‐ Al, özün ver. Amma
sən qaranquşa yox,
daha çox qartala oxşayırsan.
Bunu ərinin burnuna görə deyirdi.
Andrey quşcuğazın qabağında əllərini
sanki zarafatla yellətdi və görünməmiş hal
baş verdi: quşcuğaz dimdiklərini geniş araladı,
gözlədi, yox o gözləmirdi, o, yemək tələb
edirdi!
Qaranquş balasının sonrakı taleyi həll
olundu.
Onun üçün tort qutusundan yuva
düzəltdilər. Qayınananın deyinməsinə
baxmayaraq, köhnə balışlardan birini yırtıb
toyuq tüklərini çıxartdılar, onları qutunun
içinə yığdılar. Quşcuğazı qutuya qoyub
üstünü əsgiylə örtdülər. Ev soyuq olmasa
da, ətcəbala qurumurdu ki, qurumurdu.
Qabağına oyuncaq boşqabın içində ölü
milçəklər qoydular, amma quşcuğaz onları
görmədi. Katya buna görə hətta sevindi. Qız
israrla dedi ki, yalnız o özü toppuş əllərini
quşcuğazın dimdiyi qarşısında yellədəcək,
bu qara canlı məxluqcığaza görə məsuliyyət
daşımaq onun xoşuna gəlir. Bu hərəkətlə
quşcuğazı çox asanca aldatmaq olur, hər
dəfə dimdiklərini geniş aralayır. Qız dirildi,
sanki hərəkətə gəldi, başladı tez‐tez
gülümsəməyə.
Neçə gün idi ki, günəş görünmürdü,
görünür, havanı kimsə lənətləmişdi. Onlar
evdəki milçəklərin, demək olar ki, hamısını
tutdular və qaranquş balasını islanmış çörəklə
birlikdə yemlədilər.
Bir dəfə yatmazdan qabaq axşam Katya
soruşdu:
‐ Nə üçün ətcəbala hələ də islaqdır?
Atası susdu, anası cavab verdi:
‐ Bilmirəm. Sabah fenlə qurulamağa
çalışarıq.
Lakin gecə quşcuğaz öldü. Bunu səhər
bildilər. Katya hələ də yatmışdı. Sanki
quşçuğaz da yatmışdı, lakin onun xırda başı
əyilmişdi, boynu gözlənilmədən çox
uzanmışdı.
‐ Aman Allah! ‐ Andrey qızını dur ‐
quzmamaq üçün yavaşça yataq otağından
mətbəxə keçdi.
‐ Bəs indi neyləyəcəyik? ‐ arvadı soruşdu.
Әri çiyinlərini çəkdi.
‐ Qızı birtəhər hazırlamaq lazımdı...
‐ Sən ona həqiqəti söyləmək istəyirsən?
Bilirsən nolar? Bu qədər həngamədən,
sarsıntıdan sonra bu xəbər ona daha bir zərbə
olacaq.
‐ Bəs ona nə deyək?
‐ Bilmirəm... Deyək ki, qaranquş balası
uçub getdi...
‐ Bura bax, uşaq sən deyən də sadəlövh
deyil.
‐ Onda deyərik ki, qorxduq ki, ətcəbala
ölsün, buna görə də onu başqa yuvaya
qoyduq.
‐ Bəs niyə qabaqcadan ona heç nə
deməmişik? Onu özümüzlə aparmamışıq?
Arvadı başladı narahat olmağa.
Әsəbiləşirdi. Elə bil əri yalandan, onun
acığına hər sözünə etiraz edirdi.
‐ Yaxşı, özün bir şey fikirləş! ‐ deyə arvadı
acıqla bildirdi.
‐ Məncə, biz ona həqiqəti deməliyik.
‐ Nə?
‐ Yaxşı olar ki, düzünü deyək.
‐ Yaxşı olar? Yenə özünə qapılsın, yenə
bütün günü ağzına su alsın, hə? Yaxşı olar?
Bu da sənin həkimlərin! Qızınızı kəndə aparın!
İşə bax da!
‐ Axı niyə belə danışırsan?
Andrey çalışırdı ki, mülayim olsun,
mübahisə etmək istəmirdi, hətta gülümsəyirdi,
lakin məhz bunu etmək lazım deyildi.
‐ Sənə nə var, gülməli gəlir sənə! Sən elə
həmişə beləsən, daşdan səs çıxar, səndən
yox! Әlbəttə! Axı sən yalnız özün barədə
düşünürsən: bircə qızın səndən inciməsin,
nə bilim bircə...
‐ Bəsdi.
‐ Nə bəsdi! Sən ki onu yalnız bazar günləri
görürsən!
‐ Mənim işim olur!
‐ Әlbəttə, işin olur! Sənə iş, mənə də uşaq!
Gəlirsən, uşaqla şirin‐şirin danışırsan, sən
olursan yaxşı, olursan ən sevimli! Ata, olar?
Olar. Bu olar? Olar. O olar? Olar. Hər şey
olar! İstəyirsən yad adamlarla balıq tutmağa
Aylıq ədəbiyyat dərgisi
14
ULDUZ /
Dekabr 2015
getmək? Buyur, get! Qızım, get! Onu nə üçün
buraxdın? Nə üçün sən özün onunla
getmədin?
Hiss etdi ki, içində nəsə sıxıldı, bax elə
bu dəqiqə içində partlayış baş verəcək, açılıb
çölə töküləcək. Әvvəl‐axır içindəki şey
partlamalıydı, çölə çıxmalıydı. İndi bu hissi
həmişəkindən daha çox anlayıb yaşadı.
Bədbəxtlik onları birləşdirmədi, sanki rentgen
kimi onların qəlbinin şəklini çəkdi, qoydu
ortalığa – açıq‐aşkar bilindi ki, onlar biri‐
birindən hələ də uzaqdılar, bir‐birlərini
axıradək başa düşmürlər.
O, nəyə ümid edir? Bəs o, özündən on
yaş kiçik olan bu kənd qızından nə istəyirdi?
Rejissor arvadı olmaq ilk vaxtlar qadına
maraqlıydı, sonra gördü ki, yox, çox çətindi.
Ona yaddır, nəhayət, onun bir vaxtlar möcüzə
kimi təsəvvür etdiyi həsəd aparılası aləm
deyil. Lakin məgər buna görə o günahkardır?
Qadını təntənəylə gətirdiyi bu aləm çoxları
üçün əlçatmaz və sirli görünürdü; bu aləmdə
aktyorlar, artistlər, rəssamlar yaşayırdı; burda
təkcə bayramlar olmurdu, həm də adi həyat
olurdu, adi günlər, cansıxıcı yeknəsəklik və
tənhalıq baş alıb gedirdi, daim maddi
çətinliklərlə yaşamalı olurdular... bütün
bunlara görə günahkar odur məgər?
Birdən qapı açıldı və ayaqyalın,
topuqlarına qədər uzun rəngli gecə xalatı
geyinmiş qızı yavaşca mətbəxə girdi. Onun
balaca ovcunda sinəsinə sıxdığı qaranquş
balası vardı, quşcuğazın xırda başı əyilmişdi.
‐ O ölüb, ‐ qızı astadan bildirdi.
Pəncərə şüşəsində atılıb‐düşən milçək
göründü, sükutu milçəyin vızıltısı pozdu.
‐ Onu dəfn eləmək lazımdı, ‐ qızı, nəhayət,
dilləndi və bu anda uşaq valideynlərinə
yaşından tamam böyük kimi göründü, özləri
isə qızla müqayisədə başlarını itirmiş sadəlövh
uşağa döndülər.
Xoşbəxtlikdən səhər yağış kəsmişdi və
təxminən saat onda onlar beli götürüb bağa
getdilər. Qayınana bağda alaq vururdu, onları
gördü, belini dikəltdi, amma bir söz demədi:
bəlkə də, onlar uzaqda idilər, ona görə heç
nə demədi, bəlkə də, hər şeyi başa düşmüşdü.
Qız bağın qırağında qəbirin yerini özü
göstərdi, onu qazmağı isə atasına etibar etdi.
Təəccüblü olsa da özünü sakit aparırdı, ancaq
toyuq tükləri arasında yatan quşcuğazı
qutudan çıxarıb qəbirə qoyanda gözləri kədərli
görünürdü.
‐ İstəyirsən sənə tutuquşu alaq? ‐ anası
qızından soruşdu.
‐ Yox, ‐ uşaq yavaşca cavab verdi.
‐ Niyə?
‐ Biz harasa getməli olsaq, yazıq tək‐tənha
qalar, o da ölə bilər.
Ertəsi gün hava açıldı. Günortaya yaxın
qərb tərəfdə göy üzü duruldu; sanki hansısa
gözəgörünməz əl boz qara bulud topasını
çəkib araladı, gün işığı göründü.
Qaynana qonşu uşağının əlindən tutub
içəri gətirdi.
‐ Elə hər gün məndən soruşurdu ki, Katya
nə vaxt gələcək. İndi isə utanır gəlməyə...
Oğlanın adı Anton idi. O, Katyadan bir
yaş kiçik idi. Onlar ötən il, Katyanın Minskiyə
qayıtmasından bir gün qabaq tanış
olmuşdular,.
‐ Gedək, sənə qaranquş balasını harda
basdırdığımızı göstərim!‐ qız oğlana dedi.
Anton heç nə demədi, sadəcə itaətlə qızın
dalınca düşüb getdi.
Andrey siqaret götürdü. O, həyətdə
siqaretini sümürə‐sümürə bağın qırağına
tərəf baxırdı. Uşaqlar quşcuğazın qəbrinin
böyründə çömbəlib oturmuşdular. Katya
oğlana çox ciddi şəkildə nəsə danışırdı, gah
əllərini açır, gah da yuxarı qaldırırdı. Anton
da əllərini dizlərinin üstünə qoyub sakitcə
qulaq asırdı. O, qızı dərhal böyük kimi qəbul
eləmişdi və görünür, qız nə arzulasaydı, onu
dərhal yerinə yetirməyə hazır idi.
Siqaret kötüyü çəmənliyə düşdü və bir
andaca günəş şüalarının işıqlatdığı qızılı su
hörümçəkləri həyəcanla dağılışdılar.
İlahi, o, bu mənzərəni çoxdan idi ki,
görmürdü...
Tərcümə etdi:
Kamran Nəzirli
Aylıq ədəbiyyat dərgisi
15
ULDUZ /
Dekabr 2015