Nigora Erkaboyeva
Yüklə 1,71 Mb. Pdf görüntüsü
|
|
SO‘ZBOSHI Kishilik jamiyati taraqqiyotining o‘ziga xos bosqichi bo‘lgan bozor iqtisodiyoti har bir mutaxassisdan puxta bilim, yuksak kasbiy tayyorgarlikka ega bo‘lishni talab etmoqda. Zero, kuchli raqobatga asoslangan ijtimoiy tuzilmaning bu shaklida mutaxassislarning kasbiy salohiyati va mahorati ular tomonidan tashkil etiladigan faoliyat samaradorligini ta’minlovchi muhim omil sanaladi. Shu sababli mustaqillik yillarida O‘zbekiston Respublikasida amalga oshirilayotgan kadrlar tayyorlashga doir milliy siyosat asosini har tomonlama shakllangan, o‘zining puxta kasbiy bilim, malaka va mahoratga egaligini to‘la namoyon eta oladigan shaxslarni kamol toptirish g‘oyasi tashkil etadi. Malakali kadrlarni tayyorlashdan iborat yagona, yaxlit tizimda shubhasiz oliy ta’lim muassasalari alohida o‘rin tutadi. Binobarin, uzluksiz ta’lim tizimining aynan bu bosqichida bo‘lajak mutaxassislar ixtisoslik fanlari asoslarini ham nazariy, ham amaliy jihatdan puxta o‘zlashtirish imkoniyatiga egadirlar. Shunga ko‘ra bo‘lajak o‘qituvchilarni samarali tayyorlashda bu yo‘nalishda faoliyat olib borayotgan oliy ta’lim muassasalari, shuningdek, ixtisoslik fanlari o‘ziga xos ahamiyat kasb etadi. Ixtisoslik fanlari orasida “Pedagogik mahorat” fanining mavjudligi esa bo‘lajak o‘qituvchilarni amaliy-texnik jihatdan kasbiy faoliyatga tayyorlashning muvaffaqiyatli bo‘lishini ta’minlaydi. Bunda yagona shart – o‘quv mashg‘ulotlarining nazariy, texnik va texnologik nuqtai nazardan to‘g‘ri tashkil etilishi hisoblanadi. “Pedagogik mahorat: seminar va laboratoriya mashg‘ulotlari uchun ishlanmalar” nomli o‘quv qo‘llanmada ana shu shartning inobatga olinishi ko‘zda tutiladi. O‘quv qo‘llanmada “Pedagogik mahorat” fani bo‘yicha tashkil etiladigan ma’ruza mashg‘ulotlarining ishlanmalari berilgan bo‘lib, ular talabalar muayyan mavzularda fan asoslarini puxta o‘zlashtirishlariga yordam beradi. Ishlanmalarda talabalarning fan bo‘yicha o‘zlashtirgan nazariy bilimlarini boyitishga xizmat qiladigan ma’lumotlar o‘rin olgan bo‘lsa, laboratoriya mashg‘ulotlarining ishlanmalari ularni amaliy, texnik jihatdan kasbiy faoliyatga tayyorlashni ko‘zda tutadigan mashqlardan tarkib topgan. Muallif tomonidan o‘quv qo‘llanmada ma’ruza mashg‘ulotlarining samarali tashkil etilishiga erishish maqsadida har bir mavzu yuzasidan imkon qadar tayanch tushuncha va iboralarni qamrab olishga, talabalarda pedagogik faoliyatni muvaffaqiyatli tashkil etilishiga xizmat qiladigan ko‘nikma-malakalarning shakllantirilishini ta’minlovchi holatlarni inobatga olishga e’tiborni qaratilgan. Mazkur o‘quv qo‘llanma bo‘lajak o‘qituvchilar sifatida talabalar tomonidan “Pedagogik mahorat” fani asoslarining puxta o‘zlashtirilishida muhim amaliy manba bo‘la oladi. |