70
təsmiyyə olan (adlanan- Ş.R.) Zaqatala okruğu ilə Sığnaq uyezdin arasında sərhəd
qərar etmişdi. Halbuki hal-hazırda Laqodex qəsəbəsi olan yer, əslində Balakən ilə
Qabaqçöl camaatlıqlarına məxsus idi. Təqribən qırx sənə bundan əqdəm ruslar hər
iki camaatdan izin alıb müvəqqəti olaraq orada əsgər qışlası tikir». Qəbulov
Laqodex qəsəbəsindən şimala və şimal qərbə doğru otuz verst (təqr. 32 km)
məsafədə, yəni Alazan çayının qollarından olan Şilda çayınadək ərazidə, bircə
gürcü kəndi istisna olmaqla yalnız müsəlman kəndlərinin qərar tutduğunu əsas
gətirir və iqrar edirdi: həmin yerlər «irsən, ürfən (adətcə - Ş.R.) və qanunən bizim
toprağımızdır». Müəllif bununla demək istəyirdi ki, həm yerli adət-ənənə, həm din
nöqteyi-nəzərindən (islamiyyətə görə, torpaq onu becərənlərin istifadəsində
olmalıdır), həm də hüquqi (belə ki, çar hökuməti də həmin torpaqların Balakən və
Qabaqçöl kəndlərinin istifadəsində olduğunu tanımışdı) cəhətdən mübahisəli ərazi
mahala aiddir.
Qəbulov vaxtı ilə Qabaqçöl camaatına məxsus, fəqət gürcülərin zəbt etdiyi
digər məntəqələri də sadalayır: Qabaqçöldən təqribən 30 verst qərbdə Qarasu
çayınadək (orada qabaqçöllülər tərəfindən bir zamanlar tikilmiş «Çırpı körpü»
məqalə yazıldığı an hələ də dururdu), habelə 15-16 verst cənub və cənub-qərbə
doğru Alazan çayına qədər olan ərazilər və s.
Müəllif həmin ərazilərdə gürcülərin məskunlaşmasını belə izah edirdi:
«...Dağıstan və Zaqatala okruğunun müsəlmanlarına rus hökuməti kəm nəzərlə
baxırdı, gürcülər xaç qardaşı olmaq həsəbilə (olduğuna görə - Ş.F.) ruslara pənah
gətirib, tədriclə müttəhim müsəlmanlara təəllüq (aid - Ş.R.) yerləri tutub, özlərinə
mülk edərək, ətrafdan dəxi gürcülər gətirdib, həmin qəsb etdikləri yerləri öz
millətdaşlarıyla iskan etməyə başladılar».
Qeyd etdiyimiz digər mənbələr də situasiyanı analoji surətdə təsvir edirlər.
Zaqatala qubernatoru Ə.Haşımbəyovun daxili işlər nazirinə göndərdiyi 24 noyabr
1918-ci il tarixli raportunda qeyd edilirdi: «Rus hökmranlığının ilk dövrlərində
balakənlilər və qabaqçöllülər sabiq Zaqatala dairəsinin xəritədə Mazımçay, Abjit
və Dərin-qobu çayları ilə
işarələnmiş şimal-qərb sərhədindən qərbə doğru yerləşən,
əzəldən onlara məxsus şumluq torpaqlar və meşələrdən istifadə etməkdə davam
edirdilər, özü də onlara mənsub... sahələr Şroma kəndindən Snori-sxali
stansiyasına doğru indiki şosedən yan ötərək, Qəbələsu çayınadək uzanırdı, fəqət
sonralar torpaqlar və meşələr onların əlindən alınaraq, rus hökumətinin
sərəncamına əsasən, bəzi gürcü zadəganlarına (knyaz Çelokayevə və başqalarına)
verilmişdi».
18
1919-cu ilin oktyabrın sonu-noyabrın əvvəllərində Zaqatala mahalı ilə
Sığnaq qəzası arasında müvəqqəti sərhəd qoyulması üzrə Zaqatala şəhərində
ikitərəfli komissiyanın iclasları keçirilmişdi. Azərbaycan tərəfinin eksperti, ziraət
nazirliyinin əməkdaşı F.A.Şimanovskinin təqdim etdiyi məruzədə Çiaur meşə
məntəqəsinin tarixi ilə bağlı maraqlı bilgilər səslənmişdi: sözügedən rayonla hələ
XIX əsrin 80-cı illərindən tanış olan Şimanovski o zamanlar Çiaur meşəsindən
71
yalnız qabaqçöllülərin istifadə etdiyini vurğulayırdı. Gürcü sakinlər isə, özgə əşya
və ya mülkiyyətdən ancaq müəyyən edilmiş hüdudlar daxilində yararlanmaq
hüququnu bildirən servitut istifadəsinə malik idilər: bu, müəyyən məntəqələrdən
bəzi gürcü kəndlərinə pulsuz taxta-şalban buraxılışında və meşəbəyi biletləri üzrə
meşədə mal-qara otarmasında özünü göstərirdi. Şimanovskinin bilgilərinə əsasən
(və bu bilgilər digər mənbələrin məlumatları ilə tam uzlaşır), mübahisəli əraziyə
rus və gürcü məskunlarının gəlişi yalnız 1905-ci ildən sonraya təsadüf edirdi.
1917-ci ildə rus sakinləri bölgəni tərk etmək məcburiyyətində qalırlar; onların
torpaqlarını Kutais quberniyasından gəlmiş gürcülər ələ keçirirlər.
İxtilafın subyektlərindən biri - Qabaqçöl kənd cəmiyyətinin hadisələrə
münasibətini özündə saxlayan sənədlərdə də maraqlı faktlara rast gəlinir. Bizim
sərəncamımızda müxtəlif illərdə hökumətə ünvanlanmış ərizələr var: 27 sentyabr
1919-cu il, 27 dekabr 1923-cü il, 21 fevral 1925-ci il, 17 iyun 1926-cı il.
19
Bu
ərizələrin məzmununun ana xətti (qayəsi) - sözügedən kənd cəmiyyətinin Çiaur
meşəliyinə olan hüququnu tarixi və təsərrüfat nöqteyi-nəzərindən əsaslandırmaq
istəyi təşkil edirdi: bu zaman tarixən Car-Balakən camaatlarının inzibati cəhətdən
Sığnaq qəzasına ədalətsizcəsinə daxil edilmiş daha geniş ərazilərə malik olması
faktı vurğulanırdı.
Xronoloji cəhətdən bu sənədlər sırasında birincisinə -1919-cu il 27
sentyabr tarixli ərizənin müqəddiməsinə nəzər salaq, belə ki, o digər sənədlər üçün
də səciyyəvi idi: «...Xatirəgəlməz çağlardan, yəni kəndimizin əmələ gəlməsindən
etibarən şumluq və otlaqlarımıza bitişik meşə torpaq sahəsi bizim cəmiyyətə
məxsus idi... Mahalımızda rus hakimiyyəti bərqərar olduqdan və meşəbəyi institutu
daxil edildikdən sonra adı çəkilən sahə Dövlət Əmlakı Nazirliyinin ixtiyarına keçdi
və Çiaur meşə məntəqəsi adı altında qeydiyyata alındı, amma, eyni zamanda...
sabiq rus hökumətinin sərəncamına əsasən yerli meşəbəyləri Çiaur meşəliyini
müstəsna olaraq bizim cəmiyyətin istifadəsinə verirdi və ora heç bir yad şəxsi
buraxmırdı».
20
1923-cü ilə aid sənəddə isə çar hökumətinin hələ XIX əsrdə
qabaqçöllülərin və balakənlilərin torpaqlarından kəsərək, gürcü knyazı Çelokayevə
verdiyi sahənin ölçüsü dəqiqləşdirilirdi: 6000 desyatin.
21
Xatırlanan mətnlərdə, həmçinin Azərbaycan xarici işlər nazirinin Nazirlər
Şurasına 1919-cu ilin sentyabrın 18-də göndərdiyi təliqəsində
22
mübahisəli Çiaur
meşə məntəqəsində rus kəndlərinin Birinci rus inqilabından sonra peyda olması,
orada gürcülərin kütləvi şəkildə məskunlaşmasının isə yalnız 1917-ci ilə, yəni
rusların getməsindən sonraya təsadüf etməsi xüsusi qeyd edilirdi. Bu hadisəni
İ.Qəbulov obrazlı şəkildə belə təsəvvür edirdi: «Laqodexin ətrafında olan yerləri 8-
9 sənə bundan müqəddəm rus hökuməti müsəlmanlardan alıb, bir tərəfdən
Rusiyadan gələn xaxol mühacirlərini və digər
tərəfdən gürcüləri iskan etmişdi...
Burada mühacirlərə müsəlmanlardan alınıb verilən qayət gözəl və məhsuldar
toprağın qədəri olar 5-6 min desyatin...».
23
Dostları ilə paylaş: |