110
və eləcə də alçaq çəpərlər salmaq üçün qiymətli koldur. Dovşanalmasının meyvələri quşlar üçün
yaxşı yemdir. Qarameyvə dovşanalmasının yarpaqlarında 115,8-250 mq% C vitamini vardır.
Yaşıllaşdırmada geniş istifadəsi tövsiyə olunur. AMEA Naxçıvan Bölməsi Bioresurslar
İnstitutunun Nəbatat bağında əkilib becərilir və artırılır.
Eucalyptus obliqua L'Her. — Əyri evkalipt - Mərsinkimilər fəsiləsinə aid olub, ağac və ya
kollardır. Bitki latın dilində «Eucalyptus» adlanır. Əsasən tropik və subtropik iqlim zonalarında
təbii yayılmışdır. Dünyada evkaliptin 600 növü məlumdur. Vətəni Avastraliyada onun boyu 100
metrə çatır. Qabığının quruluşuna görə evkaliptlər bir neçə qrupa bölünür: qabığı hamar olanlar,
parçalanaraq lövhəciklərlə tökülənlər, iri gövdədə və budaqlarda qabığı həmişəlik qalanlar.
Yarpaqları ətirlidir, formaca eyni növ daxilində çoxlu müxtəliflik vardır. Hətta bir budaqda belə
uzunsov, ovalvari, lansetvari formalı, yaşıl və göyümtül rəngli yarpaqlara təsadüf edilir. Qafqazda
və Cənubi Qafqazın qərbində subtropik iqlim zonasında, Azərbaycanda subtropik zonada,
Zaqatalada, Lənkəranda, Astarada, Bakıda əkilib becərilir. Təbii halda Azərbaycanda, Tamaniyada,
Yeni Qvineyada, Yeni Zelandiyada və s. yerlərdə yayılmışdır.
Cercis siliquastrum L. — Avropa ərkəvanı - Fabakimilər (Paxlakimilər) fəsiləsinə aiddir.
Bitki latın dilində «Cercis» adlanır. Yarpağını tökən ağac və yaxud kol bitkiləridir. Gövdəsi
qaramtıl – qəhvəyi olub üzərində dərin çatları vardır. Yarpaqları sadə, bütöv, yumru, bəzən
yumurtavari və ya ürəkşəkillidir, kənarları tamdır. Çiçəkləri narıncı olub ilk baharda ağac
yarpaqladıqda onunla bərabər çiçəkləmə də davam edir. Toxumları qəhvəyi rəngdə, yumru olmaqla
paxlameyvədə 4 – 7 ədəd olmaqla budaqlarda topa şəklində yerləşirlər. Toxumla artırılması çox
asandır. AMEA Naxçıvan Bölməsi Bioresurslar İnstitutunun Nəbatat bağında əkilib becərilir.
Yaşıllaşdırmada geniş istifadəsi tövsiyə olunur.
Chamaerops humulis L. — Alçaqboylu xamerops – Təbii halda Avropanın qərb hissəsində,
Aralıq dənizi ölkələrində, İspaniyada, Fransanın cənubunda yayılmışdır. Alçaqboylu koldur.
Gövdəsi bozumtul – göy rəngli sərt yarpaqlardan ibarət sıx çətir əmələ gətirir. Yarpaq saplaqlarının
uzunluğu 70 – 80 sm, ayası yelpikvari, diametri 50 – 60 sm, qaidəsinin kənarında pazvari oyuq
vardır. Hamaşçiçəyi gövdənin qaidəsi yaxınlığında yerləşən və uzunluğu 30 – 40 sm - ə qədər olan
qıçalardır. İkicinsli çiçəkləri oturaqdır, yaşılımtıl – sarı rəngdədir. Meyvəsi sarımtıl rəngli, oval və
ya yumurtavaridir. Mayın birinci yarısında çiçəkləyir, meyvələri noyabrda yetişir. Toxum və kök
pöhrələri ilə çoxaldılır. İstisevən, quraqlığa davamlı bitkidir. Azərbaycanda Abşeron, Lənkəran,
Gəncə, Qəbələ və digər rayonlarda park və bağlarda becərilir.
Cotinus coggygria Scop. - Adi sarağan (Vəlgə) - Sumaqkimilər fəsiləsinə aiddir. Bu cinsin iki
növü vardır, Aralıq dənizi ölkələrində, Kiçik Asiyadan Əfqanıstan və Çinə qədər olan geniş
ərazilərdə yayılmışdır. Bir və yaxud ikievli bitkilərdir. Hündürlüyü 3 m - ə çatan, şarşəkilli çətiri
olan kol və yaxud ağac bitkisidir. Gövdəsinin rəngi bozumtul – qonur, zoğları çılpaq, parıldayan,
yaşıldır.Yarpaqları sadə, 5 – 10 sm uzunluğunda və 3 – 4 sm enində olub üzəri çılpaq, tünd boz –
yaşıl, alti isə açıq rəngdədir. Yaşıllaşdırmada geniş istifadə edilir. Efir yağlı, aşı maddəli olub,
ətriyyatda, təbabətdə və boyaqçılıqda istifadə olunur. Yarpaqlarında 11-20%-ə qədər aşı maddəsi
olur ki, bunlardan da texniki və tibbi tannin almaq olur. Tibbi tannindən müxtəlif preparatlar
(tannalbin, tannoform) hazırlanır. Sarağanın yarpaq və çiçəklərində efir yağı vardır bu da ətriyyat
sənayesində istifadə olunur. Əsas tərkib hissəsi-mirsen, kamfen və s. ibarətdir. Yarpaqlarında 91,7
mq% C vitamini olur. Quraqlığa, kölgəyə, küləyə, şaxtaya davamlıdır, əhəngli və gilli torpaqlarda
inkişaf yaxşı edir. Azərbaycanda 1 növü vardır, Böyük Qafqazda, Kür – Araz ovalığında və
Naxçıvanda yayılmışdır.
Hibiscus syriacus L. - Suriya hibiskusu - Əməköməcikimilər fəsiləsinə aid olan çoxillik
kol bitkisidir. Təbii halda Cənub Şərqi Asiya ölkələri, Çin, Koreya və s. ərazilərdə yayılmışdır.
Yarpağını tökən hündürlüyü 4 – 5 m olan koldur. Rusiya, Orta Asiya Respublikaları, Ukrayna,
Moldova və digər bir sıra ölkələrdə mədəni halda becərilir. Yarpaqları açıq – yaşıl olub,
yumurtavaridir, uzunluğu 10 sm - ə qədərdir. Çiçəkləri çox müxtəlif rənglərdə olur. Dekorativ,
dərman və lifli bitkidir. Yaşıllaşdırmada tək-tək, qrupla park və bağlarda əkmək üçün istifadə
olunur. Azərbaycan florasında 4 növü vardır ki, bunlardan da 3-ü mədəni şəraitdə becərilir. AMEA
Naxçıvan Bölməsi Bioresurslar İnstitutunun Nəbatat bağında əkilib becərilir və artırılır.
111
Rosa zangezura P.Jarosch. Zəngəzur itburnusu - Gülçiçəklikimilər fəsiləsinə aiddir. Bu
cinsin 300 növündən Naxçıvanda 33 növ itburnu rast gəlinir. Çiçəkləri açıq və tünd çəhrayı rəngdə
olmaqla ətirlidir. Meyvəsi avqust-sentyabrda yetişir. Vitamin C yetişmə müddətində artır. Ona görə
də yetişmiş meyvələr dərilməlidir. Şaxtalar düşənədək itburnu yığılmalıdır. Çünki şaxta vurduqda C
vitamini azalır. Kökündə, gövdəsində və yarpağında aşı maddəsi, meyvəsində 8,09%şəkər, 2,74%
pektin, 2,18% pentazon, 3,58% aşı və rəngləyici maddə, 500-1077mq% vitamin, 0,071% efir yağı
vardır. İtburnundan alınan dərman preparatları qan dövranının yaxşılaşdırılmasında, böyrək, mədə,
dəri xəstəliklərinin və yaraların müalicəsində istifadə edilir. Tərkibində çoxlu miqdarda
mikroelementlər, mürəkkəb efir, fitonsid və s. vardır. Ondan mürəbbə, cem, vitaminli içki, kompot
və s. hazırlanır. Azərbaycan florasında 34 növü vardır, 6 növü mədəni şəraitdə becərilir.
Ribes nigrum L. - Qara qarağat – Rusalçasıkimilər fəsiləsinə aiddir. Yarpağını tökən 1,5 m
hündürlüyündə olan çoxillik kol bitkisidir. Şaxtayadavamlı bol məhsul verən, çoxillik, kol
bitkisidir. Xəstəlik və ziyanvericilərə qarşı dözümlüdür. Əsasən qələm və kök vasitəsi ilə çoxalır.
Xırda yaşılımtıl çiçəkləri şivlərdə tək saplaqda yerləşir. Meyvələri iyul-avqustda yetişir, yumru və
ya oval formalıdır, rəngi yaşıl, sarı, ağ, qırmızı, tünd qırmızı, qara olur. Dadı şirin, turşməzə, qabığı
nazik və incətüklüdür. Çoxlu xırda toxumları vardır. Qarağat giləmeyvəsinin tərkibində insan
orqanizminin normal inkişafı üçün zəruri olan çoxlu şəkər, zülal, yağ, turşu, vitamin və bir sıra
başqa faydalı maddələr vardır. 150 qram qırmızı qarağatda 40, qara qarağatda isə 79-80 milliqram
"C" vitamini vardır. Qarağat meyvələrinin tərkibində şəkərin miqdarı 16,2-18, ümumi turşunun
miqdarı isə 1,8-3 faizdir. Qarağat yarpaqları ətirli və turş olduğundan tərəvəzlərin
konservləşdirilməsində ədəva kimi istifadə edilir. Qarağatdan sinqa xəstəliyi, mədə pozuntuları
zamanı müalicə vasitəsi kimi də istifadə olunur. Azərbaycan florasında 3 növü vardır ki, bunlardan
biri mədəni şəraitdə becərilir. Azərbaycanda Lənkəran, Şəki, Zaqatala rayonlarının meşəliklərində
yayılmışdır. Həmçinin həyətyanı sahələrdə də kifayət qədər əkilib, becərilir.
Rhamnus cathartica L. - İşlətmə murdarçası Murdarçakimilər fəsiləsinə aid kol bitkisidir.
Hündürlüyü 3 m - ə qədər olub, gövdəsi gümüşü – boz rəngdədir. Yarpaqları yumurtavari və yaxud
ellipsvaridir. Dərman, boya, aşılayıcı əhəmiyyətə malikdir. Meyvələrində pektin maddələri, kitrə,
piq-mentlər, acı maddələr, qabığında isə aşı maddələri vardır. Xalq təbabətində meyvələrindən
başqa qabığı da işlətmə dərmanı məqsədilə istifadə edilir. Təzə yarpaqlarında 422,7-742,2 mq%,
qurumuş yarpaqlarda isə 1140-1257 mq% C vitamini vardır. Toxumlarında 8-12%-ə qədər yağ
vardır. Azərbaycan florasında 5 növü vardır ki, bunlardan biri də mədəni şəraitdə becərilir. AMEA
Naxçıvan Bölməsi Bioresurslar İnstitutunun Nəbatat bağında əkilib becərilir və artırılır.
Syringa vulgaris L. – Adi yasəmən Zeytunkimilər fəsiləsinə aiddir. Yasəmənin Cənub-Şərqi
Avropada (Macarıstan, Balkanlar) və Asiyada yabanı halda bitən 10 növü məlumdur. Amerika,
Asiya və Avropada geniş yayılmış, çiçəklənən kolcuq və ya kiçik ağaccıqdır. Yasəmənin
yarpaqlarının üst tərəfi tünd yaşıl, altı isə açıq yaşıl rəngdədir. Yazda birillik budaqlarının
tumurcuqlarından uzunluğu 40 - 50 sm olan süpürgəcik formada çiçəklər əmələ gəlir.Bu çiçəklərin
hər birində 3-5 cüt-cüt komacıqlar yerləşir. Çiçəyi boru və tacdan ibarətdir. tacı tünd yasəməni
rəngdədir. Yasəmənin meyvəsi - quru dərili qutucuq olur. Yasəmən toxumları və vegetativ üsulla
(qələmlər, calaq, kök pöhrələri, budaqları basdırmaqla) çoxaldılır. Yasəmən gözəl və ətirli çiçəkləri
ilə yaşıllaşdırmada geniş istifadə edilir. Çiçəklərindən alınan efir yağı ətriyyatda istifadə olunur.
Xalq təbabətində böyrək xəstəliyinə qarşı istifadə olunur, vitaminli, dekorativ bitkidir.
Jasminum fruticans L. – Kolvari jasmin Zeytunkimilər fəsiləsinə aid həmişəyaşıl bəzən
yarpağını tökəndir. Qərbi Avropa, Türkiyə, Suriya, Livan, İran, Qafqaz və Qara dəniz sahillərində
geniş yayılmış növdür. Daölıq ərazilərdə daşlı – çınqıllı yamaclarda sıx kolluqlar yaradır. Aşağı
dağlıqdan başlayaraq 1800 m hündürlüyədək olan ərazilərdə geniş yayılmışdır. Yarpaqları sadə və
ya mürəkkəb lələkvaridir. Kasacığı boruvari-zəngvari, konusvari və ya boruvari, meyvəvermə vaxtı
dəyişmir və ya bir az artır; yuxarı dodağı üç dişlidir. Çiçək tacı həmişə iki dodaqlıdır; yuxarı dodağı
oraqvari və ya düzdür; aşağı dodağın orta qanadı yanlardan çox iridir; bəzən yanlara bərabərdir.
Erkəkcikləri ikidir, sütuncuğu sapvaridir; dişicik ağzı iki qanadlıdır. Qozaları yumurtavari, yumru
və ya bəzən təxminən üç hissəli, hamardır. Çoxalması: Təbiətdə əsasən toxum vasitəsilə çoxalır.
Dostları ilə paylaş: |