- 35 -
ƏFQANISTAN: SOVET IŞĞALINDAN AMERIKA MÜDAXILƏSINƏ | MƏSIAĞA MƏHƏMMƏDI
Əfqanıstan müxalifətinin daha fəal şəkildə dəstəklənəcəyi anla-
mına gəlirdi.
Əfqanıstan üçün digər mühüm ölkə – İran da ƏXDP haki-
miyyətinə mənfi münasibətini gizlətmədi. Şah rejimi inqilabdan
sonra Əfqanıstanla sərhədlərini bağladı və əvvəllər imzalanmış
müqavilələrin (o cümlədən, neft və neft məhsullarının satışına
dair) yerinə yetirilməsini dayandırdı. İslam inqilabından sonra
isə yeni İran hakimiyyəti ƏDR-ə qarşı daha kəskin mövqe sər-
giləməyə başladı. Əfqanıstan hökumətinin əməkdaşlıq təklifini
rədd edən teokratik rejim ƏXDP-yə qarşı mübarizə aparan islam-
çı müxalifəti, ilk növbədə, şiə qruplaşmalarını müdafiə etmək və
yardım göstərmək yolunu tutdu.
«Aprel inqilabından» sonrakı ilk aylarda yeni hakimiyyətə
nisbətən loyal yanaşan Qərb dövlətlərinin, ilk növbədə ABŞ-ın
mövqeyində də tədricən sərtləşmə müşahidə edilməyə başladı.
İlkin mərhələdə bir növ gözləmə taktikası seçən ABŞ rəhbərliyi
ƏXDP-nin daxili və xarici siyasətinin getdikcə aydınlaşan kontur-
larını gördükdə, tədricən ona qarşı mübarizənin əsas təşkilatçısı
və koordinatoruna çevrildi. 1979-cu ilin fevralında Kabuldakı
ABŞ səfirinin öldürülməsi münasibətlərin kəskinləşməsində
önəmli amil rolunu oynadı. ABŞ-ın ardınca onun Qərbdəki müt-
təfiqləri – İngiltərə, Fransa və Almaniya Federativ Respublikası,
eləcə də Yaponiya Əfqanıstana göstərdikləri maliyyə-iqtisadi və
texniki yardımları dayandırdılar.
Regional və qlobal oyunçular tərəfindən sıxışdırılmaqda olan
ƏDR hökuməti getdikcə daha çox SSRİ-yə sığınır, onun göstərdi-
yi yardımların artırılması, yeni, hətta açıq müdaxilə formasında
reallaşdırılması barədə istəklərini dilə gətirirdi. Münasibətlərin
məntiqi yekunu olaraq, 1978-ci il dekabrın 5-də Tərəki başda ol-
maqla Əfqanıstan nümayəndə heyətinin Moskvaya səfəri zamanı
SSRİ ilə ƏDR arasında dostluq, mehriban qonşuluq və əməkdaş-
lıq haqqında müqavilə imzalandı. Müqavilə üstüörtülü şəkildə
- 36 -
ƏFQANISTAN: SOVET IŞĞALINDAN AMERIKA MÜDAXILƏSINƏ | MƏSIAĞA MƏHƏMMƏDI
olsa da, ƏDR-in düşdüyü vəziyyəti və gələcək ssenariləri özündə
əks etdirirdi. Qeyd olunurdu ki, “tərəflər iki ölkənin təhlükəsiz-
liyini, müstəqilliyini və ərazi bütövlüyünü təmin etmək məqsə-
dilə məsləhətləşmələr aparacaq və müvafiq tədbirlər görəcəklər”,
həmçinin “uyğun razılaşmalar əsasında hərbi əməkdaşlığı davam
etdirəcəklər”. Bununla da gələcək hərbi təcavüzə bir növ hüquqi
baza yaradılmış oldu.
Bütün qeyd olunanlarla yanaşı, ƏXDP hakimiyyətinin üzləş-
diyi ciddi çətinliklər və uğursuzluqlarda bir amilin də həlledici
rolu oldu. Bu da əzəli və əbədi «Xəlq» – «Pərçəm» rəqabəti və
qarşıdurması idi.
Patiyadaxili və cinahlararası mübarizə “inqilab”ın ilk saat-
larından özünü göstərməyə başladı və məlum oldu ki, çevriliş
ərəfəsində ƏXDP-də təşkilati birlik barədə razılaşma siyasi şəra-
itin diktəsi və xarici qüvvənin (SSRİ-nin) təzyiqi ilə əldə edilmiş
müvəqqəti (taktiki!) addımdan başqa bir şey deyilmiş. Hakimiy-
yətinin ilk günlərindən ƏXDP fraksiyalar arasında uzunmüddətli
amansız və üzücü mübarizə girdabına yuvarlandı.
Qeyd olunduğu kimi, “inqilab”dan bir neçə gün sonra for-
malaşmış hökumətdə nazir postları təqribən bərabər nisbətdə
(«Xəlq»çilərin müəyyən üstünlüyü ilə) iki fraksiyanın təmsil-
çiləri arasında bölüşdürülmüşdü. Lakin “onlar nazirliklərə gedən
kimi, «Xəlq»çilər öz cinahlarının, «Pərçəm»çilər də öz cinahla-
rının üzvlərini dövlət orqanlarında yerləşdirməyə başladılar. Çox
keçmədən nazirliklər rəqabət səngərlərinə çevrildilər. Xarici işlər
nazirliyi Həfizulla Əminin ixtiyarına verilmişdi, ona görə «Pər-
çəm» fraksiyasından olan heç kəsə orada yer yox idi. Bu vəziyyət
dövlət hakimiyyətinin yuxarı eşelonlarına da mənfi təsir göstərdi,
Əmin ilə Bəbrək Karməl arasında gizli təbliğata əsaslanan düş-
mənçilik atmosferi meydana gəldi» [121].
«Xəlq» – «Pərçəm» ixtilaflarını körükləyən, qarşıdurmanı
qızışdıran və dərinləşdirən əsas şəxs Həfizulla Əmin idi. Özünü
- 37 -
ƏFQANISTAN: SOVET IŞĞALINDAN AMERIKA MÜDAXILƏSINƏ | MƏSIAĞA MƏHƏMMƏDI
inqilabın komandanı və qəhrəmanı sayan Əmin «Pərçəm»in
hakimiyyətdən pay almağa haqqı çatmadığı fikrini hər vəchlə ya-
yırdı. Karməl tərəfdarları da onu avantürist, partiyanın birlik və
vəhdətini pozan bir şəxs kimi dəyərləndirirdilər.
Hadisələrin sonrakı gedişi göstərdi ki, «Pərçəm»ə qarşı apar-
dığı kampaniya sadəcə Əminin avantürizminin təzahürü deyil,
düşünülmüş xəttinin nəticəsi idi. «Xəlq»in radikal qanadına rəh-
bərlik edən Əmin ilkin mərhələdə «Şərqin dahisi», «Böyük us-
tad», «Xalqın yaradıcı lideri» kimi epitetlərlə öydüyü Tərəkinin
köməyi ilə «Pərçəm» üzvlərini siyasi səhnədən uzaqlaşdırmaq,
sonrakı mərhələdə isə Tərəki və tərəfdarlarını da sıradan çıxarıb
hakimiyyəti tam şəkildə öz əlinə keçirmək niyyətində idi. Bu niy-
yəti gerçəkləşdirmək üçün ona il yarımdan da az vaxt lazım oldu.
«Xəlq» ilə «Pərçəm» arasında qarşıdurmanın qızışmasında
və ixtilafın açıq müstəviyə keçməsində 1978-ci il mayın 22-də
ƏXDP tərəfindən nəşr olunmuş «Aprel inqilabı haqqında» adlı
kitabça xüsusi rol oynadı. Burada hələ üstündən bir ay keçməmiş
“inqilab”a Əminin baxışı öz əksini tapmışdı: “inqilab”da əsas rolu
«Xəlq»çi zabit və əsgərlərin oynadığı, Əminin isə Davud rejimi-
nin devrilməsinə bilavasitə rəhbərlik etdiyi vurğulanmışdı. Parti-
yanın rəsmi nəşri olan broşürada Karməl və «Pərçəm» üzvü olan
hərbçilərin adları belə çəkilməmişdi. Bu azmış kimi «Tərəkinin
ətrafında olan bəzi şəxslərin qiyamın uğuruna inanmadığı, pas-
sivlik nümayiş etdirdiyi, Davudu öldürməməyə çağırdığı» qeyd
olunmuşdu. Əfqan cəmiyyəti, xüsusən partiya üzvləri burada
Karmələ işarə olunduğunu yaxşı bilirdilər.
Bundan cəmi iki gün sonra ƏXDP MK-nın partiyadaxili bir-
liyə həsr olunmuş xüsusi iclası keçirildi. İclasda partiyada fraksi-
yaçılığı pisləyən, ƏXDP üzvlərini «Xəlq»çi və «Pərçəm»çi ad-
landırmağın yolverilməz olduğunu bildirən qərar qəbul olundu.
Lakin qərardakı bir məqam onun əslində hansı mahiyyət daşıdı-
ğını və mümkün nəticələrini açıq şəkildə ortaya qoyurdu. Belə ki,
Dostları ilə paylaş: |