____________Milli Kitabxana____________
509
dırılması və sülh danışıqlarına başlanması haqqında saziş imzalamışlar. Ancaq
Ermənistan tərəfi bu sazişi pozdu. Martın əvvəlində ermənilər xüsusən Füzuli
rayonu ərazisində güclü hücuma keçdilər. Lakin onlar bir şeyə nail ola bilmədilər.
Azərbaycan Ordusunun qəhrəman əsgər və zabitləri düşmənin hücumunu
mərdliklə dəf etdilər. Buna baxmayaraq, ermənilər yenə də öz çirkin əməllərindən
əl çəkmirlər. Mən hərbi hissələrdən birində olarkən ön xətdəki səngərə getmək
istəyirdim. Lakin zabitlərimiz məni ora buraxmayaraq dedilər ki, orada atışma
gedir. Bu bir daha onu sübut edir ki, biz atəşin dayandırılmasını, məsələnin sülh
yolu ilə başa çatdırılmasını istəsək də, Ermənistan tərəfi buna getmir.
Bununla belə, biz yenə sülhsevər siyasətimizi aparacaq və bütün imkanlardan
istifadə etməyə çalışacağıq. Bu bizim siyasi-diplomatik vəzifəmizdir. Ancaq
bununla yanaşı ordumuzun möhkəmləndirilməsi, onun gücünün artırılması,
xalqımızın bu işə kömək göstərməsi əsas vəzifədir. Bu bizim nicatımızdır və
gələcəyimiz də bundan asılıdır. Ona görə də bir daha sizin hamınızı orduya daha
çox diqqət və qayğı göstərməyə, fərariliklə, ordunun daxilində təxribatçılıqla
mübarizə aparmağa çağırıram.
Biz öz taleyimizin sahibiyik. Azərbaycan müstəqil dövlətdir. Bu, tarixi
hadisədir. Azərbaycan xalqı öz müstəqilliyini, milli azadlığını qoruyub
saxlamalıdır. Bunun üçün də Azərbaycanın güclü ordusu olmalıdır. Bu, həm işğal
olunmuş torpaqlarımızı düşməndən təmizləmək, həm də gələcəkdə müstəqil
Azərbaycanın etibarlı müdafiəsini təmin etmək üçün gərəkdir. Ona görə də
orduya diqqət və qayğı göstərmək hər bir vətəndaşın şərəfli borcu olmalıdır. Mən
sizi bu borcu yerinə yetirməyə dəvət edirəm.
Kənd təsərrüfatı işləri ilə də məşğul olmağımız sizə məlumdur. Martın
əvvəlində və sonunda Bakıda kənd təsərrüfatı ilə əlaqədar müşavirələr
keçirilmişdir. Bərdə rayonu Azərbaycanın kənd təsərrüfatında çox mühüm yer
tutur. Sizin rayonun münbit torpağı, böyük potensialı var. Bunlardan səmərəli
istifadə etmək lazımdır. Yaz tarla işlərinin aparılması, çiyid səpini, ümumiyyətlə,
kənd təsərrüfatı bitkilərinin becərilməsi həm bu günün, həm də gələcəyin
vəzifələridir. Dediyim kimi, böhran içərisindəyik. Sənaye və kənd təsərrüfatı
istehsalı xeyli aşağı düşmüşdür. Ancaq xalqımız yaşamalıdır. Bundan ötrü isə
istehsal, ilk növbədə kənd təsərrüfatı istehsalı artmalıdır. Əhalini yedirdib içirdən,
ərzaqla təmin edən kənd təsərrüfatı, kənd əhalisidir. Ona görə də siz öz
yaşayışınızı yaxşılaşdırmağa, rayonun, Azərbaycanın iqtisadiyyatını qaldırmağa,
respublikanı ərzaqla təmin etməyə çalışmalısınız. Mən sizi buna dəvət edirəm və
əminəm ki, bərdəlilər, Azərbaycanın bütün kənd təsərrüfatı zəhmətkeşləri bu il öz
sözlərini deyəcək, keçmişdəki ənənələri bərpa edəcəklər və bundan sonra
Azərbaycanda kənd təsərrüfatı istehsalı daim artacaq, yüksələcəkdir.
Ölkəmizin bu ağır dövründə xalqımız üçün milli həmrəylik, vətəndaş
həmrəyliyi lazımdır. Son beş-altı ildə Azərbaycan
____________Milli Kitabxana____________
510
xalqı bir çox sınaqlardan çıxmış, əzab-əziyyətlərdən keçmişdir.
Bir tərəfdən
müharibə, sosial-iqtisadi böhran, digər tərəfdən isə respublikadakı ayrı-ayrı siyasi
qüvvələrin hakimiyyət uğrunda bir-biri ilə çəkişməsi son illərdə Azərbaycanın
daxilində ictimai-siyasi vəziyyəti gərginləşdirmişdir. İndi biz sabitliyə doğru
gedirik. Respublikada ümumən sabitlik bərqərar olmuşdur. Sabitlik hər bir
vətəndaşa lazımdır. Cinayətkarlığa, cürbəcür təxribatçılıq hallarına son
qoyulmalıdır. Bu ağır dövrdə xalqımız daha sıx birləşməli, əl-ələ verməli, daxili
sabitliyi möhkəmləndirərək xarici düşmənlərlə mübarizəni gücləndirməlidir.
Bildiyiniz kimi, son vaxtlar bu istiqamətdə xeyli iş görülür və bu, öz
nəticəsini verir. Bu iş gələcəkdə də davam etdiriləcəkdir. Güman edirəm ki,
bərdəlilər də, Qarabağ əhalisi də və bütünlükdə Azərbaycan xalqı da bu yolla
getməyi düzgün sayır. Sizin hamınızı milli həmrəyliyə, vətəndaş həmrəyliyinə
kömək etməyə çağırıram. Güman edirəm ki, biz belə həmrəyliyə nail olacağıq.
Sizin hamınıza daha da dözümlü olmağı məsləhət görürəm. Xalqımız əsrlər boyu
çox imtahandan, çox sınaqdan çıxmışdır. Bu, xalqımızın dözümlülüyü,
çətinliklərdən səriştə ilə çıxa bilməsi sayəsində mümkün olmuşdur. Xalqımızı
böyük gələcək gözləyir. Güman edirəm ki, biz sizinlə birlikdə həmin gələcəyi,
gözəl həyatı da, tərəqqi edən müstəqil Azərbaycan dövlətini də görəcəyik. Ona
görə də sizi bir daha dözümlü, dəyanətli olmağa çağırıram. Şübhə etmirəm ki, biz
birləşərək bütün çətinlikləri aradan qaldıracaq və gələcəyə doğru inamla
gedəcəyik. Sağ olun, xoşbəxt olun!
____________Milli Kitabxana____________
511
BƏRDƏ RAYONUNDA BİR SIRA ŞƏHƏR
VƏ RAYONLARIN İCRA HAKİMİYYƏTİ
BAŞÇILARININ VƏ ƏLAQƏDAR
TƏŞKİLATLARIN RƏHBƏRLƏRİNİN İŞTİRAKI
İLƏ KEÇİRİLMİŞ MÜŞAVİRƏDƏ ÇIXIŞ
Burada icra başçıları məlumat verdilər. Lakin mən bunlardan mənfi nəticə
çıxarıram. Hərə keçmiş qayda ilə hesabat verərək rəqəmlər sadaladı. Amma
ortada nəticə yoxdur. Mən qeyd etdim ki, hərbi xidmətə çağırış respublika üzrə
nəzərdə tutulmuş planın yarısı qədər yerinə yetirilmişdir. Bütün rayonlarda kəsir
var. Ona görə də mən sizə bu məsələ ilə çox ciddi məşğul olmağı tapşırıram.
Sizdən tələb edirəm, əgər bir neçə günədək bu sahədə dönüş yaranmasa, icra
başçıları, rayonların hərbi komissarları məsuliyyətə cəlb olunacaqlar. Ordumuzu
qurmaq, möhkəmləndirmək üçün gənclərimiz hərbi xidmətə çağırılmalıdır.
Bunsuz ordu ola bilməz. Çıxış edənlərə bir daha bildirirəm ki, onların
məlumatlarını qənaətbəxş saymıram. Bu, çıxış etməyənlərə də aiddir, çünki,
yəqin, onlar da bu səpkidə danışacaqlar. Güman edirəm ki, yaxın günlərdə sizin
işlərinizin nəticəsi bəlli olacaq və mən bu barədə məlumat alacağam.
Fərariliklə mübarizəyə gəldikdə isə, ola bilər, Müdafiə Nazirliyi məlumatları
dəqiq vermir. Hər bir icra başçısının, hərbi komissarın, hər bir polis rəisinin və
başqa hüquq-mühafizə orqanları rəhbərlərinin borcu odur ki, onların rayonundan
hərbi xidmətə çağırılmış gənclər orduda qulluq etsin və fərarilik edənlər hərbi
hissəyə qaytarılsın, yaxud cəzalandırılsın. Sizin konkret vəzifəniz bundan
ibarətdir. Prezidentin səlahiyyətli nümayəndəsi kimi hər bir rayon icra başçısı öz
rayonunun bu mühüm məsələləri üçün cavabdehdir. Elə hesab etməyin ki, ordunu
təşkil etmək kiminsə işidir, siz isə kənardan buna kömək göstərməlisiniz. Bu
əhval-ruhiyyəni bir kənara atın. Əgər biz düşmən təcavüzünün qarşısını almaq,
torpaqlarımızı layiqincə qorumaq və erməni silahlı qüvvələrinin ərazimizin qalan
hissəsinə soxulmasına bir daha yol verməmək istəyiriksə, eyni zamanda düşməni
geri oturtmaq, işğal olunmuş torpaqlarımızı azad etmək istəyiriksə, bu məsələ ilə
ciddi məşğul olmaq lazımdır. Mən sizi rayonlara təyin etmişəm və sizdən də
borcunuzu yerinə yetirməyi tələb edirəm. Əgər bacarmırsınızsa, istefa verin. Bir
daha təkrar edirəm, ordunun qurulması, möhkəmləndirilməsi hər bir vətəndaşın,
hər bir vəzifəli şəxsin borcudur. Bu, rayon rəhbərlərinin bir nömrəli vəzifəsidir və
bunu sizdən tələb edirəm.
Şübhəsiz ki, fərariliklə mübarizənin cürbəcür yolları var. Biz keçən ilin
noyabr-dekabr aylarında da tədbirlər gördük və fə-