Estetikaning zamonaviy muammolari Reja

Arxaik san’at turlari

Arxaik turga qaysi san’at turlari kirishi sizga ma’lum. SHu bois to’g’ridan-to’g’ri ular, imkon doiramizdan kelib chiqqan holda, qisqacha to’xtalib o’tamiz.
Badihago’ylik. Bu san’at turi asosan lirik yoki didaktik she’rlarni o’z ichiga oladi. Badihago’ylarni ba’zan maddohlar deb ham atashgan. U asosan Sharqda vujudga kelgan va taraqqiy topgan. Uni g’arb adabiyotidagi imporovizastiya yoki ekspromt san’atkorlar bilan chalkashtirish kerak emas. Chunki ular muayyan san’at turi ichidagi hozirjavoblik, xolos. Badihago’ylik – og’zaki ijod qiluvchi san’atkor. Uning baxshidan farqi o’z mavzuiga ega ekanligi, she’rlarning jamoaviy, halq og’zaki ijodi variantlari yoki versiyalari emas, balki mustaqil asar sifatida idrok etish bilan bog’liq. Badihaqigo’y buyurtmaga binoan ko’pincha bozorlarda, ba’zan saroylarda she’r o’qigan, goho she’rni musiqiy asbob jo’rligida ijro etgan. Badihaning bahosi uning qay darajada originalligi, tashbehlarning quyuqligi, buyurtma egasining qalbida etib borishi, ya’ni ta’sirchanligi kabi xususiyatlariga qarab belgilangan. Idrok etuvchi (buyurtmachi) ba’zi misralar yoqmasa, uni badihago’ydan o’zgartirishni talab qilgan va uning talabi albatta bajarilishi kerak bo’lgan. Bu qoidaning azaldan mavjudligini Imom G’azzoliy “Ihyo ulum ad din” asarida Qur’on oyatlari bilan she’riy misralarni solishtirish asnosida misol tariqasida keltirganini eslaylik. Badihago’ylik faqat musulmon Sharqida emas, balki budhaviylik mintaqasida ham qadimdan keng yoyilgan. U nafis, inja bir san’at turi tarzida zadogonlar oilasida katta e’tibor qozongan, yuqori baholangan. SHu sababli badihago’ylik iste’dodiga ega bo’lgan a’yonlar Xitoy hoqonlari saroyida g’oyatda qadrlanganlar. Biroq yozma adabiyotning keng yoyishdagi natijasida badihago’ylik mustaqil san’at turi sifatidagi mavqeini asta-sekin yo’qota bordi, keyinchalik baxshilik san’ati
bilan singishib ketdi. Afsuski, u jamoaviy ijod emas, balki individual og’zaki ijod bo’lgani uchun uning namunalari saqlanib qolmagan, faqat tarixiy va falsafiy-tasavvufiy asarlarda uchratishimiz mumkin.