196
Bunu eşidən kimi, İsmayıl bəy əmr edir:
-Hər ikisinin əl-qolunu bağlayın.
Deyirlər İsmayıl bəyin dəstəsində bir urus nəçənniki varmış, adına da Qrivanovski
deyərmişlər. Bir xeyli gedəndən sonra yolda o deyir ki, bu heç kişilik deyil, gəl Həcəri
buraxaq, başqa vaxt tutarıq.
Ismayıl bəy alayı vaxt Qrivanovskinin bir sözünü iki eləməzdi. Indi özündən çıxır
ki, sən nə danışırsan, qoburnat eşidib bizə nə deyər.
Urus naçalniki isə Həcərin əl-qolunu açdırır yolda İsmayıl bəylə sözü çəp gəlir,
onun üzünə tüpürüb geri qayıdır.
Gorus qazamatının qapısı ağzında Həcər day dözə bilmir, yerə yıxılır, bir azdan
çağa səsi eşidilir. Həcərin bir oğlu olur. Qazamatda işləyən xadimələr tez uşağın
göbəyini kəsib cır-cındıra bükürlər. Ismayıl bəy türmə nəçənnikinin otağından çıxıb
uşağı istəyir. Şaşkasını çəkib körpəni şaşkanın başına keçirir. Uşağın çığırtısı İsmayıl
bəyin şaqqanağına qarışır. Bəy qeyzlə deyir:
-Bax, bunu qoburnata göndərəcəyəm. Bu uşaq kimi Nəbinin başını da vaxt gələr
şaşqaya keçirib Urusyətə göndərərəm.
Hamı İsmayıl bəyə nifrət etdi. Bəy körpənin cənazəsini kənara atıb evinə getdi.
Lovğa-lovğa dedi:
-Eybi yox, indi Nəbi harda olsa Həcərin dalınca gələcək. Deyərsiz min canı da
olsa əlimdən qurtarmayacaq.
Qazamat işçiləri qorxudan cınqırını çıxarmadı. Gecə düşdü, evinə gedən evinə,
işinə gedən işinə yola düşdü. Qazamat naçalniki Ter Qriqoryan da qalmışdı ki, başına
nə çarə qılsın... İndi Nəbi gəlməkdə olsun, görək Həcər zindanda neenədi. Elə ki Həcəri
zindana saldılar, saçını yoldu, üz-gözünü cırıb zulum-zulum ağladı, İsmayıl bəyə bir
qarğış tökdü ki, səsinə bütün dustaqlar qoşulub ağladılar.
Ismayıl bəy Həcərə göz dağı çəkmişdi. Həcər “Nəbi, Nəbi” deyib fəryad edir,
sakitləşmək bilmirdi. Naləsi qazamatı başına götürmüşdü. Həcər Nəbini haraylamaqda
olsun, görək Nəbi necə oldu. Bəli, Nəbi elə qazamatın həndəvərinə gəlib atı yedəyinə
almışdı ki, ayağına nəsə ilişdi, əyilib baxdı, gördü körpə oğlan uşağıdı, şaşkaya
keçiriblər. Uşağı götürüb bağrına basdı. Elə bil uşaq ona dil açıb “məni al qucağına”
dedi. Nəbinin ürəyinə damdı ki, bu Həcərin uşağıdı. Deyirlər Nəbini heç kəs ağlayan
görməmişdi. Aylı gecəydi. Nəbi Boz atın başını buraxıb yerə oturdu, uşağa baxıb bir
ağlamaq ağladı ki, dağlar, daşlar titrdi. Həndəvərdə dolaşan bir qoca qarı, Nəbini
tanıyıb, uşağı ondan aldı, bütün hadisəni Nəbiyə danışdı:
-Ay oğul, olan-olub, keçən keçib, günahdı, uşağın ruhun incitmə, qoy aparıb
yuyub, qundaqlayım.
Nəbi bir söz deyə bilmədi. Handan-hana özünə gəlib dedi:
-Nənə, bir qundaqla, baxım görüm, balama qundaq yaraşırmı?
Qarı qazamat işçisiydi. Nəbini başa saldı ki, ay oğul burda çox görünmək olmaz.
Dur özün də həyətə keçək gecə keçsin, sonra
mən səni ötürərəm, dalısını özün bilərsən.
Nəbi qarıya söz deməyib içəri keçdi. Qarı uşağı yudu, kəfənlədi, qundaqlayıb
qoydu. Nəbi o ki var ağladı. Bir də qulaq verib gördü ki, uzaqdan bir fəryad səsi gəlir.
Qarı irəli gəlib pəncərəni açdı. “Həcərdir, ay Nəbi” – deyə Nəbini səslədi:
197
Nəbi daha dözə bilmədi. Qariya dedi: - Qarı nənə, körpəni dalıma sarı, yolu mənə
göstər. Indi mən bu köpək uşaqlarına bir toy tutum , nənələrinin adı yadından çıxsın.
Bəli, Nəbi elə eşiyə çıxmışdı ki, gördü Qanlı Qoca qazamatın qapısında var-gəl
edir. Nəbini görən kimi yüyürdü qabağına ki Həcərdən xəbərin varmı?
-Var, ay Qanlı Qoca, var. Indi bu qazamatın daşının üstə daş qoyan köpək
uşağıdı. Dəlilər gəlibmi?
-Gəliblər, Nəbi! Divan atlıları ilə möhkəm atışmamız oldu. Yeddi-səkkiz hampa,
strajnik o dünyaya vasil oldu. Uşaqların hamısını sağ-salamat Gorusa gətirmişəm. Bax,
dayanıblar əmrə müntəzir.
Nəbi dedi:
-Telli Qara ilə Tunc Vəli dəstələriylə keşik çəksinlər, qalanlar arxamca.
Nəbi qazamatın qapısını döydü, handan-hana gözətçinin yoğun səsi eşidildi:
-Kimdir, bu gecə vaxtı?
-İsmayıl bəydir, açın!
-Nəçənnik, sən o dədənin goru bax yazıq indicə sakit olub, ona yaman zülm
elədin, işin yoxdu, get yat, sabah gələrsən!
-Ə, köpək uşağı, aç deyirəm sənə qapını!
-Vallah, İsmayıl bəy, ağ elədin! Gərək uşağı şaşqaya keçirməyəydin, dustaqlar
üsyan eliyiblər. Həcərin də yaxın düşüləsi halı yoxdu...
-Aç deyirəm sənə...
Qapıçı çarəsiz qalıb qapını açdı, qarşısında Nəbini görəndə özünü itirdi:
-Amandı, məni öldürmə, Həcərə hamıdan çox mən ağlamışam, çay vermişəm,
lap indi arvadım xəmir
xörək gətirmişdi, onu da aparıb vermişəm, amma yeməyib...
Nəbi söz demədi, gözətçi tez bir ip gətirdi ki bununla əl-ayağımı bağla.
Bəli, gözətçilər açarları Nəbiyə könüllü verdilər, hamısının əl-qolunu bağlayıb
düzdülər yan-yana, insafən, heç biri səs-küy salmadı.
Nəbi Həcəri görəndə özünü saxlaya bilmədi. Ikisi də o ki var ağladılar. Həcər
körpənin qundağını Nəbinin dalında açıb qucağına aldı.
Nəbi Mehdini də azad elədi. Həcər üzünü Nəbiyə tutub dedi:
-Nəbi, İsmayıl bəy mənə çarpaz dağ çəkib. Ancaq birdən tələsib əhdimi
ürəyimdə qoyarsan. Onunla özüm danışacağam. Indi sən bütün dustaqları burax,
qazamatı dağıt, od vur bura!
Nəbi bütün dustaqları azad elədi, özü də hamıya dedi ki, içəridəki taxta-tuxtaya od
vursunlar.
Nəbiylə danışan gözətçi ağzını birtəhər açıb dedi:
-Aşağıda anbarda nöyüt var.
Dustaqlar o saat nöyütü çıxarıb tökdülər qapıbacaya, gözətçilərin də əl-ayağını açıb
buraxdılar. Dustaqların bir çoxu Nəbinin dəstəsinə qoşuldu.
Dan yeri söküləndə qazamat naçalniki pəncərədən baxıb gördü ki, aləmi işıq
bürüyüb. Külafirəngidən baxanda qazamatın yandığını başa düşdü. Deyirlər heç vaxt
daşın, torpağın belə yandığını görən olmamışdı. Deyilənə görə türməni yandıran həmən
od günahsız
körpənin, Həcərin ahı imiş!