130
BRUNEY DƏRÜSSALAMIN SULTANI
ƏLAHƏZRƏT
HACI HƏSSƏNAL BOLKİAHA
Əlahəzrət!
Ölkənizin milli bayramı – Milli gün münasibətilə Sizə və
Sizin simanızda bütün xalqınıza ən səmimi təbriklərimizi və xoş
arzularımızı yetirirəm.
Əminəm ki, dost ölkələrimiz arasındakı münasibətlərin,
əlaqələrimizin və əməkdaşlığımızın inkişafı daim xalqlarımızın
mənafelərinə xidmət edəcəkdir.
Sizə möhkəm cansağlığı, işlərinizdə uğurlar, ölkənizə əmin-
amanlıq və firavanlıq diləyirəm.
Hörmətlə,
İLHAM ƏLİYEV
Azərbaycan Respublikasının Prezidenti
Bakı, 14 fevral 2006-cı il
131
ESTONİYA RESPUBLİKASININ PREZİDENTİ
ZATİ-ALİLƏRİ
ARNOLD RÜYTELƏ
Hörmətli cənab Prezident!
Estoniya Respublikasının milli bayramı – Müstəqillik
günü münasibətilə Sizi və bütün xalqınızı ürəkdən təbrik
edirəm. Ümidvaram ki, Azərbaycan ilə Estoniya arasındakı
dostluq və əməkdaşlıq münasibətlərinin xoş ənənələrini daim
qoruyub saxlayacaq və möhkəmləndirəcəyik.
Sizə möhkəm cansağlığı, işlərinizdə uğurlar, dost xalqınıza
xoşbəxtlik və firavanlıq arzulayıram.
Hörmətlə,
İLHAM ƏLİYEV
Azərbaycan Respublikasının Prezidenti
Bakı, 14 fevral 2006-cı il
132
AVROPA KOMİSSİYASININ ÜZVÜ, AVROPA
KOMİSSİYASININ XARİCİ ƏLAQƏLƏR VƏ
AVROPA QONŞULUQ SİYASƏTİ
ÜZRƏ KOMİSSARI XANIM BENİTA FERRERO
VALDNERİ İLƏ GÖRÜŞ
Prezident sarayı
16 fevral 2006-cı il
Azərbaycan Respublikasının Prezidenti İlham Əliyev
fevralın 16-da Prezident sarayında Avropa Komissiyasının
üzvü, Avropa Komissiyasının Xarici Əlaqələr və Avropa Qon-
şuluq Siyasəti üzrə komissarı xanım Benita Ferrero Valdneri
qəbul etmişdir.
Görüş zamanı Azərbaycan–Avropa İttifaqı əməkdaşlığının
müxtəlif sahələri ilə bağlı fikir mübadiləsi aparılmışdır.
133
REGİONLARIN SOSİAL-İQTİSADİ İNKİŞAFI
DÖVLƏT PROQRAMININ 2-ci İLİNƏ HƏSR
OLUNMUŞ KONFRANSDA
NİTQ
«Park İNN–Azərbaycan» mehmanxanası
17 fevral 2006-cı il
Artıq iki ildir ki, Azərbaycanda regionların sosial-iqtisadi
inkişafı proqramı həyata keçirilir. Bugünkü toplantıda görülən
işlər haqqında məlumat veriləcək, təhlil aparılacaq,
çatışmazlıqlar haqqında söhbət gedəcəkdir. İki il ərzində
regionların inkişafı üçün, demək olar ki, bütün sahələrdə böyük
işlər görülmüşdür. Həm regionların sosial-iqtisadi inkişafı, həm
də infrastruktur layihələri – bütün bunlar paralel şəkildə həyata
keçirilir. Azərbaycanın uğurlu iqtisadi inkişafı bizə bu imkanı
yaratmışdır ki, həm dövlət tərəfindən, eyni zamanda,
sahibkarlar tərəfindən sərmayə qoyuluşu daha çox regionlara
yönəldilsin. Bu bizim proqramımızdır. Mən bu proqramla hələ
2003-cü ildə prezident seçkiləri ərəfəsində çıxış etmişdim.
Ölkəmizin hərtərəfli, dayanıqlı və davamlı inkişafı üçün bu
proqram bizə çox lazımdır.
Konfransda İqtisadi İnkişaf naziri Heydər Babayev, Şəki Şəhər
İcra Hakimiyyətinin başçısı Nazim İbrahimov, Şamaxı Rayon İcra
başçısı Natiq Məmmədov, Asiya İnkişaf Bankının rəhbəri Metyu
Vestfal, Xaçmaz rayonunda «NKAY-M KLİNİK» MMC-nin rəhbəri
Natiq Mütəllimov, Azərbaycanda Amerika Ticarət Palatasının
prezidenti Stenli Eskudero, NMR-nin Sahibkarlar Konfederasiyası
İdarə Heyətinin sədri Abbas Babayev və «Azəriqazbank»ın müşahidə
Şurasının sədri Çingiz Əsədullayev çıxış etmişlər.
134
Mən çox şadam ki, iki il ərzində görülən işlər gözəl
nəticələrini vermişdir. Azərbaycanda son iki il ərzində 340
mindən artıq yeni iş yeri yaradılmışdır, çoxlu müəssisələr,
fabriklər, sosial obyektlər açılmışdır. Bütün bunlar Azərbaycan
xalqına xidmət edir, ölkəmizi möhkəmləndirir. Bütün bu
uğurların təməlində 1990-cı illərin ortalarında başlanmış ciddi
iqtisadi islahatlar proqramı dayanır.
Xalqımızın ümummilli lideri Heydər Əliyevin təşəbbüsü ilə
başlanmış genişmiqyaslı islahatlar öz bəhrəsini verməkdədir.
Eyni zamanda, uğurlu neft strategiyamız da Azərbaycana çox
böyük xidmət göstərmişdir. İndi bizim maliyyə vəziyyətimiz
yaxşılaşıbdır. Ölkədə gedən böyük abadlıq-quruculuq işlərinin
təməlində də məhz 1990-cı illərin ortalarından həyata keçirilən
Heydər Əliyevin neft strategiyası durur. İndi Azərbaycan öz
neft-qaz potensialını artıq dünya bazarlarına çıxarır. Bu ildə
bizim təbii sərvətlərimizi dünya bazarına çatdırmaq üçün iki
nəhəng kəmər tikiləcəkdir.
Azərbaycanda iqtisadi artım dünyada ən yüksək sürətlə
gedir. Bunu artıq bütün dünya bilir. Ötən il ümumi daxili
məhsul 26 faizdən çox, sənaye istehsalı 33,5 faiz, əhalinin pul
gəlirləri 27 faiz artmışdır. Əlbəttə ki, bizim büdcəmiz də artır
və artmalıdır. Artıq 2006-cı ilin büdcəsi 4 milyard dollara
bərabərdir. 2005-ci illə müqayisədə artım təxminən 70 faiz
təşkil edir və bu bizə yeni imkanlar, yeni maliyyə mənbələri
yaradır. Gərək biz bundan səmərəli istifadə edək. Gərək bütün
səylərimizi xalqımızın, Vətənimizin inkişafına yönəldək.
Regionların sosial-iqtisadi inkişaf proqramı iki il bundan
əvvəl qəbul edilmişdir. Bu çox müfəssəl bir sənəddir. Orada,
demək olar ki, ölkəmizin bütün iqtisadi zonalarında görüləcək
işlər, əsas istiqamətlər öz əksini tapmışdır. Ancaq həyat yerində
durmur, ortaya yeni vəzifələr çıxır, yeni məsələlər üzə çıxır.
Bildiyiniz kimi, mənim rayonlara səfərlərim çərçivəsində zona
müşavirələri keçirilir və hər müşavirədən sonra o zonanın
inkişafı üçün lazım olan tədbirlər planı hazırlanır və sərəncam
imzalanır.
Dostları ilə paylaş: |