71
yer tutmuşdur. Azərbaycan dövlət müstəqilliyini bərpa etdikdən sonra milli mədəniyyətin, o cümlədən təsviri
sənətin inkişafında yeni mərhələ başlamışdır.
2000-ci ildə Azərbaycanın ümummilli lideri Heydər Əliyevin təşəbbüsü ilə ölkənin mədəni həyatında,
eləcə də gənc nəslin inkişafında böyük rol oynayan Azərbaycan Dövlət Rəssamlıq Akademiyası yaradıldı. Yeni
stilistikada A. Sadıqzadə, Ə. Əlimirzəyev, Z. Hüseynov, M. Əbdürrəhmanov, E. Qurbanov, Ə.
Nərimanbəyova,
S. Şıxlinskaya, M. Əmirov, A. Xəlilov, Ə. Bədəlov,
V. Muradov və başqaları işləyirlər.
F.Salayev, M.Əliyev, N.Dadaşov, M.Eldarov,
A.Useynov, H.Haqverdiyev, M.Rüstəmov kimi
heykəltəraşlar dəzgah heykəltəraşlığı sahəsində maraqlı
əsərlər yaratmışlar.
1990-cı ildən Azərbaycanda konseptual
incəsənətin müxtəlif nümunələri (instaliasiya, videoart)
yaranır. Bədii fotoqrafiya incəsənəti inkişaf edir. Qeyri-
hökumət təşkilatları səviyyəsində də müxtəlif
strukturlar, birliklər, özəl qalereyalar yaradılır.
Azərbaycan
rəssamları
beynəlxalq
layihələr
çərçivəsində Fransa, ABŞ, Yunanıstan, Rusiya, Türkiyə
və digər ölkələrdə keçirilən müasir incəsənət festivallarında müvəffəqiyyətlə iştirak edirlər.
Nurəddin Həbibov, Cəmilə Həsənzadə
Ədəbiyyat: Azərbaycan Milli Ensiklopediyası. 25 cilddə. “Az ərbaycan” cildi. Bakı, 2007, “ Təsviri və
dekorativ-tətbiqi sənətlər” məqaləsi, səh.766-774.
72
Miniatür
Yaxın və Orta Şərq xalqları incəsənətinin maraqlı və zəngin hissəsini təşkil edən Azərbaycan miniatür
sənəti dünya incəsənəti tarixində özünəməxsus yer tutur. Kitab illüstrasiyası kimi yaranıb formalaşan
Azərbaycan miniatür sənətinin təşəkkül tarixi qədimdir. 13 əsrin əvvəllərində Əbd ül-Mömin Məhəmməd əl-
Xoyinin "Vərqa və Gülşa" əlyazmasına çəkdiyi miniatürlər (Topqapı muzeyi, İstanbul) yalnız Azərbaycanda
deyil, Yaxın və Orta Şərqdə bu sənətin ən qədim nümunələrindən sayılır.
XII-XIV əsrlərdə Marağa, Təbriz və Azərbaycanın başqa şəhərlərində xəttatlıq və miniatür sənəti
sürətlə inkişaf etmiş, Təbriz şəhəri Şərqdə bədii yaradıcılığın, kitab sənəti, kalliqrafiya və miniatür
boyakarlığınının ən qüdrətli mərkəzinə çevrilmişdi. XIV əsrin əvvəllərində Təbrizin Rəşidiyyə akademiya
şəhərciyinin kitabxanasında yerli xəttat və rəssamlarla yanaşı Şərqi Türküstan, Orta Asiya və başqa Şərq
ölkələrindən toplanmış sənətkarlar fəaliyyət göstərir, dini, tarixi, elmi və poetik əsərlərin bədii əlyazma
nüsxələrini hazırlayır, onları miniatürlərlə bəzəyirdilər. Bu dövr əlyazmalarından Bəhtişunun "Mənafi əl-
heyvan" əsərinə (1297/98; Morqan kitabxanası, Nyu-York), Rəşidəddinin "Cami ət-təvarix" (1306-cı il nüsxəsi,
Edinburq universiteti, Şotlandiya; 1314-cü il nüsxəsi, Kral Asiya Cəmiyyəti, London; 1318-ci il nüsxəsi,
Topqapı muzeyi, İstanbul) əsərinin məlum nüsxələrinə çəkilmiş miniatürləri göstərmək olar. "Cami ət-təvarix"
əlyazmalarının müxtəlif rəssamlar tərəfindən çəkilmiş illüstrasiyaları Azərbaycan miniatür sənətinin inkişafında
xüsusi mərhələ təşkil edir.
XIV əsrin ortalarında Təbriz rəssamları qrafik və
boyakarlıq üslublarının uğurlu sintezindən doğan bədii
üslub yaratdılar. Bu yeni üslubun formalaşması 1340-50-ci
illərə aid edilən "Böyük Təbriz Şahnaməsi", yaxud
"Demott Şahnaməsi" adlanan məşhur əlyazmanın
miniatürlərində öz əksini tapmışdır. Əksəriyyəti dövrün
görkəmli rəssamları Əhməd Musa və Şəmsəddin tərəfindən
çəkilmiş bu miniatürlər hazırda dünyanın bir çox muzey və
kitabxanalarında saxlanılır. Əlyazmanın 120 miniatüründən
yalnız 58-i məlumdur. Bunlardan "Firidun oğlunun
cənazəsini qarşılayır", "İrəcin ölüm xəbəri" (Frir
qalereyası, Vaşinqton), "Əsir alınmış Ərdəvan Ərdəşirin
hüzurunda" (Veve kolleksiyası, Paris), "Rüstəmin dəfni",
"İsgəndərin cənazəsi üzərində ağlaşma" və s. miniatürlər
süjetin
dramatik həlli, obrazların dərin
emosional ifadəliliyi
ilə Yaxın və Orta Şərq miniatür sənətində müstəsna yer
tutur. Sonrakı dövrlərdə istər Azərbaycanda, istərsə də İran
və Orta Asiyada hazırlanmış "Şahnamə" nüsxələrində
illüstrasiyalar üçün süjetlərin seçilməsi və onların
ikonoqrafıyasının yaranmasında "Demott Şahnaməsi"nin
böyük rolu olmuşdur. Məhz buna görə bir sıra alimlər haqlı
olaraq Təbriz məktəbinin qonşu ölkələrdə miniatür
sənətinin yaranması və inkişafına böyük təsir göstərdiyini
qeyd edirlər.
Azərbaycan miniatür sənətinin bədii üslub
xüsusiyyətləri XV əsrin əvvəllərində daha da
təkmilləşmişdir. Nizami Gəncəvinin "Xosrov və Şirin"
poemasına, sonuncu Cəlairi hakimi Sultan Əhmədin şeirlər "Divanf'na dahi rəssam Əbdəl-Xoyinin çəkdiyi
rəsmlərdə (1405-10, Frir qalereyası, Vaşinqton) və Əssar Təbrizinin "Mehr və Müştəri" əsərinə çəkilmiş (1419)
illüstrasiyalardakı (xəttat Cəfər Təbrizi) üslub, bədii sənətkarlıq məziyyətləri ilə seçilir.
XV əsrin əvvəllərində məşhur Azərbaycan xəttatı Cəfər Təbrizi, bədii cild ustası Qəvaməddin,
rəssamlardan Xoca Əli və Qiyasəddin kimi görkəmli Təbriz sənətkarlarının Heratda geniş yaradıcılıq fəaliyyəti,
Şərqin böyük rəssamı Kəmaləddin Behzadın Heratda Pir Seyid Əhməd Təbrizidən rəssamlıq dərsi alması və
başqa tarixi faktlar göstərir ki, Təbriz uzun müddət Yaxın və Orta Şərq şəhərlərini yetkin sənətkarlarla təmin
edən qüdrətli sənət mərkəzi olmuşdur. Məşhur alman sənətşünası F.Şults Təbriz məktəbini qonşu Şərq
ölkələrində miniatür sənətinin inkişafına əsaslı təsir göstərmiş "ana məktəb" ("mutter schule") adlandırmışdır.
XV əsrdə Təbriz məktəbinin təsiri ilə Şamaxı və Bakıda miniatür sənəti inkişaf etməyə başlamışdı. Bu dövrdə
"Şərq poeziyası antologiyası", yaxud "Şamaxı antologiyası"na (1468, Britaniya muzeyi, London) və başqa
əlyazmalarına çəkilmiş illüstrasiyalar, Əbdülbaqi Bakuvinin çəkdiyi tək və ikifiqurlu portretlər ("Mehtər", "İki
əmir", Topqapı muzeyi, İstanbul) Şamaxı və Bakı rəssamlarının ən yaxşı miniatürləri sırasına daxildir.