IV fəsil. Postsosialist ölkələrində özəlləşdirmə problemləri və onun nəticələri
4.1. Şərqi və Mərkəzi Avropa ölkələrində özəlləşdirmənin nəticələri və dərsləri
Bundan əvvəlki fəsil postsosialist ölkələrində kütləvi özəlləşdirmə proqramlarının tətbiqinin təklif,
tələb və mübadilə mexanizmləri aspektlərinə və bu əsasda ayrı-ayrı ölkələrdə, eləcə də onların
oxşar qruplarında müşahidə olunan meyllərin və xüsusiyyətlərin bir sıra əlamətlərə görə
təsnifləşdirilib, paralellər aparılmaqla öyrənilməsinə həsr edilmişdirsə, bu fəsildə kütləvi
özəlləşdirmə modellərinin tədqiqat predmeti bir az da genişləndirilmiş və zənginləşdirilmişdir. Belə
ki, bu fəsildə tədqiqat predmetinə məxsusi coğrafi əlamətlər üzrə yanaşılmış və bu əsasda ayrı-ayrı
ölkələrdə tətbiq olunmuş müxtəlif variantlı özəlləşdirmə siyasətinin və onun nəticələrinin
Azərbaycanla müqayisəli təhlilinə üstünlük verilmişdir. İlkin olaraq çoxamilli təhlilin məkanı həm
özəlləşdirmə təcrübəsinin zənginliyinə və həm də əldə edilmiş nəticələrin müvəffəqiyyətlilik
dərəcəsinin əhatə dairəsinin genişliyinə görə Şərqi və Mərkəzi Avropanın keçid iqtisadiyyatlı
dövlətləri seçilmişdir. Bu region ölkələrinin
özəlləşdirmə təcrübəsinin, indiyədək öyrəndiyimiz
inkişaf etmiş və etməkdə olan ölkələrlə müqayisədə Azərbaycana start vəziyyətinə görə daha çox
oxşarlığı, mülkiyyətdə struktur islahatları kursundakı bir sıra elementlərin yaxınlığını əsas
götürərək Şərqi Avropa özəlləşdirilməsini ayrıca fəsil olaraq öyrənməyi məqsədəuyğun hesab
edirik.
Belə yanaşmaya həmin məkana daxil olan dövlətlərdə bu istiqamətdəki islahatlara keçmiş sovet
ölkələrindən tez başlanılması ilə bərabər, tətbiq olunmuş özəlləşdirmə formalarının müxtəlifliyi də
əsas verir. Belə ki, Şərqi və Mərkəzi Avropanın postsosialist ölkələrinin özəlləşdirmə prosesinə
müxtəlif cür yanaşmaların fonunda toplanmış təcrübə ilə keçmiş SSRİ respublikalarının
bu prosesə
oxşar münasibətinin nəticəsində əldə olunmuş və demək olar ki, daha çox Rusiya
özəlləşdirilməsinin bazasında formalaşmış nisbətən dar çərçivəli təcrübə arasında da xeyli fərqlər
mövcuddur. Bu fərqlər arasında ilk baxışdan daha çox seçilənlər Şərqi və Mərkəzi Avropanın
(ŞMA) bəzi ölkələrində özəlləşdirmənin restitutsiya formasından istifadə olunması (Çexiya və
Slovakiya Respublikaları, Almaniyanını Şərq hissəsi, Baltikyanı dövlətlər, qismən də Polşa), habelə
regionun bəzi ölkələrində kütləvi özəlləşdirmə modelinin geniş tətbiq imkanı tapmaması
(Macarıstan, Almaniyanını Şərq hissəsi) hesab edilə bilər.
ŞMA ölkələrində özəlləşdirmə siyasəti bir neçə variantda reallaşdırılmışdır. Birinci variantda
dövlət müəssisələrinin faktiki bazar dəyəri ilə satışı həyata keçirilmişdir. Özəlləşdirmənin bu
forması Macarıstan və keçmiş Almaniya Demokratik Respublikasında,
qismən də Polşa,
Çexoslovakiya Federasiyasında və digər dövlətlərdə geniş tətbiq edilmişdir. Almaniyada
özəlləşdirmənin təşkili məsələləri ilə Qəyyum Şurası, Macarıstanda isə Dövlət Əmlak Agentliyi
məşğul olmuşdur. Bu orqanların başlıca vəzifələri müəssisələri özəlləşdirməyə hazırlamaq və
prosesin özünü təşkil etməkdən ibarət idi. Belə ki, Şərqi Almaniyada özəlləşdirməyə məsul orqan -
Qəyyum Şurası geniş səlahiyyətlərə malik olmaqla, mülkiyyətin əvvəlki sahiblərinə qaytarılması ilə
əlaqədar restitutsiya tədbirlərini həyata keçirir, bununla bərabər müəssisələrin sağlamlaşdırılması,
maliyyə restrukturizasiyası, məşğulluq probleminin həlli və digər bu istiqamətli funksiyaları da
yerinə yetirirdi. Şərqi Almaniyada özəlləşdirilmənin müvəffəqiyyətinin başlıca səbəblərindən biri
də bu orqanın səmərəli fəaliyyəti ilə izah oluna bilər.
Macarıstandakı Dövlət Əmlak Agentliyi Almaniyada Qəyyum Şurasında olduğu qədər
səlahiyyətlərə malik olmadığından bu özəlləşdirmənin gedişində ləngliyə səbəb olsa da,
həmin
orqanın hər bir müəssisə üçün daha effektiv özəlləşdirmə üsulu tapmağa səy göstərməsi,
özəlləşdirilmiş təsərrüfat subyektlərinin fəaliyyətinin səmərəliyini artırmaqla yanaşı, prosesdən
maksimum miqdarda vəsait əldə olunmasına da imkan yaratmışdır. Özəlləşdirmənin ikinci variantı
dövlət əmlakının bütün əhali, bəzi hallarda isə yaşı 18-dən yuxarı olan vətəndaşlar arasında
özəlləşdirmə kuponları, vauçerləri və şəhadətnamələri vasitəsilə pulsuz paylanması hesab olunur.
Bu variant geniş tətbiq imkanlarını Çexoslovakiya Federasiyasının timsalında tapmışdır.
Bolqarıstan, Rumıniya, Polşada isə belə varianta qismən olsa da müraciət olunmuşdur. Bu
variantın başlıca üstünlüyü özəlləşdirmə tempinin sürətlənməsi və sosial yönümlülüyü, əsas
çatışmayan cəhəti isə özəlləşdirmədən sonra müəssisələrin bir çox hallarda maliyyə-təsərrüfat
fəaliyyətinin pisləşməsi sayıla bilər. Üçüncü variant "yuqosloviya özünüidarəetmə" modelinə
söykənməklə, özəlləşdirilən müəssisələrin bazasında əsasən əmək kollektivinin və idarəetmə
heyətinin, bəzən isə pensiya fondlarının pay iştirakı ilə səhmdar cəmiyyətlərinin təşkilinə əsaslanır.
Bu model ilk dəfə olaraq 1990-cı ildə Yuqoslaviyada
tətbiq edilmiş, sonradan həmin model bu və
ya digər formada bir sıra ölkələrdə qismən fərqli qaydada reallaşdırılmışdır.
Bəzi iqtisadi ədəbiyyatlarda dördüncü variantı özəlləşdirmə prosesindən ayırsalar da, fikrimizcə,
Çexiya və Slovakiya Federasiyasında, Almaniyanın Şərq ərazilərində, Baltikyanı ölkələrdə, qismən
də Polşada praktiki tətbiq imkanı qazanan və restitutsiya adlandırılan bu modelin başlıca prinsipləri
dövlət müəssisələrinin özəlləşdirilməsinə uyğun gəldiyindən ona mülkiyyətdə struktur
islahatlarından kənar şəkildə baxmağa heç də ciddi əsaslar yoxdur.
Mərkəzi və Şərqi Avropanının özəlləşdirmə tərcübəsinə nəzər yetirərkən,
burada diqqəti cəlb edən
əsas cəhətlərdən biri bütün variantlarda özəlləşdirmə formalarının geniş tətbiq imkanı
qazanmasıdır. Bunun başlıca səbəblərindən biri bu ölkələrin keçmiş SSRİ respublikalarından
(Baltikyanı dövlətlər istisna olnmaqla) fərqli olaraq kommunizm prinsipləri ilə nisbətən
qısamüddətdə idarə olunmasıdır. Məhz bu amilin təsirini nəzərə alaraq, həmin regionu təmsil edən
postsosialist dövlətlərindən bəzilərində müxtəlif çətinliklərlə olsa da, dövlət mülkiyyətinin bir
hissəsi əvvəlki sahibinə ya restitutsiya vasitəsilə qaytarılmış, ya da ki kompensasiya yolu ilə onun
əvəzi ödənilmişdir. Keçmiş Sovet respublikaları arasında Estoniya,
Litva və Latviyada da bu
prosesin həyata keçirilməsi məhz həmin ölkələrin digər SSRİ respublikalarından fərqli surətdə
nisbətən az müddətdə sosialist düşərgəsində yaşaması ilə bağlı idi. Digər tərəfdən, Şərqi və
Mərkəzi Avropa ölkələrinin bəzilərində xüsusi mülkiyyətçilik hüququnun bir sıra sahələrdə, o
cümlədən kənd təsərrüfatında, ticarətdə, xidmət sferasında saxlanılması həmin ölkələrdə
mülkiyyətdə struktur islahatlarının daha müvəffəqiyyətli formada həyata keçirilməsində impuls
rolunu oynamışdır. Çünki, həmin ölkələrdə qismən də olsa xüsusi
mülkiyyətin hökm sürdüyü
sahələrin qalması sahibkarlıq təcrübəsinin, ənənələrinin və düşüncəsinin yaşamasını
şərtləndirmişdir. Belə ölkələrə misal olaraq Polşanı, keçmiş ADR-i, Yuqoslaviyanı göstərmək
mümkündür. Bu ölkələrdə özəlləşdirmə sahəsində əldə edilən müvəffəqiyyətin həmin şərtlərlə bağlı
başqa bir arqumenti də hökumətin dövlətsizləşdirmə siyasətində başlıca diqqəti kiçik deyil, məhz
böyük özəlləşdirməyə yönəltməsi ilə izah olunur.
Postsosialist məkanında özəlləşdirmə ərəfəsində dövlət bölməsi iqtisadiyyatda dominant rol
oynamışdır. Keçmiş Sovet Respublikaları üzrə orta göstəricinin 96 faiz təşkil etməsi bu düşərgədə
geniş özəlləşdirməni zərurətə çevirmişdir.
Şərqi və Mərkəzi Avropanın bir sıra ölkələrində özəlləşdirməyədək aparılan kommersiyalaşdırma
siyasətinin nəticəsi olaraq, sahibkarlığın yeni
növlərinin meydana gəlməsi, müqavilə əsasında
sərbəst qiymətqoyma formalarının tətbiqi, təsərrüfat fəaliyyətinin müstəqilləşməsi də sonradan
müvəffəqiyyətli özəlləşdirmə aparmaq üçün əhəmiyyətli olan ilkin şərtləri formalaşdırmışdır. Bu