Azərbaycan respublikasi döVLƏt neft şİRKƏTİ

6.1.2. Baş ofisdə Satınalmaların Keçirilməsi Prosesi
Tələbatın müəyyən olunması. Malların (işlərin və xidmətlərin) alınmasına dair Satınalma Strategiyasının və Müsabiqə İştirakçılarının siyahısının (seçmə müsabiqəsi tətbiq edildikdə) hazırlanması və təsdiq edilmək üçün Satınalmalar Komitəsinə göndərilməsi. Satınalma Strategiyasında aşağıdakı məlumatlar göstərilməlidir:

• 
  Satınalmanın predmeti;
  
• 
  Malların (İşlərin və xidmətlərin) həcmi;
  
• 
  Tətbiq olunan satınalma metodu;
  
• 
  Malgöndərən barədə məlumat (müsabiqədən kənar satınalma keçirildikdə)
  
• 
  Satınalınan malın müqavilə dəyəri (müsabiqədən kənar satınalma keçirildikdə) və ya ehtimal olunan dəyəri;
  
• 
  Maliyyələşmə mənbələri;
  

Müsabiqə iştirakçılarının siyahısı təlimatın 6.2-ci bölməsinə uyğun olaraq hazırlanmalıdır.

Satınalmalar Komitəsi Satınalma Strategiyasını və Müsabiqə Iştirakçilarının siyahısını təsdiq edərək satınalma prosedurlarının başlanması və ya yenidən işlənilməsi məqsədilə Sifarişçi bölməyə geri qaytarılması barədə qərar qəbul edir.

Satınalma Strategiyası və Müsabiqə İştirakçılarının siyahısı təsdiq edildikdən sonra Satınalmalar qrupu yaradılır. Satınalmalar qrupu tərəfindən Dəvət Sənədləri hazırlanır.

Dəvət Sənədləri müsabiqə iştirakçılarına göndərilir (seçmə müsabiqə) və ya elan müvafiq kütləvi iformasiya vasitələrində yerləşdirilir (açıq müsabiqə).

Dəvət Sənədlərinə uyğun olaraq təqdim olunmuş təkliflər Normativ sənədlərlə müəyyən edilmiş qaydada qəbul edilir, etik və konfidensial qaydada açılır, protokol tərtib edilir.

Təkliflərlə bağlı müsabiqə iştirakçıları ilə dəqiqləşdirici və aydınlaşdırıcı danışıqlar aparılır.

Müsabiqə təklifləri təsdiq olunmuş meyarlara əsasən qiymətləndirilir.

Müsabiqədən Sonra Danışıqlarının (MSD) aparılması tələb olunduqda, Normativ sənədlərə uyğun olaraq Satınalmalar Komitəsindən icazə alınır.

Satınalma qrupu tərəfindən hazırlanmış müsabiqə nəticələrinə dair protokol Satınalmalar Komitəsi tərəfindən təsdiq edilir. Satınalmalar Komitəsi müsabiqə nəticələri ilə razı olmadıqda, sənədlər yenidən işlənməyə qayıdır və lazım olan təqdirdə müsabiqə nəticələri ləğv olunur.

Satınalmalar Komitəsi müsabiqə nəticələrini təsdiq edirsə, qalib iştirakçıya bildiriş göndərilir. Qalıb gəlmiş iştirakçı ilə müqavilə bağlanılır və uğursuz müsabiqə iştirakçıları nəticələr barədə məlumatlandırılır.

Müqavilə imzalandıqdan sonra müqavilə şərtlərinin yerinə yetirilməsinə nəzarət edilir.

Müqavilə üzrə öhdəliklər yerinə yetirildikdən sonra bütün sənədlər bu təlimatlarda müvafiq qaydada saxlanılır.

6.2. Münasib malgöndərənlərin (podratçıların) seçimi
Təyinatı
Bu təlimatda Seçmə Müsabiqə və Müsabiqədən Kənar satınalmalar zamanı bütün mal, iş və xidmətlərin satın alınması üçün münasib malgöndərənlərin (podratçıların) seçimində istifadə olunan prosedur və meyarların ümumi təsviri verilir.
Vəzifələr

Sifarişçi və Ixtisaslaşmış Təchizat Bölməsi yalnız ARDNŞ-ni tələb olunan standartda mal (iş və xidmət) ilə təchiz edə biləcək malgöndərənlərin (podratçıların) Müsabiqə İştirakçılarının siyahısına daxil edilməsinə nəzarət edəcəkdir.

Malgöndərənlərin (Podratçıların) uyğunluğu
Malgöndərənin (Podratçının) müsabiqə siyahısına daxil edilməsi üçün yararlığı aşağıdakı amillərdən biri yaxud bir neçəsi əsasında təyin oluna bilər:

• 
  Bilavasitə əməkdaşlıq, yaxud digər müştərilər ilə əməkdaşlıqdan irəli gələn iş göstəriciləri;
  
• 
  Malgöndərənin (Podratçının) idarəetmə sistemi üzrə keyfiyyət sertifikatının olması (ISO 9001, OHSAS 18000, ISO 14000 və s.);
  
• 
  Rəsmi bazarın araşdırılması proseduru;
  
• 
  Rəsmi prekvalifikasiya proseduru.
  

Müsabiqə İştirakçılarının siyahısının hazırlanması

• 
  Heç bir malgöndərən (podratçı) ARDNŞ-nin Baş Ofisi və ya Struktur Vahidlər tərəfindən müsabiqəyə dəvət olunmadan Seçmə Müsabiqəyə qatıla bilməz.
  
• 
  Müsabiqə İştirakçılarının Siyahısı Sifarişçi və İxtisaslaşmış Təchizat Bölməsi tərəfindən birgə hazırlanır.
  
• 
  Müsabiqəli satınalmalar keçirildikdə iştirakçı siyahısında ən azı 3 şirkətin olması vacibdir. Hər bir iştirakçı adekvat təcrübəyə, imkanlara və ixtisasa malik olmalı və Müqaviləni icra etmək üçün həqiqi marağı ifadə etməlidir.
  
• 
  Müsabiqə İştirakçılarının siyahısında həmin vaxtda bazarda təklifin vəziyyəti, iştirakçının müvafiq təcrübəsi, işçi heyəti, yeni texnologiyaları əldə etmək imkanı və s. məlumatlar öz əksin tapmalıdır.
  
• 
  Hər hansı podratçının (malgöndərənin) bacarığı və uyğunluğu müsaqbiqəyə dəvət edilməmişdən öncə yoxlanmalıdır.
  
• 
  Baş ofis və ya Struktur Vahid ilə bağlanmış müqavilə üzrə üzərinə düşən öhdəlikləri icra etməmiş podratçı (malgöndərən) Müsabiqə iştirakçılarının siyahısına daxil oluna bilməz.
  

Müsabiqə iştirakçılarının siyahısının təsdiqi
ARDNŞ-nin Prezidentinin Əmri ilə təsdiq olunmuş Səlahiyyət Hədlərinə uyğun olaraq, Müsabiqə İştirakçılarının siyahısı Struktur Vahidinin Rəhbəri və ya Satınalmalar Komitəsi tərəfindən təsdiq olunur.

6.3. Müsabiqə iştirakçıların prekvalifikasiyası
Təyinat
Bu təlimatda Müsabiqə İştirakçılarinin siyahısının hazırlanması zamanı malgöndərənlərin (podratçıların) prekvalifikasiyasına aid məqsədlər, qaydalar və təcrübə öz əksini tapır.
Vəzifələr
Sifarişçi və İxtisaslaşmış Təchizat Bölməsi prekvalifikasiyaya ehtiyacı müəyyən edilməsinə və prosesin ümumi idarəçiliyinə görə cavabdehdir.
Prekvalifikasiyanın məqsədi
Prekvalifikasiya prosesinin əsas məqsədi tələb olunan təcrübəyə, texniki və maliyyə resurslarına malik podratçıların (malgöndərənlərin) müsabiqəyə dəvət edilməsini təmin etməkdir. Prekvalifikasiyanın faydası aşağıdakılardır:

• 
  Müsabiqə İştirakçılarının siyahısına daxil etməzdən öncə yetərli sayda podratçıların (malgöndərənlərin) marağını, bacarıqlarını və yararlığını müəyyən etmək;
  
• 
  Əvvəlcədən müəyyən edilmiş qiymətləndirmə meyarları əsasında potensial malgöndərənlərin siyahısını rasional və nəzarətli siyahıya qədər qısaltmaq;
  
• 
  Yalnız kvalifikasiyalı müsabiqə iştirakçılarının təkliflərini qiymətləndirmək və bununla da ARDNŞ üçün xeyli vaxt qənaət etmək;
  
• 
  Podratçılar (malgöndərənlər) üçün tam və bərabər imkanları təmin etmək;
  
• 
  ARDNŞ üçün bazar konturlarının müəyyən etmək;
  
• 
  Müsabiqəyə Dəvət Sənədində və ya qiymətləndirmədə nəzərə alına biləcək ilkin məlumatları potensial podratçılardan (malgöndərənlərdən) toplamaq.
  

ARDNŞ bütün prekvalifikasiya müraciətlərinə baxmalıdır.

Prekvalifikasiya siyasəti
Aşağıdakı ümumi siyasət prekvalifikasiya prosesinə şamil olunur:

• 
  ARDNŞ-nin səmərəli əməkdaşlıq etdiyi malgöndərənlər (podratçılar) lazımsız prekvalifikasiyadan keçməli deyil, çünki bu həmin podratçının imkanları və bacarıqları barədə əlavə məlumat verməyəcək.
  
• 
  Oxşar tələb üzrə prekvalifikasiya son 6 ayda keçirilibsə, təkrar prosesə ehtiyac yoxdur.
  
• 
  Prekvalifikasiyanın keçirilməsi nəzərdə tutulan işlərin mürəkkəbliyindən, vacibliyindən və satınalmanın ehtimal olunan dəyərindən asılıdır.
  
• 
  Adətən, podratçıların (malgöndərənlərin) prekvalifikasiyası sənaye-tikinti, mühəndislik və inşaat müqavilələri, habelə bahalı və texniki cəhətdən mürəkkəb avadanlığın alınması müqavilələri üçün həyata keçirilir.
  
• 
  Prekvalifikasiya müraciətləri Dəvət Sənədləri göndərilməzdən əvvəl razılaşdırılmış meyarlar üzrə qiymətləndirilməlidir.
  
• 
  Prekvalifikasiya tamamilə potensial malgöndərənin (podratçının) müəyyən işi məqbul səviyyədə icra etmək bacarığı əsasında olmalıdır və aşağıdakılar nəzərə alınmalıdır: (I) müvafiq təcrübə və əvvəlki iş göstəriciləri; (II) kadrlar, avadanlıq və qurğular ilə iş imkanları; və (III) maliyyə durumu.
  
• 
  İşin müvafiq səviyyədə, təsdiq edilmiş prekvalifikasiya meyarına uyğun icra etmək üçün yararlı hesab olunmuş malgöndərən (podratçılar) prekvalifikasiya olunmalı və müsabiqə təkliflərini verməyə dəvət olunmalıdırlar.
  
• 
  Prekvalifikasiya prosesi zamanı qiymətlər barədə məlumat tələb olunmamalıdır.
  

Prekvalifikasiya siyahısı

• 
  Strategiyaya uyğun iş görmək qabiliyyətində olan malgöndərənlərin (podratçıların) siyahısının tərtib edilməsi məqsədilə bütün perspektivli və potensial malgöndərənlər (podratçılar) təhlil olunacaq.
  
• 
  Müvafiq olduğu halda, təhlil prosesi yalnız tələb olunan işin həcminə (dəyərinə) uyğun olan podratçıları (malgöndərənləri) nəzərə alacaq.
  

Prekvalifikasiya prosesinin əsas elementləri
Prekvalifikasiya prosesini iki fərqli element təşkil edir:
1. Vahid element: ümumi imkanların qiymətləndirilməsi (qeydiyyatı, maliyyə durumu, təcrübəsi, texniki təhlükəsizlik və keyfiyyətin idarə edilməsi və təşkilatı məsələlər kimi bir sıra əsas sahələrdə malgöndərənin (podratçının) imkanlarının müəyyən edilməsi);
2. Xüsusi element: müqaviləyə və iş həcminə məxsus texniki qiymətləndirmə.

1. Vahid element:

Ümumi imkanların qiymətləndirilməsi əksər prekvalifikasiya proseslərinə xas olan bir elementdir və podratçıdan (malgöndərəndan) ona göndərilmiş sorğunu cavablandırmağı tələb edir.

Ümumi imkanların qiymətləndirilməsi üçün aşağıdakı məlumatlar tələb olunur:

• 
  təşkilati-hüquqi forması, hüquq fəaliyyət qabiliyyətinin vəziyyəti;
  
• 
  Texniki və maliyyə imkanları və onlardan sərbəst istifadə etmək qabiliyyəti;
  
• 
  İdarəetmə səriştəliyi;
  
• 
  Təcrübəsi, peşəkarlığı;
  
• 
  Məhsulun (xidmətin) keyfiyyətinə nəzarət;
  
• 
  Planlaşdırma və çatdırmaya nəzarət;
  
• 
  Satışdan sonrakı xidmət;
  
• 
  Texniki təhlükəsizlik qaydalarına riayət olunması;
  
• 
  Kadr potensialı.
  

Xüsusi tələblərə məxsus iş göstəricilərinin aspektləri yuxarıdakı siyahıdan seçilib malgöndərənə (podratçıya) göndərilməsi üçün prekvalifikasiya sorğusuna daxil edilir.

Malgöndərən (podratçı) tərəfindən sağlamlığın, təhlükəsizliyin və ətraf mühitin qorunmasına dair proseslərin idarə edilməsinə xüsusi diqqət yetirilməlidir.

2. Xüsusi Element:
Müqaviləyə məxsus texniki aspektlərin qiymətləndirilməsi aşağıdakıları əhatə edir:

• 
  Xüsusi texniki tələbləri qarşılamaq imkanı;
  
• 
  Müvafiq sahədə təcrübə;
  
• 
  Fəaliyyət tarixçəsi və əvvəlki təcrübədən əsas icra göstəriciləri;
  
• 
  Zaman və qrafiklər;
  
• 
  İstehsalatın və ya xidmətlərin əhəmiyyətli aspektlərinin yoxlanılması;
  
• 
  Təchizat (xidmət) məsələləri üzrə malgöndərənin (podratçının) təklifləri;
  
• 
  Yenilik (yeni) texnologiya və sairə imkanları;
  
• 
  Stınalma müqaviləsini bağlamaq səlahiyyəti.
  

Prekvalifikasiya nəticələrinin qiymətləndirilməsi

• 
  Prekvalifikasiya sənədləri malgöndərənə (podratçıya) verilməzdən öncə obyektiv qiymətləndirmə meyarları hazırlanmalıdır.
  
• 
  Bu meyarlar ilk öncə texniki, uyğunluq, təhlükəsizlik və imkanlar aspektlərinə aiddir, lakin idarəçilik, əvvəlki iş göstəriciləri, sahədəki təcrübə, dəstək və kadrların keyfiyyəti də nəzərə alınmalıdır.
  
• 
  Prekvalifikasiya cavabları bir sıra meyarlar və saxlanmış qeydlər müqabilində qiymətləndirilməlidir.
  

Prekvalifikasiya hesabatı
Hesabata aşağıdakılar daxil olmalıdır:

• 
  Giriş (ümumi məlumat)
  
  • 
    əlaqə yaradılmış podratçılar (malgöndərənlər);
    
  • 
    cavab vermiş podratçılar (malgöndərənlər).
    
• 
  Prosesin təsviri
  
  • 
    prekvalifikasiya siyahısı necə hazırlanmışdır;
    
  • 
    seçimi idarə edən amillər;
    
  • 
    hər bir podratçının (malgöndərənin) siyahıya daxil edilməsinin səbəbini göstərən xülasə.
    
• 
  Qiymətləndirmə cədvəli
  
  • 
    Qiymətləndirmə meyarları;
    
  • 
    podratçıların (malgöndərənlərin) cavabları;
    
  • 
    qiymətləndirmə nəticələri.
    
• 
  Təklif
  
  • 
    Müsabiqə siyahısına daxil edilməsi təklif olunan iştirakçılar;
    
  • 
    Başqa hər hansı müşahidə (yanaşma, amil).
    
• 
  Qiymətləndirməni aparan heyət üzvlərinin imzaları
  

6.4. Müsabiqələrin növləri
Təyinatı
Bu təlimat ARDNŞ-nin satınalma əməliyyatlarını həyata keçirməsi üçün mümkün müsabiqə növlərini müəyyən edir.
Vəzifələr
Təyin olunmuş İxtisaslaşmış Təchizat Bölməsinin əməkdaşı və yaxud müvafiq hallarda Əlaqələndirici şəxs hər Sifarişçidən gələn hər bir sorğunun düzgün müsabiqə forması ilə tənzimlənməsinə cavabdehdir.

Nəzərə alınmalıdır ki, müsabiqə keçirilərkən rəqabəti təmin edəcək sayda malgöndərənlər (podratçıları) cəlb edilməli və əməli cəhətdən məqsədəuyğun sayda üçdən az olmamaq şərti ilə malgöndərənlərdən (podratçılardan) təkliflər cəlb edilməlidir.

Satınalmalar üzrə müsabiqələrin növləri aşağıdakılardır:
Açıq Müsabiqə
Açıq Müsabiqəyə dəvət zamanı elanlar ARDNŞ-nin veb-saytında, qazet və jurnallarda və digər informasiya vasitələrində yerləşdirilir.

Seçmə Müsabiqə

Aşağıdakı hallarda seçmə müsabiqə metodundan istifadə olunur:

• 
  həddən artıq mürəkkəb və ya xüsusi xarakterli olduğuna görə müvafiq mallar (işlər və xidmətlər) yalnız məhdud sayda potensial malgöndərənlərdə (podratçılarda) olduqda;
  
• 
  çoxsaylı təkliflərə baxılması və onların qiymətləndirilməsi üçün tələb olunan vaxt və xərclər satın alınacaq malların (işlərin və xidmətlərin) dəyəri ilə mütənasib olmadıqda;
  

Seçmə Müsabiqə zamanı müsabiqəyə qatılacaq şirkəti təyin olunmuş İxtisaslaşmış Təchizat Bölməsinin əməkdaşı ilə Sifarişçi və yaxud müvafiq hallarda Satınalmalar Qrupu seçir. Bu zaman podratçıların (malgöndərənlərin) müsabiqəyə azad qatılmaq hüququ olmur. Podratçıların (malgöndərənlərin) müsabiqəyə qatılmasının leyhinə hər hansı bir əsaslandırılmış iddialar olduqda, bu şirkətlər müsabiqəyə buraxılmalıdır.

Podratçının (malgöndərənin) bacarığı və müvafiqliyi barədə geniş araşdırmalar müsabiqə elan olunmamışdan öncə aparılmalıdır.

Elektron Hərrac
Bütün müsabiqə iştirakçıları texniki baxımdan eyni səviyyəli mal və xidmətlər təchiz edirsə və müsabiqə yalnız maliyyə aspektləri üzərində qurulacaqsa, bu zaman Elektron Hərrac satınalma metodundan istifadə oluna bilər. Bu metodla bağlı ətraflı məlumat Elektron Hərracların keçirilməsinə dair ayrıca təlimatda veriləcəkdir.

İki mərhələli Müsabiqələr
Konsepsiyaların işlənməsi, dizayn, elmi-tədqiqat və ilk mərhələdə iş həcimini və spesifikasiyasını təyin etmək mümkün olmadığı hallarda iki mərhələli müsabiqə metodundan istifadə oluna bilər.
İki mərhələli Müsabiqə zamanı, ilkin mərhələdə işlərin həcmini və spesifikasiyasını müəyyən etmək üçün potensial müsabiqə iştirakçılarına sorğu göndərilir və ya açıq müsabiqə prinsiplərinə uyğun elan edilir. Bu zaman sorğuda və ya elanda dəqiq göstərilməlidir ki, müsabiqə yalnız konsepsiyaların toplanmasına yönəldilib və növbəti addımlar barədə məlumat verilməlidir.
İlkin mərhələlərdə müsabiqə iştirakçılarının marağını artırmaq üçün hər hansı bir pul mükafatları təklif oluna bilər.
İkinci məhrələdə, təkliflər alındıqdan sonra, münasib konspesiya(lar) seçilir və dəqiq iş həcmi müəyyənləşdirilərək ya müsabiqə keçirilir və ya birbaşa danışıqlar başlayır.

6.5. Müsabiqələrin keçirilməsi

1. 
   Bağlı Zərf Prinsipi və İki Zərfli Müsabiqələrin keçirilməsi proseduru. Müsabiqə təkliflərinin qəbulu.
   
2. 
   Digər Müsabiqələr.
   
3. 
   Təkliflərin alınmasına qədər fəaliyyət.
   
4. 
   Müsabiqəyə Dəvət Sənədlərinin hazırlanması.
   
5. 
   Müsabiqə təkliflərinin qiymətləndirilməsi.
   
6. 
   Danışıqlar səlahiyyətinin verilməsi.
   
7. 
   Müsabiqə qalibinin elan edilməsi.
   
8. 
   Müsabiqə nəticilərinə dair Debrifinq.
   
9. 
   Müsabiqədən kənar satınalmalar.
   

6.5.1. “Bağlı Zərf” və “İki Zərf” prinsipləri.

Müsabiqə təkliflərinin qəbulu və açılışı.
Təyinatı
Bu təlimatda “Bağlı Zərf” və “İki Zərf” prinsiplərinin tətbiqi, müsabiqə təkliflərinin qəbulu, gecikmiş müsabiqə təklifləri, müsabiqə təkliflərinin açılışı və konfidensiallığın əhəmiyyəti göstərilir.
Vəzifələr
Təyin olunmuş Əlaqələndirici Şəxs müsabiqə təkliflərinin qəbulu, nəzarəti və açılışı məqsədilə möhürlü müsabiqə təklifləri prosedurunun tətbiqini təmin etməlidir.
“Bağlı Zərf” və “İki Zərf” prinsiplərinin tətbiqi.

• 
  Ehtimal olunan müqavilə dəyəri ARDNŞ-nin prezidentinin əmri ilə müəyyən edilmiş məbləğlərdən artıq olduqda, satınalmalarda “Bağlı Zərf” və “İki Zərf” prinsipləri tətbiq olunmalıdır.
  
• 
  Ehtimal olunan müqavilə dəyəri ARDNŞ-nin prezidentinin əmri ilə müəyyən edilmiş məbləğlərdən aşağı olduqda, sözügedən prinsiplər Satınalmalar Qrupunun qərarı ilə tətbiq oluna bilər.
  

Müsabiqə Mərhələsi

• 
  Müsabiqəyə Dəvət Sənədlərində “Bağlı Zərf” və “İki Zərf” prinsiplərinin tətbiq edilməsi aydın şəkildə göstərilməlidir. Bu zaman texniki (qiymət göstərilmədən) və maliyyə təkliflərinin ayrı-ayrılıqda bağlı zərfdə təqdim edilməsi tələb olunmalıdır.
  

• 
  “Bağlı Zərf” prinsipi tətbiq olunduğu halda müsabiqə təklifləri faks yaxud elektron poçtla qəbul oluna bilməz.
  

Müsabiqə təkliflərinin qəbulu

• 
  Müsabiqə təkliflərinin qəbulu zamanı Əlaqələndirici şəxs Baş ofisdə və ya Struktur Vahiddə fəaliyyət göstərən, sənədlərin qeydiyyatını aparan struktur bölmə tərəfindən zərflərin üzərinə daxilolma ştampının vurulmasını, dəqiq vaxtın qeyd olunmasını təmin etməlidir.
  
• 
  Zərflərin müsabiqə təkliflərinin açılışı iclasına qədər bağlı saxlanması Əlaqələndirici şəxs tərəfindən təmin edilməlidir.
  
• 
  Bağlı Zərf prinsipli müsabiqə təklifi açıq alınıbsa, Əlaqələndirici Şəxs həmin müsabiqə təklifini geri qaytarmalı və təkrar təqdim edilməsini tələb etməlidir.
  
• 
  Dəvət olunmamış müsabiqə təklifləri qəbul olunmamalıdır.
  

Gecikmiş müsabiqə təklifləri

• 
  Hər hansı müsabiqə təklifi son qəbul vaxtından dörd saat öncə hələ gəlməyibsə, bağlamanın göndərilməsi vəziyyətini öyrənmək üçün Əlaqələndirici Şəxs müsabiqə iştirakçısı ilə dərhal telefon əlaqəsini yaratmalıdır.
  
• 
  Gecikmiş müsabiqə təklifləri açılmamış geri qaytarıla bilər.
  
• 
  Müsabiqə təklifləri açılandan sonra heç bir halda başqa təkliflər qəbul oluna bilməz.
  

Müsabiqə təkliflərinin açılışı

• 
  Əlaqələndirici Şəxs Sifarişçini müsabiqə təkliflərinin açılışının təşkili barədə məlumatlandırmalıdır.
  
• 
  Müsabiqə təkliflərinin açılışı konfidensiallığın saxlanmasını təmin edən mühitdə aparılmalıdır.
  
• 
  Hətta bütün dəvət olunmuş müsabiqə təklifləri artıq alınıbsa, müsabiqə təkliflərinin açılışı bütün tərəflər üçün rahat olan vaxta təyin olunmaqla müsabiqə təkliflərinin qəbulu üçün təyin olunmuş vaxtdan tez olmamalıdır.
  
• 
  Müsabiqə təkliflərinin açılışında yalnız Satınalmalar Qrupunun üzvləri və müsabiqə iştirakçıları (nümayəndələri) iştirak etməlidir.
  
• 
  Müsabiqə təkliflərinin açılışı barədə protokol tərtib edilir.
  

Müsabiqə təkliflərinin paylanması
Orijinal nüsxələr və qiymət olan nüsxələr Əlaqələndirici Şəxsdə qalır, qiymət olmayan nüsxələr isə texniki qiymətləndirməni aparan qrupa paylanılır.

6.5.2 Digər Müsabiqələr (Bağlı Zərf və İki Zərf prinsipinlərinin tətbiq edilmədiyi müsabiqələr)
Təyinatı
Bu təlimatda, Bağlı Zərf və İki Zərf prinsipləri tətbiq edilmədikdə, yəni ehtimal olunan müqavilə dəyəri ARDNŞ prezidentinin əmrilə müəyyən edilmiş həddən aşağı olan satınalmalarda müsabiqələrin keçirilməsi qaydası təsvir olunur.
Vəzifələr
Təyin olunmuş Əlaqələndirici Şəxs bu təlimatda göstərilmiş tələblərin icrasına görə cavabdehdir.
Əsas tələblər

• 
  Müsabiqəyə dair bütün sorğular təyin edilmiş Əlaqələndirici Şəxs tərəfindən hazırlanmalı, imzalanmalı və göndərilməlidir. Bu zaman Sifarişçinin köməyinə ehtiyac olarsa, həmin kömək göstərilməlidir.
  
• 
  Müsabiqə zamanı müsabiqənin iştirakçısının sorğularına cavablar yalnız həmin iştirakçıya göndərilməlidir. Həmin məlumatın digər müsabiqə iştirakçılarına göndərilməsi Əlaqələndirici Şəxsin qərarı əsasında tələb oluna bilər (texniki detalların dəqiqləşdirilməsi, əhəmiyyətli məlumatların çatışmaması və sairə).
  
• 
  Təkliflər faks, elektron poçt və digər vasitələr ilə alınıb, alınan kimi açıla bilər. Bu məlumatlar aidiyyəti olmayan şəxslərə təqdim edilə bilməz.
  
• 
  Müsabiqə təklifləri Əlaqələndirici Şəxs tərəfindən nəzərdən keçirilib və tələb olunduqda aydınlaşdırılmalıdır.
  
• 
  Müsabiqə təkliflərinin qiymətləndirilməsi təlimatın 6.5.5-ci bölməsində əks etdirilib.
  

3. 
   Təkliflərin alınmasına qədər fəaliyyət
   

Təyinatı
Bu təlimatda müsabiqə təkliflərinin alınmasından öncə görüləcək tədbirlər göstərilir. Xüsusilə, müsabiqə qabağı brifinqlər, müsabiqə iştirakçılarının sorğularının cavablandırılması, müsabiqə müddətinin uzadılması barədə müraciətlərə cavab və lazım olan tarixdə təqdim edilməsini təmin etmək üçün müsabiqə təkliflərinin izlənməsi məsələləri öz əksini tapır.
Vəzifələr
Təyin olunmuş Əlaqələndirici Şəxs müsabiqə qabağı brifinqlərin keçirilməsinə nəzarət və idarə etməlidir; bütün sorğuların dərhal və bu Təlimatlara uyğun cavablandırılmasını və bütün müsabiqə təkliflərinin təyin olunmuş vaxta qədər alınmasını təmin etməlidir.
Sifarişçi müsabiqə qabağı brifinqlərin aparılmasına, hər hansı sorğuların təyin edilmiş Əlaqələndirici Şəxsə yönəldilməsinə və cavabların hazırlanmasında köməyin göstərilməsinə görə cavabdehdir.
Müsabiqə qabağı brifinqlər

• 
  Müsabiqə iştirakçıları ilə müsabiqə qabağı brifinqlər iştirakçı siyahısının təsdiqindən sonra və Dəvət Sənədlərinin göndərilməsindən əvvəl və ya sonra keçirilə bilər.
  
• 
  Müsabiqə qabağı brifinqlərin keçirilməsinin məqsədi - bütün iştirakçıların tam və ətraflı müsabiqə təklifi verməsi üçün lazımlı məlumata sahib olmasını təmin etməkdir.
  
• 
  Belə iclasları aşağıdakı hallarda keçirilməsinə diqqət ayrılmalıdır:
  
  • 
    Müsabiqə zamanı yeni, yaxud mürəkkəb satınalma strategiyası tətbiq edildikdə;
    
  • 
    Müsabiqə iştirakçısının əsasən satın alınacaq işləri sahə şəraitində (vəziyyətində) qiymətləndirilməsi vacib olduqda;
    
  • 
    Digər podratçılar ilə işi koordinasiya etmək və hər bir podratçının vəzifələrinin hədlərini müəyyən etmək ehtiyacı olduqda;
    
• 
  Hər bir müsabiqə iştirakçısı ilə ayrı ayrılıqda yaxud bütün iştirakçılar ilə birlikdə iclasların keçirilməsi biznes cəhətdən dəyərləndirilməlidir. Lakın ayrı-ayrı görüşlərin keçirilməsi tövsiyə olunur.
  
• 
  Brifinqdə bütün müsabiqə iştirakçılarına eyni məlumatlar verilməlidir.
  
• 
  Brifinqdə qaldırılan məsələlərin vacib məqamları müsabiqəyə Dəvət Sənədlərində (hələ göndərilməyibsə) həll olunmalı və ya müsabiqə bülleteni şəklində bütün müsabiqə iştirakçılarına göndərilməlidir.