56
palaz, həsir, cır-cındır, yorğan-döşək neft gölündə üzürdü. Kişilər şalvarlarını
çırmalayıb, dallarında şələ, ayaqyalın neft içində qaçırdılar.
Əhlikeflər əhvalatı kazinoda eşidib fayton və qazalaqlarda fontana
tamaşa eləməyə gəlirdilər.
Qara dam və daxmaların çoxunu neft seli basıb zay etmişdi.
Quyu birinci həftədə gündə 20 min tondan çox neft püskürmüşdü.
Ziyan çəkmiş yüzlərlə adam məhkəməyə müraciət edib neftxudadan
zərər pulu iddia edirdilər. Əgər məhkəmə onların tələb etdikləri məbləğin onda
birini ödəməyi qərara alıb, hökm çıxarsaydı, sahibkar müflis olardı.
Neftxudanın tutduğu üç vəkil yuxularına haram qatıb əldən-ayaqdan
düşmüşdülər, iddiaçılardan əşyayi-dəlil və rəsmi sənəd tələb edirdilər.
İş axırda gedib mahal məhkəməsinə çıxdı, məsələ daha da qarışıq
düşdü. Camaata dəyən zərər o qədər böyük idi ki, heç kəs var-yoxu əlindən
çıxıb quru yurdda qalmış, dilənçi gününə düşmüş fəqir-füqəranın haqqını
tapdalamağa sürət edə bilmirdi; lakin divan-dərə xəsarət məbləğini azaltmağa
cəhd edirdi, zərərdidələr də öz növbəsində iddianın məbləğini artırırdılar.
Neftxuda mühasirəyə düşmüş ayı kimi vurnuxurdu, sudan quru
çıxmağa cəhd edirdi... Mədən çox zəngin idi, amma kimə əl açırdı, heç kəs
borc vermirdi...
Bir səhər süpürgəçi kontora gələndə sahibkarın özünü tavandan
asdığını gördü.
Bu fontan nəticəsində neftin qiyməti birə dörd azalmışdısa, pudu 50
qəpikdən 12 qəpiyə düşmüşdüsə də, müştəri tapılmırdı. Xırda mədənçilərin
çoxu müflis olmuşdu. Nəhəng firmalar qəsdən nöyüt çıxarmır, xırda
sahibkarların mədənlərinə yiyələnmək istəyirlər.
Fontan sahibi özünü asandan sonra zərər çəkmiş camaat başını
itirmişdi, ölünü, cənazəni mühakimə etmək mümkün deyildi...
Nobel qardaşları zərər çəkənlərdən, özü də həqiqi zərərin, onda bir
hissəsini ödəmək şərtilə mədəni almağa razı oldular.
O zaman ən ağır, ən çətin, ən qorxulu iş quyu qazmaq, neft çıxarmaq,
bir də neft təmizləmək idi. Ölüm, həmişə bu peşə sahiblərinin başları üstündə
hərlənirdi. Qabaqlar dayaz quyuları külüng və bel ilə qazırdılar; quyuların
dərinliyi az idi, zaman keçdikcə artdı, əlli, altmış, daha çox... Zəhərli qaz,
yeraltı sular, palçıq qazmaçıları bərk incidir, adamları əldən, taqətdən salırdı.
Dərinə getdikcə hava azalır, zəhərli qaz artır, iş ağırlaşır, yeraltı su təbəqələri
açılır, su basqını başlayır, quyu divarları uçub tökülür, tez-tez bədbəxt
hadisələr
baş verirdi. Qəfildən fontan vuranda qazmaçının heç cəsədi də tapılmırdı.
Sevimli yazıçımız Abdulla Şaiq «Məktub yetişmədi» hekayəsində qazmaçıların
acınacaqlı, başdan-başa əziyyət, məşəqqətli həyatını, facianə ölümünü mahir,
realist qələmlə təsvir etmişdir.