70
müqaviləsi yalnız konsensual müqavilə kimi bağlanıla bilər və bu
müqavilə növü üçün real müqavilə hüquqi modeli qəbul olunmazdır.
Göstərilən müqavilələr bir-birindən həm də belə bir cəhət ilə
fərqlənirlər ki, beynəlxalq yük daşınması ilə bağlı olan
münasibətlərdə çox vaxt üç subyekt (iştirakçı) çıxış edir:
yükgöndərən, daşıyıcı və yükalan. Beynəlxalq sərnişin daşınması
müqaviləsində isə iki subyekt (iştirakçı) çıxış edir: daşıyıcı və
sərnişin.
Digər tərəfdən, göstərilən müqavilələr məsuliyyət məsələsinə
görə bir-birindən fərqlənir. Söhbət daşıyıcının müştəri (sərnişin və ya
yük sahibi) qarşısında daşıdığı məsuliyyətdən gedir. İlk növbədə
qeyd etmək lazımdır ki, daşıyıcının sərnişin qarşısındakı məsuliyyəti
daha ciddi xarakter daşıyır, yəni yüksəkdir. Bununla belə, bəzi
dövlətlərin milli (daxili) hüququ sərnişin daşınması müqaviləsi üzrə
məsuliyyət məsələsində iddiaların rəqabətinə yol verir. İddiaların
rəqabətinə görə daşıyıcıya (nəqliyyat təşkilatına) həm müqavilə
iddiası, həm də delikt iddiası (müqavilədənkənar iddia) verilə bilər.
Başqa sözlə desək, daşıyıcı sərnişin qarşısında müqavilə məsuliyyəti
və ya delikt məsuliyyəti (müqavilədənkənar məsuliyyət) daşıya bilər.
İngilis-amerikan hüququ dövlətlərində müqavilə və delikt
məsuliyyətlərinin rəqabətinə yol verilir. Bəzi ölkələrdə isə, məsələn,
Fransada daşıyıcının sərnişin qarşısındakı məsuliyyəti yüksək olsa
da, müqavilə məsuliyyəti kimi tanınır.
Azərbaycan Respublikasının mülki qanunvericiliyi də
daşıyıcının sərnişin qarşısında daşıdığı məsuliyyətə həm müqavilə
məsuliyyəti, həm də delikt məsuliyyəti kimi baxır. Belə ki, müqavilə
öhdəliklərinin icrası zamanı fiziki şəxsin həyatına, yaxud
sağlamlığına vurulmuş zərərin əvəzi, əgər qanunda və ya
müqavilədə daha yüksək məsuliyyət ölçüsü nəzərdə tutulmamışdırsa,
delikt məsuliyyəti haqqında qaydalar üzrə ödənilir (MM-in 1117-ci
maddəsi).
Beynəlxalq yük daşınması müqaviləsi üzrə daşıyıcının
məsuliyyəti yalnız müqavilə məsuliyyəti kimi tanınır. Delikt
məsuliyyəti haqqında qaydalar burada tətbiq edilmir.
71
Bunlardan əlavə, beynəlxalq sərnişin daşınması müqaviləsi
üzrə müştəri (sərnişin) artıq bağlanmış müqavilənin şərtlərini
sonradan dəyişmək hüququna malikdir. Məsələn, sərnişin
müqavilənin ləğv edilməsini, yaxud ondan qismən istifadə
edilməsini, marşrutun və səfərin müddətinin dəyişdirilməsini və s.
tələb edə bilər. Bunu nə ilə izah etmək olar?
Məlum olduğu kimi, sərnişinlər öz əmək, mədəni, məişət,
şəxsi, ailə və digər ehtiyaclarını ödəmək üçün daşıma prosesində
iştirak edirlər, müəyyən bir yerdən başqa yerə gedirlər. Onların şəxsi
mənafeləri və maddi (iqtisadi) imkanları müxtəlif olmaqla yanaşı
dəyişə bilər. Təbii ki, sərnişinlərə müqavilə şərtlərini dəyişmək
hüququ verilməlidir.
Beynəlxalq sərnişin daşınması müqaviləsi ilə daxili sərnişin
daşınması müqaviləsi arasında da fərqli cəhətlər vardır. Birinci, bu
müqavilələr subyekt tərkibinə görə bir-birindən fərqlənirlər. Belə
ki, beynəlxalq sərnişin daşınması müqaviləsində iştirak edən
subyektlərdən (daşıyıcı və sərnişindən) biri hökmən xarici dövlətə
məxsus şəxs olmalıdır. Daxili sərnişin daşınması müqaviləsinin
subyektləri rolunda isə həmişə eyni bir dövlətin şəxsləri çıxış edir.
Bununla belə, istisna hal kimi, beynəlxalq sərnişin daşınması
müqaviləsinin subyektləri qismində eyni bir dövlətin şəxsləri də
müqavilədə iştirak edə bilərlər. Belə halda, beynəlxalq sərnişin
daşınması müqaviləsi daxili sərnişin daşınması müqaviləsindən
onunla fərqlənir ki, bu müqaviləyə görə sərnişin xaricə səfər edir,
daşıma iki dövlət arasında həyata keçirilir.
İkinci, göstərilən müqavilələr bir-birindən
hüquqi
tənzimetmə mənbəyinə görə fərqlənir. Daxili sərnişin daşınması
müqaviləsi ayrı-ayrı dövlətlərin milli (daxili) hüququ ilə
tənzimlənir. Beynəlxalq sərnişin daşınması müqaviləsinə gəldikdə
isə, qeyd edə bilərik ki, bu müqavilə növü, ilk növbədə, beynəlxalq
72
nəqliyyat konvensiyaları (sazişləri) ilə tənzimlənir. Afina
Konvensiyasının, Varşava Konvensiyasının, Sərnişinlərin və
baqajın beynəlxalq avtomobil daşınması müqaviləsi haqqında
Konvensiyanın, vahid BSK qaydalarının (A əlavəsinin) və digər
beynəlxalq hüquqi sənədlərin beynəlxalq sərnişin daşımalarının
nizamlanmasında
əhəmiyyəti böyükdür. MDB məkanında
avtomobillə beynəlxalq sərnişin daşınması müqaviləsi Bişkek
Konvensiyası ilə tənzimlənir.
Beynəlxalq sərnişin daşımaları ikitərəfli dövlətlərarası
nəqliyyat sazişləri ilə də tənzimlənə bilər. Azərbaycan Respublikası
bir çox dövlətlərlə (Türkiyə, Türkmənistan, Qazaxıstan, Rumıniya,
Moldova, İran, Latviya, Rusiya Federasiyası, Birləşmiş Ərəb
Əmirlikləri, İordaniya Haşimilər Krallığı, Niderland Krallığı və b.)
beynəlxalq avtomobil daşımaları və əlaqəsi haqqında ikitərəfli saziş
imzalamışdır. Bizim ölkə hava və dəmir yolu daşımaları sahəsində də
bir sıra dövlətlərlə ikitərəfli sazişlər bağlamışdır. Bu sazişlər
beynəlxalq sərnişin daşımalarının tənzimlənmə-sində mühüm
əhəmiyyət kəsb edir.
Beynəlxalq nəqliyyat konvensiyaları (sazişləri) sərnişin
daşımalarının daha vacib şərtlərini (gediş bileti, daşıyıcının
məsuliyyəti, daşıyıcıya tələb irəli sürülməsi qaydaları) müəyyən edir.
Buna görə də onun digər şərtlərinin ayrı-ayrı dövlətlərin milli
(daxili) hüququ ilə tənzimlənməsinə ehtiyac yaranır. Hal-hazırda
beynəlxalq sərnişin daşınması müqaviləsinin tənzimlənməsində
milli (daxili) hüquq və nəqliyyat təşkilatlarının tarifləri (daşıma
qaydaları) əsas rol oynayır.
1
2.4.Beynəlxalq baqaj daşınması müqaviləsi
Beynəlxalq sərnişin daşımaları zamanı sərnişin daşıyıcıya
baqaj təhvil verə bilər. Daşıyıcıya baqaj təhvil vermək sərnişinin
malik olduğu əsas hüquqlardan biridir. Bu hüquq həyata keçirilərkən
1
Бах: Садиков О.Н. Правовое регулирование международных перевозок. М.,
1981, с.74.
Dostları ilə paylaş: |