Neft və karbohidrogen ehtiyatlarının hesablanması

Q_bal. = F_n∙ h_ef.∙ m ∙ k_n ∙ ρ_n ∙ θ ,
burada
Q_bal. – neftin ilk balans ehtiyatları, t;
F_n – neftlilik sahəsi, m²;
h_ef. – layın neftlədoymuş effektiv qalınlığı, m;
m – açıq məsaməlik əmsalı, vahidin hissələrində;
k_n – layın neftlədoyma əmsalı;
ρ_n – neftin standart şəraitdə sıxlığı, q/sm³ yaxud kq/m³;
θ – neftin həcm kiçilməsini nəzərə alan hesablanma əmsalı.
Neft və qazın ehtiyatlarının həcm üsulu ilə hesablanması üzrə təlimata əsasən aşağıdakılar təqdim olunmalıdır:

1. 
   Ayrılmış ehtiyatların kateqoriyalarının əsaslandırılması, hesablama planında onların sərhədlərinin göstərilməsi şərti ilə;
   
2. 
   Horizontun yaxud layın effektiv qalınlığı və onun məsaməliyi haqqında quyular üzrə və eləcə də hesablama üçün qəbul olunmuş ilk və orta kəmiyyətlərin alınması metodikası üzrə faktiki məlumatlar;
   
3. 
   Neft analizlərinin məlumatları, və eləcə də neftin yer üzünə çıxarıldıqda həcminin kiçilməsi və qaz amili haqqında məlumatlar;
   
4. 
   Horizontun rejimi, kollektorların növü və xassələri haqqında məlumatlar.
   

Hektar üsulu. Bu üsulu tətbiq etmək üçün tükənməkdə olan layın və ya yatağın qalınlığı 1 m olmaqla 1 hektar sahəsinə düşən neft hasilatını bilmək lazımdır. Geoloji cəhətdən oxşar göstəricili qonşu layların aşağı kateqoriyalar üzrə neft ehtiyatlarını hesabladıqda, bu məlumatlardan istifadə etmək olar. Tükənməkdə olan yatağın qalınlığı 1 m olmaqla 1 hektar sahədən çıxarılan ehtiyat aşağıdakı kimi hesablanır: q = Q/ F x H , burada :
q - qalınlıq 1 m olmaqla yatağın 1 hektar sahəsindən çıxarılan ehtiyat;
Q - yatağın istismarı zamanı çıxarılan neftin cəmi;
H - bütün işlənilmə obyektlərinin effektiv qalınlığı cəmi;
F - orta neftlilik sahəsidir (bütün layların sahəsinin orta ədədi qiyməti).
q - nun alınmış qiymətinə əsasən qonşu sahələrin ehtiyatları (aşağı kateqoriyalar üzrə - kateqoriya C3) həmin sahələrin neftlilik sahəsini (F1) və effektiv qalınlığını (H1) müəyyən etmək mümkün olduğu zaman hesablanır.
Çıxarılan ehtiyat (Qç ) aşağıdakı kimi tapılır: Q_ç= q x F₁ x H1