20
**********
*****
Istintaq
VI
Hacı Lətif kişi cümə məscidinin sağ tərəfi ilə 20-30 addım yuxarı gedərək,
Qurcanaçay üzərində salınmış kiçik körpudən keçib daha bir neçə addım irəli yeridi.
Yolun sağında da, solunda da iki mərtəbəli, yaraşıqlı binalar var idi. İstədi ki, binaların
kiminki olduğunu xatırlasın, xatırlaya bilmədi. Ona deyildiyi kimi soldakı binanın çox
vaxt açıq saxlanan orta qapısından içəri keçdi, ikinci mərtəbəyə qalxdı. Yenə də sola
döndü, yanılmasın deyə sayaraq üçüncü qapını döydü. İçəridən səs gəldi:
- Arə, kimdir?
Müracət formasındakı kobudluq Hacı Lətif kişini titrədən kimi oldu. Özünü
toplayıb qapını yavaşca araladı. İçəridəki stolun arxasında koğaburun birisi oturmuşdu.
Sanki gözləri də bir qədər qıyıq idi. Üz-gözü xoruz pipiyi kimi qaraqarışıq qırmızı rəngə
çalırdı. O, gözlərini bərəldib key-key gələn adama baxırdı. Hacı Lətif kişi özünü
toplayıb soruşdu:
-Yelyan sizsiniz?
- Arə, nə sözün var?
- Hacı Lətif kişi mənəm.
-Sən müttəhimsən. Arə, bildin?
- Yoldaş Yelyan, nə danışırsınız?!
-Arə, məni tanıyirsan? Birdən-ikidən durub oturduğumuz olub?
-Xeyr!
- Bax, gör, mən sənin yoldaşın ola bilərmmi? Ay musurman, musurman!
- Dədən boyda kişiyəm.
- Arə, mən dədə-mədə tanımaram.
Hacı Lətif kişi birdən-birə dəyişildi, səsindəki mülayimlik yoxa çıxdı:
- Onu hamı bilir. Məni nəyə çağırmısan?
- De görüm, zavodun durur?
- O, baramaaçan fabrik idi. 1917-ci ilə qədər o işlə məşğul olmuşuq.
- Sonra?
- Sonra da baramadan eşilmiş ipək almaq üçün bir neçə dəzgah gətirtdirmişdim.
Onu bir qədər böyütmüşdüm.
-Daha sonra?
-1920-ci ildən onu Şura hökumətinə bağışlamışam.
-Musurman olasan, zavod bağışlayasan. Heç ağıla batan iş deyil. Zavodunda
hayeslər də işləyirdimi?
- Karo, Jora, Hayqı.
-Necə idilər?
- Çalışırdım ki, yaxşı olsunlar. Nikolaya şikayət eləməsinlər.
- Tanıdığın erməni qadınlar da vardımı?
21
- Hələ sovet qurulmamışdan bir erməni qızı yanıma gəlmişdi. Mənim fabrikimdə
olan fəhlələrə rus dili dərsi keçmək istəyirdi. Çimnaz Piriyan adında bir qız idi. Təşkil
etdim, gənc fəhlələrlə söhbətləşdi, hətta, dərs keçməsi üçün otaq da ayırdım.
-Musurmandan çıxmayan iş!
- Hər dəfə dərsə gələndə Zərixan və Züleycan adlı iki erməni qızı da özü ilə
gətirirdi. Fəhlələrə çox şey öyrədirdilər. Fabriki hökumətə bağışlayandan sonra
onlardan xəbərim olmadı.
- Bəs onlar necə idilər?
-Sənin anan, bacın kimi. Fəhlələr arasında xətir-hörmət qazanmışdılar.
- Sən burada müttəhimsən, mən də müstəntiqəm.
Yelyan qarşısındakı vərəqə nə isə yazırmış kimi əlindəki qələmin perosunun
ucuna üfürdü. Diqqətlə Hacı Lətif kişiyə baxmağa başladı. Onun bəbəklərində
sanki ilan-qurbağa oynaşırdı. Yelyan susmağında davam edirdi. Birdən dilləndi:
-Arə, familyanı de!
-Məmmədov.
-Ara, bu, istintaq sənədidir, rusca yazılır. Mamedov. Çimnaz Piriyan sənə rusca
öyrətməyib? Susursan... Sus! Rusa hörmətin olmayıb, dilini də öyrənməmisən. Yaxşı
adın necədir?
-Hacı Lətif.
-Ox, musurman, musurman! Rusca bilmir ki, bilmir. Qadji Latip.
-“P” yox, “F”.
-Olsun! Yaxşı, yazıda düzəltdim. Atanın da adını de.
22
- Rəsul oğlu.
-Xoroşo. Rasul oqlı.
-Milliyyətin nədir?
-Türkəm.
- Rusca “tyurok”. Yazdım. Yaşadığın ölkə:- Azərbaycan Sovet Sosialist
Respublikası (ASSR). Yaşadığın qəza:- Nuxinskiy, şəhərin: – Nuxa. Yaşın: -62. Rusca
bilmirsən. Deməli, azsavadlısan. Znaçit, maloqramoten. Məktəbə də getməmisən. İndi
də ailə tərkibin haqqında. Jenanın adı?
-Başa düşmədim. Kimin adı?
-Jenanın, yəni, arvadının.
- Arvadımın adı Güllüdür.
- Vot, şto... Yazıram:-Qulli. Yaşı?
-46.
-İşi-gücü?
-Evdar qadındır.
- Oğlun? Neçə yaşdadır ? Nə işə baxır?
-Əbdüləli böyük oğlumdur. 23 yaşındadır, 24-ə keçəcək. Müəllimdir
-Musurman, özü də müəllim. Yazdım:-Abdul Ali.
- O biri oğlumu da yaz. Əbdül Məcid. O hələ oxuyur. 13 yaşı var, 14-ə keçəcək.
-Yazdım. Abu Medjit yazdım. Qızların?
-Onlar mənim üstümdə deyillər. Ərdədirlər.
-Daha bir oğlum da vardır. Hamid. Dörd yaşın içindədir.
-Balacadır. Başa düşdüm. Müsavatçısan?
23
-Xeyr!
-Yazıram: bezpartiynıy, yəni, partiyadan kənar.
-Sənətin?
- Burucu. Baramadan burulmuş, eşilmiş ipək alan.
-Şelkokrutilşik. Zavodçik. Hələlik bu qədər. Zavodun 1920-ci ildən, bağın və
bostanın isə 1927-ci ildən alınıb. Yenə də bura sadovnik, yəni, bağban olduğunu da
yazıram. Bu gün 12 mart 1931-ci ildir. Bu gündən sənə iş açıram. Delo nomer 47 sənin
iş nömrəndir. Delo nömrə 47! Yadında qaldı?
Sabah yox, birisi gün yenə bu vədə gələrsən. davam edərik. Indi isə xoş gəldin.
Müstəntiqin otağından çıxıb gəldiyi yolla qayıdan Hacı Lətif kişi evə necə gəlib
çatdığını bilmədi.
Darvazanı döydü. Güllü xanım gəlib darvazanın bala qapısını açdı, Hacı Lətif kişini
avazımış görüncə: - Bıy, ay kişi, sənə nə olub?-dedi.
**********
*****
Hacı Lətif kişi erməni müstəntiqlə baş verənləri birər-birər danışmaq istəmirdi.
Güman edirdi ki, hər necə olsa da, hökumət vardır, günahsız bir adama qarşı o qədər
də qəddarlıq etməzlər. Elə ki, axşam oldu, Əbdüləli işdən gəldi, məsələdən hali oldu,
Məcid də evdəki söhbətə qoşulmaq istədi. Ona qulaq asmağı və susmağı məsləhət
bildilər. Əbdul Əli bir xeyli fikirləşıb dedi:
- Bu olanlar daha ciddi bir məsələyə girişdir. Müstəntiq ola, özü də erməni ola, ondan
doğruluq gözləməyə dəyməz. Güllü xanım istədi ki, nəsə desin, söz boğazına tıxanıb
qaldı. Hacı Rəsul kişi hamını bir-bir nəzərdən keçirib əlavə etdi:
-Bu söhbət buradaca qalmalıdır. Orda-burda heç nə danışmayasınız.
Dostları ilə paylaş: |