22
“ZƏNGƏZUR” ROMANININ
ƏYYUB ABASOV YARADICILIĞINDA
VƏ ƏDƏBİYYATIMIZDA YERİ
Ədəbiyyat tarixində bəzən bir əsəri, elmdə bir kəşfi ilə də
adını əbədiləşdirən yazıçı, alimlər olub. 70 illik kommunist-
sovet rejimi dövründə yaranan çox sayda əsərlər var ki, artıq
bu gün ədəbiyyata, sənətə aidiyyəti olmayan makulatura
məmulatına çevrilib, lazımsız poliqrafiya məhsulu kimi
kənara atılıb qalıb. Ancaq o əsərlər yaşayır, müəllifin adını
yaşada bilir ki, o zamanın bütün təqib, təzyiqlərinə baxma-
yaraq dövrün ədəbi qəliblərinə sığmayıb, kənara çıxıb, bü-
tün mövcud risqləri görüb dəyərləndirməklə yenə də yazıçı-
vətəndaş vicdanının səsi ilə həqiqəti yazıb, əks etdirib. Xalq
yazıçısı, tənqidçi ədəbiyyatşünas Elçin həm də məhz bu
amili nəzərə alaraq sosialist realizmin hakim ədəbi metod
olduğu dövrdə Azərbaycan nəsrində yaranan belə əsərlərdən
konkret ikisinin adını çəkir ki, biri məhz Əyyub Abasovun
"Zəngəzur" romanıdır. "...sosrealizm tarixin sınağından çı-
xa bilməsə də, onun çərçivələri daxilində elə əsərlər də ya-
ranıb ki ("Zəngəzur" - Əyyub Abasov; "Gələcək gün" -
Mirzə İbrahimov və s.), onların üzərindən qətiyyən xətt
çəkmək olmaz." Elçin "Sosrealizm bizə nə verdi?", "Ədə-
biyyat" qəzeti, № 12, 05.04.2013.
Nəzərə alsaq ki, Əyyub Abasov "Zəngəzur"la böyük ədə-
biyyata gələnə qədər daha çox şair, dramaturq kimi tanı-
nırdı. Birdən-birə iki cildlik romanın meydana çıxması onun
istedadının epik vüsətinin, ədəbi potensialının genişliyinin
də göstəricisi, həm də məhz Vicdanın Səsi idi.
İnqilabi-tarixi mövzuda yazılmış "Zəngəzur" romanının
ilk variantı cəmi 53 səhifə olub və 1953-cü ildə “Zəngəzur
dağlarında” adı ilə çıxıb. Müəllif həyatı boyu onu düşündür-
müş bu mövzuya yenidən qayıdaraq əsəri daha geniş va-
23
riantda işləmək zərurəti hiss edib. “Azərbaycan” jurnalının
1955-ci il 3, 9 və 10-cu nömrələrində romanın 1-ci hissəsi
çıxan kimi ədəbi camenin diqqət mərkəzinə düşüb, xeyli
fikirlər səslənib. "Zəngəzur" romanının ilk cildi nəşr edilən-
dən sonra da ciddi müzakirələrə yol açıb.
Roman barədə ən dolğun fikri görkəmli ədəbiyyatşünas
Məmməd Arif Dadaşzadə yazmışdı: “Zəngəzur”un ən yaxşı
cəhəti onun olduqca sadə və aydın dildə yazılmasıdır. Elə bil
ki, qarşımızda hadisələrin şahidi olan bir adam oturub
başına gələnləri bizə nağıl edir. Bu sadəlikdə bir təbiilik və
şirinlik, bir səmimiyyət də vardır....Görünür müəllif işlədiyi
materialı yaxşı bilir. Hətta bu materialı əməlli-başlı mənim-
səmiş, şüuruna və duyğularına daxil etmişdir.”
Eyni fikirləri bu və ya digər formada tənqidçi ədəbiy-
yatşünas Qulu Xəlilov, Əhəd Hüseynov və başqaları da
yazıb.
Əsər barədə ilk sanballı rəylərdən birini tənqidçi-ədəbiy-
yatşünas Məsud Əlioğlu romanın birinci hissəsi haqqında
"Azərbaycan" jurnalının 1956-cı il 2-ci sayında dərc olun-
muş "Ə. Abasovun "Zəngəzur" romanı haqqın-da" irihəcmli
məqaləsində yazdı.
“Zəngəzur” romanının 2-ci kitabı işıq üzü görmüşdü və
ədəbi aləmdə maraqla qarşılanmışdı, əl-əl gəzirdi, o bu əsəri
ilə artıq özünü təsdiqləmişdi, həm də ürəyini boşaltmışdı,
içini gəmirən, didib dağıdan, ürəyini üzən dərdləri kağıza
köçürmüşdü, xalqa, millətə, gələcəyə yadigar qoymuşdu. O,
bu romandan sonra artıq ədəbi nüfuzunun, istedadının ka-
millik günlərində idi.
Əməkdar elm xadimi, professor Cahangir Qəhrəmanov
yazırdı: “Zəngəzur” romanı müəllifin dərin həyati müşahi-
dəyə, mürəkkəb hadisələri inkişaf etdirə bilmək istedadına
malik olmasını sübut edir, onun bir sənətkar kimi dolğun-
laşdığını göstərir.”
Bu roman hər şeydən əvvəl XX əsrin əvvəlindəki Zən-
gəzur mahalının, onun sakinlərinin yaşam mənzərəsidir. Bir-
24
birindən maraqlı obrazlar, kəskin ziddiyyətli süjetlər, mü-
rəkkəb, çoxşaxəli kompozisiya min səhifəlik romanı oxu-
naqlı edir, yarımçıq qoymaq olmur. Burda daha çox qara
rəng, ağrılı-acılı lövhələr üstünlük təşkil edir; kasıbçılıq,
aclıq, səfalət, yoxsulluq içində üzülən, hakimiyyət, torpaq,
var-dövlət sahiblərinin azğınlığı, ərşə dayanan zülmü, heç
bir əxlaq, ölçü-biçiyə sığmayan qudurğanlığı, acgözlüyü,
hərisliyi, harınlığı...Və bir də gecə-gündüz fikri, xəyalı
ancaq acından ölməmək üçün çalışan zəhmətkeş insanların
mənəvi dünyası, əxlaqi təmizliyi, abır-həyası, dostluğa, duz-
çörəyə sədaqəti, ailə dəyərlərini, namus, ismətini qorumaq
üçün hətta, ölümə getməyə belə hazır olmaları, övlada,
valideynə məhəbbəti bu insanları birləşdirən səciyyəvi
cəhətlərdir, ağır töycü, biyar altında inləsələr də ancaq yenə
də gələcəyə inamlarını itirmirlər. Onlar sidq ürəklə bir olan
Allaha inanır, ürəkdən tapınır, başlarına gələn qəza-qədəri,
kasıbçılığı da o gözəgörünməzin alın yazısı hesab edir, ona
görə də yaxşı-pis hər şeyi ondan yalvarıb diləyirlər, içlə-
rindəki etirazı da bu qorxu səbəbilə boğmağa çalışırlar. Bu
əsər Zəngəzur kəndlilərinin əxlaq, mənəvi dəyərlər toplu-
sudur. Zəhmətkeş kəndli Nəbi, həyat yoldaşı Güləndam, qızı
Növrəstə, oğlu Yusif yaşadıqları dağların havası kimi təmiz,
saf insanlardır, sadə, səmimi ailədirlər. Onlar nə qədər
əziyyət çəkib əkib becərsələr də, yenə səfalət içində yaşa-
yırlar, çünki əldə etdikləri məhsulun çox hissəsini var-dövlət
xəstəsi mülkədar Hacı Atakişi, yaxud erməni qolçomaq
Baqrat qamarlayıb əllərindən alır. Onların hər ikisi yoxsul
kəndlilərə qarşı nə qədər amansızdırsa, çar hökumətinin
yerli nümayən-dələrini görəndə quzuya dönürlər, onların xo-
şuna gəlmək üçün hər dona girir, yaltaqlanır, əyilir, rüşvət
verir, yalan danışırlar. Ailə üzvləri də onların əlindən be-
ziblər, ancaq qarın dolusu yemək xatirinə qorxudan susurlar,
yoxsul Nəbinin, Aşotun ailəsində olan mehribançılıqdan
bunlarda əsər-əlamət yoxdur. Hacı Atakişinin oğlu Fərman
da atasının tökdüyün yığışdırıb, ona nifrət edən saf qəlbli