Ənlik-kirşandan hiss olunmayacaq dərəcədə istifadə edirdi. Saçını boyamırdı.
Sifəti girdə, üzünün sümüyü xırda, ovurdları azacıq batıq, çöhrəsi bəyaz, solğun idi.
Soyuq mavi gözləri, quru, nazik dodaqları vardı.
Pal-paltarını tez-tez dəyişməyi sevmirdi. Bəzənməklə arası yox idi. Nə
qulağına sırğa taxırdı, nə barmağına üzük.
Gödək geyinməzdi. Onu yay aylarında da çiyni, yaxası açıq paltarlarda gör-
məzdin. Qadınlara xas naz-qəmzə, kişilərin gözünə girmək, onların diqqətini cəlb
etmək üçün özünü nə yollasa bəyəndirmək kimi şıltaqlıqlar ona yad idi. Yeriyəndə
başı aşağı gedir, yan-yörəsinə baxmırdı. Mən onu uzun ayaqlı, səssiz yeriyən,
ətrafda heç nəyi saya salmayan yox, əhəmiyyət verməyən məğrur, qiymətini bilən
quşa oxşadırdım.
Adamlara qaynayıb-qarışmazdı. Həmişə ciddi, məşğul kimi
görünərdi. Elə bil, onun nə danışmağa, nə də ürəyini boşaltmağa ehtiyacı vardı.
Əzəmətli, əlçatmaz idi. Eyni vaxtda gözünə görünməyə çalışmadığın, danışmağa
can atmadığın adam idi. Onunla qarşılaşanda bərk narahat olardıq. Kişili-arvadlı
hamı özünü itirər, tez keçib getməyini arzulardıq. Üzündə, mənasını araya
bilmədiyin istehza gəz-dirdiyindən elə bilirdin nəsə sənə kəc baxır. Sanki
bilmədiyimiz nələri isə bilir və buna görə özlüyündə bizə gülürdü.
Onunla üz-üzə gələnlərin nə üçünsə bir anlığa hərəkəti donardı. Farağat
dayanıb salamlaşar, sonra keçərdilər. Sənə münasibətini də bilmirdin, yaxşıdır,
yoxsa pis. Çünki üzünün donuq ifadəsi dəyişməzdi. Orada nə təəccüb, nə heyrət
oxunardı. Qəzəbli də görünməzdi. Hiss və həyacanlarını göstərməyən adam idi.
Dedikcə quruydu. Bəlkə buna görə də öz aramızda ona "quru balıq" deyirdik.
Danışmağa başlayanda bu quru vücudun, zərif qamətin içində adamın iradəsinə
təcavüz edən, onu boğan qüvvətli, dəmir dişli məngənə sıxıntısı duyur, amirlik,
hakimlik hiss edirdin. Sanki özü bərabərliyində təhsilli adamlarla yox, itaətdə
saxladığı əsirləri ilə danışırdı.
Otaqda olduğunu, nə vaxt gəlib, nə vaxt getdiyini bilmirdin. Pişik kimi asta
yeriyirdi. Rəişlik etdiyi şöbədə dəmir intizam vardı. İşdən əlavə söz-söhbət qəbahət
sayılırdı. Şöbədə hamının stolunun üstündə telefonu olsa da, bir-iki cümlədən artıq
danışmaq qadağan idi. Qadınlar bir-birinin təzə paltarını, bər-bəzəyini müzakirə edə
bilməzdilər. Məişət söhbətlərinə yalnız iş saatı qurtarandan sonra icazə verilirdi.
Çox oxuyurdu. İdarədən talonla ədəbiyyatı birinci o alırdı və həmişə stolunun
üstündə qalın jurnallar, qəzetlər olardı. İncəsənəti sevirdi. Amma siyasətə aid hər
şeyi ötürmədən oxuyurdu. Çünki çox vaxt tanınmış siyasətçilərin harada nə vaxt nə
dediyini adamı heyrətləndirən tərzdə əzbər bilirdi.
Ailə qura bilməməsinin səbəbi aydın idi. Burada mən onu başa düşürdüm.
Çünki A. kimi öz qanunları və xarakteri olan adamın ömür-gün yoldaşı tapa bilməsi
çətindi. Tanışlar arasında A.-ya müvafiq kişi də görmürdüm. Saxta, tez keçən, ötəri,
şəhvani hisslər ona yad idi.
Hikkəsinin, inadının da sərhədi yox idi. Sözünü, iradəsini qanun kimi
yeridirdi. Bundan, görünür, həzz alırdı. Bir dəfə mən də onun hikkə qarmağına
düşmüşəm. Buna səbəb ərindən boşanmış Solmaz adlı əsəbi, bədbəxt bir qadın
olmuşdu. Bu qadın dözülməz idi. Stolumuz yaxın olduğu üçün baş-qulağımı
aparırdı. Dünən dediyini bu gün yenidən təkrar edir, ərindən danışır. danışır
yorulmurdu. İşi də tökülüb qalırdı. Ona yaman rəhmim gəlir, qovmasınlar deyə
kömək edirdim.
Bir neçə dəfə işə gecikmişdim ki, bunu da yalnız Solmaz görmüşdü. Bir gün
məni çağırıb yaxşıca tənbeh etdilər. Bildim ki, söz ondan çıxıb. Anam yaşındaydı,
xəbərçiliyini heç cür gözləmirdim. O gündən onu dindirmədim.Ancaq məsələ belə
qurtarmadı. Solmaz məndən A.-ya şikayət edib yaşca böyük olduğu halda onun
salamını almadığımı deyərək ağlamışdı. A.-nın Solmaza elə bir rəğbəti yox idi.
Ancaq deyəsən mən də onun ürəyincə deyildim. Çalağan təki üstümə şığıdı:
-
Onu dindirməsən partiya namizədliyini geri götürəcəyəm,-dedi.
-
Bunun bizim münasibətlərə nə dəxli var? Zəmanəti də siz verməmisiniz, -
dedim. - Laqeyd bəbəklərində əsəbi parıltı yanıb - söndü.
-
Mən verməmişəm, amma ləğv elətdirə bilərəm.
-
Necə istəyirsiniz, - sakit cavab verdim. Bu o demək idi ki, məni ağciyər bil-
məsin.
-
Halını pozmadı. Dodaqlarını gülmək istəyirmiş kimi istehza ilə büzdü.
O vaxt kommunist partiyasının sıralarına keçmək mühüm hadisə olsa da, bu,
xüsusilə hərbi təşkilatda, elə də asan deyildi. Bunun üçün sən də özünü həm işində,
həm də rəftarında nümunəvi, qüsursuz göstərməliydin. Onların sözləri ilə desək,
daha doğrusu, buna layiq olmalıydın. Bir də yuxarı vəzifəyə pillələr həm də
partiyalı olmağından asılıydı. Ona görə buna can atanlar vardı. A. özü də bundan
keçmişdi. Amma, görünür, mənim namizədliyim çoxdan onun ürəyincə deyilmiş və
yolumu kəsmək üçün bu fürsət əlinə göydən düşmüşdü.
Bir neçə həftədən sonra eşitdim ki, raykoma gedən sənədlərin arasından
mənimki çıxarılıb. Bütün bunlara baxmayaraq mənim A.-dan, nə üçünsə, acığım
gəlmirdi. Partiya hadisəsini də unutmuş kimiydim. A.-nın xasiyyətindəki tündmə-
cazlığı tənhalığı ilə əlaqələndirirdim. Əslində ona yazığım gəlirdi və bunun da
səbəbi vardı!
O, tez-tez bizim qarşımızda siyasi mövzuda, ya işlə əlaqədar müxtəlif mə-
sələlərlə bağlı məruzələr edir, göstərişlər verirdi. Bu vaxt mən onun üzünə
baxmamaq üçün heç bilmirdim nəzərlərimi hara ilişdirim. İlahi, onun batıq, solğun
ovurdları, alnındakı və gicgahlarındakı uzaqdan seçilən göy damarlar, qansız nazik
dodaqlan necə səyriyirdi. Elə bil, göydə sayrışan ulduzların biri yanır, biri sönürdü.
Bu əzələ titrəyişləri ara vermir, gah çənəyə, gah sağ qaşa, gah sol gözə keçir,
nəzərlərdən çəkilmirdi. Özünü gürurlu tutan bu təkəbbürlü, dikbaş qadının dərisinin
altına bir casus kimi soxulmuş bu xain səyrintilər, elə bil, onun amansız düşməni
idilər. Sanki onun gizlicindəki göstərmək istəmədiyi əzab və iztirabları nümayiş
etdirməklə ondan hansı intiqamlarınısa almaq istəyirdilər. Kim bilir, görünür onun
beyninin, iradəsinin "olmaz, tərpənmə" siqnalları əzələlərinə çatmır, onlara təsir
etmirdi. Bu iradə sahibi onu ələ verən, gülünc göstərən səyrintilərin əlində aciz
qalmışdı, onların öhdəsindən gələ bilmirdi. Əzaları tabeçiliyindən çıxır, sözünə
baxmırdı. Qadınlar bir-birinə baxıb: "Üzü elə bil dovşan üzüdür", - deyərək
pıqqıldaşırdılar.
Ancaq mən gülə bilmir, onun ümidsizlik girdabını xatırladan, arzuları sönmüş
gözlərindən dəhşətə gəlirdim. Və artıq uçurum qabağında dayanıb bir azdan oraya
yuvarlanacağı qaçılmaz olan bu biçarə, bədbəxt qadının halına acıyır, qəlbimdə
mərhəmət və şəfqətdən savayı heç nə tapmırdım.
Dostları ilə paylaş: |