35
IV
Lakin bu istiqamətdə atmalı olduğumuz başqa addım daha vacibdir. Bu, Azərbaycanda diqqəti cəlb edən
nə varsa, hamısının öz əksini tapdığı illüstrasiyalı nəşrin buraxılmasıdır. Gürcülər artıq belə bir iş görüblər
(Əlavə 8). Biz də ayda bir dəfə çıxan "L'İmage" jurnalının naşiri ilə razılıq əldə etmişik. Biz həmin jurnalın
noyabr nömrəsinin Azərbaycana həsr olunmasını istəyirdik. Lakin fotoşəkillər, açıqcalar və s. baxımından
əlimizin altındakı materialı gözdən keçirəndə jurnalın illüstrasiya nöqteyi-nəzərindən çox solğun görünəcəyi
qənaətinə gəldik. Xüsusilə ordumuza dair fotoşəkillərin yoxluğu özünü daha kəskin şəkildə büruzə verir. Bizdə
General Mehmandarovun bir dənə də olsun şəkli yoxdur. Adını çəkdiyim jurnalın bütün nömrələri isə, demək
olar ki, hərbi xarakterli şəkillərlə doludur. Bu, bir tərəfdən yaşanan dövrün səciyyəsi ilə bağlıdır, o biri tərəfdən
isə ölkənin müdafiə qüdrətinin, onun hərbi gücünün göstəricisidir. Bütün bu mülahizələr bizi jurnalın noyabr
nömrəsi ilə bağlı fikrimizdən daşındırdı. Biz indi noyabr əvəzinə, dekabr, yaxud növbəti ilin yanvar nömrəsini
götürmək istəyirik. Ümid edirəm ki, o zamana qədər siyahısını əlavə etdiyimiz fotoşəkilləri və digər zəruri
illüstrasiya materiallarını Sizdən alacağıq (Əlavə 9).
Söz yox ki, siyahı minimum tələbləri əhatə edir. Əgər burada göstərilənlərdən əlavə şəkillər və açıqcalar
göndərsəniz, bizi yalnız sevindirərsiniz. Ancaq xahiş edirəm, bu məsələdə tələsin ki, cənab Berlin həmin
materialları özü ilə gətirə bilsin. Biz və "L'İmage" jurnalının naşiri səbirsizliklə gözləyəcəyik.
V
Mən artıq mətbuat vasitəsilə təbliğat barəsində Sizə yazmışdım. Bu baxımdan mətbuatın bura yeni
gəldiyimiz vaxtla müqayisədə indi Azərbaycan haqqında daha tez-tez söz açmasını və ölkəmizin adını daha tez-
tez çəkməsini qeyd etmək zəruridir. Doğrudur, haqqında Hacınskinin Sizə ətraflı məlumat verəcəyi planı həyata
keçirə bilmədik. Bu da əsas etibarilə dəfələrlə Sizə yazdığım maddi vəsait çatışmazlığı üzündən baş verdi. Lakin
bütün bunlara baxmayaraq indi heç olmazsa, bizə rəğbət bəsləyən çap orqanları vardır.
İlk növbədə biz öz bülletenimizin nəşrini davam etdiririk. Artıq üç nömrə çıxıb, dördüncü isə çapa
hazırlanır və bu günlərdə işıq üzü görəcək. Biz bu bülletenləri məlumat orqanı kimi həm burada, həm də
İngiltərədə və Amerikada hər yerə göndəririk. Eyni zamanda ingilis və fransız dillərindəki memorandumlarımız
da xəritələr və əhali diaqramları əlavə olunmaqla iqtisadi broşüralarla birlikdə müxtəlif yerlərə göndərilir.
Bundan başqa biz fransız və ingilis dilində iki həftə-də bir dəfə çıxan "L'Europe Orientale" jurnalından
istifadə edirik. Bizim haqqımızdakı məlumatlar "Revue de Monde musulman", "Revue Cantempoiraine"
jurnallarında, habelə "Le Temps", "L'Humanite", "La Depeche" qəzetlərində də çıxır. Son vaxtlar isə özünün
açıq-aşkar antirus xarakteri ilə seçilən və keçmiş Rusiyanın "yadellilər" adlandırılan əhalisinə rəğbətlə yanaşan
"Le dernier Nouvelles demidi" qəzeti də bizimlə yaxından maraqlanır.
Yuxarıda adını çəkdiyim mətbuat orqanlarından bəzilərinin nüsxələri başqa qəzetlərlə birlikdə ayrıca bir
zərfdə Sizə göndərilir.
Əvvəldə xatırlatdığım plana gəldikdə isə, biz onu heç vaxt diqqətdən yayındırmırıq. Hökumətdən zəruri
maddi vəsait alan kimi həmin planı həyata keçirəcəyik.
Yeri gəlmişkən, indi buradakı bütün mətbuat orqanları mütəşəkkil surətdə Parlament seçkiləri ilə
məşğuldur (noyabrın 16-da keçiriləcək).
Ən son momentdə yenə də sözün geniş mənasında mətbuat məsələsi ilə bağlı təzə bir sual ortaya çıxdı.
Məsələ buradadır ki, "L'Europe Orientale" jurnalının rəhbərləri hələ lap başlanğıcdan onu İsveçrədə çap etmək
istəyirdilər. Yanvar ayından başlayaraq onlar özlərinin bu niyyətlərini həyata keçirmək fikrindədirlər və jurnalın
nəşri Cenevrəyə köçürüləcək. Məsələ yalnız jurnalda deyil. Söhbət Cenevrədə keçmiş Rusiya ərazisində
meydana gəlmiş bütün respublikaların müdafiəsini öz üzərinə götürən bir mərkəzin yaradılmasından gedir. Elə
dünən bu məsələ ilə bağlı Ukraynanın tanınmış xadimi, keçmiş gimnaziya yoldaşım professor Qruşevski ilə
geniş söhbətimiz oldu. Onun fikrincə, Cenevrədə hər respublikanın öz mərkəzi yaradılmalıdır, çünki Millətlər
Cəmiyyəti fəaliyyətini burada davam etdirəcəkdir. Az tanınan xalqlar üçün isə belə mərkəzlər daha zəruridir.
Ukraynalılar, estonlar, gürcülər artıq İsveçrədə əməlli-başlı məskunlaşıblar. Əlbəttə bu işlər böyük vəsait tələb
edir. Yeni yaranan respublikaların hamısı isə, təəssüf ki, belə vəsaitə malik deyil. Qruşevskinin sözlərindən belə
çıxdı ki, hamının yeganə ümidi Ukraynaya və Azərbaycanadır. Bizdən əhəmiyyətli yardım gözləyirlər. həm öz
mənafeyimizi, həm də ümumi mənafeyi nəzərə alaraq, belə hesab edirəm ki, bu məsələdə əlimizdən gələn
yardımı göstərməliyik. Ən başlıcası isə Cenevrədə özümüzə yer eləməyə tələsməliyik.
Bu işə mən partiya məsələsi kimi deyil, ümumi işimiz kimi böyük əhəmiyyət verirəm. Lakin hələ
məsələ sona qədər aydınlaşdırılmamışdır. Ona görə də ideyanı həyata keçirmək üçün zəruri olan planın
şərhindən özümü saxlayıram. İndi bir məsələ aydındır ki, biz "L'Europe Orientale" jurnalına yardım
göstərməliyik. Nümayəndə heyətimiz jurnala yardım məqsədi ilə 10 min frank ayırıb. Həmin məbləğdən 5 min
frank artıq onun hesabına köçürülüb, qalan məbləğ isə bu günlərdə ödəniləcək. Digər tərəfdən, qarşıdan gələn
1920-ci il üçün ya 20 min frank ödəməliyik, ya da jurnalın 20 min nüsxəsinə abunə yazılmalıyıq. Şübhə
36
etmirəm ki, Nümayəndə heyəti hökumətdən tələb olunan vəsaiti alacaq və 1920-ci ildə jurnala lazımi miqdarda
maddi yardım göstərmək imkanını əldən verməyəcək.
Təkrar edirəm: jurnal gələcəkdə də bizim üçün çox faydalı bir orqan olacaqdır. Gələcəkdə Cenevrədə,
Millətlər Cəmiyyətinin gözü qarşısında öz Mərkəzimizi yaradanda isə o, artıq bizim üçün zərurətə çevriləcəkdir.
Bunu da nəzərə almaq lazımdır ki, İsveçrənin mətbuat orqanlarının səsinə həmişə diqqətlə qulaq asırlar. Yeri
gəlmişkən, bizim Nümayəndə heyəti ilə əlaqə saxlayan professor Broşe "Jurnal de Jenev"də Azərbaycan
haqqında iki məqalə çap etdirmişdir. Onun özünün Lozannada nəşr etdiyi "Les peuples Libres" jurnalında da 6
və 7-ci nömrələrdə Azərbaycan haqqında iki yazı verilmişdir. Bütün bu materialların hər birindən bir neçə nüsxə
olmaqla ayrıca qovluqda Sizə göndərilir. Nəhayət professor Broşe bizim haqqımızda ingilis və amerikan
qəzetlərinə də məqalələr yazmışdır. Təəssüf ki, hələlik onların nüsxələrini almamışıq.
VI
Amerika Nümayəndə heyətinin keçmiş tərkibindən burada yalnız cənab Morqentau qalmışdır. Üç həftə
əvvəl o da gəldi (mətndə diqqətsizliyə yol verilmişdir. Əslində "getdi" olmalıdır - tərc.). Yola düşməmişdən
əvvəl mən cənab Morqentaunun yanında oldum, bizim Amerikadakı müvəkkilimiz cənab Çendlerə əlindən
gələn yardımı göstərməsini xahiş etdim. O, Çendleri yaxşı tanıyır. Cənab Morqentau bacardığını edəcəyinə söz
verdi, ancaq bildirdi ki, Amerikada öz təmsilçilərimizin olması daha yerinə düşərdi: "Biz bütün kiçik xalqların
dostuyuq, lakin sizə kömək etməyə ürəkdən can atsaq da, beynəlxalq siyasətdə hər şeyi təkbaşına həll etmirik.
Mən artıq Sizin memorandumla tanış olmuşam və görürəm ki, Azərbaycan zəngin ölkədir, o, müstəqil yaşaya
bilər. Sizi Amerikada yaxşı qarşılayarlar, çox güman ki, sərvətlərinizin üzə çıxarılması üçün kapital da tapılar".
Vidalaşmamışdan əvvəl o, ərazi məsələləri ilə məşğul olan bölmənin başçısı cənab Bukleri yanına çağırdı, məni
onunla tanış etdi və bildirdi ki, cənab Bukler hər zaman bizim işlərimizə yaraya bilər.
Bir gün sonra Buklerin yanında oldum. O, öz həmkarı ilə (adını xatırlamıram) birlikdə məni
ümumiyyətlə Qafqaz və xüsusən də Qafqaz xalqlarının münasibətləri haqqında uzun-uzadı sorğu-suala tutdu.
Verdiyim məlumatların çoxu, xüsusən də ermənilər barəsində söylədiklərim onun üçün Yenilik idi. Söhbətin
sonunda cənab Bukler bu məlumatlara görə mənə minnətdarlığını bildirdi və xahiş etdi ki, ona ölkəmizin siyasi
və iqtisadi xəritələrini göndərim. O dedi: "Sizi inandırmaq istəyirəm ki, qonşularınızı müəyyən dərəcədə
tanıyırıq və onları qətiyyən mələk hesab etmirik. İndi ölkənizdə olan missiyamızdan xəbər gözləyirik".
Bir həftə bundan əvvəl Qafqazdakı amerikan missiyasının başçısı general Harbord Parisdən keçərək
Amerikaya getdi. O, burada yalnız iki gün qaldı. Mən iki dəfə görüş üçün vaxt təyin etməsi məqsədi ilə
kuryerimizi onun yanına göndərdim. Adyutantı bildirdi ki, general özü bizimlə görüşməyə məmnun olacaq,
təyin edilmiş saat barəsində isə, özü telefonla xəbər çatdıracaqdır. Lakin təəssüf ki, bu dəfə onunla görüşmək
mümkün olmadı. General Hahrbord gəlişi münasibəti ilə qəzetlərdə
("Le Temps") bildirilirdi ki, o məruzəsini birbaşa prezident Vilsonun özünə təqdim edəcək, Amerikanın
Ermənistan üzərində mandat almasının əleyhinədir, yalnız Amerikanın Türkiyə üzərində mandat sahibi
olmasına razıdır və çox məşğul olduğundan heç kəsi qəbul etmir.
Əlavə edim ki, onun səfəri ilə bağlı Amerikanın özündən müəyyən məlumatlar alacağımıza ümidimi
itirirəm.
Polkovnik Haske1 də bir neçə günlüyə bura gəlib. Mən dünən ondan məktub aldım. O, məktubunda
hörmətkaranə bir tərzdə görüşmək istəyini bildirirdi. Bu gün cənab Məhərrəmovla birlikdə onun yanında olduq.
O, ilk növbədə polkovnik Rey-n Tiflisdən salamını və Kanada Qırmızı Xaç Cəmiyyətinin bizə verdiyi 200 yeşik
müxtəlif xəstəxana materiallarının (bu barədə Sizə daha əvvəl məlumat çatdırmışdım) Amerika gəmisində
Batuma göndərilməsi ilə əlaqədar sifarişini mənə yetirdi. Sonra cənab Haske1 ölkəmizdə müşahidə etdiyi
qayda-qanun barəsində tərifli sözlər dedi. O, özünün Bakıda ehtiramla qəbul olunmasından çox razıdır. Bizim
sadə camaat xoşuna gəlib, "xalqınız sülhsevər xalqdır və qətiyyən ermənilərin düşməni deyil". "Əgər siyasət
adamları (Hommens Politiciens) olmasaydı, ermənilər də sakit yaşayardılar" - deyir. Naxçıvan və Şərur
dairələrində indi sakitlikdir. Amerikalı qubernatorun idarə etdiyi neytral zona yaradılmışdır.
Mən Naxçıvan və Şərur dairələrində Ermənistanla bizim əhali arasında qarşılıqlı münasibətlərin nizama
salınmasında onun neçə mühüm rol oynadığı barəsində hökumətimizin artıq Nümayəndə heyətinə xəbər
verdiyini polkovnikə dedim və eyni zamanda öz adımdan da ona minnətdarlığımızı bildirdim. Sonra xatırlatdım
ki, hökumətimizdən bizə çox xoş olan bir xəbər almışam. Bu da Naxçıvanda və Şərurda baş verən hadisələrdə
guya müsəlmanların günahkar olması barəsində ermənilərin burada yaydıqları yanlış məlumatlarla bağlıdır.
Ermənilər guya bu barədə polkovnik Haske1-in Ermənistan Parlamentindəki çıxışında məlumat verdiyini iddia
edirlər. Əslində isə, hökumətimizin də bildirdiyinə görə, həmin yalan xəbəri polkovnik özü təkzib edib.
Polkovnik Haske1 dediklərimlə razılaşdı.
Bizim suallarımıza cavab verərkən polkovnik əmin olduğunu qeyd etdi ki, Zaqafqaziya xalqları, hətta
bütün Qafqaz xalqları birlikdə yaşaya bilərlər. Çünki onlar hər şeydən əvvəl iqtisadi cəhətdən biri-birləri ilə
möhkəm bağlıdırlar. Lakin başlanğıc mərhələdə hər hansı qüdrətli dövlətin onlara himayədarlıq etməsi zəruridir.
Həmin dövlət ilk növbədə bütün regionda maliyyə vəziyyətinin yaxşılaşmasına yardım göstərməlidir. Bir neçə