Qam Atanın hakimiyyətə gəlməsindən sonra etmiş olduğu ən maraqlı
addımlardan biri mövcud dini ibadətgahları dağıtmasıdır. Bu addımın
nə məqsədlə edilməsi, onun hansı ibadətgahları və nə üçün dağıtması
hələ ki elmi izahını tapmayıb. Bağıstan yazısında deyilir: "Əlimizdən
alınan şahlığı geri alıb mağ Qumatanın dağıtdığı ilahi məbədləri bərpa
etdim. Mağ Qumatanın dəyişdiyi ibadət qaydalarını yenidən sahmana
saldım. Xalqı: Parsua və Maday və başqalarını əvvəlki səviyyəsinə
çatdırdım. Hörmüzdün sayəsində bunu zəhmətlə həyata keçirdim ki,
evimiz əvvəlki yerində bərqərar olsun, Hörmüzdün dayağı ilə bu mağ
Qumata evimizi uçura bilməsin". Əgər Bağıstandakı bu hadisə, yəni
Qam Atanın məbədləri dağıtması həqiqətdirsə, deməli mağ qardaşlar
farsların məhv etdikləri və ya dəyişdirdikləri inanclarını yenidən bərpa
etməyə çalışmışlar. Bu baxımdan antik mənbələrdə fəlsəfənin
yaradıcıları hesab edilən mağların dini və fəlsəfi dünyagörüşləri
mühüm əhəmiyyət kəsb edir. Mənbələrə əsasən, mağlar bütün
vaxtlarını Tanrıya ibadət etməklə keçirir, dualar oxuyurlar. Odu,
torpağı, suyu, havanı müqəddəs sayan mağların fikrincə, Tanrı yalnız
onları görür və səmada təkcə iti gözlərin görə biləcəyi mövcudatlar
vardır. Onlar Tanrının zatı haqqında fikirləşməyi məqbul saymayaraq,
yaradıcının kişi və ya qadın cinsindən olmasını rədd edirlər. Ağappaq
paltar geyinən mağlar qızıl və bəzək əşyaları gəzdirmir, göy-göyərti,
pendir, quru çörək yeyərək torpaq üstündə yatırlar. Onlar
ölüyandırmanı çirkin əməl sayırlar və insanın öldükdən sonra əbədi
həyata qovuşacaqlarına inanırlar. Sonralar mağların bu inancını daha
da təkmilləşdirən Zərdüşt həmin dövrün dünyəvi dinlərindən birini
yaradır. Yeri gəlmişkən, bəzi mənbələr Qam Atanın Zərdüştün
silahdaşı olması ideyasını da ortalığa atmaqdadır. Çünki Zərdüştün
elmdə daha çox qəbul edilmiş yaşam tarixini (569-492) nəzərə alsaq
mağın Zərdüştlə görüşmə ehtimalı mümkünsüz deyil. Lakin bütün
bunlara baxmayaraq Qam Atanın hansı məbədləri və nə üçün
dağıtması cavabsız qalmaqdadır. Hər halda dağıdılan məbədlər zərdüşt
dininə aid olmayıb, çünki bu ehtimal məntiqi baxımdan özünü
doğrultmur. Çünki, şübhəsiz, mağlar həmin dövrdə tək Tanrı Ahuraya
inanırdılar. Deməli, yalnız bir ağlabatan ehtimal qalmış olur: Çox
güman ki, Dara Asiyanın ədalət simvolu olan Qam Atanı gözdən
salmaq üçün daha bir yalan uydurub.
V yarpaq
Ay Tenqridə Qut bulanlar
Uyğur adı müxtəlif türk qəbilələrinin ittifaqını ifadə edir. Çin
qaynaqlarında Hoei-ho, Vei-ho, Hui-ho, Hueu-hu, Vei-vu şəklində
xatırlanır. 974-cü ilə aid bir Çin salnaməsində “uyğur” sözünün mənası
“şahin kimi hücum edən” kimi izah olunur. Təbii ki, bu açılış düzgün
olmayıb, sadəcə çinlilərin uyğurların xarakterlərinə uyğun olaraq
verdikləri şərhdir. Uyğurlar ilk vaxtlar Sarı çayın şimalında yerləşən
Qansu, Çingey və Şensi ərazilərindən başlayaraq Tarım çayının
şimalınadək olan torpaqlarda yaşayırdılar. Miladdan əvvəl III
yüzillikdə çinlilərin hücumuna məruz qaldıqlarından Selenqa çayı
ətrafında yerləşirlər. Burada yaşayan uyğurlar Hun xaqanlığının,
ardınca Tabqaç və Göktürk dövlətlərinin tərkibinə daxil olurlar.
Uyğurlar haqqında ilk yazılar m.ö 177-43-cü illərə aiddir. Çin
əfsanələrində uyğurların hun xaqanının qızı ilə bir qurddan törədikləri
qeyd olunur. Eyni zamanda ağacdan törəmələri haqqında əfsanə də
mövcuddur. Ən məşhur mifləri “Törəyiş” və “Köç” əfsanələridir.
Tabqaç dövləti zamanı uyğurlar Kao-kö adlanırdılar. Orxon yazılarında
ilk dəfə 717-ci il hadisələri ilə əlaqədar olaraq adları çəkilir. Uyğur
ittifaqına müxtəlif tayfalar daxil idi. Göktürk xaqanlığının zəiflədiyi
zamanlarda uyğurlar kiçik bir bəylik yaradırlar. Bu bəyliyin başçısı
erkin adlanırdı. Bu dönəmdə bir sıra qəbilələr də uyğur adı altında
birləşirlər. 630-cu ildə erkinlərdən Pusa Göktürk xaqanı Kiəlinin (Qara
xaqan) oğlunun idarə etdiyi ordunu məğlub edir. I Göktürk xaqanlığı
dağıldıqdan sonra uyğurlar Dokuz oğuzları da özlərinə tabe edərək
Tula çayı sahilində bəylik yaradırlar. Bu bəylikdə başçı eltəbər
adlanırdı. Getdikcə güclənən bu bəylik Altay dağlarını aşaraq On
okların ərazilərinə qədər genişlənir. Eltəbər Tumitunun zamanında
Tola ərazisi tutulur, cənubda Hoanq-hoya yürüşlər təşkil edilir. 646-cı
ildə bu bəylik Çin tərəfindən tanındıqdan sonra Tumuti özünü xaqan
elan edir. 648-ci ildə Tumuti çinlilər tərəfindən öldürüldükdən sonra
yerinə oğlu Pojon keçir. Pojon xaqan On okların başçısı Ho-lunu
məğlub etdikdən sonra 656-cı ildə Daşkəndə qədər irəliləyir. Fəqət
Qutluq xaqanın Göktürkləri yenidən dirçəltməsindən sonra onların
tərkibinə daxil olurlar. 688-ci ildən 741-ci ilədək Uyğurlar Göktürklərin
tabeçiliyində yaşayırlar.
Uzun müddət Göktürklərin hökmranlığında yaşayan Uyğurlar 745-ci
ildə basmıl və qarluqlarla birləşərək Göktürk xaqanlığını süquta
uğradırlar. Əvvəlcə basmılların başçısını xaqan elan edən uyğurlar az
sonra istifadə etdikləri basmıl başçısını öldürərək özlərindən olan
Qutluq Bilgə Kül xaqanı hakimiyyətə gətirirlər.
Beləliklə, əvvəllər bəylik şəklində formalaşan uyğur hakimiyyəti
Göktürklərin süqutundan sonra xaqanlığa çevrilir. Xaqanlıq 9 uruğdan
təşkil olunurdu. Xaqanın uruğu Yağlaqır adlanırdı. Sonralar dokuz
oğuz boyu da uyğur ittifaqına qoşularaq On oğuz elini təşkil edirlər.
Xaqanlığın idarəçiliyi 11 valiyə tapşırılırdı.
Dövlətin mərkəzi Orxon çayı kənarındakı Qarabalasağun şəhəri idi.
Başçı xaqan, kağan və ya yabqu adlanırdı. Sonralar müqəddəslik
anlamında “İduq Qut” ismi götürülür. Buna uyğun olaraq qış mərkəzi
olan Hoca şəhəri də İduq Qut adlandırılır. Mənbələrdə uyğur
xaqanlarının siyahısı aşağıdakı şəkildədir: Qutluq Bilgə Kül Kağan (745
- 747), Moyunçor Kağan (747 - 759), Bögü Kağan (759 - 779), Tun Bağa
Tarxan (779 - 789), Ay Tenqride Qut Bolmış Külüg Bilgə Kağan (789 -
790), Qutluq Bilgə Kağan (790 - 795), Ay Tenqride Qut bolmış Alp
Dostları ilə paylaş: |