Azərbaycan və Əhli-beyt irsi
22
AZƏRBAYCAN HƏDİSLƏRDƏ
Natiq RƏHİMOV,
tədqiqatçı-jurnalist
Hər şeydən öncə qeyd etməliyik ki, Qurani-Kərim-
dən sonra İslamın əsas mənbəyi sayılan hədislərdə Azərbay-
canla bağlı məlumatlar o qədər də çox deyil. İslam xila-
fətinin bəzi bölgələri ilə müqayisədə Azərbaycanın və Azər-
baycana aid olan məntəqələrin adı hədislərdə çox az çəkilir.
Bunun bir səbəbini Azərbaycanın xilafət mərkəzlərindən –
Mədinə, Kufə, Dəməşq və Bağdad şəhərlərindən kifayət
qədər uzaqda yerləşməsi ilə izah etmək mümkündürsə də,
zənnimizcə, əsas səbəbi Azərbaycan əhalisinin və bu tor-
paqlarda hakimiyyət sürən müsəlman valilərin siyasi məsə-
lələrə və intriqalara az qoşulmasında axtarmaq lazımdır.
Hər halda, Məkkə, Mədinə, Kufə, Şam, Xorasan, Yəmən ki-
mi bölgələrlə müqayisədə Azərbaycanın adı hədislərdə daha
az hallanır.
Bununla belə, İslam tarixinin bəzi mühüm nöqtələ-
rində Azərbaycanla bağlı müəyyən məqamlara rast gəlirik.
Məsələn, məhz Azərbaycanın fəthində iştirak edən səhabə-
lərin fərqli qiraətlərlə Quran oxumaları barədə üçüncü
xəlifə Osman ibn Affana şikayət edildikdən sonra İslam di-
ninin ana mənbəyi sayılan Qurani-Kərimi indiki ardıcıllıqla
toplamaq zərurəti yaranmış və bunun nəticəsi olaraq vahid
Quran nüsxəsi meydana çıxmışdı.
|
