Mehnat faoliyati motivlari Mundajera

Kasb tanlash motivlari.

O’qish motivlari muammosini tadqiqot qilgan jahon psixologlari ularni ikki kategoriyaga yoki guruhga ajratib tekshirishni lozim topadilar. Birinchi kategoriyaga taalluqli motivlar o’quv faoliyatining mazmuni, mohiyati hamda uning jarayonlari, sharoitlari bilan bevosita uyg’unlashgandir. Ikkinchi kategoriyaga kiruvchi motivlar tizimi o’quvchilarning atrof - muhit bilan keng ko’lamdagi o’zaro munosabatlariga ularning begona, o’zga kishilar bilan muomalaga kirishish ehtiyojiga, ijtimoiy turmush vaqeliligiga nisbatan shaxsiy qarashiga bog’liqdir.

O’quv faoliyati mazmuni bilan uzviy bog’liq motivlar tizimini shartli ravishda ikki guruhga ajratib ularni ijobiy (musbat, pozitiv) va salbiy (manfiy, negativ) deb nomlash mumkin. Bunday atamalarni qo’llashdan asosiy maqsad mahalliy an’ana, ijtimoiy tajriba (stereotipizatsiya darajasidagi ta’sirchan kuchli tashqi omil) ekstremal holat ta’sirida keskin ruhiy burilishlar yasashga qodir psixologik mexanizmlarni aniqlashdan iboratdir. Odatda salbiy (negativ) motivatsiya shunday vaziyatda vujudga kelishi mumkinki, qachonki o’quvchi bilimlarni o’zlashtirmasligi oqibatida qanday ko’ngilsiz holatlarga olib kelishini anglab yetsa (jazolanish, ota- onalar tanbehi, sinfdoshlar e’tirozi, yomon baho olish, jamoa a’zolari orasida obro’sizlanish va boshqalar) va ana shunga muvofiq sa’yi - harakatlarni amalga oshirsa. Salbiy motivatsiyaga ega bo’lgan o’quvchi kamroq musibatli (mushkul ahvol) yo’lni tanlab ta’lim jarayonida qatnashishda davom etadi. Bunday o’qish motivatsiyasiga aloqador o’quvchilar yuqori ko’rsatkichlarga muvaffaqiyatli o’zlashtirish imkoniyatiga ega bo’lmaydilar, chunki ishtiyoqsiz darsga qatnashish tuyg’usi, bilim va o’quv predmetiga nisbatan qiziqishning mavjud emasligi bunga ma’noviy to’siq bo’lib xizmat qiladi. Buning natijasida o’zlashtirmovchi, bo’sh o’zlashtiruvchi, sust o’quvchilarning safi tabora kengayib boradi, bu narsa kundalik odatga aylana borsa, u stereotip darajasiga o’sib o’tishi mumkin. Mustaqil va muvaffaqiyatli o’qish esa shaxsdan faol, qat’iy, ijodiy izlanishlarni taqozo qiladi va shunga o’xshash talablarni o’zlashtiruvchi oldiga qo’yadi. SHaxsning mazkur holatlarga tayyor emasligi, undagi imkoniyatlarning cheklanganligi sababli o’zlashtirmovchilar qatorini to’ldirishga, bir sinfda yoki kursda ikki yil o’qishga olib keladi, o’sha qiyinchiliklar bilan o’z sinfi, kursini tamomlaydi. Bunday toifadagi o’quvchilar yoki talabalar o’quv faoliyati motivatsiyasini qayta qurish evaziga ijobiy natijalarga erishishi mumkin.
O’quvchilar va talabalarda o’qishga nisbatan salbiy motivatsiya birdaniga vujudga kelmaydi, balki uni keltirib chiqaruvchi bir necha xususiyatli omillar ta’sir etishi ehtimol.
Ma’lumki, birinchi sinf, kollej, akademik litsey o’quvchilari, oliy maktab talabalari o’ta kuchli xohish, qiziqish yuksak ezgu niyatlar bilan sinfga va auditoriyaga kiradilar. Ularning barchasida tevarak atrof va ijtimoiy muhitda o’z o’rnini o’quvchi va talaba sifatida egallash ehtiyoji mavjud bo’lib, yangi vaziyatda muayyan faoliyatini amalga oshirish ishtiyoqini keltirib chiqaradi. Yangicha vaziyat, o’ziga xos talab, qoidalar, munosabatlar muhitdagi xoh birinchi sinf o’quvchisi, xoh kollej tinglovchisi, xoh talaba bo’lishidan qat’iy nazar ularning har qaysisi o’qishga qiziqib, mas’uliyat sezib, vijdonan, ijobiy munosabatda bo’ladi. Ammo ta’lim jarayonida o’quvchilarning ayrimlarida o’qishga nisbatan ijobiy munosabat asta sekin so’na boshlaydi. YAngi muhit, ilm dargohlaridagi majburiyatlar, pozitsiyalar, qonun - qoidalar o’z ahamiyati, nisbiy yangilik xususiyatini yo’qota boradi, his-tuyg’ularga serob, quvnoqlar davrasiday tasavvur etilgan sinf (auditoriya) g’ayri tabiiy qo’rinish kasb etadi.
O’qishga nisbatan saboq oluvchilar munosabatii aniqlashga harakat qilgan o’qituvchi qanday o’zgarishlar yuz berayotganligini qayd qilish uchun ayrim mezonlarni ta’kidlay boshlaydi: a) xayolparishonlik vujudga keladi; b) vijdonan yondashish yo’qoladi; v) boshqalardan ko’chirib olishni odat qiladi; g) yolg’on so’zlash va bahona qidirishga o’rganadi; d) darslarni qoldiradigan bo’lib qoladi; ye) mustaqil topshiriqlarni bajarmay qo’yadi va boshqalar. O’qituvchi yoki o’quvchilar jamoasi yuqorida taxmin qilingan o’quvchilardagi salbiy o’zgarishga nisbatan an’anaviy tartib - intizom metodlarini tatbiq qiladi: a) kundaliklarga ogohlantirish yozish; b) ota-onalarga bu to’g’risida ma’lumot berish; v) sinf rahbari, maktab rahbariyatiga xabar berish; g) darsdan keyin olib qolib qattiq uyaltirish; d) bilim dargohidan haydash masalasini qo’yish va hokazo. Bunday aniq voqelik har qanday maktab, kollej, akademik litsey, oliy ta’lim tizimida yuz berib turadi. Bizningcha, jazo choralarini ko’rishga shoshilishdan ko’ra, mazkur «Muammoni keltirib chiqaruvchi omillar qaysilar?», «Nega shunday hodisa yuz beradi?» degan savollarga javob qidirish odilona yondoshishdir.
Jumladan, «O’quvchilar va talabalar xulq atvoridagi o’zgarishlarning qanday motivlari mavjud?», «O’qishga nisbatan o’zgaruvchan munosabatni yuzaga keltiruvchi sabablar nimalardan iborat?», «Sinfda (auditoriyada) va undan tashqari u yoki bu xatti harakatlarni amalga oshirishga undovchi omil qaysi?» va boshqalar.
Yuqorida ta’kidlab o’tilgan munosabat va xulq atvor motivlarini chuqur va mukammal o’rganmasdan turib, pedagogik ta’sir o’tkazish chora va tadbirlarni qo’llash mumkin emas, chunki motivni turtki sifatida namoyon qiluvchi ichki va tashqi ta’sirini aniqlamasdan, unga ilmiy yondashib bo’lmaydi.
Hozirgi zamon psixologiya fani bilimlarni egallashga nisbatan ichki ehtiyojga katta ahamiyat beradi va bu bilan shaxs xulq-atvorini bir muncha boshqarish imkoniyati mavjud ekanligini ta’kidlaydi. SHuning bilan birga o’quvchi (talaba)da barqaror bilishga qiziqishni shakllantirish muammosiga alohida e’tibor qilinadi. Darhaqiqat barqaror bilishga qiziqishlar qo’zg’atuvchi turtki (kuch) sifatida o’quv motivlarini vujudga keltiradi, muvaffaqiyatni ta’minlashga xizmat qiladi. O’quvchi yoki talabada bilimlarning muayyan sohasiga, u yoki bu faoliyat turiga qiziqishning tug’ilishi ko’p jihatdan shaxsni qay tariqa shakllanish imkoniyatini belgilaydi.
Ana shu boisdan o’qituvchi o’z o’quv faniga nisbatan o’quvchi va talabalarda qiziqishni o’stirish tarafdori bo’lishi shart, chunki xuddi shuning negizida o’quv materiali va o’quv dasturini yuksak darajada o’zlashtirish muammosi yotadi. SHuni alohida ta’kidlash lozimki, bilishga qiziqish motiv doirasida o’sadi, o’zaro ta’sir etadi, ular bilan uzviy bog’lanib ketadi.
Ma’lumki, o’quvchi (talaba) bilim dargohida ilm olishdan tashqari tengdoshlari jamoasi ichiga kirib boradi va hayotida qatnashadi, shu boisdan unda o’z o’rtoqlari, o’qituvchilarga nisbatan muayyan munosabat shakli vujudga keladi. Uning o’quv faoliyatiga undovchi motivlari bilan bir qatorda boshqacha xususiyatli xulq- atvor motivlari ham mavjuddir, jumladan ijtimoiy motiv jamoa bilan bo’lish istagini anglatib, uning hayotida ishtirok etish xohishini o’zida aks ettiradi.
O’quvchi va talabalar o’quv faoliyatining ijtimoiy motivlari ularning boshqa odamlar bilan muomalaga kirish ehtiyoji bilan uzviy bog’liq bo’lib, ularni baholash, quvvatlash, tengdoshlar jamoasida muayyan joy egallash singari talablarda o’z aksini topadi. Mazkur motivlar o’quv faoliyatining mohiyati bilan bog’liq bo’lmay, balki unga yondosh yordamchi faktorlarni bildiradi. Ammo ushbu motivlar o’quvchi va talaba o’qishiga jiddiy turtki vazifasini bajaradi.
Ijtimoiy motivlarni tahlil qilishda davom etsak, ular bevosita jamoa burchi, qarindoshlar va yaqin kishilar oldidagi burch, o’qishni umuminsoniy madaniyat, qadriyat, ma’naviyatni egallash tasavvuri bilan bog’liq vosita, ushbu vosita odamlarga foydali shaxs tariqasida namoyon bo’lish, o’z imkoniyatini ruyobga chiqarish. Ezgu niyatini o’xshatishga intilish funksiyasini bajarishi mumkin. Turtki, undovchi usul vazifasini bajaruvchi qo’zg’atuvchi yosh xususiyatlari davriga qarab u yoki bu darajada aks etadi, ammo ular har doim ham anglashilgan shaklga ega emas, shuning uchun ifodalanish darajasi nursizdir. O’smirlik va o’spirinlik davrlarida ijtimoiy motivlar anglashinilgan ahamiyat kasb etuvchi bosqichga o’sib o’tadi. Bunday motivatsiyani har tomonlama qo’llab-quvvatlash, rag’batlantirish bilan birga va har davrning o’zida bilishga qiziqishga aloqador boshqa o’quv faoliyati motivlarini shakllantirish lozim.
Ijtimoiy motivlar o’quvchi va talabalarning tor ma’nodagi shaxsiy intilishlari bilan ham aloqador bo’lishi mumkin, jumladan, ularda o’qishga nisbatan qiziqish yo’q bo’lsa-da, lekin barcha topshiriqlarni yuksak darajada bajaradi, chunki o’qituvchi ularni “a’lo” baholashi, sinf yoki kurs peshqadami qilib tayinlashi, hech qanday shubha bilan qaramasligi ehtimol o’quv jarayoni bunday xususiyatli odamlarga shaxsiy muvaffaqiyat yoki yutuqqa erishishning, nufuz (obro’ - e’tibor)ning, yalovbardorlikning birdan – bir yo’li deb tasavvur qilinadi. Bunday yo’lni tanlash vijdonga xilof xatti - harakatlarga olib boradi, shaxsni shakllanish jarayoniga salbiy ta’sir etadi. SHu boisdan ijtimoiy deb qabul qilingan motivlar jamoa ehtiyojini qamrab oladi, goho ular shaxsiyatparastlik, tor saviyali shaxs xususiyatini mujassamlashtiradi.
Ularning hayotida o’z tengdoshlari va do’stlari bilan muomalaga kirishish, do’stlikka sodiqlik, bergan va’dasi (so’zi)ni uddasidan chiqish, hamkor bo’lish ehtiyoji muhim o’rin egallaydi.
O’qituvchi mashg’ulotlarda o’quv faoliyatining zarur motivatsiyasini shakllantirsa, ularning mavjud extiyojlariga tayanib ish tutsa, o’quvchida bilishga qiziqish barqarorlashadi. Shuning uchun qiziqish, motiv, motivatsiya shaxsning xatti - harakati ichki regulyatsiyasi funksiyasini bajarib, ehtiyojni qondirish, xohish -istak, ezgu niyat, orzu tilakni amaliyotda ruyobga chiqarishning bosh omili bo’lib hisoblanadi. Motiv va motivatsiya faqat bilimlarni o’zlashtirish, o’quv ko’nikmalari va malakalarni egallash bilan cheklanib qolmasdan, balki shaxsning xulq - atvori, ya’ni shaxsga oid xususiyatlarining namoyon bo’lishini ham izohlashga xizmat qiladi.
Maktab o’quvchilarining, kasb - hunar kollejlarining tegishli kasb - hunar tanlashlariga quyidagi omillar ta’sir qilishini xulosa qilib berish mumkin: o’qituvchi, kasb - hunarga yo’naltiruvchi, sinf rahbari, mahalla, mehnat ta’limi o’qituvchisi, fan o’qituvchilari, bolalar yetakchisi, to’garak rahbarlari, kutubxona, xududiy mehnat bozori, psixolog, defektolog, shifokor, ota - onalar, qarindosh - urug’lar, qo’ni - qo’shnilar, ideal qahramon obrazlari, tengdoshlar, ommaviy axborot vositalari, yaqin korxonalar va hokazolar.
Respublikamiz aholisining aksariyati agar xo’jalik sohasi bilan shug’ullanayotganligi tufayli uning tarmokdariga oid mutaxassislarni tayyorlash uchun kasbning psixologik xususiyatlari, mehnat ko’nikmalari va malakalari bilan bo’lg’usi ixtisos egalarini qurollantirish muhim ijtimoiy vazifalardan biridir.
Bo’lg’usi agronomni kasbiy tayyorlash, kasb- hunar oldiga qo’yiladigan talablarga mutanosib insonlar qilib shakllantirish davlat ahamiyatiga molik muammo bo’lib hisoblanadi. O’zbekistonning issiq iqlim sharoitining biologik-tibbiy jihatlari birmuncha o’rganilganligiga qaramay, ularning mexanizmlari, akseleratsiya hodisasi, qishloq aholisining jismoniy rivojlanishi, mehnatkashlarning issiq sharoitga moslashishlari, mehnatni tashkil qilishning oqilona yo’llari, mehnat unumdorligini oshirishning samarali usullari, ekologiyaning o’zgarishiga o’xshash muammolar qariyb o’rganilmagan.
Quyidagi mavzular yuqoridagi muammolarnsh aksariyatiga javob berishga xizmat qiladi. Inson-tabiat munosabatini o’zida aks ettiradi, shaxs omili va uning hozirgi davrda ishlab chiqarishda hisobga olish mehnat samaradorligini oshirish, kasb mahoratini takomillashtirish uchun negiz bo’lib hisoblanadi. Kasb- hunar mohiyatini ochib beruvchi professiogramma, professiografiya, psixogramma asosida qishloq xo’jalik mutaxassislarini tayyorlash uchun agrar oliy o’quv yurtlarini intilmoqlari lozim. Zero, yuksak texnologiyani boshqarishga layoqatli, ijodiy, mustaqil fikrlovchi, shaxslararo munosabatlarni tashkil qilishga o’quvli mutaxassislar yetishtirishga erishilsa, ezgu niyatlar ijtimoiy hayotda qaror topgan bo’lar edi.
Ijtimoiy taraqqiyotni ro’yobga chiqarish uchun mamlakatda yuqori malakali mutaxassislarni tayyorlash va ularni jahon standartlari darajasiga ko’tarmoq lozim, fan va texnikaning bugungi kun taraqqiyotiga javob berish uchun keng saviyali, bilimdon, o’z kasbining fidoiy kishisini kamol toptirish orqali davlatimizda bozor iqtisodiyotiga bardosh beradigan raqobatbardosh mahsulotlar yaratuvchi kasb egalarini shakllantirish joiz. Toki ular davr talablarsh og’ishmay javob beradigan, qiziqishi keng, malakasi mustahkam, xotirasi barqaror, fikr yuritishi puxta, izlanuvchan, mehnatsevar, vatanparvar, iymon-e’tiqodli insonlar bo’lib voyaga yetishsin.
Maktab o’quvchilarining mayllari, havaslari, intilishlari, xohishlari, motivlari, ezgu-niyatlari xususan kasbkorga bo’lgan qiziqishlari, motivlari, ehtiyojlari tug’ilishi psixologiya fanining shaxs muammosi bilan uzviy bog’liqdir. Shaxs psixologiyasini o’rganish o’quvchilarni kasb tanlashga yo’llash demakdir. O’quvchilarning idividual tipologik xususiyatlari, yoshi va jinsini hisobga olgan holda ularning har birini oqilona kasbga yo’llash shaxs psixologiyasining muhim vazifalaridan biridir. Bozor iqtisodiyotiga asoslangan jamiyat qurish to’g’risidagi hujjatlarda o’quvchilarni mustaqil kasb tanlashga (o’z imkoniyatlarini o’zi baholash orqali) o’rgatish juda muhim va zarur vazifa ekanligi ta’kidlanadi. SHunga ko’ra psixolog olimlar, metodistlar, tashxis Markazi xodimlari keng jamoatchilik bilan birgalikda kasbga doir bilimlarni keng tashviqot qilishlari, kasb-kor tanlashga oid yo’l-yo’riqlari va metodlar ishlab chiqishlari, kasb tanlash maslahatlari rasmiy shaxobchalari kengaytirilishi, professiogramma, professiografiya, psixogrammalar ko’lami orttirilishi lozim. Kasb tanlash faoliyatini oqilona tashkil etish uchun mamlakatimiz qaysi soha mutaxassislariga muhtojligini nazarda tutish va shunga yarasha maktab o’quvchilarini ularning mayli, intilishi, qiziqishi, imkoniyati, aqliy va jismoniy qobiliyatlariga qarab, hamda u yoki bu kasbga yaroqliligini aniqlab, so’ng kasbga yo’llash kerak.
Hozirgi davrda xalq ta’limi bo’limlarida, ishlab chiqarishda, aholini ish bilan ta’minlash muassasalarida, kollejlar va Oliy O’quv Yurtlarida yoshlarga kasb tanlash yo’lini ko’rsataditan maxsus kasb-hunar kabinetlari tashkil etilgan. Bu borada Respublika tashxis markazining, hamda joylardagi uning bo’limlarining faoliyati ibratlidir. Bundan tashqari malakali psixologlar va pedagoglar (shu jumladan mahalla tarbiyachisi), murabbiylar, muxandislar va texniklar har bir kasb-hunarning o’ziga xos tomonlari haqida malakaviy maslahatlar tashkil qilishadi.
Lekin yoshlarning kasb-hunar tanlashi asosan o’rta maktabdan boshlanadi, shunga ko’ra o’quvchilar kichik jamoasi bilan psixologlar oldida turli yoshda jinsdagi maktab o’quvchilarini kasbga qiziqtirish, mehnat qobiliyatlarini rivojlantirish, ichki imkoniyatlarini ishga solish (o’zini-o’zi namoyon etish) kabi muhim vazifa turibdi. Psixologlar, bundan tashqari, o’quvchilarning aql idroki, qobiliyatlarini hamda muayyan kasbga yaroqlilik darajasini aniqlash metodlari, usullari, texnologiyasi, akllari mezonlari va tarkibiy qismlarini ishlab chiqishlari shuningdek, bu sohada ilmiy- tadqiqot ishlari olib borishlari zarur.
Ommaviy kasblarga bag’ishlangan o’quv-uslubiy adabiyotlar va kasb-hunar to’g’risidagi kinofilmlar, spravochniklar kamligi, psixologik-diagnostik tadqiqotlar o’tkazishga yordam beradigan zamonaviy apparat va asboblar bilan ta’minlash yaxshi yo’lga qo’yilmaganligi, shaxsning muayyan kasbga yaroqliligini aniqlash borasida ilmiy-tadqiqot ishlari yetarlicha olib borilmayotganligi shunday kamchiliklar jumlasiga kiradi.
O’quvchilarni mustaqil mehnat faoliyatiga puxta tayyorlash va ularning kasb-hunarini o’z qobiliyatlariga yarasha to’g’ri tanlashlariga erishish uchun maktab o’qituvchilarining pedagogik mahorati, bilim saviyasi, didaktik (shuningdek, akademik, tashkilotchilik, perseptiv va h.k.) qobiliyatlari yuksak bo’lishi, fan asoslarini turmush bilan bog’lab o’rganilishi, to’garak va qo’shimcha, yordamchi kurslar oqilona uyushtirilishi, maktablarda kasb-hunar to’g’risida ma’ruzalar o’qilishi, suhbatlar, munozaralar o’tkazilishi, sayohatlar, uchrashuvlar, kasb-hunar fotoko’rgazmalari tashkil qilishlari zarur.
Ilk o’spirinlar va katta o’smirlarning kasb tanlashi katta hayotiy ahamiyatga ega bo’lgan ham shaxsiy, ham ijtimoiy muammo bo’lganligidan bu jarayonda ota- onalar, jamoatchilik va turli kasb ustalari ham faol qatnashishlari kerak, chunki yoshlar ko’p hollarda kattalarning maslahatlari va tavisiyalarini hisobga olgan holda qat’iy bir fikrga, qarorga kelishlari mumkin.
Maktab kasb-hunarga yo’naltiruvchi mutaxassisining asosiy vazifasi o’quvchilarni kasb- hunarga yo’naltirishni ta’minlovchi barcha ma’lumotlar bankini yaratishdan iborat. Bu maqsadda kasb-hunarga yo’naltiruvchi mutaxassis tuman (shahar) tashxis Markazidan olgan kasbiy axborotlar, kasblar ro’yxati, tasnifi, hududiy kasblar ro’yxati, kasblarga bo’lgan ehtiyoj va boshqa kasbiy tashxis metodikalari, tavsiya yo’riqnomalardan foydalaniladi. Maktab kasb-hunarga yo’naltiruvchi mutaxassisi tomonidan o’quvchilarni kasbiy qiziqishlarini rivojlantirish, kasblar haqidagi ma’lumotlarni to’liqroq anglab yetishi shuningdek, ularning kasb tanlashdagi reallikni vujudga keltirish maqsadida maktabda ilg’or kasb egalari, kasb faxriylari, kasb sulolalari bilan uchrashuvlar, davra suhbatlari, kechalar va ma’ruzalar tashkil etilsa maqsadga muvofiq bo’ladi. Ushbu tadbirlar o’quvchining shu kasbga bo’lgan qiziqishini yanada qat’iylashishini vujudga keltiradi.