9
Leikfélag Akureyrar, Listasafnið á Akureyri og Sinfóníuhljómsveit Norðurlands. Grunngerð á svæðinu er
sterk og býður upp á að Norðurland eystra verði leiðandi í menningar- og listalífi. Í mannauð og
grunngerð svæðisins felast þó enn frekari tækifæri til framtíðar.
Í úttekt á framkvæmd menningarsamninga 2009-13 (Capacent 2013) kemur fram að á svæðinu hefur
náðst árangur í nýsköpun og fjölbreytni í menningu og menningarferðaþjónustu. Einnig hefur
samningurinn leitt til nýrra starfa og verkefni hafa náð að þróast í það að verða varanleg. Þó er alltaf
hægt að gera betur sér í lagi í fámennari samfélögum og auka á fjölbreytni og atvinnusköpun með
samvinnu m.a. sveitarfélaga, starfandi listamanna, áhugafólks og stoðkerfis.
Ef litið er á grunngerð og mannauð á svæðinu þá liggur styrkleikinn víða í samvinnu atvinnulistafólks
og áhugafólks. Á sviði leiklistar þá er eina atvinnuleikhúsið utan höfuðborgarsvæðisins, Leikfélag
Akureyrar (LA), staðsett á Akureyri. Í tengslum við LA er rekinn öflugur leiklistarskóli, sá eini á landinu
sem tengdur er starfsemi atvinnuleikhúss. Auk þess eru 13 áhugaleikfélög sem mörg hver eru mjög
öflug og setja reglulega upp sýningar. Sum þeirra setja upp nokkrar sýningar á ári og hafa allnokkrar
þeirra hlotið mikla athygli og viðurkenningar. Á síðustu árum hefur færst í vöxt að áhugaleikfélögin láti
skrifa fyrir sig leikverk sem oftar en ekki byggja á sögu og sérstöðu svæðisins. Tónlist á svæðinu
blómstrar, rúmlega 60 kórar og tónlistarhópar eru starfandi og eru um 1400 einstaklingar sem standa
að baki starfsemi þeirra. Sinfóníuhljómsveit Norðurlands er staðsett á Akureyri og tónlistarmenn
búsettir á svæðinu og víðar að spila með sveitinni. Vel menntaðir tónlistarmenn eru fjölmargir og flestir
þeirra vinna einnig við kennslu í tónlistarskólum á svæðinu.
Sjónlistir eru áberandi á Norðurlandi eystra, sér í lagi í Eyjafirði. Öflugar stofnanir s.s. Listasafnið á
Akureyri og minni staðir þar sem sjónlistir skipa stóran sess eru áberandi. Mörg þeirra eru rekin af
listafólki s.s. Verksmiðjan á Hjalteyri, Alþýðuhúsið á Siglufirði, Kaktus á Akureyri og Fjúk Art Center á
Húsavík. Myndlistarfélag er á svæðinu og eru yfir 80 félagsmenn skráðir í félagið. Vinnustofur
listamanna eru fjölmargar og eru yfir 60 skráðar í gagnagrunn menningarráðs. Á svæðinu eru 10
gestavinnustofur fyrir lista- og fræðifólk (Art and Scholar residency) og geta rúmlega 30 listamenn
dvalið á slíkum vinnustofum í hverjum mánuði. Í undirbúningi er að opna fleiri gestavinnustofur á
svæðinu.
Safnastarf á svæðinu er öflugt, um 40 söfn, setur, sýningar og stofur eru á svæðinu. Átta þeirra hafa
hlotið viðurkenningu safnasjóðs. Safnaflóran er mjög fjölbreytt og starfsemin til fyrirmyndar undir
forystu þeirra safna sem hafa hlotið viðurkenningu safnasjóðs. Mikilvægt er að sveitarfélögin á svæðinu
setji sér sameiginlega stefnu í safnamálum sem felur í sér áherslur varðandi uppbyggingu, skipulag og
þróun safnamála á svæðinu.
Handverkshefð á svæðinu er sterk. Rúmlega 20 handverkshópar og handverkshús eru starfandi á
Norðurlandi eystra. Handverkshópar líkt og Laufáshópurinn, Handraðinn og Þingeyskt og þjóðlegt hafa
vakið athygli fyrir öflugt og metnaðarfullt starf sem byggir á sérstöðu. Ein stærsta handverkssýning á
landinu, Handverkshátíðin á Hrafnagili, er haldin árlega í Eyjafjarðarsveit. Þar kemur saman
handverksfólk af öllu landinu og styður það við handverkshefð á svæðinu.
Yfir 50 önnur menningarfélög eru á Norðurlandi eystra. Þau félög eru áhugafélög og vinna að öflugu
menningarstarfi sem setur svip sinn á svæðið. Þetta eru t.d. rímnafélög, þjóðdansahópar, jassklúbbar,
ljóðafélög, tónlistarfélög, myndlistarfélög, sögufélög, ljósmyndaklúbbar og fl. slík félagasamtök. Þessi
félög eru hverju samfélagi mikilvæg og eiga sinn þátt í sterkum félagsauði á svæðinu. Mikilvægt er að
hlúa að sjálfboðaliðastarfi í menningu og hvetja áfram til góðra verka samfélaginu til hagsbóta.
Menningarhátíðir/dagskrár sem eru rúmlega 30 á svæðinu. Þá er átt við hátíðir sem hafa fest sig í sessi
og eru haldnar reglulega. Um 14 aðrar hátíðir eru á svæðinu þar sem menning og listir skipa veglegan
10
sess. Ef skoðuð er dreifing þessara hátíða á svæðinu eru þær flestar í Eyjafirði, tækifæri gætu verið til
að þróa og efla þessar hátíðir sem og fjölga menningarhátíðum í Þingeyjarsýslu.
Ef litið er til menntunar á sviði lista þá eru 12 tónlistarskólar á svæðinu, þrír dansskólar, einn
leiklistarskóli og 4 skólar sem kenna sjónlistir. Þrír framhaldsskólar bjóða upp á listnámsbrautir.
Tónlistarskólar eru í öllum sveitarfélögum en aðrir sérskólar eru í Eyjafirði.
Aðstaða fyrir menningarstarf er víðast á svæðinu góð. Á síðustu árum hafa tvö ný menningarhús verið
tekin í notkun, á Akureyri og Dalvík, auk þess eru Menningarhúsið Tjarnarborg Ólafsfirði og
Menningarmiðstöð Þingeyinga á Húsavík skilgreind sem menningarhús. Yfir 50 önnur rými eru
víðsvegar um svæðið sem eru nýtt til ýmiskonar menningarstarfs s.s. tónleika- og sýningarhalds
hverskonar. Mörg þeirra eru vannýtt og má því leiða líkum að því að tækifæri felist í vannýttu húsnæði
til menningarstarfs.
Að ofansögðu er ljóst að grunngerð og mannauður menningar er sterkur á svæðinu, þá sér í lagi í
Eyjafirði. Í Þingeyjarsýslum er þó sterk áhugamenning sem byggir á ómældu sjálfboðastarfi og öflugu
starfi m.a. undir merkjum Menningarmiðstöðvar Þingeyinga. Auk þess hefur starfandi listafólki verið
að fjölga í Þingeyjarsýslum. Þörf fyrir fjármagn í málaflokkinn er þó mikil og rekstur setra, sýninga og
menningarverkefna er þröngur stakkur sniðinn sem veldur því að nýsköpun og þróun innan
málaflokksins er nokkuð erfið.
Menntun á sviði lista er víða nokkuð fjölbreytt og góð en tryggja þarf öllu svæðinu aðgengi að
metnaðarfullri og faglegri menntun á sviði lista og menningar, hvort sem er í námskeiðsformi, innan
grunnskóla eða til framhaldsnáms.
Tryggja þarf fjármagn í málaflokkinn til að hægt sé að standa að því öfluga starfi sem þegar er til staðar,
auka samvinnu innan svæðisins og út fyrir svæðið sem og landið. Greina þarf möguleika innan
svæðisins og bæta það sem betur má fara og styrkja ákveðinn hluta svæðisins enn frekar.
Staða mannauðs og lýðfræðileg þróun
Í landshlutanum er víðast gott aðgengi að öllum
skólastigum allt frá leikskóla til háskóla.
Samkvæmt stöðugreiningu Byggðastofnunar fyrir
Norðurland eystra (2015,) þá er samsetning
vinnuafls á Norðurlandi eystra þegar kemur að
menntunarstigi nokkuð frábrugðið landsmeðal-tali.
Hlutfall þeirra sem hafa einungis lokið prófi úr
grunnskóla, eru með starfsnám úr framhaldsskóla,
eða minni menntun, er hærra en landsmeðaltalið.
Þá er hlutfall karla með iðnmenntun og kvenna með
stúdentspróf hærra en landsmeðaltalið. Hlutfall
þeirra sem hafa lokið einhverskonar háskólaprófi
hins vegar undir landsmeðaltali (sjá mynd 1). Þessa
stöðu þarf að styrkja og auka breiddina í
námsframboði á sviði verk- og tæknigreina eftir því
sem atvinnulífið kallar á. Stöðugreiningar
Mynd 1 - hlutfallsleg skipting íbúa 18 ára og eldri 2011-
2012 eftir menntun. Mynd úr stöðugreiningu
Byggðastofnunar fyrir Norðurland eystra (2015).