70
faktiki olaraq, Avropada hegemonluq uğrunda mübarizəyə başlayır. Reyni tutur,
İspaniyaya müdaxilə edir, Versalın hərbi şərtlərini pozaraq, öz hərbi kontingentinin
sayını artırır. Ölkələr susur və həm də nəinki susur, hətta, Almaniyanı öz rəqiblərinin
əleyhinə yönəltmək üçün onunla gizli danışıqlara başlayırlar. Onların Almaniyanın bu
hərəkətlərinə göz yumması və gizli danışıqlara başlaması Hitleri bir qədər də ruhlandırır
və alman qoşunlarını Avstriyaya daxil olmağa şirnikləndirir. Bunun ardınca Hitler Fransa
və İngiltərəni ya müharibə, ya da Çexoslovakiyanın almanlar yaşayan Sudet əyalətinin
Almaniyaya birləşdirilməsi dilemması qarşısında qoyaraq, Münhen (1938)
sövdələşməsinə imza atmağa məcbur edir. O zaman SSRİ Çexoslovakiyanın
parçalanmasına mane olmaq istəsə də, ABŞ bu sövdələşməyə etiraz etmir və beləliklə,
alman qoşunları Çexoslovakiyanın yarısını işğal edir. Münhenin ardınca Almaniyaya
qarşı mübarizə apara biləcək dörd əsas dövlətdən (İngiltərə, Fransa, ABŞ və SSRİ) biri
olan İngiltərə 1938-ci il sentyabrın 30-da Hitlerlə dostluq və hücum etməmək haqqında
saziş bağlayır. Bununla, İngiltərə öz maraqlarını qorumaq və təhlükəli Almaniyanı
rəqiblərinə qarşı yönəltmək məqsədi güdsə də, Almaniyanın Avropada işğal planlarına
yaşıl işıq yandırır. İngilislərin bu hərəkəti Fransanı da 1938-ci il dekabrın 6-da Almaniya
ilə eyni məzmunlu saziş bağlamağa və təhlükəni özündən uzaqlaşdırmağa sövq edir.
Bu Hitlerin əl-qolunu bir az da açır.
Fransa və İngiltərə hesab edirdi ki, bu separat sazişlərlə onlar Hitlerin Şərqə
hücumuna və Almaniya ilə Rusiya arasında müharibənin başlanmasına şərait
yaradacaqlar. Bu müharibədən hər iki ölkə öz xeyrinə yararlana biləcəyinə ümid edirdi.
Guya bu müharibədə rəqiblər (Almaniya və Rusiya) zəifləyər və bundan məharətlə
bəhrələnmək olarmış. Ingiltərə və Fransanın Almaniyanı Şərqə doğru (SSRİ-yə)
yönəltmək niyyətlərindən Hitler məharətlə istifadə etdi. O gizli şəkildə SSRİ ilə
danışıqlara başlayır və 1939-cu il avqustun 23-də “Ribbentrop-Molotov” paktı deyilən
gizli saziş bağlayaraq, Qara dənizdən tutmuş Baltik dənizinə qədər olan ərazilərin
1914-cü il sərhədləri (Rus imperiyasının sərhədləri) çərçivəsində bölünməsi və 10 il
müddətinə hücum etməmək haqqında razılığa gəlir. Beləliklə, İngiltərə, Fransa və ABŞ-
ın Almaniyanı SSRİ-yə yönəltmək cəhdləri boşa çıxır.
1939-cu il sentyabrın 1-də Almaniya Polşaya, SSRİ isə Qərbi Ukrayna və Qərbi
Belorusiyaya, daha sonra isə Finlandiyaya və Baltikyanı ölkələrə hücum edir. ABŞ,
İngiltərə və Fransa dərhal SSRİ-nin bu hərəkətinə reaksiya verir və onu “Millətlər
Liqası”ndan çıxarır, Almaniyaya isə müharibə elan edirlər. Beləliklə, beynəlxalq
münasibətlərin Versal-Vaşinqton sisteminə son qoyulur.
71
İkinci dünya müharibəsi başlayar-başlamaz Almaniyanın müttəfiqi hesab olunan
Yaponiya Çinin böyük hissəsini işğal edir və SSRİ-yə qarşı Uzaq Şərqdə müharibəyə
başlayır. Beləliklə, 1922-1939-cu illərdə beynəlxalq münasibətlər sistemində aparıcı
dövlətərin qeyri-səmimi siyasəti və öz maraqlarına görə kollektiv təhlükəsizlik
tələblərinə, Versal-Vaşinqton sistemi çərçivəsində razılaşdırılmış beynəlxalq hüquq
normalarına və sivil birgəyaşayış qaydalarına ikili standatrlarla yanaşması Avropada və
dünyada yeni qanlı və fəlakətli qarşıdurmaya şərait yaratdı. 1939-cu ildə bir vaxtlar
“Millətlər Liqası” tərkibində birgə fəaliyyət göstərən 44 dövlət yenidən müharibəyə cəlb
olundu və onların yaratdığı beynəlxalq münasibətlər sistemi öz yerini İkinci dünya
müharibəsinə verdi. “Millətlər Liqası” formal olaraq 1946-cı ilə qədər mövcud olsa da,
faktiki olaraq 1939-cu ildə öz fəaliyyətinə son qoydu.
6. İKİNCİ DÜNYA MÜHARİBƏSININ NƏTİCƏLƏRİ VƏ DÜNYADA ÜÇQÜTBLÜ
BEYNƏLXALQ MÜNASİBƏTLƏR SİSTEMİNİN YARANMASI
(1945-1950-Cİ İLLƏRİN ORTALARI)
İkinci dünya müharibəsinin başlanmasından keçən 20 ay ərzində alman
qoşunları bütün Şimal-Qərbi Avropanın kiçik dövlətlərini işğal edərək Balkanları,
Polşanı, Çexoslovakiyanı, Belçikanı, Hollandiyanı, Danimarkanı, Norveçi, Bolqarıstanı,
Albaniyanı, Yuqoslaviyanı ələ keçirmiş, Macarıstan, Rumıniya və Finlandiyanı təsir
dairəsi altına almış, Fransanı təslim olmağa məcbur etmişdir. Bütün bu ölkələrin iqtisadi,
ərazi, insan və s. resursları alman hərb maşınının əlinə keçmişdi. 1941-ci ildə artıq
SSRİ və İngiltərə də almanların hücumlarını gözləyirdilər. ABŞ-ı alman təhlükəsindən
okeanlar və bir qədər uzaqda olması sığortalasa da, o, hər halda Hitlerin qısa müddətdə
qazandığı müvəffəqiyyətdən ciddi təşviş keçirməkdə idi. 1941-ci ilin iyun ayında alman
qoşunlarının SSRİ-yə hücumu ingilis-amerikan siyasi dairələrinə bir qədər azad nəfəs
almağa imkan versə də, ümumilikdə onların rahat olması üçün heç bir əsas yox idi.
Bütün tərəqqipərvər bəşəriyyət, dünyanın hitlerizm təhlükəsi ilə üz-üzə gələn
xalqları birləşərək, XX əsrin bu bəlasından xilas olmaq üçün ayağa qalxmışdı. Faşizmə
qarşı mübarizə əzmi tezliklə bütün sinfi və ideoloji sədləri aşaraq anti-faşist
koalisiyasının yaranmasına və alman-italyan-yapon işğalına qarşı birgə mübarizənin
təşkil olunmasına gətirdi. 1941-42-ci illərdə Hitler və onun müttəfiqləri əleyhinə SSRİ,
İngiltərə və ABŞ-ın yaratdığı hərbi-siyasi ittifaqa müharibənin gedişində 50-yə yaxın
kiçik və böyük dövlət qoşuldu.