20
işıqlanıb də zəm nənin tərəqqisi ilə münasib bir yaşayışa layiq olması yalnız
müsəlmanların deyil, hökümət və dövlətin də mənfəətləri iqtizasındadır‖ (―Açıq
söz‖ 1915, № 6 ).
Vicdan azadlığı məsələsi M. Ə. Rəsulzadənin dünyagörüşündə xüsusi yer
tutur. O, dinə idarə vasitəsi kimi yanaşan dövlətləri ciddi tənqid atəşinə tutur. Bir
dini yüksəldib dövlət səviyyəsinə qaldıranda, digərini isə sıxışdırıb qadağan
edəndə, ölkədə sabitlik pozulur və hərc – mərclik yaranır. Şübhəsiz ki, müəllif
burada mütləqiyyət quruluşunun müsəlman xalqlarına olan münasibətini nəzərdə
tutmuşdur. O, vicdan azadlığının pozulmasını ancaq hakimiyyətpərəstlikdə və şəxsi
mənafedə görür. Hakim və yaxud dövlət hakimiyyəti əlində saxlamaq üçün dindən
bacarıqla istifadə edir. Burada hakim deyəndə heç şübhəsiz, rus çarı gözlərimiz
qarşısında canlanır. M. Ə. Rəsulzadə yazır: ―Hakimlər, dövlətlər din və höküməti
əllərində bir idarə vasitəsi qərar verdiklərindən müəyyən bir din və o din daxilində
dəxi müəyyən bir məzhəbə rəsmiyyət verib başqalarını məhv etmişlər və bu sürətlə
hürriyyəti – məzhəb aradan qalxaraq hakimiyyətdə olan din və məzhəb
məhkumiyyətdə qalan din və məzhəbləri təzyiq etmişdir. Bu təyziq sayəsində də
nifrət, ədavət, bir – birini çəkməməzlik, düşmənçilik əmələ gəlmişdir.‖(―Açıq söz‖
qəzeti, 1916, № 134).
Rəsulzadə yalnız din azadlığından deyil, həm də məzhəb azadlığından bəhs
edir. O, bununla bir din daxilində mövcud olan müxtəlif təriqətləri nəzərdə tutur.
Çarizm dövründə provoslav təriqəti dövlət səviyyəsinə qaldırıldığından digər
təriqətlər (staroverlər, baptistlər, incilçilər və başqaları) təqib olunurdu. Hətta
həmin təriqətlərə etiqad edənləri kütləvi surətdə Rusiyanın ucqarlarına sürgün
edirdilər. Məsələn, XIX əsrdə Azərbaycana sürgün edilmiş malakanlar buna sübut
deyilmi?
Məhəmməd Əmin din azadlığı olmadan tərəqqinin olmasını qeyri –
mümkün saymışdır. O, bütün tərəqqipərvər insanların, istər Avropanın, istərsə də
Rusiyanın vicdan azadlığı istədiyini söyləmişdir. Vicdan azadlığı həm də
Rusiyanın tərəqqisi nöqteyi – nəzərindən zəruridir. Bütün dinlər və məzhəblər azad
olmalıdır. Bir din digər dinə və yaxud məzhəbə təzyiq etməməlidir. O, vicdan
azadlığı probleminə ümumavropa miqyasında baxmışdır. ―Halbuki indiki hürr
əndişi Avropanın, yaxud demokrat və tərəqqipərvər Rusiyanın istədiyi nədir?
Məzhəblər haqqında tam bir hürriyyət, hürriyyəti – vicdan. Hər kəsin məzhəbinə
ehtiram hər kəsin etiqadına qarşı bir təhəmmul deyilmi?‖ (yenə orada).
Maraqlıdır ki, M. Ə. Rəsulzadə Avropanı azadfikirli, Rusiyanı isə demokrat
və tərəqqipərvər adlandırmışdır. Bununla o, Avropanın humanitar elmlər sahəsində
Rusiya ilə müqayisədə daha irəli getdiyini demək istəməmişdirmi? Ümumiyyətlə,
o, məqalələrinin çoxunda Avropanı bizə bir örnək kimi göstərmişdir. Dünya
müharibəsinə baxmayaraq, Avropa dövlətlərini azad dövlətlər saymış və Rusiyanın
da o cür olmasını arzulamışdır.
21
Hətta məqaləsinin birində müharibəyə də mütərəqqi don geydirməyə
çalışmışdır. ―Dünyanın mütəməddin millətləri öz diriliklərini təmin üçün
cəhənnəmi silahlarla müsəlləh olub bir – birlərinin üstünə hücum edirlər. Nə əcayib
bir tələqqi kimi, istədikləri gibi dirilə bilmək üçün ölümü qəbul edirlər. Dirilik
üçün ölürlər‖ (―Dirilik‖ məcmuəsi, 1914, № 1).
Göründüyü kimi, M. Ə. Rəsulzadə məqalədə bir növ imperialist
müharibələrinə haqq qazandırmağa çalışmışdır. Bu isə ilk növbədə adamda təəccüb
doğurur. Çünki müharibənin mütərəqqi rol oynadığını iddia etməyin özü heç cür
ağıla sığmır, çünki müharibə xalqa ancaq aclıq, səfalət və dağıntı gətirir. On
minlərlə insan həyatı qurban gedir. Halbuki onlar işləyib ölkənin tərəqqisi üçün
əllərindən gələni edərdilər, ölkəni irəli aparardılar.
Qeyd edək ki, Rəsulzadənin müharibə haqqında bu qəribə fikirləri ancaq bir
dəfə, o da ―Dirilik nədir?‖ məqaləsində şərh olunmuşdur. Yerdə qalan
məqalələrində o, ardıcıl olaraq müharibənin əleyhinə çıxmış, onu tənqid etmiş,
xalqa nə qədər məşəqqət, əzab - əziyyət, aclıq və səfalət gətirdiyini söyləmişdir.
Bütün bunlar bizə belə bir fikir söyləmək üçün əsas verir ki, M. Ə. Rəsulzadənin
müharibə barədə təkcə bir məqalədə söylədikləri hansısa emosional təsir altında
təsadüfən deyilmiş mühakimə olub, bütövlükdə onun müharibəyə münasibətini əks
etdirmir.
Sosial azadlıq problemi barəsində Azərbaycanın digər ziyalıları da maraqlı
fikir söyləmişlər. Bəri başdan qeyd edək ki, onların fikirləri M. Ə. Rəsulzadənin
fikirlərindən fərqli olaraq ardıcıl və sistemli şəkildə olmamışdır. Onlar bu məsələ
barəsində yeri gəldikcə fikir söyləmişlər. Sosial azadlıq probleminə, sosial tərəqqi
probleminə və sairəyə zəruri hallarda toxunmuşlar. Elələrindən biri də Sənətulla
İbrahimov idi. O, ―Milli məsələlər qarşısında bugünkü mövqemiz‖ məqaləsində
yazır: ―Tarixin, müqəddəratın kim bilir müsəlmanlara verdiyi nasıl bir tale
məşumidir ki, bu gün heç bir dairədə, heç bir partiyalar arasında, heç bir millətin
əfkari – ümumiyyəsində müsəlmanlara xulusiyyətlərə tərəfdar və xeyirxah bir
nöqtə görüləmməz‖ (―İqbal‖ qəzeti, 1914, № 617).
Göründüyü kimi, S. İbrahimov tarixə mistik don geyindirmişdir. Bu
mistisizmin isə arxasında, təbii ki, allah anlayışı durmuşdur. İnsanlarda ―alın
yazısı‖ olduğu kimi, millətlərdə də buna bənzər bir şey olduğunu söyləmək
iştəmişdir. O, müsəlmanların pis güzəranını, məşəqqətini ―alın yazısı‖ ilə izah
etməyə çalışmışdır. Əlbəttə, dinin cəmiyyətdə oynadığı rolu danmaq olmaz. Dinin
cəmiyyətdə xüsusi mövqeyi vardır və həmişə də olacaqdır. Lakin hər şeyi dini
baxımdan izah etmək düzgün deyil. Xüsusilə də ―Alın yazısı‖ ilə əlaqədar müddəa
xalqın əlini işdən soyudur, bədbinliyə aparır. Bu da son nəticədə sosial tərəqqini
buxovlayıb ləngidir.
S. İbrahimovun ―Şəlalə‖ məcmuəsində çap olunan ―Ruhən və hissən
bəşərdə tərəqqi‖ məqaləsi qaldırdığı məsələyə görə xüsusi maraq oyadır. Məqalədə
əsasən sosial tərəqqi probleminə toxunulmuşdur. Hər şeydən əvvəl, müəllif