Şərqşünaslıq fakültəsi İstiqaməti, şifri və adı: hsm- 040000 Dilşünaslıq İxtisası, şifri və adı: hsm- 040009 Ərəb dili

Arami dilindən: möhür, poçt markası- طابع, məktub, ismarıc- كتاب, qovluq, vəsiqə, açıqca- بطاقة, buğda- قمح.
Fars dilindən: nümunə- نموذج, tip, sistem, marka- طراز, kataloq, siyahı- فهرس, çek- صكّ, professor- أستاذ, proqram, plan, kataloq- برنامج, kargüzarlıq, dövlət idarəsi- ديوان, gömrük- جمرك və s.
Türk dilindən: şöbə- قلم, sənədlər- أوراق, mədaxil- إيراد, piastr- قرش, imza- إمضاء, vergi- رسم və s.
Yunan dilindən: kataloq- كتالوج, dəst- طقم, telefon- تلفون, teleqraf- تلغراف, dirhəm- درهم, qanun- قانون və s.
Latın dilindən: viza- فيزا, dinar- دينار, poçt- بريد, səfir- قنصل və s.
Fransız dilindən: doktor- دكتور, katib-سكرتير, dəb-مودة, موضة və s.[26,159]
Misallardan da göründüyü kimi, ərəb dilinin leksik fondu müxtəlif alınma sözlərin hesabına zənginləşmişdir. Bunlara misal olaraq, funt-جنيه (Misir) sözü ingilis mənşəli guinea sözündən götürülmüşdür, və yaxud da dinar- دينار (İraq, Əlcəzair, İordaniya, Küveyt) sözü latın sözü olan denarius sözü ilə eyni mənşəlidir.
İşgüzar sənədlərdə beynəlxalq ölçü, çəki vahidləri, eləcə də iqtisadiyyat və maliyyə sahəsinə aid terminlər olduqca geniş yayılmışdır[26,159].
İşgüzar sənədlərin tədqiqi zamanı aydın olur ki, ərəb dili digər dil ailələrinə daxil olan dillərlə əlaqədə olmuşdur. Bu dillərdən bəziləri (arami, fars, türk) müəyyən struktur xüsusuiyyətlərinə görə ümumidirlər; bəziləri isə hind-Avropa ailəsinə aid olub, morfoloji quruluşuna görə fərqlənirlər (yunan, latın, ingilis, fransız, italyan).
Əcnəbi leksikanın tarixən şəklini dəyişməsi və onun tam mənimsənilməsi bir çox səbəblərdən, o cümlədən dillər arasında əlaqənin intensivliyindən, onların xarakterindən, əhalinin savadından və başqa dili bilmə səviyyəsindən, alınmanın üsulundan (şifahi və ya yazılı) asılı olmuşdur. Suriya, Livan və Əlcəzairdə fransız dilinin, Liviyada italyan dilinin, Misir və İraqda ingilis dilinin təsiri daha çox olmuşdur.
Zaman keçdikcə əcnəbi elementlər dilin ayrılmaz hissəsinə çevrilir; alınma sözlərin assimilyasiyası üçün bir sıra imkanlar mövcuddur. Ərəb yazılı dilinə alınma sözlərin keçməsi ərəb qrafikasının köməyilə transliterasiya vasitəsilə baş verir: əcnəbi sözlərdə olan saitlərin transliterasiyası tam (saitlər ا,و,ي- vasitəsilə ifadə olunduqda) və natamam (saitlər hərəkələr-fəthə, kəsrə, damma vasitəsilə verildikdə) olaraq iki yerə ayrılır.
Əcnəbi sözlər əxz edilmə zamanı ərəb dilinin qrammatik qaydalarına tamamilə və ya qismən tabe olurlar (məsələn, cəm formasının yaradılması zamanı). Məsələn: bank-بنك-بنوك, metr-متر-أمتار, kompyuter-كمبيوتر-كمبيهترات
Leksik vahidlərin alınması ilə yanaşı, semantik alınmalar da mövcuddur. məsələn, kompyuter- إلكترونية حاسُبة حاسب آليٌّ və ya[26,161].
Alınma sözlərin təsnifi zamanı ərəb tədqiqatçıları ərəbləşmiş sözləri-معرّبات (assimilyasiyaya uğrayaraq ərəb modellərinə uyğunlaşmış sözlər) və yad sözləri-أسماء دخيلية (morfoloji assimilyasiyaya uğramayan və ilkin formasını saxlayan sözlər) ayırırlar: bu sözlər əcəmi sözlər-كلمات أعجميّة adlanırlar. Ərəbləşmənin dərəcəsindən asılı olaraq ərəb dilçiləri onları belə təsnif edirlər: a) dəyişikliyə uğramış və ərəb qrammatikasına uyğunlaşmış sözlər; b) sözdüzəldici modellərə adoptasiya olmamış sözlər; c) dəyişilməmiş, lakin ərəb sözdüzəldici modellərinə adoptasiya olmuş sözlər; d) dəyişikliyə uğramış, amma sözdüzəldici modellərə uyğunlaşmamış sözlər [26,165].
Ərəbləşmənin- تعريب əsas xüsusiyyəti alınma sözün səs tərkibinin dəyişmədən qalmasından ibarətdir, yəni o-fonematik substitusiyadır. Fonematik assimilyasiya (əcnəbi səsin dildə olan səslə əvəz olunması; məsələn,فيزا ) ilə paralel olaraq, morfoloji assimilyasiya prosesi də (hərfin buraxılması və ya əlavə olunması, bir samitin digəri ilə əvəz olunması) həyata keçirilir. Əcnəbi sözün ərəb dilinin fonetik sisteminə uyğunlaşdırılmasının digər üsulu isə, sözün əvvəlində iki samitin aradan qaldırılmasıdır ki, bu da iki yolla həyata keçirilir: a) sözün əvvəlinə həmzənin əlavə edilməsi; b) iki samit arasına sait əlavə edilməsi.
Ərəb işgüzar sənədlərinin tərtibi zamanı alınma sözlərin rolu əvəzsizdir. Onlar müasir iş dünyasında real əhəmiyyətə malikdirlər; rabitənin yaradılmasına xidmət edirlər.
Beləliklə, ərəb dilində sənədlərin, xüsusən də işgüzar sənədlərin tərtibi zamanı vacib olan elementləri, bu sənədlərin dil xüsusiyyətlərini araşdırarkən nəzərə alınmalı olan əsas cəhətlər ərəb dilinin linqvistik xüsusiyyətləri, ərəb dili ilə yanaşı, digər dillərdə də işgüzar sənədlər tərtib olunarkən istifadə olunan leksemlər, morfemlər, leksik pasajlar, stereotip cümlələr, şablonlar, klişelər və s. bu kimi standart formalardan ibarətdir. Həmçinin, işgüzar sənədlərin standart forması da maraqlı cəhətlərdən biridir. Bu formalar sənədlərin unifikasiyası və standartlaşması nəticəsində yaranmışdır. Belə standart sənəd formaları eynitipli vəziyyətlərin çoxluğu nəticəsində meydana gəlmiş, sənədin tərtibinə minimum vaxt sərf etməyə və onun ən əsas hissələrini qavramağa imkan verir. Bu standart formalara anket, cədvəl, trafaret kimi sənədləri misal göstərmək olar. İşgüzar sənədlərdə istifadə olunan standart formalarla yanaşı, termin və alınma sözlər də vacib elementlərdən biridir. Terminlər sırf istifadə olunduğu sahəyə aid olan, danışıq dilində yalnız müəyyən məfhumu bildirmək üçün istifadə olunan, ümumişlək sözləri əvəz etməyən sözlərdir. Hər bir sferada olduğu kimi, işgüzar sənədlərin də özünəməxsus terminləri var. Bundan başqa, bir çox ümumişlək sözlər də işgüzar sənədlərdə istifadə olunaraq rəsmi məna kəsb edirlər. Alınma sözlərə gəldikdə, qeyd etmək lazımdır ki, hər bir dildə olduğu kimi, ərəb dilində də kifayət qədər alınma söz vardır və bu sözlərdən işgüzar sənədlərdə də geniş istifadə olunur.
İşgüzar sənədləri, xüsusən də ərəb dilində işgüzar sənədləri tərtib edərkən, sənədin linqvistik xüsusiyyətləri ilə yanaşı, etnopsixoloji, sosial-mədəni, tarixi və s. xüsusiyyətləri də nəzərə almaq lazımdır. Belə ki, ərəblərin özünəməxsus dünyagörüşü, dini baxışları, mentaliteti də işgüzar sənədlərin tərtib olunmasında mühüm rol oynayır, işgüzar münasibətlərin uğurlu olmasına şərait yaradır.
Sonda onu demək olar ki, işgüzar sənədlərin dili olan rəsmi-kargüzarlıq üslubu funksional üslublar arasında ən geniş yayılmış üslubdur və o digər üslublardan özünəməxsus dil xüsusiyyətləri, linqvistik formullarla fərqlənir.


NƏTİCƏ

İşgüzar məktubun savadlı, düzgün tərtibi internet əlaqəsinin sürətlə inkişaf etdiyi müasir dövrdə xüsusi əhəmiyyət kəsb edir. Telefon, teleks, teleqraf kimi əlaqə vasitələrinin yaradılmasına baxmayaraq, insanlar arasında ən asan və etibarlı ünsiyyət vasitəsi olaraq məktublar qalmaqdadır.

İşgüzar etikanın tələblərindən biri ondan ibarətdir ki, telefon və teleqraf (teleqram, teleks) vasitəsilə ötürülən məlumatlar məktubla təsdiq olunmalıdırlar. Deməli, işgüzar məktubu yazmaq bacarığı xüsusilə vacib məsələlərdəndir. İşgüzar məktubu yazarkən aşağıdakılara diqqət yetirmək lazımdır:

1. 
   İlk növbədə düzgün tərtib olunmuş sənədlər, xüsusilə də əcnəbi dillərə, o cümlədən də ərəb dilinə tərcümə olunmuş sənədlər mətnin hərfi tərcüməsindən ibarət olmamalıdırlar. Bu onunla əlaqədardır ki, hər bir dilin özünəməxsus qrammatik konstruksiyaları və leksik birləşmələri vardır.
   
2. 
   Bəzən, ümumişlək birləşmələrdən, tipik məktublardan, standart söz və formalardan istifadə etmək məqbul sayılır ki, bütün bunlar da sənədin tərtibini asanlaşdırır. Belə ki, işgüzar sənədlər tematik cəhətdən rəngarəng deyillər.
   
3. 
   Sənədin mətni yalnız bir məna ifadə etməlidir; burada fikir ayrılığına yol vermək olmaz.
   
4. 
   Sənədin dili, yəni rəsmi üslub özünün dəqiqliyi və səlisliyi ilə fərqlənməlidir. Buradan da işgüzar məktublara irəli sürülən tələblər meydana gəlir: lakoniklik, aydınlıq və ifadənin səlisliyi.
   
5. 
   Sənədin mətni düzgün və savadlı, orfoqrafik və punktuativ qaydalara uyğun şəkildə rəsmi-işgüzar üslubda tərtib olunmalıdır.
   
6. 
   İşgüzar sənədlərin dili özünəməxsus stereotip cümlə, klişe, ştamp və standart formaların məcmusundan ibarətdir. Sənədlərin standartlaşdırılması mətnin əsas hissələrinin anlaşılmasına, sənədin tərtibinin asanlaşmasına şərait yaradır.
   
7. 
   İşgüzar sənədlər xüsusi blanklarda və əsas elementləri olan rekvizitləri qeyd olunmaqla tərtib olunurlar. Bu rekvizitlərə təşkilatın adı, poçt ünvanı, telefon nömrəsi, sənədin tarix və nömrəsi, mətnin başlığı, mətn, qoşma haqqında qeyd, icraçının adı, soyadı, imzası və s. daxildir.
   
8. 
   İşgüzar sənədin digər sənədlərdən fərqi ondan ibarətdir ki, burada onun adı qeyd olunmur (Məsələn, əmr, fərman, akt və s.-dən fərqli olaraq).