98
soyudulmayan məhsul deformasiyaya uğrayaraq keyfiyyətsiz olubdur. Bişirilmə prosesində ani
olaraq istiliyin yüksəlməsi, soyuma zamanı istiliyin kəskin şəkildə aşağı düşməsi çatların
yaranmasının əsas səbəbidir. Bişirilmə prosesindən sonra bəzi keramikaların üzərində hava
qabarcıqlarının qalması bişmiş gilin tərkibində düzgün reaksiyanın getmədiyini göstərir. Dulus
məhsullarının hazırlanmasında əsas yeri dulus kürələri (sobaları) tutur. Aparılan araşdırma zamanı
məlum olur ki, ibtidai dulus kürələri birdən-birə yaranmamış, bunun üçün müəyyən vaxt və zaman
tələb olunmuşdur. İbtidai dulus kürələri düzəldənə qədər insanlar dulusçu məhsullarını bişirmək
üçün ən primitiv metodlardan istifadə etmişlər. Dulus kürələri sonradan düzəldilmişdir. Ən qədim,
primitiv bişirilmə metodları dulusçu məhsullarının açıq yerdə və ya çuxurda bişirməsi olmuşdur.
Hər iki metoddan dünyada geniş istifadə edilmişdir. Bu metodların tətbiqi zamanı lazım olan əsas
material çoxlu miqdarda kol və çırpıdan ibarət olmuşdur. Açıq yerdə bişirmə metodu zamanı
havanın küləkli olmaması əsas şərtdir. Bu metodda bişiriləcək məhsulların arasında isti havanın
rahatca hərəkət etməsi üçün aralıq olaraq quru odunlar yığılaraq boşluqlar yaradılmışdır. Sonra
kiçik odunlarla onun ətrafının örtülməsi tamamlanmışdır. Odunların dağılmaması üçün oçağın ətrafı
daş və ya kərpiclə əhatə olunmuşdur. Odunlar alovlandıqdan sonra odun köz halına gəlməsinə qədər
ona nəzarət edilmişdir. Ocağı söndürərkən közün yavaş-yavaş sönməsi üçün onun üzərinə çimən
döşənmişdir. Çuxurda bişirmə metodu zamanı ilk olaraq bişəçək məhsullar torpaqda qazılmış dərin
quyunun içinə qoyulmuşdur. Sonra onların üstü çoxlu sayda odunla örtülmüşdür. Odunlar yandıqca
köz və isti küllər çuxurun içərisinə düşərək dulusçu məhsullarını bişirmişdir. Bu zaman çuxurda
qoyulmuş hər hansı bir dulusçu məhsulunun üzərinin isti küllə tam örtülü olmasına fikir verilmişdir.
Bunun üçün daha çox odun yandırılmışdır. Cəmiyyət daxilində baş verən sosial-iqtisadi dəyişiklər
bütün sahələr kimi dulusçuluğun da inkişafına təsir göstərmişdir. Açıq yerdə və çuxurda
bişirilmənin davamı olaraq yeni bişirilmə metodları yaranmış, müxtəlif formalı və müxtəlif adlı
qədim dulusçu kürələri düzəldilmişdir. Dünyada mövcud olan “Ağ dəniz”, “Sueki”, “Tamba”,
“Əjdaha”, “Yaruk Bambu”, “Novoriqama” tipli dulusçu kürələrini bunu nümunə göstərmək olar
(19; 6, s. 38-42). “Sueki”, “Tamba”, “Novoriqama” Yaponiyada, “Əjdaha” Çində, “Yaruk Bambu”
Koreyada düzəldilmiş qədim dulusçu kürələrindəndir (18). Dulus kürələrinin düzəldilməsi zamanı
iki əsas məsələyə diqqət yetirilmişdir. Birinci məsələ bişiriləcək məhsullar üçün örtülü kameranın
yaradılmasından ibarət olmuşdur. İkinci məsələni odun yandığı manqallın dulusçu məhsullarının
yığıldığı kameradan ayırmaq təşkil etmişdir. İbtidai dulus sobasını düzəldərkən insanlar ilk olaraq
odun qalandığı yerin ətrafını silindrik formalı divarla künbəz şəklində hörmüşlər. Hörgü işləri
tamamlandıqdan sonar künbəz şəklində olan dulusçü kürəsinin kamerasının üst hissəsində bir və ya
bir neçə deşiklər açılmışdır. Kürənin üzərində deşiklərin qoyulması sobada odun yaxşı yanması
üçün əlverişli şərait yaratmışdır. Bişirilmə prosesi zamanı hava yanacaq atılan deşiklərdən girərək,
sobanın üst hissəsinə yığılan dulusçu məhsullarının arasından keçərək, təpədəki deşiklərdən çölə
çıxmışdır. Havanın bu cür çölə çıxması kürənin içində homogen istiliyin qarşısını alaraq dulusçu
məhsullarının keyfiyyətlə bişirilməsinə köməklik etmişdir. Naxçıvanda I Kültəpə abidəsinin Erkən
Tunc dövrü təbəqəsindən ibtidai dulus kürələri aşkar edilmişdir. Onlar dairəvi və dördkünc planda
tikilmişdir. Abidənin Erkən Tunc dövrünə aid VII (yeddinci), XI (on birinci) tikinti qatlarından
aşkar edilmiş dülus kürəsinin hamısının alt hissəsi yaxşı qalmışdır. Bütün sobaların qab yığılan
hissəsi tamamilə dağılmışdır (15, s. 120). I Kültəpə abidəsinin VII (yeddinci) tikinti qalıqlarından
tapılmış unikal formalı dulus sobasının qalıqlarına hələlik Cənubi Qafqazdakı arxeoloji abidələrdə
aşkar edilməmişdir. II Kültəpənin XI tikinti qatında aşkar olunan duzbucaqlı planlı dulus kürəsinin
qalıqları bu dövrdə gil məmulatların birkameralı sobalarda bişirildiyi, kürənin yuxarı hissəsinə
temperaturu tənzimləmək məqsədiylə çay daşlarının düzüldüyü haqqında tədqiqatçılar tərəfindən
fikirlər söylənilmişdir (5, s. 106). Erkən Tunc dövründə Naxçıvanın dulusçuluq sənətində hansı
alətlərdən istifadə olunduğu haqqında mənbələrdə bitkin fikir yoxdur. Lakin arxeoloji abidələrdən
əldə olunmuş müxtəlif formalı əmək alətlərinin müqayisəli şəkildə öyrənilməsinə əsasən ehtimal
etmək olar ki, bu dövrdə dulusçuluqda istifadə olunan alətlər daşdan, ağacdan, sümükdən, tuncdan
olmuşdur. Bu dövrdə dulus çarxından istifadə olunması dulusçuluğa mühüm təsir göstərmiş, onun
yeni inkişaf mərhələsinə qədəm qoymasına səbəb olmuşdur. Qalın divarlı qablarla yanaşı, nazik
divarlı, yaxşı cilalanmış qablar da düzəltmişlər. İlk dulus çarxı əl ilə hərəkətə gətirilmişdir. O qısa
99
ox üzərində qurulmuşdur. Dulusçu əli ilə çarxı hərəkət etdirdikdən sonra onun fırlanmasından
dayanmasına qədər olan müddət ərzində iki əli ilə qabı müəyyən formaya salmışdır. Babilistan,
Misir və Hindistanda da e.ə. IV-III minilliklərdə əl ilə hərəkətə gətirilən bu tip dulus çarxından
istifadə olunmuşdur (7, s. 61). Naxçıvanın Erkən Tunc dövrü dulusçuluq məhsulları gildən
düzəldilmiş ocaqlardan, manqallardan, heyvan, təkər fiqurlarından, qab altılıqlarından, qablardan
ibarətdir (16, s. 67, 72, 75). Onların hər biri maddi və mənəvi mədəniyyətimizin öyrənilməsində
mühüm yer tutur. Gil ocaqlar nalşəkilli və düzbucaqlı formada düzəldilmişdir. Heyvan fiqurları
öküz, at, it fiqurlarından ibarətdir. I Kültəpə abidəsinin Erkən Tunc dövrü təbəqəsindən, Maxta
Kültəpəsindən, Ovçulartəpəsindən bu tip arxeoloji materiallar tapılmışdır. I Kültəpə abidəsindən 21
ədəd (1, s. 141), Maxtadan 4 (3, s. 65) ədəd heyvan fiquru tapılmışdır. Naxçıvanın Erkən Tunc
dövrü arxeoloji abidələrindən (I Kültəpə, II Kültəpə, Ovculartəpəsi, Maxta, Ərəbyengicə, Şortəpə
və s.) əldə olunmuş dulusçuluq məhsulları içərisində gil qablar çoxluq təşkil edir. Onlar boz, qara
və çəhrayı rəngli, cilalı və cilasız düzəldilmişdir. Qabların hazırlandığı gilin tərkibinə iri və kiçik
qum dənələr qatılmışdır. Bu qablar süfrə və təsərrüfat qabları olmaqla iki qrupa bölünürlər. Süfrə
qablarının gilinin tərkibinə narın, təsəttüfat qablarının tərkibinə iri qum dənələri qatılmışdır. Gil
qabların xarakterik xüsusiyyətləri bu dövrə aid qabların çoxunun ağız kənarının düzbucaqlı şəkildə
xaricə çıxması, onların ağızlarının iki tərəfdən bir qədər içəri yığılması və simmetrik olmasıdı. Bəzi
qabların ağzının kənarı isə bir qədər qalın, relsşəkilli formada düzəldilmişdir. II Kültəpə arxeoloji
abidəsindən əldə olunmuş bu cür qabların bir qrupunun bənzərləri Göytəpədə abidəsinin Erkən
Tunc dövrü təbəqəsindən tapılmışdır (Aşurov, 2002: 108). Ağzının kənarı qalın, relsşəklində
düzəldilmiş qablar Şərqi Anadoluda geniş yayılmışdır. Qara rəngli keramikalar içərisində şar
gövdəli, düz oturacaqlı, silindirik boğazlı üzərində qabın ağzı ilə gövdəsini birləşdirən yarımşar
şəkilli və ya oküz burnu formalı qulp olan qablar çoxluq təşkil edir. Bu tip qulplar Erkən Tunc
dövrünün xarekterik xüsusiyyətlərindəndir. Naxçıvanın Erkən Tunc dövrü arxeoloji abidələrinin bir
qrupundan, o cümlədən Plovdağdan aşkar olunan keramika məmulatları içərisində elmi
ədəbiyyatlarda “camış dərisi rəngli” keramika adı ilə tanınan qəhvəyi gilli qabların bənzərlərinin
Giyan, Mussiana və Suzda geniş yayıldığı qeyd olunmuşdur (10, s. 167). Erkən Tunc dövrünə aid
qabların naxışlanmasında oval və ya dairəvi batıqlardan, ziqzaq, svastika, S, M və s. formalı
işarələrdən, buynuz, spiral formalı ornamentlərdən, müxtəlif həndəsi, daraqvari formalı naxışlardan,
qabarıq, məməcikşəkilli çıxıntılardan, sxematik quş, müxtəlif heyvan, antropomorf rəsimlərdən
istifadə edilmişdir. Qabların üzərinə naxışlar çızma, çərtmə, basma, qabartma texniki üsulları ilə
vurulmuşdur. Bu naxışlardan hər biri dulusçuların sənətkarlıq vərdişləri ilə yanaşı dini-ideoloji
görüşləri ilə bağlılıq təşkil edir. Naxışlar sadə və mürəkkəb süjetlidir. Onlar həm yerli xüsusiyyət
daşıyır, həm də digər mədəniyyətlərlə bənzərlik təşkil edir (şəkil 1). Fikrimizi əsaslandırmaq üçün
arxeoloji mənbələrə nəzər salsaq görərik ki, üzəri oval və ya dairəvi ornamentlərlə bəzədilmiş gil
qablar dünyanın bir çox bölgələrindəki Erkən Tunc dövrü abidələri kimi Naxçıvandan da kifayyət
qədər aşkar edilmişdir. Naxçıvanda bu tip qablar I Kültəpə, II Kültəpə, I Maxta arxeoloji
abidələrindən, Cənubi Azərbaycanda isə Göytəpə abidəsindən tapılmışdır (4, s. 50; 8, s. 33-36). I
Maxta yaşayış yerindən əldə olunmuş qabların bir çoxunun üzəri Naxçıvanın digər Erkən Tunc
dövrü abidələrindən tapılan keramikalar kimi çızma naxışlarla bəzədilmişdir (17, s. şəkil 27). I
Kültəpə abidəsindən tapılmış üzərində qabartma üsulu ilə çəkilmiş M formalı naxışlı gil qablar (1,
s. 133). Yanıqtəpə abidəsindən əldə edilmiş bir qrup qablarla bənzərlik təşkil edir (11, s. 89).
Azərbaycanda Babadərviş, Şərqi Gürcüstanda Amiranisqora, Anakliya abidələrindən bu tip
ornamentli keramikalar əldə olunmuşdur (20, s. 26, 68). I Kültəpə (1, s. 127), II Kültəpə (2, s. 123)
yaşayış yerlərindən əldə olunmuş üzəri zıqzaq ornamentlərlə naxışlanmış gil qablar Cənubi
Qafqazın (19, s. 166), Ön Asyanın (14, s. 852) həmdövr arxeoloji abidələrdən tapılmış bir qrup
qablarla bənzərlik təşkil edir. S ornamentli keramikaların bənzərləri Yanıqtəpə, Amiranisqora
abidələrindən tapılmışdır (20, s. 28). Spiral, svastika, buynuz ornamentlərinin bənzərləri də
dünyanın müxtəlif bölgələrindən tapılan qayaüstü təsvirlərdə, keramika məmulatlarının üzərində
aşkar edilmişdir .
Aparılan araşdırma nəticəsində sonda onu qeyd etmək olar ki, Naxçıvanın Erkən Tunc dövrü
sənətkarlıq sahələri içərisində dulusçuluq özünəməxsus yer tutur. Həmin dövrdən başlayaraq
Dostları ilə paylaş: |