Sadə riyazi təsəvvürlərin formalaşması metodikası

Körpə yaşlılar qrupu üçün məşğələ nümunəsi

Mövzu:” Dovşana yemək tapaq”

Məqsəd: Şifahi göstərişə əsasən “içində”, “üstündə”, “altında”, “arxasında” tanış yerdə əşyaları tapmaq bacarığını möhkəmləndirmək.

Vəsait: dovşan oyuncağı, bir neçə kök (mulyaj və ya həqiqi), uşaq stolu, stullar, salfet.

Məşğələnin gedişi: Tərbiyəçi qrup otağına oyuncaq dovşanı gətirib uşaqlara deyir:

-Dovşan acıb, kök yemək istəyir.

Uşaqlardan birini çağırıb dovşanı stol arxasında oturtmağı təklif edir. Sonra tərbiyəçi dovşanın boynuna salfet salır və uşaqdan soruşur. Bəs, kök hanı? Sən otaqda kökü görürsən? (Yox) Mən də görmürəm. Gəl birlikdə dovşan üçün kök axtaraq. Mən kökün yerini deyəcəyəm, sən isə dovşan üçün kökü gətirəcəksən.

Diqqətlə qulaq as, kök haradadır:

-divanın üstündə balışın altındadır;

-stolun üstündəki qazanın içindədir;

-oyuncaq güşəsində soyuducunun içindədir;

-oyucaq güşəsində şkafın içindədir;

-stolun üstündəki şəklin arxasındadır.

Tərbiyəçinin göstərişi qrup otağında uşağı əhatə edən əşyalardan asılı olaraq müxtəlif şəkildə ola bilər. Əsas odur ki, köklər uşağın boyu səviyyəsində yerlərdə gizlədilsin. Sonda uşaq dovşan üçün nə qədər kök tapdığını və onun nə qədər kök yediyini aydınlaşdırmalıdır:

-İndi dovşanın nə qədər kökü var?

-Dovşan köklərinin hamısını yedi.Artıq onun kökü yoxdur.