1-tema: Tálim processinde metodlardıń pedagogikalıq mánisi. Tálim processinde túrli metodlardan paydalanıw Joba: «Metod», «Tálim metodları»

Seminar shınıģıwınıń wazıypası-sabaqlarda bayan etilgen teoriyalıq pikirlerdi anıqlastırıw, tereńlestiriwden, oqıwshılardıń bilimin tekseriw hám bekkemlewden, ádebiyattı úyreniw kónlikpesin payda etiw, onı konspekt qılıw, sáwbetler, dokladlar, ata-analar ushın konsul’taciyalardıń planı hám konspektlerin dúziwden, kurstıń konkret temasın awızeki bayan etiw qábiletine iye bolıwdan ibarat.
Seminar shınıģıwları ushın kurstıń eń zárúr hám qıyın máseleleri, sonday-aq, ádebiyatlarda jeterli dárejede tolıq jarıtılģan hám oqıwshılardıń ózleri erkin úyreniwi múmkin bolģan máseleler tańlap alınadı.
Seminardıń hár bir teması boyınsha oqıwshılarģa ádebiyatlar dizimin beriw, tapsırmanıń xarakterin belgilew, onı orınlaw planı hám esabat formasın kórsetiwi kerek. Ádebiyatlardı úyrenip atırģanda oqıwshılar konspekt yamasa ata-analar ushın konsul’taciyalardıń tekstlerin dúzedi.
Seminar shınıģıwların tómendegi formada shólkemlestiriw múmkin: dáslep oqıtıwshı seminardıń wazıypası hám onı ótkeriw tártibin belgileydi. Keyin sóz sóylew ushın oqıwshılarģa sóz beriledi. Keyin qatnasıwshılar shıģıp sóylegenlerge sorawlar beredi, olar juwap qaytaradı. Keyin basqa oqıwshılar sózdiń mazmunına xarakteristika berip, onı tolıqtıradı (jetiskenlik hám kemshilikler kórsetiledi). Oqıtıwshı seminardı juwmaqlar aldında, shıģıp sóylegenlerdi bahalaydı, onıń mazmunı, túsinik forması, kórgizbeli qurallar (kesteler, súwretler, foto súwretler h.t.b)dan paydalanıw dárejesine xarakteristika beredi. Sonday-aq, basqa oqıwshılardıń shıģıp sóylewleri tuwralı da pikir hám usınısların aytadı. Shınıģıw sońında qoyılģan wazıypa qalay orınlanģanlıģın aytıp ótiw hám gezektegi seminarģa tayarlanıw ushın usınıslardı beriw múmkin.
Lekciya teması boyınsha islenetuģın sáwbet, seminar bolıp, bul oqıtıwshı basshılıģında ótkeriletuģın ámeliy shınıģıw oqıwshılarda erkin pikirlew, erkin xızmet kórsetiw, sabaqlıq penen erkin islew, dóretiwshilik pikirlew qábiletiniń rawajlanıwına járdem beretuģın dárejede bolıwı kerek.
Seminarlardı shólkemlestiriwden kózlengen maqset oqıwshılardıń óz betinshe jumısların ele de rawajlandırıw, ayırım temalar boyınsha keń hám tereń maģlıwmat bere alatuģın derekler ústinde isley alıw hám de usı arqalı keleshek xızmetlerinde zárúr ádebiyatlardan paydalana alıw kónlikpe hám tájiriybelerine iye bolıwdan ibarat bolıp esaplanadı.
Seminar shınıģıwı oqıwshılar tárepinen qanday da bir tema boyınsha lekciyalar tayarlaw hám de onı klass oqıwshıları menen talqılaw jolı menen alıp barıladı.
Seminarlarģa 2-3 hápte tayarlıq kóriledi. Oqıwshılar ádebiyatlardı úyrenedi, material jıynaydı, túrli izlenisler ótkeredi, jıynaģan maģlıwmatları boyınsha tezisler dúzedi.
Seminar shınıģıwı oqıtıwshı basshılıģında ótkeriledi. Ol oqıwshılardıń jumısın baģdarlap turadı, temaģa baylanıslı sorawları boyınsha shólkemlestirilgen analizdi juwmaqlaydı. Zárúr qosımsha pikirler bildiriledi, materialdı anıq sistemaģa saladı. Lekciya qılģan, analizde qatnasqan oqıwshılardıń jumısları bahalap barıladı.
Seminar shınıģıwı oqıwshılardıń itibarın sabaqqa tartıw, olardıń qızıģıwshılıģın arttırıw, olardı erkin islewge, pikirlewge úyretiw, sabaqtı aktivlestiriw hám de oqıwshılardıń aqlıy qábiletlerin ósiriwde zárúr orın iyeleydi.