79
RUS MƏTBUATININ V ÜMUMDÜNYA
KONQRESİNİN İŞTİRAKÇILARI İLƏ
GÖRÜŞDƏ SÖHBƏT
Bakı, Yaxt-klub
20 sentyabr 2003-cü il
Hörmətli Vitali Nikitiç, hörmətli qonaqlar!
İcazə verin, sizi salamlayım və Azərbaycanda Rus Mətbuatı Konqresinin uğurla keçirilməsi münasibətilə
təbrik edim. Bu bizim üçün çox böyük və mühüm hadisədir. Biz çox istəyirdik ki, bu konqres Bakıda keçirilsin.
Odur ki, təkliflərimiz qəbul edildiyinə görə bu təşkilatın rəhbərliyinə çox minnətdarıq.
Hesab edirəm ki, biz haqlı olaraq V Konqresin keçirilməsinə ev sahibliyi etmək şərəfinə layiq idik, çünki
Azərbaycanda rus dilinə, rus mədəniyyətinə münasibət də, rus mətbuatının fəaliyyəti də çox yüksək
səviyyədədir. Biz dövlətlərarası, hökumətlərarası səviyyədə və sadəcə, insanlar arasında mövcud olan
münasibətlərimizi çox əziz tutmuşuq və tuturuq. Bizim üçün çox dəyərlidir ki, on ildən artıqdır
müxtəlif döv-
lətlərdə yaşasaq da, bizi yaxınlaşdıran və əlaqələrimizi təcəssüm etdirən yaxşı və səmimi nə varsa, hamısını
qoruyub saxlamışıq və zənnimcə, hətta möhkəmləndirmişik. Prezidentimizin bu siyasəti gələcəkdə mütləq
davam etdiriləcəkdir.
Mən elə srağagün Yaltada Rusiya prezidenti, hörmətli Vladimir Vladimiroviç Putinlə görüşmək şərəfinə nail
oldum. Onun məni belə səmimiliklə qarşılaması bir daha sübut edir ki, ölkələrimiz arasında münasibətlər ən
yüksək səviyyədədir. Biz çox yaxşı görüşlər keçirdik, ikitərəfli münasibətlər və bu münasibətlərin gələcəkdə
necə inkişaf etməsi barədə açıq və ətraflı danışdıq. Deməliyəm ki, bizim söhbətimiz daha böyük əminlik yaratdı
ki, ölkələrimiz bundan sonra da bütün istiqamətlərdə fəal əməkdaşlıq edəcək, həm ikitərəfli münasibətlərdə,
həm də beynəlxalq aləmdə bir-birinə kömək göstərəcək və bununla da əlaqələrimizin daha da
möhkəmlənməsinə kömək edəcək. Bu münasibətlərin bizim üçün prinsip etibarilə böyük əhəmiyyəti vardır. Biz
şadıq ki, indi, ilk növbədə, iki prezidentin səyləri ilə münasibətlərimiz uğurla inkişaf edir. Bakıda V
Ümumdünya Rus Mətbuatı Konqresinin keçirilməsi dediklərimə daha bir sübutdur.
Mən
eşitdim ki, konqres uğurla keçir, çoxlu faydalı iş görülmüşdür. Bu, əlbəttə, vacibdir. Lakin bizim üçün
daha vacibi odur ki, Bakıya gəlmiş bütün qonaqlarımız və dostlarımız ölkəmizlə, xalqımızla daha yaxından tanış
olmaq imkanı əldə etmişlər. Mən dəfələrlə demişəm, biz heç də bərabər vəziyyətdə deyilik. Rusiyada nələr baş
verdiyi barədə bizim tam məlumatımız vardır. Çünki ölkəmiz keçmiş Sovet İttifaqı respublikaları arasında
Rusiyanın telekanallarının qəbul edildiyi və Rusiya qəzetlərinin çap olunduğu çox az respublikadan biridir. Odur
ki, Rusiyada nələr baş verdiyi bizə məlumdur, Azərbaycanda baş verənlər isə Rusiya cəmiyyətinin heç də geniş
dairəsinə məlum deyildir. Zənn edirəm ki, bu konqresin Bakıda təşkili və həmin istiqamətdə gələcəkdə həyata
keçiriləcək birgə proqramlar Azərbaycanın bu günü haqqında həqiqətin Rusiyada geniş ictimaiyyətin diqqətinə
çatdırılmasına kömək göstərəcəkdir. Bu baxımdan konqresin Azərbaycanda keçirilməsi böyük əhəmiyyət kəsb
edir.
Vitali Nikitiçə, Bakıda konqresin keçirilməsinə kömək etmiş bütün dostlarımıza və yaxınlarımıza
bir daha öz
minnətdarlığımı bildirmək istəyirəm və ümid edirəm ki, biz gələcəkdə Bakıda, Moskvada görüşmək üçün
mütləq yeni formalar axtarıb tapacağıq.
Ən başlıcası odur ki, bu əlaqələr davam etsin və münasibətlərimiz möhkəmlənsin. Mən, həmçinin ümid
edirəm ki, hava bir o qədər yaxşı olmasa da, Bakı haqqında təəssürat sizin yaddaşınızda uzun müddət
qalacaqdır.
V i t a l i İ q n a t e n k o (
Rusiyanın İTAR-TASS agentliyinin baş direktoru): Sizinlə görüşmək imkanına
görə çox sağ olun. Düşünürəm ki, bu, işimizin davamıdır. Əminəm ki, həmkarlarım Sizə öz suallarını verəcək
və minnətdarlıq hisslərini bildirəcəklər. Mən də elə bundan başlayacağam.
Mənə elə gəlir ki, çox gözəl təşkil edildiyi üçün bu kon-
qres indiyədək keçirdiklərimizin ən yaxşısıdır. Yeri gəlmişkən, Sizin çox yaxşı, cavan və fəal komandanız var
və bu komanda çox sədaqətli və beynəlmiləldir. Hətta Slavyan Universitetinin volontyorları, bu gənc istedadlar
da bizim qayğımıza qalırdılar. Biz bu tələbələrin
öz işlərinə necə həvəslə, istəklə yanaşdıqlarını gördük. Bütün
bunlara görə çox sağ olun.
Siz tamamilə düzgün dediniz ki, konqresin keçirilməsi üçün sizin gözəl ölkəniz – Azərbaycan təsadüfən
seçilməmişdir. Hər şeydən əvvəl, biz Azərbaycan prezidenti Heydər Əliyevin iki il bundan əvvəl irəli sürdüyü
təklifi nəzərə almalı idik. Mən başa düşürdüm ki, bu, bir növ bizim qarşılıqlı öhdəliyimizdir. Bizim tərəfimizdən
80
məzmunlu və ciddi iş tələb olunur. Digər tərəfdən, hələ iki il bundan əvvəl Heydər Əliyeviç Bakının daha gözəl
olacağını deyirdi. Elə belə də oldu.
Mənə belə gəlir ki, xarici teleqraf agentliklərinin beş baş direktorunun burada iştirak etməsi çox
əhəmiyyətlidir, onların çoxu informasiya naziridir. Burada mən Küveytdən, Çindən olan həmkarlarımı görürəm.
Onlar çox ciddi və tanınmış jurnalistlərdir,
neçə illərdir ki, Azərbaycanı gözəl tanıyırlar və onun inkişafını
izləyirlər. Zənnimcə, bu gün onlar Azərbaycan barədə çox söz deyə bilərlər. Artıq hamıya bəllidir ki, ölkəniz
çox böyük sürətlə inkişaf edir. Azərbaycanı belə irəliləyişdə görmək bizim üçün çox vacib idi. Biz konqresin
gedişində qərarlar qəbul etdik və sizə demək istəyirəm ki, qarşıda bizi televiziya yaradılmasına dair böyük iş
gözləyir.
Biz bilirik ki, Azərbaycan rus dilində nəşrlərin sayına görə Qazaxıstan və Ukrayna ilə birlikdə bir neçə
ölkədən biridir. Elə təkcə “Bakinski raboçi” qəzeti zəngin tarixə malikdir, öz nəşrinə ötən yüzilliyin əvvəllərində
başlamışdır. Biz Bakıdakı rus mətbuatının tarixini gözəl bilirik. Bu gün müxalifət qəzetləri bəlkə də daha
çoxdur. Məncə, bu, qorxulu deyildir. Ümumiyyətlə, rusdilli mətbuat öz mahiyyəti etibarilə həmişə müxalif
mətbuat olmuşdur. Bundan qorxmaq lazım deyil, bu, normal demokratik cəmiyyətdə normal prosesdir.
Mənə elə gəlir ki, Sizin qonaqpərvərliyinizin əvəzini yaxşılıqla çıxmalıyıq.
Bu gün biz Slavyan
Universitetində olduq və onun məzunlarından biri – Mixail Qusman orada Səməd Vurğunun şeirlərini oxudu.
Düşünürəm ki, biz burada iştirak edənlərin səyləri ilə sizin Slavyan Universitetinin tələbələrini Moskvaya və
ölkəmizin başqa regionlarına təcrübə keçməyə dəvət edə bilərik. Hesab edirəm ki, bu, faydalı olacaq və
respublikalar arasında canlı əlaqə meydana gələcək, mətbuatınızın inkişafına canlı töhfə veriləcəkdir.
Şəxsən Sizə bir daha təşəkkürümü bildirmək və nadir bir hədiyyəni – Berlində rus dilində nəşr olunmuş
“Antologiya sovremennoy Azerbaydjanskoy liriki” kitabını təqdim etmək istəyirəm.
M i x a i l S e s l a v i n s k i (
Rusiyanın mətbuat, teleradio verilişləri və kütləvi informasiya vasitələri
nazirinin birinci müavini): Azərbaycanda mətbuat və teleradio verilişləri nazirliyinin olmadığını eşitdikdə
əvvəlcə heyrətə gəldim. Sizdə kütləvi informasiya vasitələrinin qeydiyyatdan keçirilməsi şərtlərinin Rusiya
Federasiyasındakına nisbətən daha liberal olduğunu, kütləvi informasiyanın çap vasitələrinin, onların yaradıldığı
barədə Ədliyyə Nazirliyini, sadəcə, xəbərdar etməli olduğunu, lakin onun icazəsini
gözləmədən bir həftədən
sonra mətbu KİV-in nəşrinə başlandığını eşitdikdə, daha da heyrətləndim. Belə şərait yaradılması məsələləri ilə
bizim nazirlik də məşğul olur. Bəlkə onu da hökumətin tərkibindən çıxarmaq olar.
Mən minnətdarlıq hissi ilə bir daha demək istəyirəm ki, Rusiya telekanallarının verilişləri təkcə Bakıda deyil,
Azərbaycan Respublikasının ərazisində də yayımlanır. Bizə söylədilər ki, birinci kanalı da, RTR kanalını da
hətta dağ yerlərində, bir çox kəndlərdə qəbul etmək mümkündür. Biz gördük ki, burada peyk televiziyası kifayət
qədər inkişaf edib və çoxlu antena var, rusdilli qəzetlər – “Exo” və “Zerkalo” tirajlarına görə Bakıda ən
populyar nəşrlərdəndir. Əlbəttə, bu, çox xoşdur.
Şəhərdə gəzərkən görürdük ki, insanlar bizi – moskvalı qonaqları çox mehribanlıqla və səmimiyyətlə
qarşılayırlar. Onlar rus dilində yaxşı danışır və Rusiyada baş verən hadisələrə canlı maraq göstərirlər.
Bilirsinizmi, Rusiyanın kütləvi informasiya vasitələri Azərbaycanda baş verən hadisələrdən, əslində, ətraflı
söhbət açırlar, xüsusilə indi, seçkiqabağı proses gedəndə çoxlu məqalə dərc olunur. Dünən “İzvestiya”nın bütöv
bir səhifəsində Azərbaycan Prezidenti haqqında məqalə dərc edilmişdir. Əlbəttə, jurnalistlər öz materialının
oxucuda daha canlı reaksiya doğurması üçün onu daha kəskin şəkildə təqdim etməyə çalışırlar. Vitali Nikitiç
tamamilə haqlıdır. Bu, normal haldır.
Yəqin elə bir dövlət yoxdur ki, orada jurnalistlər öz materialını maksimum
kəskin şəkildə təqdim etməyə çalışmasınlar. Demək istəyirəm, Bakıda səmimiyyətlə qarşılanmağımız göstərir
ki, təkcə siyasi, iqtisadi səviyyədə deyil, başqa səviyyələrdə də əməkdaşlığımız üçün böyük imkanlar
mövcuddur. Məsələn, sizdə güclü Ekologiya naziri var - Hüseyn Bağırov. O öz təsərrüfatını bizə göstərdi. Biz
onun öz işinə nə qədər qüvvə və enerji sərf etdiyini gördük. Hələ Mixail Solomonoviç demişdi ki, kaş bizdə də
belə nazir olaydı.
Biz onu da dedik ki, birinci kanalda nümayiş etdirmək üçün Azərbaycanın təbii parkları və qoruqları
haqqında verilişlər hazırlamaq lazımdır. İndi Rusiyada olduqca çox elmi-kütləvi nəşrlər var, onlardan biri də
“Vokruq sveta” jurnalıdır.
Gələcəkdə turizmi inkişaf etdirmək üçün ekspedisiyalar da təşkil etmək olar. Siyasi və insani səviyyədə
mövcud olan əməkdaşlıq intensiv turist mübadiləsinə çevrilməlidir.
Bizə göstərilən səmimi qəbula görə bir daha minnətdarlığımı bildirirəm.
İ l h a m Ə l i y e v: Çox sağ olun. Sizin bu sözlərinizi eşitmək bizim üçün çox xoşdur.
Bizdə Mətbuat
Nazirliyi yoxdur, lakin çap məhsullarının qeydiyyata alınması prosedurunun olmaması, əlbəttə, müsbət haldır və
bu da ona gətirib çıxarmışdır ki, indi Azərbaycanda 500-dən artıq qəzet və jurnal çıxır. Bilmirəm, onları kimlər
və neçəsini oxuya bilər. Hər halda, bu, əlbəttə, müsbət faktdır. Bəlkə də hansısa bir ailə, yaxud bir qrup adam
hər hansı bir qəzet buraxır. Lakin vəziyyət tamamilə liberaldır və bu, əlbəttə, müsbət haldır. İnsanlar
istədiklərini oxumaq hüququna malikdirlər. Qəzetlərin müxalifətyönümlü olmasına gəldikdə isə, biz buna vərdiş