşöhrətli siyasətçi
Heydər Əliyev də Cavad Heyət şəxsiyyətinə, Cavad Heyət
elminə, Cavad Heyət vətənpərvərliyinə yüksək dəyər verirdi,
ona böyük hörmətlə yanaşırdı. Ulu öndərimiz Cavad Heyəti
93
Bakıda qəbul edərkən xeyirxahlığına, Vətən üçün əhəmiyyətli
işlərinə və İranla Azərbaycan arasında dostluq körpüsü
yaratdığına görə ona minnətdarlıq etmişdi.
Doktor Cavad Heyətin qəlbi daim vətənpərvərlik ehtirası
ilə döyünür. O, bütün varlığı ilə xalqının xoşbəxtliyi üçün
çalışır.
Bir məqamı da nəzərə çatdırmaq istəyirəm: əgər Cavad
Heyət təkcə cərrah, həkim, təbib kimi fəaliyyət göstərsəydi,
yenə sənətin zirvəsində dayanacaqdı. Əgər Cavad Heyət təkcə
türkologiya ilə məşğul olsaydı, yenə tarixdə ən məşhur
türkoloq alim kimi qalacaqdı. Əgər Cavad Heyət təkcə
«Varlığ»ın naşiri olsaydı, yenə də Azərbaycanın ən sevimli
övladlarından biri olaraq tanınacaqdı. Yəni o, hər sahədə öz
sözünü böyük məharətlə, ustalıqla, peşəkarlıqla deyib.
Mənim bütün bunları sadalamaqda məqsədim var. Bu
gün Cavad Heyət ömrün zirvəsindədir! Və həm də
müdrikliyin zirvəsindədir. Ömrün zirvəsinə çatmaq olar,
amma öz sağlığında müdrikliyin zirvəsini kəşf etmək hər kəsə
nəsib olan xoşbəxtlik deyil. Amma Doktor Cavad Heyət bu
zirvəni kəşf edib. Və o, bu zirvəni kəşf etmək üçün nəfəs
dərmədən yol gəlib. İndi bu zirvədən dünyaya, onu sevənlərə
qürurla, alnıaçıq baxmağa tam haqqı var. Bu gün Cavad
Heyətin öyünməyə tam haqqı var.
Cavad Heyət yüksək səriştəli həkim-cərrah, filoloq-alim,
tarixçidir. O, indi də İran İslam Respublikası ilə Azərbaycan
arasında, Cənubi Azərbaycanla Şimali Azərbaycan arasında
mənəviyyat körpüsünə çevrilib. Qoy bu körpü sarsılmaz
olsun!
İki tayın ağsaqqalı, hamımızın iftixarı, müdrik insan! Biz
fəxr edirik ki, dövrümüzün ensiklopedik biliyə malik alimi,
görkəmli təbibi, alovlu vətənpərvər doktor Cavad Heyətin
müasirləriyik.
Dostları ilə paylaş: |