3-mashg’ulot. Ommaviy qirg’in qurollari ta’siridan himoyalanish ishdan maqsad

3-mashg’ulot. OMMAVIY QIRG’IN QUROLLARI TA’SIRIDAN HIMOYALANISH
Ishdan maqsad:
- FMning himoya inshootlaridan foydalanish qoidalarini o’rganish.
- Talofat o’chog’i va uni baholashni o’rganish.


Pana joy. Pana joyni maxsus komissiya qabul qiladi va ekspluatatsiyaga kiritadi. Odamlarni pana joydan evakuatsiya qilish sxemasi va shu joyga tuzilgan kartochkadan kelib chiqib har bir pana joyga reja tuziladi. Bu hujjatlarning bitta nusxasi fuqaro muhofazasi shtabida saqlanadi, ikkinchisi esa shu pana joyda bo’ladi. Har chorakda bir marotaba «Havo trevogasi!» signalidan so’ng, albatta har bitta pana joyni germetik bekilishi tekshiriladi. Buning uchun ichkaridagi havo bosimini 5 mm simob ustiniga teng qilib ushlab turish kerak, agar bosim kamaysa, u holda shamchirok bilan havo chiqib ketadigan joy aniqlanadi va u bartaraf etiladi.
Pana joyni texnik talablarga javob beradigan holda saqlash kerak. Pana joylarning ishlarini boshqarib turish fuqaro muhofazasi shtabiga topshiriladi. Har bitta pana joyga bitta zveno belgilanadi, zveno komandiri esa pana joyning komendanti hisoblanadi.
Jamoa himoya qilish vositalarini tayyorlash. FM ning himoyalanadigan qurilmalari aholini qabul qilishga tayyor bo’lishi kerak. Tinchlik vaqtida iqtisodiyot tarmoqlari uchun foydalanilgan qurilmalar aholi tomonidan tezlikda bo’shatilib, undagi havo almashtirish (ventilyatsiya) asboblari tekshiriladi. Xuddi shuningdek, tinchlik vaqtida ishlatilmay bo’sh turgan himoyalanish qurilmalari nazoratdan o’tkaziladi. Maxsus ichki asboblarning bor-yo’g’ligi hamda ularning holati tekshiriladi, ishlamayotganlari tuzatiladi.
Qishloq joylarida radiatsiyadan himoyalanishda asosan yer osti qurilmalari: yerto’lalar, sabzavot saqlanadigan xonalar hamda tog’ jinslari qazib olingan joylar va boshqa qurilmalar tayyorlanadi. Agar bular etarli bo’lmasa uncha murakkab bo’lmagan engil xildagi - oddiy pana joylar qurish talab qilinadi.
Hamma himoyalanish inshootlariga biriktirib qo’yilgan komendantlar va boshliqlar xavf e’lon qilinishi bilanoq mas’ul shaxsga aylanadi. Yashirinadigan joyning komendantlari va zvenoning shaxsiy kishilari yashirinadigan inshootni qabul qilib olib, uning holatini diqqat bilan tekshirib chiqadilar. Yashirinadigan inshootlarda ma’muriyat tomonidan 2 kunga etarli oziq-ovqat mahsulotlari, kuniga kishi boshiga 3 litr dan suv bilan ta’minlaniladi. Bundan tashqari har bir kishi o’zi bilan birga 2 kunga etadigan oziq-ovqat (polietilen yoki sellofanga o’ralgan bo’lishi kerak) olishlari kerak. Oziq-ovqat va suv zahiralari komendantning ruxsati bilan ishlatiladi.
Yashirinish binolarning kirish joyiga e’lon osiladi. Unda bu joyning nomi, nomeri va biriktirilganligi yozib qo’yiladi, tunda esa yoritiladigan tablo o’rnatilib, unda tezkor foydalanish tayyorgarligi so’zi yoziladi. Pana joylarga kirish yo’llari ko’rsatkichlar bilan belgilanadi. Har bir kishi o’ziga ajratilgan himoyalanish joyini bilish kerak.