586
KDR-in təsərrüfatında bir-biri ilə zəif əlaqəsi olan ənənəvi və müasir
sektorlar yanaşı mövcuddur. Ənənəvi sektor kənd təsərrüfatı məhsullarını və
emal olunmuş ən sadə malları istehsal edən kiçik müəssisələrlə təmsil
olunmuşdur. Bu sahə geridə qalmış (sənayeləşməyə qədərki) əmək
vasitələrinə əsaslanır və daxili bazara yönəlmişdir. Amma KDR-in iqtisadi
fəal əhalisinin əsas hissəsi məhz ənənəvi sektorda cəmləşmişdir.
Müasir sektor milli və xarici kapitallı, əsasən mədənçıxarma
sənayesində fəaliyyət göstərən müəssisələrlə təmsil olunmuşdur. Burada
sənaye, bəzən isə tamamilə müasir əmək vasitələrindən istifadə olunur və
istehsal əsasən xarici bazarlara istiqamətlənmişdir. İnkişaf etməkdə olan
ölkələrdə təsərrüfatın bu cür dualist strukturu sosial-iqtisadi inkişafın ən
mühüm təzadlarından birini özündə ehtiva edir.
İqtisadi gerilik inkişafı aşağı səviyyədə olan ölkələrin səciyyəvi
əlamətidir. KDR-in cari valyuta məzənnələri əsasında hesablanmış ÜMG-in
əhalinin hər nəfərinə düşən məbləği keçmiş metropoliya olan Belçikanın
müvafiq göstəricilərindən 295 dəfə aşağıdır. KDR-in iqtisadi geriliyi onun
sosial sahəsinin son dərəcə qeyri-qənaətbəxş səviyyədə olması ilə
nəticələnmişdir. Əhalinin 70%-i tibb xidmətlərindən praktiki olaraq
məhrumdur (əhalinin hər min nəfərinə cəmi 0,1 həkim düşür), 57%-i
təhlükəsiz su ilə təmin olunmamışdır və cəmi 31%-i məqbul sanitariya
şəraitində yaşayır. Uzun müddətdir ki, əhalinin ölkədən axını baş verir və
ötən onillikdə bu göstərici hər il 2 milyon adam olmuşdur.
İnkişaf etməkdə olan ölkələrin əksəriyyəti kimi, KDR dünya
iqtisadiyyatında periferiya və buna müvafiq olaraq asılı mövqe tutur. Bu cür
asılılıq özünü eyni zamanda bir neçə istiqamətdə göstərir:
(1) beynəlxalq əmək bölgüsündə dar sahədə, xammal üzrə ixtisas-
laşmasına görə KDR-in xarici ticarətdən gəlirləri dünyanın xammal
bazarlarında yaranan konyunkturdan və deməli, onların əsas istehlakçıları
olan inkişaf etmiş ölkələrin bu mallara tələbatından asılıdır;
(2) KDR-in məcmu daxili əmanətləri uzun müddət son dərəcə aşağı
səviyyədə (ÜDM-in 9-10%-i) olmuş və daxili investisiyalara tələbatdan
(onlar isə yalnız maliyyə resurslarının xaricdən cəlb olunduğu hallarda təmin
edilə bilər) xeyli geridə qalmışdır;
(3) KDR-in dünya iqtisadiyyatındakı asılı vəziyyətini onun borc
yükü sübut edir. Dəfələrlə silinməsindən sonra 2007-ci ildə ölkənin xarici
borcu 12,3 milyard dollar olmuşdur. Bu isə, onun ÜDM-nin 111%-nə və
mal ixracının 473%-nə müvafiqdir. BVF-in təsnifatına görə, KDR borc
böhranına düçar olmuş ölkələr qrupuna daxildir və inkişafının perspektivləri
kreditorların - Qərbin inkişaf etmiş ölkələrinin münasibətindən birbaşa
asılıdır.
587
32.2. İqtisadi inkişafın xüsusiyyətləri
_____________________________________________________
Artım templəri
1960-cı ildə siyasi müstəqillik əldə etdikdən sonrakı dövrün əksər
hissəsi ərzində KDR-in iqtisadi artım templəri son dərəcə aşağı olmuşdur.
Bundan əlavə, iqtisadi artım templəri əhalinin artımından xeyli geri
qalmışdır. Belə ki, 1965-1980-ci illərdə ölkənin ÜDM-nin və əhalinin orta
illik artım templəri müvafiq olaraq 1,4% və 2,8% təşkil etmişdir. 1980-
1990-cı illərdə isə ölkənin ÜDM-i ildə orta hesabla 1,6%, əhalisi isə 3,3%
artırdı. 1990-2000-ci illərdə ÜDM-in artım templəri, ümumiyyətlə, mənfi
olmuş və əhali hər il 2,7% artdığı halda, 4,9% aşağı düşmüşdür. Bu onillikdə
KDR-də Syerra-Leone və Ekvatorial Qvineya ilə yanaşı, çoxamilli
məhsuldarlığın ən böyük (ildə 3,6%) tənəzzülü baş vermişdir. 2000-ci ildə
çoxamilli məhsuldarlıq ABŞ-ın 2%-i səviyyəsində olmuşdur.
ÜDM-in müsbət artım templəri yalnız XXI əsrin əvvəlində bərpa
olundu və 2000-2010-cu illərdə əhalinin orta illik artımı 3% olduğu halda,
5,2% təşkil etdi (şəkil 32.1).
Səkil 32.1. KDR-də iqtisadi artım templəri, %
Mənbə: World Development Indicators. 2002, 2009. World Bank;
Global Economic Prospects. January 2011. World Bank.
İqtisadi artım templərinin əhalinin artımından geri qalması
nəticəsində bu dövr ərzində KDR-də əhalinin hər nəfərinə düşən gəlirin
məbləği aşağı enməyə doğru meyil göstərmişdir. 1965-1997-ci illərdə
ölkənin ÜMG-nin əhalinin hər nəfərinə düşən məbləği ildə 3,7% azalırdı.
588
Burada qeyd olunmalıdır ki, 1965-1997-ci illərdə bu göstəricinin aşağı
düşmə tempi Böyük Səhradan Cənubda yerləşən bütün dövlətlər arasında ən
sürətli idi. 2000-ci illərin birinci onilliyində ÜDM-in adambaşına düşən
həcminin artımı regionun başqa ölkələri ilə müqayisədə ən aşağı olmuşdur.
_____________________________________________________
Təkrar istehsal şərtləri
Son iki onillikdə KDR-in iqtisadi inkişafı mürəkkəb şəraitdə keçmiş
və bir sıra mənfi amillərin və ilk növbədə, ölkənin daxilində və ətrafında
siyasi qeyri-sabitlik amilinin təsirinə məruz qalmışdır. Ölkə daxilində baş
verərək, beynəlxalq xarakter alan münaqişələr gah zəifləyir, gah da yeni
qüvvə ilə alovlanırdı. Hərbi əməliyyatlar gedən bölgələrdə iqtisadi
fəaliyyətin
əhəmiyyətli
dərəcədə
ixtisarı,
iqtisadi
proseslərin
tənzimlənməsinin son dərəcədə çətinləşməsi və hətta ən sadə tədbirlərin
həyata keçirilməsinin ciddi problemə çevrilməsi ölkənin iqtisadi inkişafına
mənfi təsir göstərməyə bilməzdi.
Dövlətin təsərrüfatda iştirakı zəifdir. Korrupsiyaya nəzarət 10%-dən
aşağı qiymətləndirilir, hüquqi normalara əməl olunması isə bundan da
aşağıdır. ÜDM-in 23%-i dövlət maliyyəsi vasitəsilə yenidən bölüşdürülür.
Büdcə ÜDM-in 3-13%-i həcmində kəsirlə icra olunur. Xərclərdə dövlət
qulluqçularının məvacibi böyük məbləğ təşkil edir, əsaslı xərclər isə 16%-dir.
Bank sistemi zəifdir. Riskli kreditlərin payı 10%-dən artıqdır.
Bankların əksəriyyəti likvidlik tələbini ödəmək və valyuta əməliyyatlarını
yerinə yetirmək iqtidarında deyil. 2009-cu ildə mərkəzi bankın uçot dərəcəsi
65%-ə çatmışdır.
Demoqrafik təzyiqin yüksək səviyyəsi iqtisadi vəziyyəti daha da
ağırlaşdırır. Artıq çoxdandır ki, himayədə olanların iş qabiliyyəti yaşında
olanlara nisbəti vahidə bərabərdir.
Təkrar istehsalın xarici şəraitinə inkişaf etmiş ölkələrdə struktur
islahatlarının aparılması və sintetik əvəzləyicilərin yaradılması nəticəsində
dünyanın mineral xammal bazarlarında vəziyyətin dəyişməsi təsir göstərir.
İnkişaf səviyyəsi aşağı olan bir çox ölkələr kimi, KDR da 1990-cı illərdə
mineral xammalın qiymətlərinin ucuzlaşması nəticəsində gəlirlərin
azalmasına məruz qaldı. Bu isə, idxalın, o cümlədən istehsal vasitələrinin
satın alınmasının ixtisarına gətirib çıxardı. Nəticədə əsas kapitalın fiziki və
mənəvi köhnəlmiş elementlərinin əvəz olunması əhəmiyyətli dərəcədə
ləngidi, texnoloji proseslərin vəhdəti pozuldu, bir çox sənaye müəssisələri
fəaliyyətini dayandırdı.
İqtisadiyyatın həm bütünlükdə, həm də ayrı-ayrı sektorlarının
inkişafının aşağı templəri 2000-ci ilədək ölkənin pul sahəsinin qeyri-
qənaətbəxş vəziyyətinin əsas səbəbi olmuşdur. İnflyasiyanın ÜDM
Dostları ilə paylaş: |