Şərqdə və Qərbdə ictimai təşkilatlanma
Qərbdə cəmiyyətin təkmilləşməsi şəxsiyyətin təkmilləşməsinə gətirir.
Ər-Reyhani
Bəşəriyyət ictimai inkişafın müəyyən mərhələlərində özünüdərk səviyyəsinə yüksəlir. Daha sonra özünü dərk etməkdən məmnun qalmış cəmiyyət müəyyən bir dövr ərzində öz ətaləti ilə yaşayır. Gələcək bu günə pərçimlənmiş olur. Daxili potensial toplanır-toplanır, nəhayət, qərarlaşmış normaları aşmaq dərəcəsinə yüksəlir. İctimai paradiqmanın həlli bir normal cəmiyyətdən yeni normal cəmiyyətə keçid üçün zəmin yaradır. Hər şey elə bil ki, T.Konun konsepsiyası əsasında elmin inkişaf modelinə uyğun surətdə həyata keçir. Marksizmin irəli sürdüyü ictimai-iqtisadi formasiyalar nəzəriyyəsi də, Toynbinin sivilizasiyalar təlimi də cəmiyyətin diskret inkişafının ayrı-ayrı konkret təzahürlərini ifadə edir.
Hər bir insan həyatının mənası olmalı olduğu kimi, bütövlükdə bəşəriyyətin, ictimai inkişafın da məqsədi, mənası axtarılır. Buna bəzən sosial idealın müəyyənləşməsi, bəzən cəmiyyətin özünüdərki, bəzən tarixin mənası və məqsədi kimi yanaşılmışdır. Bəşər tarixinin əsasında dayanan ideya axtarışları XVII-XVIII əsrlərdə sosial ideal, utopiya formasında, XVIII-XIX əsrlərdə fəlsəfi fikir səviyyəsində daha çox (klassik alman fəlsəfəsinin timsalında) özünüdərkə gətirir.
Kortəbii proseslərlə yanaşı, cəmiyyətin təşkilatlanmasına xidmət edən yeni ideyalar da formalaşır. Sonra “ideya kütlələrə yiyələnir”, sonra inqilablar baş verir. Yeni quruluşlar yaranır, cəmiyyətdə müəyyən qanunlar, hüquq normaları bərqərar olur. İnsanların yeni nəsli artıq yeni sosial mühitdə dünyaya gəlir. Tədricən cəmiyyətlə insan arasında uyğunlaşma yaranır, hər cür ziddiyyət, fərq aradan qalxır.
Daha yeni ideya axtarışlarına da ehtiyac qalmır. İnsanlar öz mühitindən razı olduğundan əsas məqsəd bu mühitə uyğunlaşmaqdan ibarət olur.
«Mühitə, təbiətə uyğunlaşmaq» prinsipi heç də yeni olmayıb, hələ Heraklit tərəfindən irəli sürülmüşdür. Lakin Heraklit ictimai mühitdən deyil, təbii mühitdən, təbiətdən bəhs edirdi. Bu baxımdan, Heraklitin mövqeyi daha çox Şərq təfəkkürünə uyğun gəlir. Çünki Qərb sivilizasiyasının əsasında insanın təbiətə uyğunlaşmaq yox, təbiəti özünə uyğunlaşdırmaq əzmi dayanır. Diqqətlə yanaşıldıqda bu əzm tədricən insandan cəmiyyətə ötürülür və ictimai iradə kimi təzahür edir.
İctimai inkişafın müxtəlif mərhələlərində gah yeni ideya axtarışları gedir (bunlar milli ideya, sosial ideal, ideologiya və s. formalarda üzə çıxır), gah da müəyyən bir ideya ictimai müstəvidə gerçəkləşdikdən sonra onun praktik həyatı başlanır. Yəni, müəyyən bir tarixi dövr ərzində müəyyən ictimai paradiqma hakim olur və ideya axtarışları da məhdud miqyasda bu paradiqma çərçivəsində gedir. Belə cəmiyyəti «normal cəmiyyət» və ya insanlar tərəfindən qəbul edilən, normalarına əməl edilən «yaxşı cəmiyyət» adlandırmaq olar.
Bu yaxşı cəmiyyətin pis cəhəti ondan ibarətdir ki, burada insanlar yeni cəmiyyət modeli hazırlamır, yeni sosial ideyalar üçün tələbat yaranmır. İnsanlar cəmiyyəti olduğu kimi qəbul edir və onun içərisində itirlər. Cəmiyyətin şəxsiyyətlər üzərində dominantlığı yaranır.
Babaların ideya axtarışları öz bəhrəsini artıq verdiyindən, ideologiyalar artıq ictimai reallığa çevrildiyindən və hüquq müstəvisində təsbit olunduğundan, nəvələr ancaq bu hüquq normalarını öyrənmək və ona əməl etməklə kifayətlənirlər. Bəli, Qərb dünyasında klassik kapitalizm dövründə azadlıq idealları üçün standart qəliblər hazırlanmış və yeni nəsil artıq bu qəliblərdən çıxmışdır.
Qanunların aliliyi, hüquqi dövlət şəraitində, insanların hüquq və azadlıqları təmin olunduğu bir şəraitdə insanın cəmiyyətdən narazı qalması üçün elə bir əsas yoxdur. Cəmiyyət elə təşkilatlanmışdır ki, burada hər bir insan öz istedadını və qabiliyyətini reallaşdırmaq üçün şans qazanır. Ayrı-ayrı insanların fəaliyyəti toplanıb, vahid ictimai tərəqqi prosesini təşkil edir. Kumulyativlik prinsipi ödənilmiş olur. Kumulyativlik isə Qərb sivilizasiyasının ən böyük üstünlüyüdür.
Beləliklə, müasir Qərb cəmiyyəti sivilizasiyanın tələblərinə uyğunlaşmışdır. Əmək bölgüsünün düzgün təşkili, insanların müxtəlif sahələrdə ixtisaslaşması və bu peşəkar fəaliyyətlərin ən optimal toplanma variantlarının tapılması ictimai tərəqqiyə böyük təkan verir.
Qərb dünyası məhz ictimai tərəqqinin hesabına bu dərəcədə inkişaf edə bilmişdir. Şərq dünyası isə ayrı-ayrı şəxslərin tərəqqisi, insanların mənəvi kamilləşməsi yoluna üstünlük verməklə ictimai tərəqqinin optimal düsturunu tapa bilməmiş və ya heç tapmaq istəməmişdir. Kumulyativlik prinsipi ancaq Qərb dünyasına xidmət etmişdir.
Şərq ilə Qərbin müqayisəsi bir çox məqamlarına görə incəsənətlə elmin müqayisəsinə bənzəyir. Şərq daha çox incəsənətlə, Qərb daha çox elmlə səsləşir.
Kumulyativlik elmi fərqləndirən başlıca xüsusiyyət kimi çıxış edir. İncəsənətdə isə əsas şərt fərdilikdir. Sənət əsərləri hər biri özü-özlüyündə dəyərlidir. Onların toplanması fərdi keyfiyyətlərin unikallığını itirə bilər və sənət əsəri öz estetik dəyərindən məhrum olar.
«Elmin spesifikasından söhbət gedərkən o, bir qayda olaraq, fəlsəfə, din, incəsənət və əxlaqla qarşılaşdırılır. Bu zaman kumulyativlik xassəsi elmi bütün bu hadisələrdən fərqləndirən başlıca xüsusiyyət kimi çıxış edir. Bu gün orta məktəbdə oxuyan şagird fizika haqqında İ.Nyutona nisbətən daha çox məlumata malikdir. Sıravi elmi işçi, aspirant A.Eynşteynin nəzəriyyəsinə əlavələr edir, onun tətbiq dairəsini daha da genişləndirir. Başqa cür mümkün də deyil; hər hansı elm korifeyi elm binasında yeni bir mərtəbə tikirsə, sonrakı nəsil artıq bu yeni mərtəbədə rahat yerləşərək onun üzərinə yeni kərpiclər qoymaqla məşğul olur.
İncəsənətdə belə deyil. Bu günün hər hansı bəstəkarının L.Bethovendən və ya Y.Hacıbəyovdan daha mükəmməl musiqi bəstələməsi nəinki qanunauyğunluq deyil, hətta ağlasığmaz bir haldır. Müasir rəssamlar intibah dövrü rəssamlarından daha yaxşı çəkə bilsə idilər Rafaelin, Vinçinin, Mikelancelonun əsərlərinin qiyməti gün-gündən daha da artardımı? Hər bir yeni şair nəsli Füzulidən, Puşkindən qabağa getsə və ya, başqa sözlə, onların qalxdığı mərtəbədə dayanıb üstünə bircə kərpic də əlavə etsə idi, poeziya binası hara ucalardı? Ümumiyyətlə, vahid poeziya binasından, vahid musiqi abidəsindən danışmaq mümkündürmü? Xeyr. Sənət məmləkətində hər bir şairin, rəssamın, bəstəkarın ucaltdığı ayrıca məbədlər var ki, onlar bir-birindən seçilir və heç vaxt bir-birinin üzərinə toplanmır. Sənət əsəri hansı isə vahid bir binanın kərpicinə, nəhəng sənət maşının vintinə çevrilsə, öz bütövlüyünü və ahənginin itirər və daha sənət əsəri olmaz».25
Mükəmməl bir sənət əsərinin yaradılması ayrıca bir fərdin axtarışlarının bəhrəsi olur. İki-üç bəstəkar yığışıb bir yeni musiqi əsəri yaratmır. Orijinal rəsm əsərləri bir neçə rəssamın birgə müəllifliyi ilə ortaya çıxmır. Hətta böyük bir binanın, kompleksin inşasında ancaq bir memarın ideyası rəhbər tutulur. İcraçılar çox ola bilər. Lakin ideya müəllifi təkdir. Ona görə ki, yaradıcılıq prosesi o dərəcədə individualdır ki, sənətkarın, fərdin mənəvi-estetik dünyası ilə o dərəcədə sıx surətdə bağlıdır ki, burada iki müəllifin birgə fəaliyyəti mümkün deyil. Burada toplama cəhdi dəyərin artması yox, itməsi ilə nəticələnir.
Biz sənətdə yaradıcılığı ona görə Şərq təfəkkürü ilə müqayisə etdik ki, burada da fərdi-mənəvi dünya ön plana çəkilir. İnsanın dəyəri məhz onun mənəvi kamilliyində axtarılır. Uyğunluq bir də onunla əlaqədardır ki, burada optimal toplama mümkün deyil.
Qərbdə isə insanların müxtəlifliyi onların toplanmasına mane olmur. Çünki birləşmək, birgə fəaliyyət, qarşılıqlı əlaqə ictimai təşkilatlanmanın mühüm şərtlərindəndir. Hərə bir hava çalsa, ümumi dil tapmaq çətin olar. Müxtəlif alətlərdə, lakin eyni notlar əsasında çalmaq, vahid dirijora tabe olmaq Qərb üslubuna uyğun gəlir. Müxtəlif alətlərin səslərinin bir-birini tamamlaması simfonik effekt yaradır. Eyni alətin çoxlu sayda olmasından isə ən yaxşı halda sinxronluq yarana bilər. Yeni keyfiyyət isə ancaq simfonikliyin məhsulu ola bilər. Şərq eyniyyətin, Qərb isə müxtəlifliyin vəhdətinə nail olmağa çalışır. Birinci halda ayrıca bir şəxsin, ikinci halda bütövlükdə cəmiyyətin iradəsi təzahür edir.
Bəs Qərbdə birləşdirici amilin əsasında nə dayanır? Estetik şüurdan fərqli olaraq rasional idrak, elmi təfəkkür hamı üçün eyni olan struktura malik olduğundan bu müstəvidə adamlar eyni dildə danışırlar. Formal məntiq birləşdirici amilə çevrilir. Riyaziyyat bu birliyi daha da artırır. Riyaziyyat üçün baxılan obyektlərin təbiəti yox, onlar arasındakı nisbət önəmlidir. Qərb cəmiyyətinin bütövlüyü də məhz hər kəsin fərdi məzmununa toxunmadan ictimai münasibətləri tənzimləməkdən irəli gəlir.
Bütün elmlər ilk növbədə formal məntiqin və riyaziyyatın xidmətlərindən istifadə etdiyi üçün elm müxtəlif alimlərin eyni prosesdə iştirakına şərait yaradır. Ona görə də elmi əsərlərin bəzən bir neçə müəllifi olur. Bir əsərdə başqa əsərlərə istinad edilməsi isə elmi tədqiqatın zəruri şərtlərindəndir. Nəticədə hər bir əsər əvvəlkilərin davamı kimi ortaya çıxır. Müəyyən sahədəki bütün elmi əsərlər isə elə bil vahid bir elmi əsərin hissələrinə çevrilir.
Qərbdə insanların fəaliyyəti də vahid ictimai prinsiplər çərçivəsində həyata keçirildiyindən çoxlu sayda adamlar eyni bir ideyanın reallaşdırılmasına cəlb edilə bilirlər. Ayrı-ayrı insanlar bütövlükdə cəmiyyətin hissələri olurlar. Bu baxımdan, Şərqdə cəmiyyət insanların toplusu, Qərbdə isə insanlar cəmiyyətin hissələridir. Hissələrin vahid strukturda birləşməsindən bütöv mükəmməl bir sistem yaranır. Nəticədə Qərbdə cəmiyyət toplu yox, sistemdir. Şərqdə isə fərdi dünyalar bir-birinə bənzər olsa belə, hər biri özündə tamamlanan sistem olduğundan, onları üzvi surətdə birləşdirərək vahid dayanıqlı sistem yaratmaq olduqca çətindir.
Qərbdə ideya binanın ümumi strukturunu əks etdirir. Adamlar bu mükəmməl strukturun yaradılmasında vasitədir. Lakin şüurlu vasitələrdir. Şərqdə isə insanlar kərpicdən fərqli olaraq, müstəqil və orijinal struktura malik mükəmməl sənət abidələrini xatırlatdığından onlardan nə isə tikmək çox çətindir. Lakin qloballaşma gedir və Şərqdə də Qərbdəkinə bənzər böyük miqyaslı abidələr tikilməlidir. Şərqdə kərpiclər yoxdur. Ya çay daşları və daş-kəsək var, ya sal qayalar və sənət əsərinə çevrilmiş unikal abidələr – fərdi fəaliyyətlər var. Şərqin öz kiçik miqyaslı fərdi abidələrini çay daşı kimi istifadə etməyə əli gəlməsə də, qloballaşma dalğaları ağına-bozuna baxmır. Güclü sel fərdi özünəməxsusluqları və fərdi istiqamətləri aradan götürərək hamını eyni səmtə yönəldir, güclü sahə onları böyük təzyiq altında yapışdırır, birləşdirir. Kiçik iradələr böyük güclü bir iradənin təsir dairəsinə düşərək tərkisilah olunur, iradəsizləşir, mənsizləşirlər. Onlar kərpic kimi rahatca üst-üstə düzülə bilmədiyindən və ölçüləri də uyarsız olduğundan birləşdirici amil, sahə, yapışqan çox güclü olmalıdır.
Bəli, Qərb dünyası müxtəlifliyin vəhdəti kimi mövcuddur. Orada fərdi iradələr məhv edilmədən, fərdlərin öz təşəbbüsü ilə əlaqələndirilir, birləşdirilir. Təkcə fərdlərə münasibətdə yox, etnik qruplara, kiçik millətlərə münasibətdə də mədəni-mənəvi müstəvidə müxtəlifliyin saxlanılması mövqeyindən çıxış edən Qərb dünyası sosial-hüquqi müstəvidə eyniyyətin, vəhdətin tərəfdarıdır. Lakin bununla belə, başqa xalqlara münasibətdə hüquq bərabərliyi təlqin edən Qərb «kütləvi mədəniyyət» ixrac etməklə yeni müstəqillik əldə etmiş ölkələrin müstəqil mədəni-mənəvi simasının yaranmasına mane olur. Görünür, belə güman olunur ki, mədəni-mənəvi iradə qloballaşmaya doğru siyasi-hüquqi identifikasiya işinə mane ola bilər.
Qloballaşma–qərbləşmə şəraitində etnik qruplar, kiçik millətlər də, bax beləcə, hərəsi bir rəngə çalan çay daşları kimi qəlibə tökülərək betonlaşırlar. Fərdilik itir, müxtəliflik itir və dünən gözəllik sayılan özünəməxsusluq bu gün çatışmazlıq kimi ortaya çıxır. Bir qranit parçası, bir çay daşı kərpic və ya blok-beton kimi düzgün həndəsi biçimdə olmadığı üçün dəyərsizləşir, təhqirlərə məruz qalır. Onlar incə və mürəkkəb bir strukturda birləşərək nə isə böyük bir şey əmələ gətirə bilmədiyindən, sadəcə böyük bir şeyin içərisinə qatılaraq itib-batırlar.
Bəli, hərəsi bir havaya köklənmiş müxtəlif biçimli Şərq adamlarından vahid layihə əsasında bütöv bir sistem yaratmağın çətinliyi Şərq adamının dəyərini aşağı salır. Lakin digər tərəfdən, Qərb adamının vahid bir ideyanın (konstitusiya, hüquq, formal məntiq və s.) qəlibindən çıxmış standart kərpic olması Şərqlinin nəzərində bir çatışmazlıqdır.
* * *
Başqa bucaq altında baxdıqda bütün bu mülahizələrimiz olduqca paradoksal görünə bilər. Belə ki, bu gün fərdlərin hüquq və azadlıqlarından, müstəqilliyindən, fikir plüralizmindən, siyasi plüralizmdən məhz Qərb dünyasında danışılır. Məhz Qərb dünyası artıq neçə əsrdir ki, ayrıca götürülmüş insanların səadətini və xoşbəxt həyatını dövlətin və cəmiyyətin əsas vəzifəsi hesab edir və bu istiqamətdə məqsədyönlü fəaliyyət göstərir. Şərq ölkələri isə məhz insan hüquqlarının pozulması, fərdi azadlıqların məhdudlaşdırılması, hamının bir adamın (padşahın, monarxın) iradəsindən asılı vəziyyətə salınması faktlarına görə tənqid olunur. Və qloballaşmanın əsas pozitiv cəhətlərindən biri də bu ölkələrin sakinlərinə hüquq və azadlıq gətirmək, onlara azad iqtisadi rəqabətdə öz güclərini yoxlamaq şansı verməkdən ibarətdir.
Doğrudan da, paradoksaldır.
Onda bəs nə üçün şərqli obrazını çay daşları ilə müqayisə edirik?
Bəlkə ənənəviliyin təcəssümü olan Şərq adamlarının obrazını elə standart kərpiclər daha yaxşı ifadə edə bilər? Xeyr. Bütün məsələ də burasındadır ki, kərpic obrazı standartlığına görə seçilməmişdir. Onlar müxtəlif ölçülərdə və formalarda ola bilərlər. Əsas əlamət onun düzgün həndəsi formada olması, daha doğrusu, bir-birini tamamlaya bilməsi, üst-üstə yığıla bilməsidir.
Çay daşları isə əksinə, bir-birinə bənzəsə də, eyni ölçüdə olsalar da məhz sferik səthə görə üst-üstə yığılma üçün əlverişli deyildir. Onların hər birinin müstəqil kamillik əzmi (idealı) sferikliyə gətirir. Çünki kürə hələ Aristotelin qeyd etdiyi kimi, ən mükəmməl formadır. Özündə qapanan, özü bir kamil sistem olan, başqalarını inkar edən asket obrazıdır. Kub, parallelipiped, prizma və s. isə üst-üstə yığılaraq müxtəlif kombinasiyalar yaratmaq üçün daha əlverişlidir. Buradakı müxtəlif hissələrin hər biri müəyyən bir tamın hissəsi olduğunu dərk edir. Və öz mahiyyətini özündə yox, həmin tamda axtarır. Burada insan özünü cəmiyyətdə tapır.
Şərqdə isə hər bir insan özünü cəmiyyətdən daha çox, özündə və ailəsində tapır. İnsanlar daha böyük tamın hissəsi olmaq üçün hazır deyillər. Digər insanlarla münasibət şəxsi münasibət müstəvisində, iki tərəfin əlaqəsi kimi qurulur. İnsanlar bu şəxsi münasibətləri ümummilli, ümumictimai maraqlar kontekstinə salmır, dövlətçilik mövqeyindən çıxış etmirlər. Belə münasibətlər şəbəkəsi hüquq normalarına yox, daha çox dərəcədə əxlaq və ənənəyə söykənir.
Burada hər bir insan özü üçün lokal ictimai mühit yaratmalı və öz azadlığını bu mühitdaxili münasibətlər çərçivəsində ifadə etməlidir.
Lakin bütün məsələ də elə burasındadır ki, Qərb dünyasında insanlara, fərdlərə hüquq və azadlıq, sərbəst yaradıcılıq imkanları, azad rəqabət şansı məhz cəmiyyət vasitəsilə, dövlətin, cəmiyyətin əli ilə verilir. Azad ola bilmək üçün əvvəlcə azadlığın bir qismindən imtina etməli, digər insanlarla kompromisə gəlməli, birgə fəaliyyət düsturunu qəbul etməli, özünü dövlətdən və cəmiyyətdən asılı vəziyyətə salmalısan. Əvəzində dövlət və cəmiyyət də sənin qalan azadlığını, hüquqla məhdudlaşmayan azadlığını mühafizə edir.
İstənilən cəmiyyətdə, istənilən mühitdə heç kim mütləq azadlığa malik ola bilməz. Hegelin dediyi kimi, azadlıq dərk olunmuş zərurətdir. Əsas məsələ bu zərurətin hüdudlarını optimal şəkildə müəyyənləşdirməkdən ibarətdir. Karl Yaspers yazır ki, liberalizm, azadlıq və şəxslərin həyatının rəngarəngliyi – Qərb ənənəsinin böyüklüyüdür. (K.Yaspers bu mövqeyi həm də Maks Veberin mövqeyi kimi təqdim edir.)26
İctimai normalara, hüquq qaydalarına hamılıqla əməl olunduqda hər bir adam öz fəaliyyətinin azadlıq çərçivəsini müəyyənləşdirmək imkanı qazanır. Yəni, qanunla məhdudlaşdırılmayan hər şey azaddır. Şərqdə isə qanuna, hüquqi normalara mülayim münasibət ilk baxışda fərdi azadlıq dərəcəsinin daha yüksək olması görüntüsünü yaratsa da, əslində, azad fəaliyyət meydanı şəxsi münasibətlərin və adət-ənənənin qoyduğu əlavə məhdudiyyətlərlə xeyli sıxışdırılır. Başqası üçün qanun işləmədikdə bu sənin də azadlığını məhdudlaşdırmış olur. Lap az sayda adamların da azadlıq dərəcəsinin artması və ictimai normadan kənara çıxması, zərurət sferasındakı qeyri-müəyyənlik, əksəriyyətin azadlıq dairəsini də hədsiz dərəcədə məhdudlaşdırmış olur.
Burada saxlanma qanunu işləmir.
Qərbdə insanların fərdiliyi, azadlığı peşə fəaliyyətində, yaradıcı əməkdə, iqtisadiyyatda, elmdə özünü göstərirsə, və əksinə, ictimai həyatda, hüquq müstəvisində hamı eyni prinsiplərə əməl edirsə, Şərqdə azadlıq iddiası çox vaxt məhz hüquq normalarına münasibətdə özünü göstərir.
Qərbdə fərdi azadlıq dövlət və cəmiyyətlə vasitələnmiş olur. Fərdi iradənin özü ictimai şüura söykənir.
Dövlət və cəmiyyətlə vasitələnmiş fərdi azadlıqlar.
* * *
Necə ki, XIX əsrdə mexanika elmi öz inkişafının yüksək səviyyəsinə çatmış və bütün elmləri ehtiva etmək iddiasına düşmüşdü, eləcə də XX əsrin ikinci yarısında Qərb dünyasında formalaşmış cəmiyyət modeli özünü ən optimal model saymaqla, özündən razılıq səviyyəsinə gəlib çatmışdır. Vesternizasiyanı artıq bütün planet miqyasında yaymaq cəhdləri də bu özündən razılığın ifadəsidir.
Qərb idrakın, özünüdərkin elə məqamına çatıb ki, özünü şüurlu surətdə idarə edə bilir. Ona görə də bir böyrəyi çatmırsa və ya xəstədirsə, onu sağlam bədənlərdən transfer edir. Eləcə də sağlam ruh çatmırsa, mənəviyyat böhranı varsa, bu problemi yüksək mənəviyyatlı cəmiyyətlər hesabına həll etmək təşəbbüsü göstərir. Lakin mənəviyyat böyrək deyil ki, onu kəsib götürəsən. Onu kopiyalamaq da mümkündür. Bu mənada Qərb dünyası Şərqdən nə isə götürürsə, buna heç bir etiraz ola bilməz. Lakin öz xəstə mənəviyyatını Şərqə transfer edirsə, o, artıq yolverilməz haldır.
Özlərinin yaxşı hesab etdiklərini başqalarına da rəva görmək normal bir haldır. Lakin başqalarına bunu güclə qəbul etdirmək cəhdləri insan azadlığı haqqında idealların beynəlxalq miqyasda artıq öz əksliyinə çevrilməsindən xəbər verir.
Bəlkə başqa ölkələr üçün onlara daha çox uyğun gələn yeni cəmiyyət modelləri hazırlansa daha yaxşı olar?
Lakin bunun üçün yeni ideyalar lazımdır. Qərb dünyası isə indi ancaq hüquq normaları və hazır stereotiplərlə silahlanmışdır. Böyük fəlsəfələr dövrü arxada qalmışdır.
Fəlsəfəsizləşmiş, ruhsuzlaşmış, ideyasızlaşmış ictimai fikir yeni cəmiyyətlər üçün səciyyəvi olan yeni tendensiyaları, ictimai dramatizmi əks etdirmək iqtidarında deyil.
Yeni, böyük ideyalar böyük təxəyyülün məhsulu olur. Böyük şəxsiyyətlər və böyük fəlsəfələr dövrünü arxada qoymuş Qərb daha artıq bu missiyanı yerinə yetirmək iqtidarında deyil.
Bu gün bu yük, bu məsuliyyət Şərqin üzərinə düşür.
Lakin Şərq özünü itirmişdir. İncə strukturlu, unikal sənət abidələri böyük miqyaslı dəmir beton konstruksiyaların içərisinə qatılaraq ənənəvi əlaqələrdən məhrum olmuşdur.
Bəli, Şərq özünü itirmişdir. O, özünü tapa bilsə, xilas yolunu da tapacaq.
Sivilizasiya və cəmiyyət
Hər bir millətin inkişaf tarıxındə onun nailiyyətlərinin dünya sivilizasiyasının mühüm tərkib hissəsinə çevrildiyi çiçəklənmə dövrü olur.
Aida İmanquliyeva
Texnika inkişaf etdikcə və müasir kommunikasiya vasitələri yarandıqca, elə bil ki, dünya kiçilir.
Təkcə bir qəsəbə, bir şəhər daxilində deyil, həm də xalqlar və dövlətlər arasında əlaqələr artır, məsafələr azalır. Dəvə karvanları komfortabelli reaktiv təyyarələrlə əvəz olunduqca, insanların müxtəlif səbəblərdən yerdəyişməsi çoxalır. Digər tərəfdən, peyk ötürücüləri ilə teleyayımların və internetin açdığı böyük imkanlar məsafələri ümumiyyətlə aradan götürür. Nəticədə bəzən uzaq qitələrdə yaşayan adamlarla əlaqə və ünsiyyət ən yaxın qonşu ilə olduğundan çox olur.
Əlaqələrin artması müxtəlif siyasi rejimlərin, sosial quruluş formalarının, həyat tərzlərinin, düşüncə üsullarının, mədəniyyətlərin, əxlaqların, dini dəyərlərin daha çox qarşılaşmasına və birbaşa təmaslara şərait yaradır. Müxtəlifliklərin əlaqələnməsi bir tərəfdən qarşılıqlı zənginləşmə üçün şərait yaradırsa, digər tərəfdən, qarşıdurmanın artması yeni ziddiyyət və konflikt mənbələrinin yaranması üçün də səbəb olur.
Bir sözlə, əlaqələr artdıqca təkcə hansı isə bir ölkənin sakini indi özünü bütövlükdə Yer planetinin sakini kimi hiss etmək istəyir. Lakin hansı yolla; başqa xalqların dilini, mədəniyyətini, həyat tərzini mənimsəmək və onlara uyğunlaşmaq, yoxsa öz mədəni-mənəvi dəyərlərini bütün dünyaya yaymaqla? “Sivilizasiyaların toqquşması” ideyası da, “mədəniyyətlərin dialoqu” və “mədəniyyətlərin plüralizmi” ideyası da bu suala cavab axtarışında ortaya çıxır. Lakin əvvəlcə dünyada bir-birindən köklü surətdə və ya önəmli dərəcədə fərqlənən hansı düşüncə üsullarının, həyat tərzlərinin, mədəniyyətlərin olması və bunların əsas fərqləndirici xüsusiyyətləri öyrənilməlidir. Çünki hər bir xalqın, etnosun özünəməxsus spesifik cəhətləri olsa da, daha böyük miqyasda eyniyyət məqamlarının olması bir neçə böyük sivilizasiyalardan və mədəniyyətlərdən danışmağa imkan verir.
Belə bölgülərdən biri də xeyli dərəcədə rəmzi səciyyə daşıyan Şərq və Qərb düşüncəsi, Şərq və Qərb sivilizasiyalarıdır. Milli və ya dini bölgülərdən fərqli olaraq, burada cəmiyyətin inkişaf səviyyəsi və tutduğu inkişaf yolu mahiyyət göstəricisi kimi ön plana keçir.
Qərb sivilizasiyasını şərtləndirən, onun Şərqə nisbətən üstünlüyünü təmin edən mühüm cəhətlərdən biri fərd–cəmiyyət münasibətlərinin daha mükəmməl olması, cəmiyyətin daha optimal təşkilatlanmasıdır. Şərqdə azadlığın hər kəsin öz arzu və istəyinə uyğun surətdə yaşamaq kimi anlamasına rəğmən, Qərbdə hər kəs özünü ilk növbədə cəmiyyətin bir üzvü kimi hiss etməklə, öz azadlığını da qərarlaşmış ictimai münasibətlər çərçivəsində tapır. Burada hər hansı bir şəxs mövcud qaydalarla razılaşmırsa, öz etirazını onları pozmaq, «qulaq ardına vurmaq» yolu ilə yox, bütövlükdə ictimai münasibətlərin dəyişdirilməsi, onların əsasında duran ideyanın yeniləşməsi uğrunda mübarizə ilə ifadə edir.
Cəmiyyətin necə təşkilatlanması hər bir fərdin həyatına təsir edir. Lakin hər bir fərd ümumictimai miqyasda gedən proseslərin məğzini anlamaq, onlara düşünülmüş şəkildə müdaxilə etmək imkanına malik deyil. Ona görə də ən asan yol bu işi kimlərin isə öhdəsinə buraxaraq, ictimai axına kor-koranə surətdə qoşulmaqdır. Lakin bu yol insanların azadlıq və xoşbəxtliyini nə dərəcədə təmin edir?
Hegelə görə azadlıq dərk olunmuş zərurətdir. Başqa sözlə, adi insanlar azad olmaq üçün mövcud cəmiyyətin qanunlarını, onların təməlində duran, onları zəruri edən prinsipləri mənimsəməlidir. Şəxsi ideyalar, şəxsi fəaliyyət planları da ictimai zərurətlə uyğunlaşdırılmalıdır. Lakin elə şəxslər də olur ki, onlar ictimai zərurətin özünü, onun əsasında duran ideyanı dəyişmək yolunda mübarizə aparırlar. Bütün maddi təzahürlər kimi ictimai gerçəklik, qərarlaşmış ictimai münasibətlər sistemi də hansısa ideyanın təzahürü olduğundan, ictimai həyatın hər hansı bir struktur səviyyəsindəki islahatlar da ilk öncə ideyalar iyerarxiyasının adekvat pilləsində dəyişiklik olmasını tələb edir.
Hər bir şəxs öz fərdi həyatını yaşamaqla yanaşı, cəmiyyətin bir üzvü kimi böyük miqyaslı ictimai proseslərin də iştirakçısı olur. Əlbəttə, bu şans hamıya eyni dərəcədə verilmir. Kim isə ictimai hadisələrdə aparıcı rol oynayaraq bəşər tarixinə daxil olduğu halda minlərlə insan ictimai həyatda subyektdən daha çox bir obyekt olaraq iştirak edir və tarixdə heç bir iz qoymur. Bununla belə, minlər, milyonlar olmasa, kütlə olmasa, ayrı-ayrı şəxslər nə qədər böyük düha sahibi olsalar da, cəmiyyəti inkişaf etdirə bilməzlər. Çünki cəmiyyət əhalinin şəxsiyyətlərlə, kütlənin ideya ilə sintezidir. Kim isə o zaman böyük şəxsiyyətə çevrilə bilər ki, onun qərarlaşmış ictimai şüurdan kənara çıxan, fərqli ideyası olsun və bu ideya təkcə keyfiyyətcə, sanbalca deyil, həm də məhz kəmiyyətcə, miqdarca böyük proseslərin hərəkətverici qüvvəsinə çevrilmək əzmində olsun.
Məhz ideya çoxlu miqdarda, müxtəlif istiqamətli hadisələrin eyni üstün istiqamət boyunca düzənlənməsinə, təşkilatlanmasına imkan yaradır. İdeya hadisələri canlandırır və yönəldir. Onun öz rolu istiqamətini özü seçə bilməyən yüklü zərrəciklər üçün sahənin oynadığı rola bənzəyir. Təsadüfi deyildir ki, K.Marks kütlələrin ideyaya yiyələnməsindən yox, ideyanın kütlələrə yiyələnməsindən bəhs edirdi.
Lakin ən gözəl, ən böyük ideya da özlüyündə hələ ictimai tərəqqi üçün kifayət deyildir. Bir növ pərakəndə, xaotik material olan kütlənin ideya yönümündə düzənlənməsi üçün xüsusi məqsədyönlü fəaliyyət tələb olunur. İdeyanın gerçəkləşməsi, real ictimai müstəvidə təzahürü üçün görülməli olan işlər mahiyyət etibarı ilə nə ideya yaradıcılığı, nə də maddi bir hadisədir. Bu, əslində ideyadan gerçəkliyə körpü atılması prosesidir. Bu, ideya ilə siyai iradənin sintezi, cəmiyyətin fərqli ideya əsasında yenidən təşkilatlanmasıdır.
Cəmiyyəti bir piramidaya bənzətsək onu təşkil edənlərin əksəriyyəti alt müstəvidə yerləşəcəkdir. Yuxarı qatlardakı adamların sayı getdikcə azalacaqdır. Zirvəyə isə ancaq tək-tək adamlar çıxa bilər. Alt müstəvilərdə hadisələr, maddi həyat cərəyan edir. İdeya isə yuxarıdan aşağıya gəlir. Piramidanın zirvə nöqtəsini ən yüksək ideya səviyyəsi kimi fərz etsək, burada ideya var, lakin maddi heç nə yoxdur. Hündürlük maksimal olsa da, oturacaq sıfra bərabər olduğundan, həcm də sıfırdır. Aşağıya doğru gəldikcə hündürlük azalır, oturacaq isə genişlənir.
Həyatın dibindən müəyyən ideya səviyyəsinə yalnız ayrı-ayrı şəxslər yüksələ bilir. Bu, insanın başqalarından fərqlənməsi, şəxsiyyətin cəmiyyətdən ayrılması və onun fövqünə qalxması deməkdir. Burada hərəkətverici qüvvə intellektual yaradıcılıq və mədəni-mənəvi potensialdır. Sıxılmış yayın potensial enerjisi olduğu kimi mədəni-mənəvi və intellektual potensial da belədir. Mövcud ictimai münasibətlərin, real ictimai inkişaf səviyyəsinin məhdudlaşdırıcı baryeri bu enerjinin aktuallaşmasına imkan vermir; ta o vaxta qədər ki, sıxılmış ideya və iradi potensialın səviyyəsi bu baryeri keçməyə imkan versin.
Cəmiyyətin strukturu o zaman optimal sayılır ki, onu ideya səviyyəsinə görə piramidanın aşağısında yox, yuxarısında duranlar idarə etsin. Yəni, hökumət intellektual elitadan təşkil olunmuş olsun. Bu isə ilk yaxınlaşmada demokratiya prinsipləri ilə uzlaşmır.
Bir tərəfdən, demokratiya, xalqın özünüidarəsi ideyası çox cazibədar görünür. Digər tərəfdən, intellektual və mədəni-mənəvi inkişaf səviyyəsinə görə yüksəkdə duranların sayı həmişə az, orta və aşağı səviyyəlilərin sayı çox olur. Ona görə də, demokratiya müəyyən mənada aşağı səviyyəlilərin yüksəkdə duranları idarə etməsi kimi də başa düşülə bilər.
Halbuki, daha yaxşı cəmiyyət, yəqin ki, yüksəkdə duranların aşağıda duranları idarə etməsinə əsaslanmalıdır. Məhz bu cəhətə görə də Platon kimi görkəmli simalar hələ o vaxtlar demokratiyanın əleyhinə olub. Demokratiya əleyhdarlarının mövqeyi buna əsaslanır ki, idarəetmə sistemində meyar azlıq və ya çoxluq deyil, dünyagörüşü və intellektin səviyyəsi, başqa sözlə, şüurun azlığı və ya çoxluğu olmalıdır. Tək adamın (monarxiya) və ya elitar bir qrupun (aristokratiya) hakimiyyəti ideyası belə yaranıb. Şərqdə geniş yayılan ədalətli şah ideyası da bu qəbildəndir.
Lakin çoxluq ara-sıra öz sözünü həmişə deyib. Aşağılar hərəkətə gəlib. Üsyanlar olub. Çevrilişlər olub. Kütlə gücünü göstərib. El gücü – sel gücü. Amma unudulub ki, sel tənzim olunmadıqda onun gücü ancaq dağıtmağa yönəlir.
İstiqamətlənməmiş, təşkilatlanmamış ictimai güc də hər cür kobud qüvvə kimi, sel kimi dağıdıcı olur. Sel cəmiyyətin arxitektonikasını dağıdıb, neçə-neçə əsrlər ərzində ixtisaslaşmış, strukturlaşmış cəmiyyətin nailiyyətlərini xeyli dərəcədə yuyub aparıb. (Marksizmin tənqid etdiyi təbəqələşmə də əslində strukturlaşmanın, deməli, sivilizasiyanın əlamətlərindən biridir). Düzdür, bu sosial selə, bu ictimai hərəkatlara da əslində həmişə azların nümayəndəsi başçılıq edib. (Əslində, demokratiya o zaman faydalı ola bilər ki, o, bütövlükdə kütləyə deyil, elitaya tətbiq olunmuş olsun, lakin elita daxilində azlıqda qalan tərəf bəzən bu mənada məqbul olmayan metoda əl atır və öz mövqeyini kütlənin köməyilə həyata keçirməyə çalışır. Elitadaxili mübarizə ideyaların mübarizəsindən daha çox kütləyə təsir etmək və onu yönəltmək uğrunda mübarizəyə çevrilir).
«Şəxsiyyət və kütlə», «Şəxsiyyət və cəmiyyət», «Fərd və toplum» münasibətlərinə olduqca müxtəlif mövqelərdən yanaşmaq mümkündür. Problem nəzəri-fəlsəfi müstəviyə keçməzdən əvvəl xalq arasında da ona müəyyən münasibət formalaşmışdır. Kiminsə kütlədən, camaatdan, xalqdan ayrılmasına, toplumdan ya yuxarıda, ya da aşağıda dayanmasına, ya müsbət, ya da mənfi istiqamətdə seçilməsinə çox vaxt pis baxılmışdır. «Palaza bürün, elnən sürün!», «Şəhərə girdin hamı gözü qıpıq, sən də ol gözü qıpıq!» ifadələri hamıdan biri olmaq, seçilməmək, fərqlənməmək mövqeyini ifadə edir. Halbuki, fərq olmadıqda inkişaf da ola bilməz. Kimsə irəli çıxmalıdır, kimsə sürünənlərə şahin zirvəsindən baxmalıdır, kimsə ürəyinin atəşi ilə qaranlıq meşədə azanların yoluna işıq salmalıdır, - əks təqdirdə cəmiyyətdə inkişaf ola bilməz.
İctimai tərəqqinin hərəkətverici qüvvəsi məhz fərqlənənlərin qalxdığı yüksəkliyin potensial enerjisi ilə ölçülür. Bu fərqdən doğan ziddiyyət kütlənin xeyrinə həll olunanda şəxsiyyətlər tərki-dünya olur və onları tənhalığın faciəsi gözləyir. Şəxsiyyətin qələbəsi isə cəmiyyətin sosial ideala doğru hərəkətə gətirilə bilməsindən asılıdır.
İnkişafın dialektikası belədir. Eyni səviyyədə olanlar, tamamilə identik olanlar bir-birini inkişaf etdirə bilməzlər. İnkişaf fərqdən yaranır. Əgər yüzlərlə, minlərlə insanın içərisində bircə nəfər də «standart»dan kənara çıxa bilsə, yeni ideya verə bilsə hamının bu ideyaya yiyələnməsi, səviyyəcə yüksəlməsi və deməli, ictimai inkişaf səviyyəsinin də yüksəlməsi şansı yaranır. Yəni bütövlükdə ictimai inkişaf əksəriyyətin deyil, tək-tək adamların, liderlərin səviyyəsi ilə ictimai baryer arasındakı nisbətdən asılı olur. Bütövlükdə cəmiyyətin səviyyəsinin qalxması üçün onun bütün üzvlərinin müvafiq səviyyəyə qalxmasına ehtiyac yoxdur. Müəyyən çətin problemi həll etmək üçün bir adamın yüksək səviyyəsi kifayət edə bilər. Çətini yerdə qalanların ona inam bəsləməsidir. Vay o gündən ki, kütlə öz içərisindən çıxmış böyüklərin və kiçiklərin yerini dəyişik salsın və mənfi istiqamətdə seçilənlərin dalınca getsin. (Burada yenə də təqsir kütlənin yox, şəxsiyyətin üzərinə düşür).
Beləliklə, cəmiyyəti inkişaf etdirən şəxsiyyətlərdir. Şəxsiyyətlər yeni ideyalarına görə seçilirlər. İctimai inkişaf isə ideyaların kütlələrə yiyələnməsi hesabına həyata keçir.
Sivilizasiya əslində ictimai tərəqqi anlayışına adekvatdır. İctimai tərəqqi isə cəmiyyətin təşkilatlanma dərəcəsindən, ideyalarla kütlələr (maddi-ictimai potensial) arasında koordinasiyanın effektivliyindən asılıdır.
Cəmiyyəti insanlar toplusundan mütəşəkkil bir sistemə çevirən əmək bölgüsüdür. Sivilizasiyanın da əsasında məhz əmək bölgüsü dayanır.
* * *
Yaşadığı müddət ərzində insan bütün ideyalarının reallaşmasına nail ola bilərmi? Axı, bir ömür üçün nəzərdə tutulmuş qısa müddətli hadisələrlə yanaşı ömrə sığmayan uzun müddətli hadisələr də vardır (hadisənin müddəti dedikdə ideyadan onun tam reallaşmasına qədər tələb olunan zaman nəzərdə tutulur. İnsan ömrü özü də bir hadisədir. Hər bir insanın ömrü gen və tale ilə müəyyənləşdirilmiş ideyalar kompleksinin reallaşması və tükənməsi prosesidir). İdeyası, təməli insan üçün kənar olan hadisələrdən fərqli olaraq insanın öz ideyalarının gerçəkləşdirilməsi doğma hadisələrdir. Və insan ömrünün hissələridir. Bir az nasiranə dillə desək, həyat planlardan və onların reallaşmasından ibarətdir. Bəs yarımçıq qalan planların həyata keçirilməsi məsuliyyəti kimin üzərinə düşür? Kiminsə yarımçıq qalmış planlarını övladımı həyata keçirməlidir? Yəni ideyanın maddiləşməsi proseslərindəki varislik, əgər bu mümkündürsə, genetik-bioloji varislikləmi əlaqədardır? Yoxsa ancaq ailə-məişət, xüsusi mülkiyyət sahəsindəmi bu varisliklər adekvat olurlar? Bəs elm, sənət sahəsindəki yaradıcı fikirlər, yarımçıq qalmış ideyalar hansı övlad tərəfindən davam etdirilməlidir? İqtisadi quruculuq, dövlət quruculuğu sahələrində geopolitik strategiyalar, ümummilli mədəni-mənəvi amallar, ümumbəşəri sosial ideallar kimin tərəfindən davam etdirilməlidir?
Təsadüfi deyil ki, elm adamları da, sənət adamları da öz sağlığında davamçılar hazırlamaq, öz məktəblərini yaratmaq haqqında da düşünürlər. Bununla da öz fərdi cismani həyatları başa çatsa da onların ideyaları davamçıların şəxsində yaşayır. Beləliklə, insan ömrünə verdiyimiz tərif mövqeyindən yanaşdıqda onların həqiqi ömrü davam etdirilmiş olur. İnsan daha böyük müddətli hadisələrə, proseslərə qatılaraq öz həyatını daha böyük miqyaslı ictimai proseslərin tərkibində yaşada bilər. Əslində insanların əksəriyyəti bu və ya digər ictimai proseslərə daxil olduğundan onların cismani ömrü ilə real həyatı arasında fərq həmişə olur. Lakin ölməzlik qazananlar ideya müəllifləridir. Başqasının ideyasının ictimai realizasiyası prosesinə qatılaraq real ictimai həyatın uzadılması bir şeydir, sənin ideyanın ictimai prosesə çevrilərək yaşaması başqa şeydir. Bu artıq sosial-mənəvi sferada ölməzlikdir.
Cəmiyyəti çox vaxt müəyyən zaman kəsiyində, müəyyən dövrdə insanların ittifaqı, sazişi, birgə fəaliyyəti kimi və ya yenə də müəyyən zaman kəsiyində insanlar arasında qərarlaşmış münasibətlər sistemi kimi başa düşürlər. Lakin bizcə bu cür başa düşülən cəmiyyət cansızlaşmış, maddiləşdirilmiş bir prosesdir. Əslində cəmiyyət onu təşkil edən insanların canından, qanından, beynindən, ürəyindən, fikrindən, hissiyyatından fərqli olaraq özünün iqtisadi və siyasi həyatı, enerji dövranı, informasiya mübadiləsi sistemi, ideologiyası, fikri, hissiyyatı olan canlı bir orqanizmdir. Daha doğrusu, bütövlük naminə belə olmalıdır. Cəmiyyətin həyatı da ümumi, yekun ideyaların müxtəlif istiqamətlərdəki realizasiya proseslərinə uyğun olaraq insan ömrünə bənzəyir. Əks təqdirdə biz bütöv cəmiyyət əvəzinə ayrı-ayrı şəxsi həyatların, vahid istiqamətdə yönəldilməyən ayrı-ayrı hadisələrin (ideya-reallıq keçidləri) sadəcə toplusu və ya ən yaxşı halda eklektik sistemi ilə rastlaşacayıq.
Bir insanın vahid əqidəsi, həyat məramı olmadıqda, o çoxlu sayda müxtəlif, bəzən bir-birinə zidd istəklərin reallaşması dalınca qaçdıqda onun şəxsi həyatı da təsadüflərdən asılı vəziyyətə düşür. Cəmiyyətin də vahid konseptual ideyası olmadıqda onu təşkil edən ayrı-ayrı adamların ideyalar toplusu ancaq bir xaos və qarşıdurmalar yarada bilər.
Sual olunur ki, cəmiyyət daha böyük insanlar toplusunu əhatə etdikcə onun inkişaf potensialı artır, yoxsa azalır?
Hər bir adamın müəyyən bilik və bacarıqları vardır. Əgər bunlar toplana bilsəydi, böyük toplumun imkanları daha böyük olardı. Lakin elə hər şey də bu toplama qaydasının səmərəliliyindən asılıdır. Cəmiyyətlər bir-birindən təşkilatlanma dərəcəsi ilə və fərdi impulsların toplanma mexanizmi ilə seçilirlər. Məsələ burasındadır ki, insanların əməli fəaliyyətinin faydalılıq dərəcəsi skalyar yox, vektorial kəmiyyətdir. Biz bu kəmiyyəti şərti olaraq fərdi fəaliyyət impulsu adlandıra bilərik. Burada ideyadan başlayaraq bilik və bacarıqlar vasitəsilə son nəticənin əldə olunmasına qədərki bütün fəaliyyət prosesi əhatə olunur. Bu hadisə ona görə vektorial kəmiyyətlə ölçülür ki, müxtəlif fərdlərin fəaliyyətləri heç də bir-birinin davamı kimi, eyni istiqamətdəki proseslər kimi ortaya çıxmır və onları sadəcə olaraq toplamaq mümkün deyildir. Burada vektorial kəmiyyətlərin toplanma qaydası tətbiq olunur. Fərdi impulsların yönəlmə bucağından asılı olaraq yekun impuls sıfır da ola bilər. Hər halda vektorial cəm həmişə skalyar cəmdən (mütləq qiymətlərin məcmuyundan) kiçik olur. Yekun göstəricinin sıfır ilə mütləq cəm arasında hansı mövqeyə uyğun gəlməsi məhz cəmiyyətin təşkilatlanma dərəcəsindən asılıdır.
Göründüyü kimi, fiziki enerjinin, əməli fəaliyyətlərin toplanma qaydası vektorial cəm prinsipinə uyğundur. Lakin əqli enerji başqa prinsiplə toplanır. Məsələn, biliklərin toplanması ortaq, təkrarlanan hissənin çıxarılması yolu ilə həyata keçir. Biliyin təkrarlanması ilə yekun bilik artmır. İkinci fərdi bilik birinci fərdi biliyə nisbətən məhduddursa və ya bərabərdirsə, onun əlavə olunması yekun biliyi artırmır.
Əqli qabiliyyətlərin toplanması da başqa prinsiplə həyata keçir. Burada çoxluğun bütün hədlərinin cəmi bu çoxluğa daxil olan ən böyük həddin mütləq qiymətinə bərabərdir. Yəni bir qrup adamın yekun ağlı bu qrupdakı ən ağıllı adamın səviyyəsi ilə ölçülür. Bu halda cəm toplananların içərisində ən böyüyünün mütləq qiymətinə bərabər olur.
Riyaziyyatda belə bir prinsip var: toplananların yerini dəyişdikdə cəm dəyişmir. Lakin real həyatda bu belə deyildir. Toplananların yerini ya məkanca, ya zamanca dəyişdikdə nəticə fərqli ola bilər.
Cəmiyyətdə insanların hansı ardıcıllıqla düzlənməsi sadəcə həndəsi mənada başa düşülmür. Burada ən əsas məsələ hər kəsin öz yerində olmasını təmin etməkdir. Belə ki, cəmiyyətin mükəmməl bir mexanizm kimi işləməsi üçün insanların müxtəlifliyindən istifadə olunmalıdır. Bütün üzvləri eyni olan cəmiyyət inkişaf edə bilməz. Hamının bilik və vərdişləri, bacarıqları eyni olduqda əmək bölgüsü prinsipi optimal surətdə həyata keçirilə bilməz. Halbuki, inkişaf ancaq müxtəlifliyin vəhdətindən doğa bilər.
Sivilizasiya üçün iki hərəkətverici qüvvə var. Birincisi, hər bir insanın bilik və bacarıqlarının artırılmasıdır ki, bu da insan imkanlarının təbii məhdudluğu üzündən müəyyən bir hüdudu aşa bilməz. Eyni biliklərə malik insanların toplanmasından isə yeni biliklər hasil ola bilməz. İkinci mənbə müxtəlif istiqamətlərdə ixtisaslaşan insanların məqsədyönlü kombinasiyasından böyük miqyaslı, güclü ictimai mexanizmlərin hazırlamasıdır. Birinci istiqamət fərdlərin inkişafına və kamilləşməsinə, ikinci istiqamət isə cəmiyyətin inkişafına və kamilləşməsinə yönəldilmişdir. Birinci istiqamət Şərq üçün, ikinci istiqamət isə Qərb üçün daha səciyyəvidir.
Lakin indi Qərbdə paradiqmanın dəyişməsi prosesi gedir. Meyarlar özgələşir, struktur yerdəyişmələri baş verir. Qərbdə elə bir inkişaf səviyyəsi yetişib ki, cəmiyyətdə, demək olar ki, hamı savadlı, yüksək təhsilli, siyasətə qoşulmaq iqtidarında olan adamlardır. Burada elita orta təbəqədən az fərqlənir. («Fəhlə aristokratiyası» ideyaları və s.) Kütlə anlayışına səviyyəcə uyğun gələn aşağı təbəqə (cəmiyyətin tör-töküntüsü) isə əslində azlıqda qalır.
Siyasi elita, hakimiyyətdə, yoxsa müxalifətdə olmasından asılı olmayaraq böyük əksəriyyətlə, xalq kütləsi ilə bir növ qaynayıb-qarışır. (Səviyyəcə sərt keçid yoxdur, xarizma mümkün deyil.) Əvvəlki modelə görə, piramidanın zirvəsində durmalı olanlar əksəriyyəti təşkil etdiyindən piramida sanki tərsinə çevrilmiş olur. Azlıqda qalan təbəqə, sosial tör-töküntü, «normalardan» kənara çıxanlar diqqət mərkəzində olur və cəmiyyətin onlara xüsusi münasibəti, hətta qayğısı formalaşır. Cəmiyyət özünü unudub (öz problemləri artıq həllini tapıb deyə), azlıqların (etnik, ya seksual azlıq, narkomanlar, AİDS-ə tutulanlar və s.) dərdini çəkməyə və onlara qayğı göstərməyə, onlar üçün hüquqi baza yaratmağa başlayır.
Dayanıqlılığın təbii prinsipinə görə, sistem geniş oturacağa söykənir və azlıq həmişə üstə çıxır. Ona görə də, piramida çevrilmək məcburiyyətində qalır. Bu hal müasir Qərb cəmiyyətində müşahidə olunmaqdadır. Piramida təbiət qanunlarına uyğun olaraq çevrilsə də, cəmiyyətə tətbiq halında bu, əslində tərsinə çevrilşdir. (Sağlam şüur baxımından hansı model daha yolveriləndir: cəmiyyətin bütün ağırlığını hiss edən azlıqlar, yoxsa azlıqları başına mindirən cəmiyyət?)
Bizcə, Qərbin süqutu ideyasının əsasında həm də bu cür anormal vəziyyəti şərtləndirən sosial gerçəklik dayanır.
Çoxluq ənənəvi olaraq azlığı öz başı üzərinə qaldırıb və bu Qərbdə yeni ənənənin təməlini qoyur. Son dövrlərdə Qərbdə formalaşan yeni dəyərlər sistemində insan haqlarını qorumaq adı altında azlıqların haqları ön plana çıxır. Qərb ölkələri üçün bu, bəlkə də anlaşılandır. Lakin onlar bu yeni paradiqmanın tələblərinə uyğun olaraq bizim ölkədə də məhz həmin azlıqları axtarıb tapmaq, onların xüsusi statusunu müəyyənləşdirmək tələbi ilə çıxış edirlər. Halbuki, bizdə hələ intellektual elitanın özü azlıqdır və cəmiyyət ona qayğı ilə yanaşmaq üçün xüsusi baza yaratmadığı halda, Qərbdəki azlıqların analoqunu axtarıb tapmaq və qayğı ilə əhatə etmək məcburiyyətində qalır.
Dostları ilə paylaş: |