Applikasiya (qurama) işləri
Applikasiya - texniki təsvir növündən olub, müxtəlif formaların kəsilməsi, fon kimi qəbul edilən başqa material üzərinə qoyulması və bərkidilməsinə əsaslanır.
«Applikasiya» anlayışı öz xüsusiyyəti və keyfiyyətinə görə yerinə yetirilmə texnikasının oxşarlığını birləşdirən, müxtəlif olan materiallardan bədii əsərlərin yaradılması üsulunu özündə əks etdirir. Hər bir material öz xüsusiyyətlərinə malikdir ki, applikasiyanın yerinə yetirilmə texnikasına özünün müəyyən təsirini göstərir: məs; kağız, saman, qurudulmuş bitkilər, kimi materiallar fona müxtəlif yapışqanlarla bərkidilir.
Applikasiya -çox sadə və əlverişli bədii əsər yaratma üsuludur ki, bu zaman təsvirin özünün real görünüşü saxlanır. Bu imkan verir ki, applikasiyadan təkcə tərtibat məqsədi ilə deyil (əyani vəsaitlərin müxtəlif oyunlar üçün vəsaitlər, oyuncaqlar, bayraqlar, bayramların keçirilməsi üçün kostyumlara bəzəklər, suvenirlər, divar qəzetləri, sərgi, və s.), həm də şəkil, ornament və s. yaradılmasında istifadə edilsin.
Əl əməyinin təşkilində əsasən applikasiya üsulundan istifadə edilir. Belə ki, kağız, parça, bitkilərdən istifadə etməklə applikasiya yolu ilə kompazisiyalar, açıqcalar, kitabçalar və s. hazırlamaq olar.
Applikasiya sözü latınca applicatio - yapışdırmaq sözündən götürülüb. Təsviri sənətin bu növü hələ qədim dövrlərdən geniş yayılmışdır. Parçadan applikasiya - rəngbərəng, müxtəlif fiqurlar formasında kəsilib uşaq paltarına tikilmiş olur. Təbii materiallardan - saman çöpündən, qurudulmuş bitkilərdən hazırlanmış applikasiyalar daha qiymətlidir. Müxtəlif ornamentlərlə bəzədilmiş milli paltarlardakı bəzəklər, hətta divar qəzetinin başlığı da applikasiya hesab edilir.
Uşaqlar şəkil çəkməklə yanaşı maraqlı, applikasiyalar da kəsməyi xoşlayırlar. Applikasiya üçün uşaqlara ilk növbədə qayçı ilə düzgün işləməyi öyrətmək lazımdır. Qayçının əldən ələ halqa hissəsini uzadıb vermək lazımdır ki, iti ucu onun əlini zədələməsin. Qayçını stəkana iti ucu aşağı vəziyyətdə qoymaq lazımdır.
Uşaqlara kağızdan bir neçə zolaq kəsməyi tapşırın. Aşağıdakı qaydalara riayət edin:
Kəsmə xətti düz, çıxıntısız olmalıdır. Bunun qarşısını almaq üçün iti qayçı ilə işləyin;
Düz xətləri ağzı düz olan qayçı ilə kəsin;
Kağızı düz xətt boyunca kəsərkən, kəsik yerini boş buraxıb, qayçını üzü yuxarı tutub kəsin;
Dairə və ya digər formaları kəsərkən qayçını sağ əldə tutub, sol əllə kağızı xətt boyunca fırladın;
Çox xırda detalları orta ölçülü qayçılarla kəsin;
Kağızda dəlik açmağı öyrənin. Əvvəlcə qayçının iti ucu ilə dəlik açın, sonra ortasını kəsin;
Kağızı qənaətlə işlədin. Artıq qalmış kağız parçalarını atmayın. Onlardan sonra xırda detalları kəsmək üçün istifadə edə bilərsiniz.
Uşaqlara qayçı tutmağı, zolaqlar və digər asan formaları kəsməyi öyrətdikdən sonra onlara bir neçə qaydanı başa salın. Əvvəlcə bir vərəqi ortadan qatlayın. 2 səhifəli «dəftər» alınacaq. Qatlanmış vərəqin bir yarım hissəsini sizə tanış olan ağaclardan birinin yarpağının yarısını qələmlə çəkib, kəsin. Vərəqi açın, bu zaman hazır yarpaq alınacaq. Əgər səliqəsiz kəsibsinizsə, təəssüflənməyin. Yenidən təkrar edin. ( palıd, qarağat, ağcaqayın, tozağacı yarpaqları).
Sarı, narıncı, qırmızı kağızlardan payız yarpaqlarını, yaşıl kağızlardan isə yay yarpaqlarını kəsin. Bitkilərin budaqlarım kağız zolaqlarından kəsmək olar.
Sonra ilk applikasiyaları düzəltməyə başlayın. Fon üçün rəsm kağızı və ya nazik karton götürün, üzərinə budaqları və yarpaqları yapışdırın. Sonra üzərinə ağır əşya qoyun ki, applikasiyalar qarışmasın. Yük kimi işlətdiyiniz ağır əşya (kitab) bulanmasın deyə yapışdirilmiş applikasiyanın artıq qalan yapışqanını əski ilə silin, üzərinə təmiz kağız qoyun. Yapışqanı fırça ilə formanın ortasından başlayaraq kənarlarınadək sürtün, 1-2 dəqiqə gözləyib sonra yapışdırın ki, qırışlar yaranmasın Uşaqlar budaqları, çiçəkləri kəsməyi bacardıqdan sonra onlara güldan kəsməyi öyrədin.
Göbələklər. Uşaqların bəziləri göbələkləri meşədə, bəziləri isə kitablarda görüb. Göbələyin papağı üçün qırmızı, ot üçün yaşıl, papaqdakı dairələr üçün ağ kağız götürün. Göbələklərin kökü üçün kağızı püskürmə yolu ilə rəngləyin. Bütün detalları kəsib yapışdırın. Əvvəlcə göbələklərin gövdəsini, onun üzərinə papağını, aşağı hissəyə otları, papağın üzərinə isə ağ dairələri yapışdırın. Tanıdığınız digər göbələk növlərini də bu qayda ilə düzəldə bilərsiniz.
Dostları ilə paylaş: |